Versete biblice populare din Iuwãu 1

Partajează

Maꞌato tukupteꞌen imohey hanuaria. Miꞌiria teꞌeroꞌe taꞌatupyꞌa pe -Woromohey kahato En Iesui. Ereke ro uipyꞌa pe e haria pe aru Tupana toꞌe -Pywo ti rat koitywy woronug en mesup uhaꞌyru sese wo uhakiꞌyt sese wo e aru ahepe Iesui mohey haria pe.

Uito Iuwãu ti ahenoi teran Aikaꞌiwat saꞌawyꞌi ieineꞌen hap etiat. Saꞌawyꞌi sese turan mesuwat wuatꞌi nug hap eꞌyian mete ti Aikaꞌiwat Iesui toineꞌen Tupana kai te. Saꞌawyꞌi sese wuatꞌi owakai te Aikaꞌiwat set Tupana Ehay Moherep Hat toineꞌen are. Tupana kai toineꞌen saꞌawyꞌi iꞌewyte Tupana wo toineꞌen mekewat Tupana Ehay Moherep Hat are.

Pywo pe ti Miꞌi ẽtyhot hap iꞌypyryp we teke imoẽtyhot hamuat. Miꞌi hawyi Aikaꞌiwat ẽtyhot hap iꞌypyryp hap yt hasep kuap i.

Mekewat Sehay e hap het rakat Iesui aiꞌewywuat tuwemoherep miitno aipiit ewywuat tuwemoherep. Miꞌi hawyi watehaꞌat kuap i hẽtyhot atipy kaipywiat Tupana saꞌyru wẽtup yn kape. Miꞌi hawyi toineꞌen aipyꞌasetpe. Putꞌok e mesuwe hegyiꞌat hap moherep hamo. Miꞌi ti Wakuat Sese toineꞌen. Hãpyk hap yn tuete. Pywuat rakat toineꞌen.

Saꞌawyꞌi yne inug hap eꞌat turan Tupana mesuwat mytyyp nug hat toineꞌen. Taꞌi miꞌi turan toineꞌen Sehay e hap het rakat wẽtup Aikaꞌiwat set. Tupana yt kat i tutunug mesuwat rotiat Aikaꞌiwat yt uwe i itote pote. Mekewat Aikaꞌiwat Sehay wẽtup set toineꞌen itote yne nug hap eꞌat turan. Miꞌi wywo yne nug hat Tupana toineꞌen. Pywo Aikaꞌiwat yt uwe i mekewat eꞌat pe pote yt kat i toineꞌen kat kat koꞌi iminug hap. Aikaꞌiwat wẽtup set Sehay e hap ẽtyhot hap yne iminug koꞌi moieineꞌen hamuat. Miꞌi hawyi hẽtyhot hap putꞌok e yne miitꞌin ete iꞌatumohotꞌok hamo.

Eꞌihatꞌok pe Iuwãu taꞌakasa Iesui uut tewowiat hap kape. Miꞌi hawyi toꞌe temiitꞌin me -Eiwehaꞌat ro e. Meipe tuut raꞌyn Tupana mipoꞌoro ihũ ewywuat putꞌok e yne miitꞌin minug saꞌag hap moweityk hamuat e.

Mekewat miit nimo pyi toineꞌen. Kat kat koꞌi mesuwat rotiat inug hat toineꞌen. Maꞌato mesuwat rotiaria yt ikuap i uwe. Aikaꞌiwat tuwemoherep saꞌawyꞌi toꞌywania Iuteuria ywania ehakyeraꞌat hamo maꞌato yt taꞌatumohey i yt taꞌatukyꞌesat i Iesui taꞌatuehakyeraꞌat hat taꞌatuporekuatno.

Miꞌi miit topyhuꞌat Ariãty Sese. Tuut wyti aru yne miitꞌin ieineꞌen hap moẽtyhot hamuat.

Nimuat ahaꞌaseꞌi Muisei wyti henoi kahato waĩꞌe hap ahepuo maꞌato mesup ti koitywy Aipotypot Tupana Mipoꞌoro Sese Iesui raꞌyn henoi kahato ahepuo tegyiꞌat hap sese pywuat sehay e.