लूका 9
9
बारह खास-चैले डेयाल़े
(मत्ती 10:5-15; मरकुस 6:7-13)
1तबे प्रभू यीशू ऐ आप्णे बारह खास-चैले बंईदे अरह् तिनू सोभी खे दुष्ट-आत्त्मा अरह् बीमारी दूर कर्णो के शक्त्ति अरह् अ-धिकार दिता। 2तबे प्रभू यीशू ऐं तिनू आप्णें खास-चैले खे पंण्मिश्वर के राज्य के खुष्खबरी शुणाँणी अरह् रूगी-बीमार च़ाँग्गै कर्दे डियाल़े। 3प्रभू यीशू ऐ आप्णें खास-चैले खे बुलो, “बाटो खे किऐ ने नींऐं, ना डीगा, ना झूल़ा, ना रोटी, ना रूपिया, अरह् ना दो-दो झोग्गै नींऐ बाँम्बणों खे। 4जैसी कोसी घर दे तुँऐं ज़ाले, तैथी रूऐ, अरह् तैसी ही घर शे बिदा भे हुऐ। 5जे कुँऐं लोग तुवारा स्वागत् ने करो, तअ तिन के नंगर शे नींक्ल़दी बंई गुवा-शाज़्त्त के रूप दी आप्णें लात्तो के माँट्टी अरह् धूड़ भे तैथी झाड़े तअ सैजी ही हुवाऐ हंदी।” 6तबे: खास-चैले तेथै शे हुटियों गाँव-गाँव दे ज़ाऐयों पंण्मिश्वर के राजो का बखाँण शुणाँदें रूऐ, अरह् कैथी-कैथी लोग बीमारी शे चाँग्गै कर्दें अरह् फिर्दे रूऐ।
राजा हेरोदेस के परीशानी
(मत्ती 14:1-12; मरकुस 6:14-29)
7च़ौथे हिस्सै का हिस्सेदार राजा हेरोदेस ऐजो बादो शुणियों डरी गुवा, किन्देंखे के कंऐ लोग बुलो थिऐ, के सेजा संत्त-यूहन्ना नहाँण-कराँणों वाल़ा मंरे अंदे मुँझ्षा जीऊँदा हऐ रूवा। 8अरह् कंऐ लोग बुलो थिऐ, के ऋषी-एलिय्याह पर्गट हऐ रूवा, अरह् कंऐ लोग ऐजो बुलो थिऐ; के कुँऐ पुराँणे ऋषी मुझ्षा ऐक ऋषी जीऊँदा हऐ रूवा। 9परह् तैने राजा हेरोदेस ऐ बुलो, के तैसी “संत्त-यूहन्ना के तअ मुँऐं शीरी दुर्की पुवाऐ थऐ थी, तअ तबे ऐजा कुँण असो; जैस्के बारे दे मुँऐ ऐजी बात शुंणी लऐ?” तबे तैने प्रभू यीशू दे:ख्णों के हिछ़या करी।
प्रभू यीशू ऐ पाँच हजार मर्दो कैई शोखाणों खे खियाओ
(मत्ती 14:13-21; मरकुस 6:30-44; यूहन्ना 6:1-14)
10तबे प्रभू यीशू के सेजै खास-चैले पाछ़ू आऐ, करह् सेजो जू कुछ़ तिन्ऐ करो थियों सेजो सब-कुछ़ प्रभू यीशू कैई आगू बुलो; तबे: प्रभू यीशू ऐ तिनू आप्णी गईलो बेतसैदा नंगर की ढबै नींऐ, अरह् से बादे कैथी ऐकाँन्त्त दे हुटे। 11परह् लोगो कैई ईयों बादी बातो का पत्ता लागा, अरह् तबे लोगो के बैजाऐ बड़ी भीड़ तिनू पाछ़ी-पाछ़ी तैसी ही जागे दी हुटी; अरह् से बादे मंज्जे के तिन कैई शे भेंटिऐं, अरह् प्रभू यीशू ऐं खुशी हऐयों तिनू सोभी कैई पंण्मिश्वर के राज्य का बखाँण शुणाँया, अरह् जुण्जे लोग बीमार थिऐ अरह् से आछो हंणों चहाँव थिऐ; तिनू सोभी भे प्रभू ऐ चाँग्गै भले करे। 12जबे देस ऊछाँदो लागो तअ तिनू बारह खास-चैले ऐ आऐयों प्रभू यीशू खे बुलो, के “हे प्रभू जी, ऐबे लोग ईथै शे बिदा करह्, किन्देंखे के ऐजे लोग ऊँडे-पुडे के गाँव, गाँऊजी दे ज़ाले; अरह् आप्णे रंहणों अरह् किऐ खाणों का भे ईन्त्तजाँम कर्लें, किन्देंखे के आँमें ईथै शून-शान जागे दे असो।” 13प्रभू यीशू ऐ तिनू खास-चैले खे बुलो, “तुँऐं ही ईन लोगो खे किऐ खाणों खे दियों” चैले ऐ बुलो, “आँमों कैई सिर्फ पाँच रोटी अरह् दो माँछ़ी के सुवाऐं ऊको किऐ ने आथी; अरह् जे आँमें ज़ाऐयों, ईनू लोगो खे किऐ भोजन मोल्लै लियाऊँबे तअ तबे ठीक असो” परह् ऐजे लोग तअ पाँच हजार मरोद् के ऊडे-पुडे असो। 14तबे प्रभू यीशू ऐ आप्णे चैले खे बुलो, के “ईनू बादे लोग पचाष-पचाष के पंग्त्ति दे बईठाल़ो।” 15अरह् चैले ऐ तैष्णों ही करो, अरह् तिनू बादे लोग तैष्णेंं ही बईठाल़े जैष्णों प्रभू ऐ बुली थो थियों। 16तबे प्रभू यीशू ऐ सेजी पाँच रोटी अरह् दो माछ़ी आप्णी हाथो दी कअरी, अरह् स्वर्गो के ढबे दे:खियों धन्यबाद कअरा, अरह् सैजी रोटी, माछ़ी च़ुड़ी-चूड़ियों चैले कैई देंदे रूऐ, जू चैले तिनू लोगो खे बाँडो। 17जबे तिनू सोभिऐ छ़कियों खाऐ पाव, तअ तबे चैले ऐ बंचे अंदें टूक्ड़े की बारह् शैक्ड़ी शियों लाऐयों टिप्पी।
संत्त-पतरसे प्रभू यीशू मसीया माँने
(मत्ती 16:13-20; मरकुस 8:27-30)
18जबे प्रभू यीशू ऐक्लाल़े दे प्रार्थना कर्दे लागे, तअ चैले भे तिन की गईलो थिऐ, तबे प्रभू यीशू ऐ चैले शो पुछो, “लोग मुँखे का बुलो?” 19तिन्ऐं जबाब दिता, “संत्त-यूहन्ना नहाँण-कराँणों वाल़ा, अरह् कुँऐं बुलो ऋषी-एलिय्याह, अरह् कुँऐं बुलो, के कुँऐ पुराँणा ऋषी जीऊँदा हऐ रूवा।” 20प्रभू यीशू ऐ चैले शो पुछो, “परह् तुँऐं मुँखे का बुलो?” संत्त-पतरस ऐ जबाब दिता, “पंण्मिश्वर का मसीया।” 21तबे प्रभू यीशू ऐ तिनू आप्णें चैले खे सम्झाऐयोंं बुलो, के चींत्ते थुऐ कोसी कैई किऐ ने बुले।
आप्णी मऊँत्ती के बरंम्बाँणीं
(मत्ती 16:21-23; मरकुस 8:31-33)
22तबे प्रभू यीशू ऐ बुलो “आदमी के बैटे खे जरूरी असो, के से बैजाऐ दु:ख भोग्ला, अरह् यहूदिया के ठग्ड़ै अरह् सियाँणे, प्रधान-याजकों, अरह् यहूदी-निय्म के शिखाँणों वाल़े तैसी छुटा जाँणियों मांरी देले, अरह् च़ीज़े देसे से मरियों ऊबा जीऊँदा हला।”
प्रभू यीशू पाछी चाल्णो का मतल्व का असो
(मत्ती 16:24-28; मरकुस 8:34; 9:1)
23प्रभू यीशू ऐ तिनू सोभी खे बुलो, के “जे कुँऐं मुँह पाछी आँणों चहाँव, तअ आप्णी बादी हिछ़या छुड़ी दियों, अरह् रोज-रोज आप्णें दु:खो शुँल़ी-फ़ाँशी टिपियों मुँह फाछी चालो। 24किन्देंखे के जू कुँऐं आप्णी जीयाँन बचाँणी चहाला, से तियों जीयाँन गवाँला; परह् जुण्जा कुँऐं मेरी ताँईऐ आप्णी जीयाँन गवाँला, सेजा ही आप्णी जीयाँन बंचाला। 25जे कोसी आदमी खे बादी संईसारी को राज भेंटलो अरह् से आप्णी जीयाँन गुवाँऐ देला तअ तैस्का का फाय्दा हंदा? 26जू कुँऐ मुँदा अरह् मेरी बातो दा सरमाला, तैसी ‘आदमी का बैटा’ भे, जबे आप्णी अरह् आप्णे परंम-पिता पंण्मिश्वर के अरह् पबित्र-स्वर्गदूत्तो के बड़ियाऐं आरी आला तअ तैस्दा से भे तेथै सरमाई ज़ाँदा। 27मुँऐं तुँओं खे सत्ती खास बात बुली लऐ, के जै-तोड़े खड़े असो, ईन मुँझी कंऐ जैष्णें भे असो, जू जाँव तोड़ी से पंण्मिश्वर को राज्य आँदे ने दे:खो ताँव-तोड़ी से मरी ने बल़्दे।”
प्रभू यीशू का रूप बद्ल़ा
(मत्ती 17:1-8; मरकुस 9:2-8)
28ईनू बातो हऐयों किऐ आठ देसो हुऐ, के प्रभू यीशू ऐ संत्त-पतरस, संत्त-यूहन्ना अरह् संत्त-याकूब आपु आरी साथी नींऐं, अरह् प्रार्थना कर्दे धारंह् गाशी हुटे। 29जबे प्रभू यीशू ऐ प्रार्थना करी ही लई थी, तअ तिन के मुँहों च़ैहेरे का रूप बद्ल़ी गुवा; अरह् तिन का च़ूग्गा चीट्टा-शाँख्ल़ा अरह् चंमक्दा लागा। 30अरह् दे:खो, मूसा अरह् ऋषी-एलिय्याह ऐजे दो मंरोद् प्रभू यीशू आरी पह्ली रूऐ थिऐ। 31प्रभू यीशू आप्णी पुरी शाँन-शोक्त्त आरी दे:खिऐ; तिन के मंर्णों के चर्चा करी लऐ थी; जुण्जी यरूशलेम दी हंदी थी। 32पतरस, अरह् तैस्के साथी नीज़राल़ी रूऐ थिऐ, अरह् जबे से आछे करियों बिकराल़िऐं; तअ तबे तिनू चैले ऐ प्रभू यीशू के बड़ियाऐ अरह् तिन की गईलो खड़े दो मंरोद् भे दे:खे। 33जबे सेजे दुन्नै ऋषी प्रभू यीशू कैई शे बिदा हंदे ही लागे थिऐ; तअ संत्त-पतरस ऐ प्रभू यीशू खे बुलो, “हे प्रभू! ऐजो आँमों खे कैत्रो आछ़ो असो; के आँमें भे ईथै असो! आँमें ईथै च़ींन ताँम्बू बाँणूबे, ऐक तुओं खे, ऐक ऋषी-मूसा खे, अरह् ऐक ऋषी-एलिय्याह खे।” से ऐजो ने जाँणों थिया, तैने का बुली लो। 34तैने ऐजो बुली ही लो थियों, के तैख्णी ऐक बाद्ल़ जियो आव; अरह् तैथू बाद्ल़ै तिनू चौऊँ ढबे शे घेरे अरह् से डरी गुऐ। 35तबे तेसी बाद्ल़ो शी ऐक धाव पढ़ी, “ऐ मेरा बैटा असो, मेरा च़ूणा-छ़ाँटा अंदा; ऐस्की बात शुणों।” 36तियों धाव पड़णों पाछ़ी तिन के प्रभू यीशू ऐक्ले ही दे:खिऐ, अरह् सेजे चैले चुप्पी रूऐ; अरह् जुण्जो किऐ तिन्ऐं दे:खो, तिन्दें के बारे दो तिन के तिनू देसे किऐ ने बुलियों थियों।
दुष्टो का भूचा अंदा टड्का चाँग्गा करा
(मत्ती 17:14-18; मरकुस 9:14-27)
37दुज़े के जबे से तियों धारंह् गेच़्छ़ै ऊदे आऐ, तअ ऐक बड़ा दल़ लोगो का प्रभू यीशू कैई भेंट कर्दे आऐ। 38तियों लोगो की बड़ी भीडो मुँझ्शो ऐकी आदमी ऐं लेल्याऐयों बुलो, “हे गुरू जी! मेरी तुँओं शी ऐजी बिनत्ती असो; के तुऐं मेरे बैटे गाशी आप्णी कृपा के नंजर पाव; किन्देंखे के मेरे ऐके बैटा असो। 39ऐस्दी ऐक दुष्ट-आत्त्मा संमाँव, जिन्दें लई ऐ ऐक-दंम लेल्लयादा लागो, अरह् सैजी दुष्ट-आत्त्मा ऐसी ऐशा मूछ़ौ-अकैड़ो के ऐस्के मुँह्-ज़ात्ती शी शैफ़ो लागो; सैजी दुष्ट-आत्त्मा ऐस्की चोंरी करो, अरह् ऐसी बड़ी मुष्किल शा छ़ूड़ो। 40मुँऐं तुँवारे चैले कैई शी ढाल-अरज करी थी, के ऐथू दुष्ट-आत्त्मा ऐस्शी आगू गाड़ो, परह् ऐ ऐष्णों करी ने सकी।” 41प्रभू यीशू ऐ जबाब दिता, “ओ बै-बिश्वाषी अरह् भ्रष्ट पीड़ी! हाँव तुँओं आरी कदी तोड़ी रंह्दा; अरह् तुँवारी ऐष्णी ही सऊँबा? आप्णा बैटा ईथै लियायों।” 42सेजा टंड्का नंजीक आँदा ही लागा थिया, के तिऐं दुष्ट-आत्त्मा ऐ तैसी थाँम्बड़ियों धनियों पट्कियों मूँछ़ा-मंरोड़ा, तबे प्रभू यीशू ऐ तियों बिच्की-आत्त्मा डाँटी-झाड़ी अरह् तैसी टंड्का चाँग्गा करियों तैस्की बाबा कैई दिता। 43तबे पंण्मिश्वर के तियों शक्त्ति दे:खियों सोभी लोगो के तुर्बाणच़ूटे।
आप्णी मऊँत्ती के बारे दे दोज़ी बर्मबाँणी
(मत्ती 17:22-23; मरकुस 9:30-32)
परह् जबे बादे लोगो के तिनू काँम-काज दे:खियों तूरंबाणच़ूंटे जुण्जे प्रभू यीशू ऐं करे; तअ तबे प्रभू यीशू ऐ आप्णे चैले खे बुलो। 44“तुँऐं लोग ऐजी बात काँन लाऐयों शुणों! आदमी का बैटा आदमी के हाथै थंम्बड़ाया ज़ाँदा।” 45परह् चैले के सेजी बात सम्झ दे ने आई, अरह् सेजी बात तिन के सम्झ शी बाऐर थी; अरह् सेजै चैले तियों बात पुछ़्णों शे प्रभू यीशू दे डरह् थिऐ।
सोभी शा बड़ा कुँण असो
(मत्ती 18:1-5; मरकुस 9:33-37)
46तबे चैले मुँझी ऐजी होढ़ लागी, के आँमों मुँझी सोभी शा बड़ा कुँण असो। 47प्रभू यीशू ऐ तिन के मंन-सासो के बात जाँणी पाऐ, अरह् ऐक नहाँन्ड़िया तिन्ऐं आपु कैई बऐदियों खड़ो करो। 48अरह् प्रभू यीशू ऐ तिनू आप्णें सैले खे बुलो, “जुण्जा कुँऐं मेरे नाँव शा ऐथू नहाँन्ड़िया का माँन-समाँन करला, तअ से मेरा माँन-समाँन करला; अरह् जुण्जा कुँऐं मेरा माँन-समाँन करह्, से मेरे भेज्णों वाल़े का भे माँन-समाँन करह्; किन्देंखे के तुँओं सोभी मुँझ्षा जुण्जा छ़ुटे शा छ़ुटा असो, सैजा ही बड़ा असो।”
जुण्जा तुवाँरे खिलाफ ने आथी, सेजा ही तुवाँरी गईलो असो
(मरकुस 9:38-40)
49तबे यूहन्ना ऐ बुलो, “हे प्रभू! आँमें ऐक आदमी तुवाँरे नाँव शा दुष्ट-आत्त्मा गाड़्दे दे:खी थुवा, अरह् आँमें तैसी रूका; किन्देंखे के से आँमों आरी आऐयों तुओं पाछ़ी ने चालदा।” 50प्रभू यीशू ऐ बुलो, “तैसी रूके ने! किन्देंखे के जुण्जा तुवाँरे बिरूध दा ने आथी; सैजा तुवाँरी गईलो असो।”
सामरी लोग प्रभू यीशू आरी बाद बिरूध करह् थिऐ
(मत्ती 8:19-22)
51जबे प्रभू यीशू के स्वर्गो दे ऊँबे ज़ाँणों के देसो नंजीक आऐ; तअ तबे तिन्ऐं यरूशलेम खे ज़ाँणों का पाक्का बिचार करा। 52प्रभू यीशू ऐ आपु शे आगे आप्णे दूत्त भेजे। के से सामरिया के गाँव दे हुटो, अरह् तिन खे जागा तियार करह्। 53परह् तेथै के लोगे ऐ प्रभू यीशू के आणों का बिरोध करा; किन्देंखे के से यरूशलेम खे ज़ादे लागे थिऐ। 54जबे तिन के चैले याकूब अरह् यूहन्ना ऐ ऐजो दे:खो तअ से बुल्दे लागे, “हे प्रभू! कियों तुँऐं ऐजों चहाँव के आँमें अज्ञाँ दियों, के असमाँनों शी आग साल, अरह् ईनू लोग स्वाह्-भस्मं करी देली?” 55परह् प्रभू यीशू ऐ पाछू फीरियों तिनू डाँटे-झाड़े (अरह् बुलो, “तुँऐं ने जाँण्दे के तुँऐं कैष्णी आत्त्मा के असो”)। 56अरह् तबे से कोसी ओकी गाँव दे हुटे।
प्रभू यीशू का चैला बण्णों का मोल
(मत्ती 8:19-22)
57जबे प्रभू यीशू आप्णें चैले आरी बाटो पूंडे ज़ाँदे लागे थिऐ, तअ कुँणिऐ तिनखे बुलो, “जेथै-केथी तुँऐं ज़ाले हाँव भे तुँओं पाछ़ी-पाछ़ी आँदा।” 58प्रभू यीशू ऐ तैस्खे बुलो, “सियाल़ी, के भे ढोऐं असो, अरह् चोंड़ू ऐ भे कुँह्लो बाँणी थुऐ, परह् आदमी के बैटे के मूँडो घोसर्णो खे भे जागा ने आथी।” 59अरह् प्रभू यीशू ऐ कोसी ओकी खे बुलो, “मुँहँ पाछी आ” तैने तिन खे जबाब दिता, “हे प्रभू! आगे मुँह आप्णा बाबा दाब्दा ज़ाँणों दियों।” 60प्रभू यीशू ऐ तैस्खे बुलो, “मुँड़्द आप्णें मुँड़्दे दाब्णों दियों; परह् तुऐं ज़ाऐयों पंण्मिश्वर के राज्य के खुष्खबरी का प्रचार करह्।” 61तबै कोसी ओकिऐ बुलो, “हे प्रभू! हाँव तुँओं पाछी आँदा, परह् मुँह आगे ज़ाँणों दियो, जू हाँव आप्णे घईले कैई शी बिदाई लह्ऊँ।” 62प्रभू यीशू ऐ तैस्खे बुलो, “हंल़ो की आड़ी गाशी हाथ थऐयों जुण्जा कुँऐ पाछ़्खे दे:खो, सैजा पंण्मिश्वर के राज्य ज़ूगा ने आथी।”
Выбрано:
लूका 9: sri
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2022, Wycliffe Bible Translators, Inc. All rights reserved.