Text: © Wycliffe India Audio: ℗ Hosanna 2024 and WPT

Pangwali 2023 WBT (NT) Drama

इन्हि बोकी केआं पता यीशु गलील राज्य अन्तर ईं हंटता रेहा। से यहूदिया राज्य जे घेण ना चहन्ताथ किस कि यहूदी नेते तस मारणे कोशिश करण लगो थिए। तपल यहूदी मेह्‍णु के डेरा बाड़ी त्योहार बि नीड़ा एई गो थिआ। त तसे भाई तस जे बोलुण लगे, “इठिआ नश कइ यहूदिया राज्य जे गा, ताकि जे जे कम तु कता, तस तें चेले बि हेर सकियेल। किस कि अगर कोई मेह्‍णु अपु शान चहन्ता, त से नियोक कइ कम ना कता। पर तु अगर ई सोब कम कता, त सम्हाई मेह्‍णु के सामणि घेण दे।” (तेन्हि ई बोक तोउं बोली, किस कि से बि तेस पुठ विश्वास ना कतेथ।) तोउं यीशु तेन्हि जे बोलु, “में टेम अपल तकर नेईं अओ; पर तुस कपले बि घेई सकते। मेह्‍णु तुस रशुणे नेईं, पर अउं रशुणा असा, किस कि अउं तेन्के बारे ई उगाह देन्ता कि तेन्के कम बुरे असे। तुस त्योहार जे घिए, अउं अभेईं इस त्योहार जे ना घेन्ता, किस कि में टेम अपल तकर नेईं अओ।” से तेन्हि जे ईं बोल कइ गलील राज्य अन्तरे बिशा।

पर जपल यीशु भाई त्योहार जे गे, त से बि चुपचाप, मेह्‍णु केआं नियोक कइ त्योहार जे गा। यहूदी नेते त्योहार बुच तस ई बोल कइ तोपुण लगे कि “यीशु कोठि असा?” तपल किठिए मेह्‍णु बि अपफ बुच बोक विचार करण लग गे। कोई बोतेथ कि “से खरा मेह्‍णु असा”, त केहि बोतेथ, “ना, से त मेह्‍णु ठगता”। पर यहूदी नेती केईआं डर कइ कोई बि मेह्‍णु तसे बारे खुल कइ ना बोतेथ।
त जपल त्योहार आधा खतम भोई गा, त यीशु देहेर अन्तर घेई कइ शिचालुण लगा। त मेह्‍णु तस शुण कइ हैरान भोई गे त बोलु, “एन त केसे गुरु केईआं नेईं शिचो। फि बि अस एत ज्ञान कोढ़िआ मेईंया?” यीशु तेन्हि जे बोलु, “ए शिक्षा में ना भो, पर परमपिता परमेश्वरे भो, जेन अउं लंघो असा। अगर कोई तसे इच्छा जुए जीण चहन्ता, त तस में शिक्षा बारे पता लगाल कि ए परमेश्वर केआं असी, ना अउं अपफ एस बणाई कइ बोलुण लगो असा। जे अपु इज्जत चहन्ता, से ईं अपफ बणाई कइ बोता, पर जे अपु लंघाणे बाड़े इज्जत चहन्ता, से सच्चा असा त तस अन्तर कोई दुरबुध नेईं। मूसे तुं धे परमेश्वरे नियम दिता। तोउं बि तुसी बुच यक जेईं बि तस ना मानते। त तुस मोउं किस मारुण चहन्ते?” त मेह्‍णु तस जे बोलु, “तु जगरी गो असा! तोउ कोउं मारण चहन्ता, आं?” यीशु तेन्हि जे जवाब अन्तर बोलु, “मेईं भक्ति करणे रोज यक चमत्कारे कम किआ, जेस हेर तुस सम्हाई परेशान भोई गो असे। पर तुस अपफ बि त भक्ति करणे रोज कम कते, जपल तुस मूसे दुतो नियम मान कइ मेह्‍णु खतना कते। सच्चाई त ई असी कि ए नियम तुसी मूसे केआं नेईं बल्कि दादु पड़दादु केआं मेओ असे। मूसे नियम मनुण जे अगर तुस भक्ति करणे रोज बि मेह्‍णु खतना कइ सकते, त भक्ति करणे रोज अउं मेह्‍णु किस ना ठीक कइ सकता? त मोउं पुठ तुस इरुह दोष किस लान्ते? टीर बंद कइ पंची ना करे, पर सोब चीज हेर कइ पंची करे।”

तपल कतु यरुशलेम शेहरे मेह्‍णु बोलुण लगे, “ए कि से मेह्‍णु ना भो ना, जेस मारण जे कोशिश भुण लगो असी? पर हेरे, ए त सोबी के अगर शिक्षा देण लगो असा त कोई कुछ बोलुण नेईं लगो। ई त नेईं कि हें नेते मनी गे कि ए मसीह भो? मसीह जपल एन्ता त केसे पता ना लगता कि से कोठियाणि भो, पर इसे बारे त असी सम्हाई पता असा।”
तपल यीशु देहेर अन्तर शिक्षा देन्ते हक दी कइ बोलु, “तुसी में पता असा त अउं कोठियाणि भो तसे बारे बि पता असा। अउं त अपफ नेईं ओ, पर परमेश्वर जेन अउं लंघो असा, से सच्चा असा। तुस तस ना जाणते। तस अउं जाणता, किस कि अउं तस केईआं अओ असा, त तेन अउं लंघो असा।”
इस बोक पुठ तेन्हि तस टाणे की, पर तस कोई कुछ ना कइ बटे, किस कि तसे कष्ट सेहणे त मरणे टेम अपल तकर नेओथ ओ। त हुसुड़े केआं सुआ मेह्‍णु तस पुठ विश्वास किआ त बोलुण लगे, “जपल मसीह एईयाल, त से कि जे चमत्कारे कम एनि किओ असे, इस केआं बि ज्यादा चमत्कारे कम से कता ना?”
जपल मुख्य पुजारे, त फरीसी मेह्‍णु यकी होरी कन पतूं घुश-घुशात कते शुणे त यीशु टाण जे देहरे सपाही लंघाए। त यीशु बोलु, “अउं थोड़ी देर तकर तुसी जुए असा, तोउं अउं अपु लंघाणे बाड़े केईं घेई घेन्ता। तुस मोउं तोपते, पर अउं तुसी ना मेता। त जेठि अउं भुन्ता, तुस तठि एई ना सकते।”
त यहूदी नेते अपफ बुच बोलुण लगे, “ए को घेन्ता जे अस एस तोप ना बटते? कि ए तेन्हि यहूदी मेह्‍णु केईं घेन्ता, जे गैर यहूदी इलाके अन्तर बिश्ते त गैर यहूदी मेह्‍णु जे शिचालता? इसे मतलब की बणतु कि ‘तुस मोउं तोपते, पर अउं तुसी ना मेता त जेठि अउं भुन्ता, तुस तठि एई ना सकते’”?

तोउं, जे त्योहारे अखिर रोज थिआ, त बोडा खास रोज थिआ, तपल यीशु खड़ भुआ त जोर जोई हक दी कइ बोलुण लगा, “अगर कोई टिशो असा, त मोउं केईं एई कइ तस पीण दिए, जे अउं देन्ता। त जीं धरमे कताब अन्तर लिखो असु,
‘जे मोउं पुठ विश्वास कता,
तसे दिल अन्तर जीवन देण बाड़ी पुओणि सुजली ईं बहिन्तु।’”
तेन ई बोक तेस शुची आत्मा बारे बोलु, जे तस पुठ विश्वास करणे बाड़ी जे मेणे बाड़ा थिआ। अपल तकर शुची आत्मा विश्वासी मेह्‍णु पुठ नेओथ अओ, किस कि यीशु अभेईं तकर अपु शान जे नेईं गो।

तपल मेह्‍णु बुच केहि केहि ई बोक शुण कइ बोलु, “ए सच्चे से भविष्य वक्ता भो, जेस अस भाड़ बिशो असे।” किछ होरी बोलु, “ए मसीह भो” पर केनि होरी ई बोल कइ पुछु कि “किस, मसीह कि गलील राज्य केआं एन्ता ना? धरमे कताब अन्तर कि लिखो नेईं ना कि मसीह दाऊद राजे ऊड़ी त बैतलहम ग्रां केआं एन्ता, जेठिआ राजा दाऊद अओ थिआ?” त इस बझई जुए मेह्‍णु बुच अणबण भोई गई तेन्हि बिचा कुछ यीशु टाण चहन्तेथ, पर तसे कुछ कइ ना बटु।
तोउं देहरे सपाही, मुख्य पुजारे त फरीसी केईं एई गे त तेन्हि तेन्हि सपाही केईआं पुछु, “तुसी से किस ना अण्हा?” त सपाही तेन्हि जे बोलु, “आज तकर केनि बि मेह्‍णु एसे ईं बोके ना की।” त फरीसी लेहरी कइ बोलु, “तुस बि ठगी गे ना? नेते त फरीसी बिचा कि केनि जेईं तस पुठ विश्वास किओ असा ना? पर एन्हि मेह्‍णु पुठ शराप असा, किस कि ए नियम ना जाणते।”
पर नीकुदेमुस, जे पेहले यीशु केईं अओ थिआ, त जे तेन्हि फरीसी बिचा यक थिआ, नाराज भोई कइ बोलु “हें नियम केस जे बजन बोक शुणणे, त बजन तसे कम समझणे तेस पुठ दोष लाणे ना बोता।” त फरीसी त नेते तस जे बोलु, “तु बि कि गलीले भो ना? गा त धरमे कताब अन्तर हेरिण दे कि गलील राज्य केआं कोई बि भविष्य वक्ता ना एन्ता।” [तोउं सम्हाई मेह्‍णु अपु अपु गी जे गे।

Слушайте यूहन्ना 7