Matthew 3
3
John usiikahaahtaacheu kaa chihchipayihtaat e kacheskwet
Mark 1.1-8; Luke 3.1-18; John 1.19-28
1Ekut maak utah mekwaach John siikahaahtaacheu kaa chii ituhtet anite pakwaatiskamikaahch, anite Judea aschiihch itehche, ekw kaa chihchipayihtaat e kacheskwet. 2E itwet, “Kweskaatisiikw, wesh shaash peshunaakun an kihchikiishikw chisheuchimaawin.” 3Eukw maak uyuu John kaa aayimuumaat aniyaa uchischiwehiichesuu Isaiah kaa ishinihkaasut iskutak kaa itwekupane,
Ihtaau awen e tepwet anite pakwaatiskamikaahch e itwet, Ayeskawiihkamuwaahkw Utipeyihchikeu umeskanaam anit che pimuhtet, kuiskumuhtaawaahkw.
4Uu maak John, kaa mista piskwaaukunet awesiis upiiwii chii uhchi ushihtaakanuuyuu uchekwaanimh, kaye muushuyaaniyaapii chii iteyihtaakuniyuu aniyuu chekwaayuu kaa upahkuhtehunit kaye kwaashkwaashkuhchishiisha ekw maak shuukaayuu aamuuwachistunihch kaa ihtakuniyich eukw uyuu kaa umiichimit. 5Chii pechi nituhtaakuu maak John aniyuuh aweyuuh Jerusalemihch kaa uhchiyich kaye anite misiwe Judea aschiihch kaa uhchiyich, kaye aniyuu aweyuuh misiwe anite aniyuuh ihtaawinh peshuch Jordan siipiihch kaa ihtakuniyikwaauh. 6Mushe chii wiihtamuch taan kaa ishi machituutamuwaakupanenich ekw maak kaa siikahaahtaakutwaau John anite Jordan siipiihch.
7Iskutak maak John wiyaapamaat mihchetu Phariseeh kaye Sadduceeh e pechi takushiniyich chechii siikahaahtuwaakanuyich, chii iteu, “Muyaam taapwe chinepukuch e iteyihtaakusiyekw. Awen kaa ititaakw chechii ushimututamuwekw Chishemanituu utaahkuiwesuwin. 8Nuukuhtaakw taapwe e kweskaatisiyekw, e nakatamekw chimachaatisiiwinawaauh. 9Kaye ekaawii iteyihtamukw ekaa che uhchi waweshihiitaakw Chishemanituu e wanituutamekw mikw Abraham e ihtaat e uhchiyekw. Chiwiihtamaatinaawaau, Chishemanituu chika chii ihtuutuweu uyeyuu asiniih kaa itapiyich chechii uhchi ushihaat aweyuuh Abraham utawaashiimiyich. 10Wesh muyaam shaash e ayeskuushtech usitaaskw eukw che ishinaakuhch che naatwaakahwaakanuut an mistikw anite e utipiyuut. Wesh tahtu mistikw ekaa miyu miinishuut chika naatwaakahwaakanuu kaye chika machishtewepinaakanuu ishkutehch. 11Nipiihch chisiikahaahtaatinaawaau niya e nuukuhch e wii kweskaatisiyekw, mikw maak kutak awen chika takushinuu uste e chisteyihtaakusit ishpishaat niya. Namui maak mechim nitepicheyihtaakusin chechii aapihkunamuch umaschisiniyaapii. Wiya maak chika siikahaahtaakuwaau Kaa payehchisiyich Ahchaahkwa, kaye ishkuteyuu. 12Uu che takushihk chika iteyihtaakusuu mwehch naapeu kaa payehchihtaat pahkweshikaniminaahtikw anit chechii uhtinaat pahkweshikan kaye maak pahkaanishtaau aniyuu kaa miywaayikwaauh anite ashtaasuukamikuhch. Ekw aniyuu ekaa wiyesh chechii itaapataniyikwaauh ishkwaasam anite ekaa nihtaa aashtuweyich ishkuteyuu.” Eukw maak uyuu kaa itaat John siikahaahtaacheu aniyuu iinuu kaa pechi nituhtaakut e kacheskwet.
Jesus kaa siikahaahtuwaakanuut
Mark 1.9-11; Luke 3.21, 22
13Paatimaa maak Jesus chii takushinuu Galilee aschiihch e uhtuhtet, kaa nituwaapamaat aniyuu John anite Jordan Siipiihch chechii siikahaahtaakut. 14Mikw maak John chii wii nakaaneu e itaat, “Ishinaakun teyakuch chiya chechii pechi siikahaahtuwiyin, chekwaan maak wehchi pechi kakwechimiyin chechii siikahaahtaataan.”
15Ekw Jesus kaa itaat, “Anuhchiish uu ihtuut taan e itashumitaan. Wesh uu ihtuutamuhkwe chika ihtuutamuwaanuu misiwe taan e ishi nituweyihtahk Chishemanituu.” Kiipaa kaa pishichihaat John.
16Iskutak maak Jesus kaa siikahaahtuwaakanuut, e ati kapaat maak chii uhchi pekuchishkupayuu kihchikiishikuhch. Chii waapameu maak Chishemanituu Utahchaahkuyuuh e pechi aashiitutaakut mwehch umiimiiu e ishinaakusiyich kaye e tehutaakut. 17Ekw kaa pehtawaatwaau aweyuu anite uhchi kihchikiishikuhch e itweyich, “Eukuu Nikus kaa saachihiik kaye naashch taapwe kaa naniheyihtamihiit.”
Выбрано:
Matthew 3: crjrNT
Выделить
Поделиться
Копировать
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fru.png&w=128&q=75)
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.