Text: © New Life Computer Institute Audio: ℗ 2022 Hosanna

Shekhawati 2017 NLCI (NT)  Non Drama

बठै निकेदेमुस नाम को यहूदि नेता हो, जखो एक फरिसी हो। एक रात बो ईसु कनै गयो अर बिऊँ बोल्यो, “गरूजी, म्हें जाणा हां क म्हानै सीखाबा ताँई परमेसर तनै भेज्यो ह। अर ज परमेसर थारै सागै नइ होतो तो थे चमत्कार कोनी कर सका हा।”
ईसु जुबाब दिओ, “म तेरूँ सची बोलुँ हूँ जद ताँई कोई मिनख ओज्यु नइ जलमै जद ताँई बो परमेसर का राजनै कोनी देख सकै।”
जणा निकेदेमुस बोल्यो, “एक बूडो मिनख ओज्यु आपकी माँ का पेट म जार कंय्यां जलम ले सकै ह?”
ईसु बोल्यो, “म थारूँ सची-सची बोलुँ हूँ, पबितर आत्मा अर पाणीऊँ जलम्या बिना कोईबी मिनख परमेसर का राज म कोनी बड़ सकै। मिनख मिनखनै जलम दे सकै ह, पण बा पबितर आत्मा ह जिकै जरिए बो आत्मिक रूप म जलमै ह। था सगळानै ओज्यु जलम लेणोई ह, मेरी इ बात प ताजूब मना करो। भाळ जठै चावै बठै भेवै ह, जिकी उवाज थे सुणो हो, पण थे आ कोनी जाणो क बा कठैऊँ आवै अर कठै जावै ह। पबितर आत्माऊँ जलम लेबाळो हरेक मिनख इकी जंय्यांई ह।”
निकेदेमुस बोल्यो, “ओ कंय्यां हो सकै ह?”
ईसु बिऊँ बोल्यो, “तू इजरायल्यानै सीख देबाळो होर बी, आ बातानै क्युं कोनी समज सक्यो? म तनै सची बोलुँ हूँ, म्हें जोक्यु जाणा बो बोलां हां, अर जोक्यु देखां बिकी गुवाई देवां हां, इकै बावजुद बी थे म्हारी बातानै कोनी मानो। थे जद इ धरती की बाता पई बिस्वास कोनी करो जखी म थानै बताऊँ हूँ। जणा पाछै ज म थानै ईस्बर नगरी की बाता बताऊँ, थे बापै कंय्यां बिस्वास करस्यो? बो जखो ईस्बर नगरीऊँ उतर्यो बि मिनख का बेटा क अलावा कोई ईस्बर नगरी म कोनी चढ्यो। जंय्यां मूसा बि उजाड़ म कांसा का साँपनै उचो उठायो हो बंय्यांई मिनख को बेटो बी उचो उठायो ज्यासी। जिऊँ जखो बी बिपै बिस्वास करै बो अजर-अमर जीवन पावै।”
“क्युं क परमेसर जगत का मिनखाऊँ अंय्यां को परेम कर्यो, जिकै चलतै बो आपको इकलोतो बेटो दे दिओ। जिऊँ जखो बी बिपै बिस्वास करै बो नास नइ होवै पण अजर-अमर जीवन पावै। परमेसर आपका बेटानै, जगत का मिनखानै सजा देबा को हुकम देबा ताँई कोनी भेज्यो। पण बानै बचाबा ताँई भेज्यो ह। जत्ता बी बिपै बिस्वास करै ह, बानै परमेसर माफ करै ह। पण जखा बिपै बिस्वास कोनी करै बे सजा का भागी ह, क्युं क बे परमेसर का इकलोता बेटा प बिस्वास कोनी कर्या। बाको न्याय इ आधार प ह क ईस्बर नगरीऊँ च्यानणो धरती प आयो। पण बे च्यानणाऊँ बेत्ती अँधकारऊँ लगाव राख्या। क्युं क बाका करम बुरा हा। जखो बुराई करै ह, बो च्यानणाऊँ नफरत राखै ह। अर च्यानणा म कोनी आवै, क्युं क बो डरै ह क बिका करम चोड़ा म नइ आज्यावै। पण जखा खराई प चालै ह, बे च्यानणा म आवै ह। जिऊँ ओ सामै आ सकै, क जोक्यु परमेसर चातो हो बोई बे कर्या।”

आ बाता क होबा क पाछै ईसु आपका चेला क सागै यहूदिआ का निचला इलाका म आयो। अर बठै बाकै सागै रिह्यो अर पाणी को बतिस्मो दिओ। सलेम नगरी क सांकड़ैई एनोन नाम की झघा एक कूंड हो जठै यहून्ना बी पाणी को बतिस्मो दिआ करतो हो, क्युं क इ झघा म बोळो पाणी हो। मिनख बिकन आर पाणी को बतिस्मो लेता हा। अ यहून्नानै केद म लेबाऊँ पेली की बाता हीं। सुद होबा का रिवाजा क बारां म यहून्ना का क्युंक चेला एक यहूदि अधिकारीऊँ जिरै करर्या हा। जणा बे यहून्ना कनै जार बिऊँ बोल्या, “गरूजी जखो मिनख यरदन क परलै नाकै तेरै सागै हो जिकै बारां म तू बोल्यो हो, इब बो पाणी को बतिस्मो देर्यो ह अर हरेक जणो पाणी को बतिस्मो लेबा बिकन जार्यो ह।”
यहून्ना जुबाब दिओ, “जद ताँई परमेसर नइ दे, कोईनै क्युंई कोनी मिलै। थे खुद मेरा गुवा हो, म थानै बोल्यो हो क, ‘म मसी कोनी पण बिकै अगाऊ भेजेड़ो हूँ।’ बिंद बोई ह जिकै बिनणी ह। पण बिंद को भाईलो जखो खड़्यो होर बिकी सुणै ह, बो जद बिंद बोलै जणा बिकी उवाज सुणर राजी होज्यावै ह। ठिक बंय्यांई म बी राजी होयो। आ जरूरी ह क मिनखा म ईसु को मान बढै अर मेरो घटै।
“जखो उपरऊँ आवै ह, बो सऊँ बढर ह। जखो मिनख धरतीऊँ आवै बो धरती को ह अर बो धरती की बाता करै ह। पण जखो ईस्बर नगरीऊँ आवै बो सऊँ उपर ह। बो जोक्यु देख्यो अर सुण्यो बिनैई बोलै ह, पण कोईबी मिनख बिकी बातानै कोनी मानै। जखो बी बिकी बातानै मानै ह, बो आ दिखावै ह क परमेसर सचो ह। क्युं क जिनै परमेसर भेज्यो ह, बो परमेसर का बोल बोलै ह। क्युं क परमेसर बिनै बेथां पबितर आत्माऊँ भर्यो ह। परम-पिता आपका बेटाऊँ परेम करै ह अर बिकै हाता म सक्यु सूप दिओ ह। जखो मिनख परमेसर का बेटा प बिस्वास करै, बिनै अजर-अमर जीवन मिलसी। पण जखो बिकी कोनी मानै, बि ताँई जीवन कोनी अर बो परमेसर की झाळ भोगसी।”

Слушайте यहून्ना 3