Runyoro-Rutoro - 2008 BSU (NT) Drama

Bible in Runyoro/Rutooro Interconfessional Translation © Bible Society of Uganda, 2008.

Obugenyi bw'Emigaati Etatumbisiibwe, oburukwetwa Okuhingurwaho, bukaba buli haihi kuhika. Baanyakatagara abakuru n'abeegesa b'ebiragiro bakaba nibaserra amagezi ag'okwita Yesu, habwokuba bakaba nibatiina abantu.


Nubwo Sitaani yataahiremu Yuda arukwetwa Isikalyota, omu ha ikumi na babiri. Yuda akagenda yahanuura n'abanyakatagara abakuru n'abakuru b'abalinzi b'enju ya Ruhanga nkooku araagobeza Yesu abamukwase. Baasemererwa, baamuraganiza kumuha sente. Nawe yaikiriza kandi yaserra akanya karungi aka araabamukwasizamu, abantu, batakimanyire.


Aho ekiro kikuru ky'Emigaati Etatumbisiibwe kyahika, nikyo eki baatambirahoga omwana gw'entaama ogw'Okuhingurwaho. Yesu yatuma Petero na Yohaana ati: “Mugende mututeekanirize Obugenyi bw'Okuhingurwaho, twije tubulye.” Baamukaguza bati: “Noogonza tubuteekanirize nkaha?” Yabagarukamu ati: “Obu muraaba nimutaaha omu rubuga nimwija kutangaana omusaija ayetwekere ensoha y'amaizi. Mumuhondere okuhika omu nju ei araataahamu. Nyineeka mumugambire muti: ‘Omwegesa akutumireho naakaguza ngu: Kiraha ekisiika ky'abagenyi nambere araaliira Obugenyi bw'Okuhingurwaho hamu n'abeegesebwa be?’ Araabooleka ekisiika kikooto eky'omu kainaabiri ekirumu byona ebirukwetaagwa. Oku nuho murateekaniza ebintu byona.” Bbo baagenda, baasanga byona biri nkooku yabagambiire, baateekaniza Obugenyi bw'Okuhingurwaho.


Esaaha obu yahikire, Yesu yaija ha meeza hamu n'abakwenda be. Yabagambira ati: “Nyegombere muno kulya na inywe Obugenyi bunu obw'okwijuka Okuhingurwaho ntakabonabonesiibwe! Nimbagambira nti: Tindigaruka kubulya okuhika obu bulihikirizibwa omu bukama bwa Ruhanga.” Nubwo yakwata ekikopo, yasiima naagamba ati: “Mukwate kinu munyweho inywena; habwokuba nimbagambira nti: Okuruga hati tindigaruka kunywa ha nsande y'ebijuma by'emizaabbibbu okuhikya obukama bwa Ruhanga obu buliija.” Yakwata omugaati, yasiima, yagucwamu, yagubaha naagamba ati: “Gunu nugwo mubiri gwange [oguraaheebwayo habwanyu. Kinu mukikolege okunyijukiraho.” Omu mulingo nugwo gumu obu baamazire kulya, yakwata ekikopo naagamba ati: “Ekikopo kinu nikyo kiragaano ekihyaka eky'esagama yange eraaseeswa habwanyu.”]

“Omukono gw'ogu arukungobeza ngunu, guli hanu n'ogwange ha meeza! Habwokuba Omwana w'omuntu naagenda kuhikiriza ekyamuteekaniriziibwe, baitu alikibona bambi omuntu ogu arukumugobeza!” Aho baatandika kukaguzangana bonka na bonka ngu, nooha omuli bo arukwija kukora eki.

Hakaimuka empaka omu bakwenda ngu, nooha omuli bo arukuteekerezibwa kuba mukuru. Yesu yabagambira ati: “Abakama b'Abanyamahanga abantu baabo babalemesa itwale, kandi n'ab'obusobozi beetwa kabumba, baitu tikiriba kiti omuli inywe; leka omukuru omuli inywe abe nk'arukukira obuto, kandi omwebembezi nk'omuheereza. Arukukira obukuru nuwe oha: anyakwikarra ha meeza okulya, nandiki anyakuheereza? Tali ogu anyakwikarra ha meeza? Baitu nyowe ndi hagati yanyu nk'omuheereza.
“Inywe abatarandugiireho omu mihito yange, Isenyowe nkooku yanteekaniriize obukama, na nyowe nukwo ndukububateekaniriza. Muraaliira kandi munywere ha meeza omu bukama bwange, kandi mwikarre ha bitebe mucwere emisango enganda ikumi na ibiri eza Isirairi.”


Yesu akagamba ati: “Simooni, Simooni, omanye Sitaani aikirizibwe kubasegesa inywena nk'engano. Baitu iwe nkakusabira okwikiriza kwawe kuleke kugarukirra; kandi obu olimara kwegarukamu, ogumye bagenzi baawe.” Petero yamugarukamu ati: “MUKAMA wange, nyeteekaniize kugenda omu nkomo n'okufa hamu na iwe!” Yesu yamugarukamu ati: “Petero ninkugambira nti: Kiro kinu enkoko etakakookere, oraaba onyehoogere emirundi esatu ngu, tommanyire.”
Yesu yabakaguza ati: “Buli obu nabatumire mutaina nsahu za sente n'ez'ebyokulya, mutajwaire n'enkaito, hakabaho ekyababuzireho?” Baagarukamu bati: “Nangwa.” Nandiki Yesu ati: “Leero hati, weena anyakwina ensahu ya sente rundi ey'ebyokulya agitwale; kandi ataina empirima, atunde omwegereko gwe, agigule. Nyowe nimbagambira nti: Ekyahandiikirwe ekirukugamba kiti: ‘Akabalirwa omu basiisi’ nikisemerra kuhikirra hali nyowe; ningira ebyampandiikirweho biri haihi kuhikirra.” Abakwenda baamugarukamu bati: “Waitu, hanu twina empirima ibiri!” Nandiki uwe ati: “Ezi nizimara!”


Yesu yaruga omu nju yagenda ha rusozi rw'emiti Oliva, nkooku yakakoraga bwona; abakwenda be baamukuraatira. Obu baahikireyo yabagambira ati: “Musabe, mutaikara kutwarwa omu kwohebwa.” Uwe yabarugaho yagenda nk'omwanya oguhungurwamu ibaale, yateeza amaju yayesengereza ati: “Taata, obu oraaba nookisiima onyiheho amabone ganu. Nabwo kitaba nyowe nkooku ndukugonza, baitu kibe Iwe nkooku orukugonza.” [ Nubwo malaika yaruga omwiguru yamubonekera, yamugumya. Obu, obusaalizi bwamuhinguraine, yayesengereza muno okukiraho; empita yamurugamu yatonya hansi neesisana entonyezi enkooto ez'esagama.]
Obu yamazire kusaba, yaimuka, yagaruka hali abakwenda be yabasanga bagwijagiire habw'obujune. Yabagambira ati: “Mugwijagiziibwe ki? Mwimuke musabe, mutaikara kutwarwa omu kwohebwa.”


Obu akaba nakyabaza, haija ekitebe, ky'abantu; omusaija arukwetwa Yuda, omu hali ikumi na babiri, abeebembiire. Yairra haihi Yesu kumugwa omu kifuba. Baitu Yesu yamukaguza ati: “Yuda, noogobeza Omwana w'omuntu kunu noomugwa omu kifuba?” Abo abakaba bali hamu na Yesu obu baarozire ekirukugenda kubaho, baamukaguza bati: “Waitu, tubateme n'empirima?” Omu hali bo yatema omwiru w'omukuru w'abanyakatagara, yamucwaho okutu okw'obulyo. Baitu Yesu yabatanga ati: “Lekera aho!” Yakwata ha kutu kw'omusaija, yamukiza.
Nubwo Yesu yakagwize banyakatagara abakuru, n'abakuru n'abalinzi b'enju ya Ruhanga n'abakuru b'abantu abakaba baizire kumukwata ati: “Munyiziire n'empirima n'ebiduuma nk'abaiziire kukwata omunyagi? Buli kiro naikaraga na inywe omunju ya Ruhanga, mutankwate. Baitu kanu nuko kasumi kanyu, hati omwirima nugwo gurukulema.”


Aho baakwata Yesu, baamutwara baamuhikya mba mukuru w'abanyakatagara; Petero yabahondera ali haraho. Obu baahembere omurro omu kizigati hagati, baikarra kwota, Petero nawe yabaikarramu.
Omu ha bazaana n'omukuru w'abanyakatagara obu yamurozire aikaliire ha murro, yamugumyaho amaiso naagamba ati: “Omusaija onu nawe abairege hamu na Yesu!” Baitu Petero yayehooga naagamba ati: “Mukazi iwe, ogu tindukumumanya!” Obu haahingwireho akanya kake, omuntu ondi yamurora yagamba ati: “Na iwe oli omu hali bo!” Baitu Petero yamugarukamu ati: “Musaija iwe, tindi wabo!” Obu haahingwireho omwanya gw'esaaha nk'emu, ondi yamwomereza muno naagamba ati: “Mazimakwo omusaija onu abaire ali hamu nawe; habwokuba nawe Mugaliraaya!” Petero yagamba ati: “Musaija iwe, tindukumanya eki orukugamba!” Ahonaaho obu akaba naakyabaza, enkoko yakooka. MUKAMA Yesu yahinduka yarolerra Petero. Na Petero nubwo yaijukire ebigambo MUKAMA ebi yamugambiire ati: “Kiro kinu enkoko etakakookere, oraaba onyehoogere kasatu.” Petero yaturuka aheeru, yarra muno.


Abasaija abakaba nibalinda Yesu bakamusekeereza kandi baamuteera enkoba. Baamuswekerra ha maiso, nibamukaguza bati: “Toma, nooha akutiire!” Kandi baamugambaho ebindi bingi nibamujuma.


Obwire obu bwakiire, abakuru b'abantu, banyakatagara abakuru, n'abeegesa b'ebiragiro bakasorrokana hamu, baaleeta Yesu omu Rukurato rwabo. Baamukaguza bati: “Tugambire, niiwe Kristo?” Yabagarukamu ati: “Obu ndaabagambira, timurukwija kunyikiriza; noobu ndaabakaguza, timurukwija kungarukamu. Baitu okuruga hati, Omwana w'omuntu naija kwikarra ha mukono gw'obulyo ogwa Ruhanga Omusobozi wa byona.” Boona nukwo kumukaguza bati: “Mara iwe, oli Mwana wa Ruhanga?” Yabagarukamu ati: “Niinywe mwakigamba.” Nandiki bbo bati: “Hati nitukyaserurra ki obwakaiso? Ningira twayehulirra itwenka ebi agambire!”

Слушайте Luk 22