توریت شریف: پَیدایش 15
15
1اُس توں بعد اللّٰہ تعالیٰ نا کلام حضرت ابرام پر نازل ہویا کہ،
”اے ابرام، توں ناں ڈر!
میں تُہاڑی ٹہال آں۔
تُکی بڑا اجر لبھسی.“
2پر حضرت ابرام اعتراض کیتا، ”اے رب قادر مطلق، تُوں مِکی کَے دیسیں؟ میں تے اجے تک اوتر آں، تے مہاڑی ساری وراثت نا مالک مہاڑا نوکر اِلی عزر دمشقی بݨی جاسی. 3تُوں مِکی اولاد نی بخشی. اِس واسطے مہاڑے کہرے نا نوکر مہاڑا وارث ہوسی.“
4فِر اللّٰہ تعالیٰ نا کلام حضرت ابرام اپر نازل ہویا، ”اے بندہ تُہاڑا وارث نی ہوݨ لغا، بلکہ تُہاڑا وارث او ہوسی جیہڑا تُہاڑے وِچوں جمسی۔“ 5فِر رب اِنہاں کی باہر کھڑی کے آخیا، ”تُوں اَسمان در تک! جے تاریاں کی گِݨی سکیں، تے گِݨ! اِتنی ہی تُہاڑی اُولاد ہوسی۔“
6حضرت ابرام رب نی گلاں پر بھروسہ کِیتا، اِس واسطے رب اُنہاں کی نیک بندیاں وِچ شُمار کیتا.
7فِر رب اُنہاں کی آخیا، ”میں رب آں، جس تُکی کَلدانی قوم نے شہر اُر وچوں کڈی کے آندا، تانکہ میں تُکی اے مُلک وراثت وِچ دیاں۔“
8پر حضرت ابرام پُچھیا، ”اے رب، میں کِس طرح سمجھاں کہ میں اِس نا وارث ہوساں؟“
9فِر رب جواب دِتا، ”جائی کے مہاڑے واسطے ترَے ترَے سالاں نے بچھی، بکری، تے لیلا آݨ. تے اِک کُہگی تے اِک کبُوتر نا بچہ وی آݨ۔“
10حضرت ابرام اِسے طرح کیتا. فِر اُنہاں اِنہاں ساریاں جانوراں نے دو دو ادھے وِچوں ٹوٹے کِیتے، تے اِنہاں کی آمݨے سامݨے رخیا. پر اُنہاں پرندیاں نے ٹوٹے نی کِیتے۔ 11فِر شِکاری پکھیروں اِنہاں ٹوٹیاں پر کھاݨے نی غرض نال ٹہیݨ لغے، پر حضرت ابرام اُنہاں کی اُڈاری شوڑیا۔
12سُورج نے ڈُبݨے ویلے حضرت ابرام کی سخت نِیندر آئی گئی، تے اُنہاں پر بہُوں زیادہ کالا تے خوفناک نہیرا پئی گیا۔ 13فِر رب اُنہاں کی آخیا، ”جانی کِہن! تُہاڑی نسلاں نے لوک بیگانے مُلخے وِچ پردیسی ہوسݨ. چوآں صدیاں تک او غُلام رہسݨ تے اِنہاں نال بدسلوکی ہوسی. 14پر میں اُس قوم پر عذاب آݨساں جس نی اے غلامی کرسݨ، فِر بعد وِچ تُہاڑی نسل نے لوک بہُوں دولت کہنی کے اُتھوں نکلی اچھسݨ۔ 15پر تُوں آپوں لمی عمر توں بعد سُکون نال فوت ہوسیں تے دفن ہوسیں۔ 16فِر چوتھی پُشتے وِچوں تُہاڑی نسل نے لوک اِتھے مُڑی اچھسݨ، کِیئانکہ اَموری قوم نے غُناہ اُس حد تک نی پُہنچے کہ اُنہاں پر عذاب آئی کے اِس مُلکے وِچوں باہر کڈیا جائے۔“
17جس ویلے سُورج ڈُبیا تے نہیرا پئی گیا سی، فِر اِک تہُونئیں آلا تندُور تے اگی نا اِک بلݨا مہوٹا دِسیا، جیہڑے ٹوٹیاں وِچوں ہوئی کے لنگے۔ 18اُس دیہاڑے رب حضرت ابرام نال عہد کِیتا کہ میں تُہاڑی نسلاں کی اے ساری زِیمی دیساں، جیہڑی مصر نے دریا نِیل توں کِہنی کے بڑے دریا یعنی دریائے فرات تک ہوسی، 19جِتھے اے ساریاں قوماں آباد اݨ: قینانی قوم، قِنزّی قوم، قَدمونی قوم، 20حِتی قوم، فَرزی قوم، رِفائیم قوم، 21اَموری قوم، کنعانی قوم، جِرجاسی قوم تے یَبوسی قوم.“
Выбрано:
توریت شریف: پَیدایش 15: phr
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Text (c) 2021 Noor-e-Kashmir
Audio (p) 2021 Noor-e-Kashmir