यहून्ना 13
13
ईसु आपका चेला का पग धोया
1फसै का त्युंहार क पेलीई ईसु आ जा'णर क, “मेर ताँई बा घड़ी आगी जद म इ दुनियानै तजर मेरा परम-पिता कनै जाऊँ।” बो धरती प जत्ता बी बिका हा बाऊँ आखरी ताँई एकसोई परेम करतो रिह्यो।
2ईसु अर बिका चेला आथण्या रोटी खार्या हा, जणा सेतान समोन का बेटा यहूदा इस्करोती क मन म ईसुनै धोकाऊँ पकड़ाबा की बात घाल दिओ हो। 3ईसु जाणतो हो क परम-पिता बिकै हाता म सक्यु सूप दिओ ह। अर बो परमेसर क कनैऊँ आयो अर बिकनई पाछो जार्यो ह। 4जणा बो आपकी खाबाळी चोकीऊँ खड़्यो होयो अर आपको कोटियो उतार एक गमछ्यो आपकी कड़त्यु प बांद्यो। 5जणा पाछै बो बठळ म पाणी भर आपका चेला का पग धोबा लाग्यो, अर कड़त्यु प भंदेड़ा गमछ्याऊँ बानै पुछ्यो।
6जद बो समोन पतरस क कनै आयो, समोन बोल्यो, “परबु, थे मेरा पग धोस्यो?”
7ईसु बिनै जुबाब दिओ, “म जखो करूं हूँ बिनै तू हाल कोनी समज सकै, पण पाछै तेरै समज म आसी।”
8पतरस बिऊँ बोल्यो, “नइ आ कदैई कोनी हो सकै क, थे मेरा पग धोओ!”
ईसु बोल्यो, “ज म तेरा पग नइ धोऊँ जणा तू मेरो चेलो कोनी।”
9समोन पतरस बोल्यो, “जणा परबु तू मेरा पगई क्युं, हात अर माथो बी धो दे!”
10ईसु बोल्यो, “जखो न्हा लिओ बिनै पग धोबा किई जुर्त ह, क्युं क बो पूरो पबितर ह। एकनै छोडर थे सगळा साप हो।” 11ईसु पेल्याऊँ जाणतो हो क, बिनै कूण पकड़ासी जणाई तो बो बोल्यो हो क, “एकनै छोडर सगळा पबितर हो।”
12 #
लूक 22:27
चेला का पग धोया पाछै, बो आपको कोटियो पेर पाछो आपकी झघा प जार बेठगो। बो बुज्यो, “म जखो थारै सागै कर्यो बिनै समज्या के? 13थे मनै गरूजी अर परबु बोलो हो, आ बात सई ह, क्युं क म हूँ। 14म थारो परबु अर गरूजी होर थारा पग धोयो, जणा थानै बी एक दुसरा का पग धोणो चाए। 15म अंय्यां कर थारै सामै एक मिसाल दिनी ह। जिऊँ थे बी बंय्यांई करो जंय्यां म थारै सागै कर्यो हूँ। 16#मत्त 10:24; लूक 6:40; यह 15:20म थारूँ साची बोलुँ हूँ, कोईबी दास आपका मालिकऊँ बडो कोनी, अर नइ भेजेड़ो आपका भेजबाळाऊँ बडो। 17इब थे अ बाता जाणग्या हो, जद थे आनै करस्योक जणा परमेसर थानै आसिरबाद देसी।
18“म थारी सगळा की बात कोनी करूं, म बानै जाणू हूँ जानै म टाळ्या हूँ। सास्तर म मंडेड़ो आंक पूरो होसी, ‘जखो मेरी रोटी खाई बोई मेरै लात मारी।’
19“इकै होबाऊँ पेलीई म थानै आ बतार्यो हूँ, जिऊँ जद अ बाता होवै जणा थे बिस्वास करो क म बोई हूँ।#यह 8:24 20#मत्त 10:40; मर 9:37; लूक 9:48; 10:16म थारूँ सची बोलुँ हूँ, जखो बी बानै मानै जखानै म भेजूँ हूँ बो मनै बी मानै ह अर जखो बी मनै मानै, बो मनै भेजबाळानै बी मानै ह।”
बिस्वास घात क बारां म ईसु को अगाऊ बोलबो
(मत्ती 26:20–25; मरकुस 14:17–21; लूका 22:21–23)
21आ खेबा क पाछै ईसु आपकी आत्मा म बोळो दुखी होया। अर साप-साप बोल्यो, “म थारूँ सची बोलुँ हूँ, थार मऊँ एक जणो मनै धोकाऊँ पकड़ासी।”
22चेला एक दुसरा को मुंडो देखबा लाग्या, अर सोच म पड़गा क बिको इसारो की कानि ह। 23बाका चेला मऊँ एक जणो, जखो लाडलो खुवातो हो। बो ईसु क सारै बेठ्यो हो। 24समोन पतरस बिकै कानि इसारो कर बोल्यो, “ईसुऊँ बुज बो किकै बारां म खेर्यो ह।”
25जणा बो चेलो ईसु क कान क कनैसिक मुंडो कर बाऊँ बुज्यो, “परबु, बो कूण ह?”
26ईसु बोल्यो, “म ओ रोटी को टुक इ कचोळा म डूबार जिनै देस्युँ, बोई बो मिनख ह।” जणा बे रोटी को टुक तोड़र बिनै डबोर समोन का बेटा यहूदा इस्करोतीनै दिआ। 27रोटी को टुक लेताई यहूदा म सेतान बड़गो।
जणा ईसु बिऊँ बोल्यो, “तू जखो करबो चावै ह, बो तावळोसो करकरा ले।” 28खाबा बेठ्या दुसरा चेला मऊँ कोईसा कई आ पलै कोनी पड़ी की ईसु बिऊँ आ बात क्युं बोली। 29यहूदा कनै रिपीआळी थेली रेह्ती ही, इ बजेऊँ क्युंक चेला सोच्या क ईसु बिनै इ बजेऊँ खेवै ह की बो जार त्युंहार ताँई बानै जखो चाए बिनै मोल लिआवै नहिस गरीबा म क्युं बाट देवै। 30रोटी को टुक लेताई यहूदा बारनै चलेगो। बो रात को टेम हो।
नयो हुकम
31यहूदा क जाबा क पाछै, ईसु बोल्यो, “टेम आगो जद मिनख का बेटा की मेमा परगट होसी, अर बिकै जरिए परमेसर की मेमा परगट होसी। 32ज परमेसर की मेमा बिकै जरिए होवै। जणा तावळोई परमेसर मिनख का बेटा की मेमा परगट करसी।
33 #
यह 7:34
“मेरा टाबरो म क्युंक टेम ताँई थारै सागै हूँ। थे मनै ढुंढस्यो, अर इब म थानै बी बात बोलुँ हूँ जखी यहूदि बडकाऊँ कही ही, क जठै म जार्यो हूँ, बठै थे कोनी आ सको।
34 #
यह 15:12,17; 1 यह 3:23; 2 यह 1:5 “अर इ टेम म थानै नयो हुकम देऊँ हूँ क एक दुसराऊँ प्यार-परेम राखो। जंय्यां को प्यार-परेम म थारूँ कर्यो, बंय्यांई आपसरी म थे बी करो। 35ज थे आपसरी म प्यार-परेम राखस्यो, जणा सगळा जाणसी की थे मेरा चेला हो।”
पतरस मनै जाणबाऊँ मुकरसी
(मत्ती 26:31–35; मरकुस 14:27–31; लूका 22:31–34)
36समोन पतरस बुज्यो, “परबु थे कठै जार्या हो?”
ईसु बोल्यो, “जठै म जार्यो हूँ बठै हाल तू मेरै गेल कोनी आ सकै पण पाछै तू बठै मेरै गेल आसी।”
37पतरस बोल्यो, “परबु इ टेम म थारै सागै क्युं कोनी चाल सकूँ? इबकी स्यात म थारै ताँई मेरा पिराण दे सकूँ हूँ!”
38ईसु बिऊँ बोल्यो, “के तू साच्याई मेर ताँई पिराण दे सकै ह? पण म तेरूँ साची बोलर्यो हूँ, मुरगा क बांग देबाऊँ पेली तीन बार तू मनै पिछाण्बाऊँ मना कर देसी।”
Выбрано:
यहून्ना 13: एस डब्लु वी
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
(c) 2010-2017, New Life Computer Institute. All rights reserved