If you have would like a copy of this version please contact info@davarpartners.org

Text: Garhwali New Testament, CC-BY-SA-4.0, The Love Fellowship. -- Audio: Garhwali New Testament Audio Bible, CC-BY-SA-4.0, Davar Partners International, The Love Fellowship, 2021

Garhwali New Testament

Garhwali - Common Language Version BSI (NT) Drama

Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.

जब उ वे डांडा बट्टी उतरी त एक बड़ी भीड़ वेका पिछनै हवे गै। अर एक कोढ़ी ल यीशु का संमणी ऐ प्रणाम कैरी अर बोलि, “हे प्रभु तु जु चै त मि तैं शुद्ध कैरी सकदी छै।” यीशु ल वे पर तरस खै अर हथ रखि, अर वे तैं छवे के बोलि, “मि चांदु छौं कि तु खूब हवे जा अर उ तुरंत कोढ़ बट्टी खूब हवे गै।” यीशु ल वेकु बोलि, “देख कै मा भि कुछ नि बोलि, कि मिल त्वे तैं ठिक कैरी पर जै के अफ तैं यहूदी याजक तैं दिखौ, अर अपड़ा कोढ़ बट्टी शुद्ध हूंणा का बारा मा जु कुछ चढ़ावा मूसा ल ठैरे उ सब परमेश्वर तैं भेंट चढ़ौ, कि ऊं पर गव्है हो।”


जब उ कफरनहूम शहर मा ऐ त एक रोमी सुबदार वेका संमणी ऐ के यीशु बट्टी बिनती कैरी “हे प्रभु मेरू सेवक घौर मा लकवा का रोग का कन हिलडुली भि नि सकदा अर भौत दुख मा पोड़य्युं च।” यीशु वेमा बोलि, “मि ऐ के वे तैं खूब करुलु।” सुबदार ल जवाब दींनि, “हे प्रभु मि यु लैक नि छों की तु मेरा घौर ऐ, पर भस गिच्चा ल बोल दे त मेरू सेवक खूब हवे जालो।” किलैकि मि जंणदु छो की मि एक पराधीन मनिख छौं अर सिपै मेरा अधिकार मा छिन जब मि एक बट्टी बुल्द जा त उ जांदु च अर हैंका बट्टी बुल्द कि औ त उ औंदु च अर जब अपड़ा सेवक बट्टी बुल्द कि यु कैर त करदो च। यु सूंणि के यीशु भैंचक हवे गै अर जु वेका पिछनैं औणा छा ऊं बट्टी बोलि, “मि तुम मा सच बुल्णु छौं कि मिल पूरा इस्राएल का लुखुं का घराना मा एक भि इन आदिम नि मिली जु यु गैर-यहूदी आदिम का जन मि पर विश्वास करदो हो। अर मि तुम मा बुल्णु छौं कि भौत सैरा अन्यजातियों का लोग पूर्व अर पश्चिम बट्टी ऐ के अब्राहम अर इसहाक अर याकूब का दगड़ी स्वर्ग का राज्य मा खांणु खाला। पर परमेश्वर का राज्य की संतान समझण वला यहूदी भैर अंधेरा मा डलै जाला उख रूंण अर दांतों को पिसंण होलो।” तब यीशु ल सुबदार मा बोलि, “घौर जा, जन तेरु विश्वास च उन ही त्वे कु हो” अर वेको सेवक वे ही बगत खूब हवे गै।


यीशु जब पतरस का घौर मा ऐ तब वेल पतरस की सास तैं जौर मा पड़ीं देखि। तब यीशु ल बिस्तर का संमणी मा जै के वीं को हथ पकड़ी के वीं तैं उठै अर वीं को जौर उतरी गै, अर व ठिक हवे गै अर ऊं सभियूं कि सेवा पांणी कन लगि गै। जब रुमुक हवे तब लोग यीशु का संमणी भौतों लुखुं तैं लैनि जौं मा दुष्टात्मा लगिं छै अर वेल ऊं आत्माओं तैं अपड़ा वचन से निकाली दींनि अर सब बिमारों तैं खूब कैरी। इलै की जु वचन यशायाह परमेश्वर का तरपां बट्टी बुल्ण वला का द्वारा बुलै गै छो उ पूरो हो, “कि वेल अपड़ा मथि हमारी कमजोरियों तैं लींनि अर हमारी बिमारियों तैं अपड़ा मथि उठैनि।”


यीशु ल जब अपड़ा चारों तरपां एक बड़ी भीड़ देखि त चेलों कु बोलि, आवा हम गलील झील का दुसरा छाला कु चला। जब उ जांणु कु तैयार हूंणा छा तब एक मूसा की व्यवस्था तैं सिखांण वलो संमणी ऐ के वेमा बोलि, “हे गुरु जख कखि भि तु जैलि मि तेरु चेला बंनाणु कु तेरु अनुसरण करलो।” यीशु ल वेमा बोलि, “स्यालुं का उडयारुं अर आसमान का चलखुडों का घोल हूंदींनि पर मि मनिख कु नौंना कु स्यूंणु कु एक घौर भि नि च जख मि स्ये साको।” एक और चेला ल वेमा बोलि, “हे प्रभु मि तैं पैली घौर वापिस जांण दे कि मेरा बुबा का मुरण का बाद की मि वे तैं दफ्नोंण अर फिर ऐ के मि तेरु चेला बंणुल।” यीशु ल वेमा बोलि, “तु मेरा चेला बनण कु मेरा पिछनैं औ, अर जु लोग आत्मिक रूप से मुर्युं छिनी ऊं तैं अपड़ा मुर्दा दफनौंण दे।”


जब यीशु नाव पर चड़ी त वेका चेला ऊंका पिछनैं ऐनी। अर देखा झील मा एक इथग बड़ो अतरोळ-बतरोळ हवे कि नाव बौछारयुंनं ढकंण लगि गै अर यीशु सियूं छो तब चेलों ल संमणी ऐ के वे तैं बिजालि अर बोलि, “हे प्रभु हम तैं बचौ हम डुबि कै मुरण वला छा।” यीशु ल ऊं बट्टी बोलि, “हे अधुरा विश्वासियों” किलै डरणा छा? तब वेल उठि के अतरोळ-बतरोळ से उठयां लहरों तैं झिड़की अर सब शान्त हवे गै। अर चेला हकदक हवे के बुल्ण लगि गैनी यु कन्दरो आदिम च, “जु कि अतरोळ-बतरोळ तैं भि अर लहर भि वेको बुल्युं मणदींनि।”


जब यीशु झील का पल्या छाला गदरेनियों का लुखुं का क्षेत्र मा पौंछिंनी त द्वी मनिख जौं मा दुष्टात्मा छै उ कब्रों बट्टी निकली के वेमा ऐनी उ इथग खुंखार छा, कि कुई भि वे बट्टा बट्टी नि जै सकदा छा। ऊंल चिल्लै कै बोलि, “हे परमेश्वर का नौंनो” मेरू तेरु कुई लिणु दींणु नि च क्य तु बगत से पैली हम तैं दुःख दींणु कु इख अईं छै? ऊं बट्टी कुछ दूर बिजां सुंगरु को एक बड़ो झुण्ड चरणु छो। दुष्टात्मा ल यीशु मा बिनती कैरी कै बोलि, कि “जु तु हम तैं निकलणी छै त ऊं सुंगरुं का झुण्ड मा भेज दे।” यीशु ल ऊं बट्टी बोलि, “जावा अर व दुष्टात्मा निकली के सुंगरु मा बैठी गै अर देखा ऊं सुंगरुं को सैरो झुण्ड पोड पर बट्टी झपटी के पांणि मा जै पोड़ि गै अर डुबि के मोरि गै।” सुंगरु का चरवाहा भागि के शहर मा गैनी अर यु सब बात अर जौं मा दुष्टात्मा छै ऊंको सैरो हाल सुंणै। तब सैरा शहर का लोग यीशु बट्टी भेंट कनु कु ऐनी अर वे तैं देखि के बिनती कैरी कि हमारा सरहद बट्टी भैर चलि जा।

Слушайте मत्ती 8