Эхин 10
10
Нойһоо үдэн гараһан арадууд
1Нойн гурбан хүбүүд болохо Шээм, Хаам ба Яапэдэй угай бэшэг эндэһээ эхитэй. Үерэй һүүлээр гурбуулаа тэдэ хүбүүдтэй болоо һэн.
2Яапэдэй хүбүүд: Гоомэр, Магоог, Мадай, Яваан, Тубаал, Мээшэх ба Тираас. 3Гоомэрэй хүбүүд: Ашхэнааз, Рипаат ба Тогармаа.
4Яваанай хүбүүд: Элишаа, Таршииш, Киттиим, Доданиим. 5Тэдэнэй үри һадаһад далайн эрьеэр, мүн олтирогуудаар ажаһуугша зоной эхи табигшад болоно. Элдэб газар дайда, уг унги, айл аймагуудаар ажаһуугша, өөрын тусгаар хэлэтэй зон тэдээнһээл эхи абаа.
6Хаамай хүбүүд: Күүш, Мицраим, Пүүт ба Ханаһаан. 7Күүшэй хүбүүд: Сэбаа, Хавилаа, Сабтаа, Раамаа ба Сабтэхаа. Раамаагай хүбүүд: Шэбаа ба Дэдаан. 8Күүшэй хүбүүн Нимроод мүн. Тэрэ дэлхэй дээрэ түрүүшын хүсэтэ баатар байгаа. 9Эзэнэй туһаар тэрэ ехэ ангуушан болоо. Тиимэһээ зон иигэжэ хэлсэдэг: «Эзэнэй үршөөл хайратай мэргэн ангуушан Нимроод мэтэ». 10Түрүүшээр тэрэнэй хаан түрэ Вавилоон, Ээрэх, Аккаад, Калнээ гэдэг хотонуудһаа бүридэдэг бэлэй. Эдэ бүгэдэ Шинаар гэдэг орон нютагта оршодог байгаа. 11Энэ газар дайдаһаа тэрэ Ассири ошожо, тэндээ Нинэвээ, Рэхобоот-Ир, Каалах 12мүн баһа Рээсэн (энэнь Нинэвээ ба ехэ хото Каалахай хоорондо) хотонуудые бодхоогоо һэн.
13Мицраимһаа үдэн гараа: лүүдшүүд, анаамууд, лэһаабууд, наптуухууд, 14патруусшууд, каслуухууд, тэдэ хоёрһоо пилиштүүд гараһан, каптоорууд.
15Ханаһаан ууган хүбүүндээ Сидоон гэжэ нэрэ үгэбэ. Тэрэнэй бусад хүбүүдынь Хээт, 16Евүүс, Эмоор, Гиргааш, 17Хиив, Архээ, Сиин, 18Арваад, Цэмээр болон Хамаат гэгшэд. Хожомынь ханаһаан обогтон үргэнөөр тараа бэлэй. 19Тэдэ Сидоон хотоһоо урагшаа далайн эрьеын Гааза хотын оршом болохо Гэраар хүрэтэр, тэндэһээ зүүн тээшээ Лааша хүрэтэр Цэбоһиим, Содом, Гоморро, Адмаа гэдэг хотонуудые бии болгобо.
20Иигэжэ Хаамай бүхы үри һадаһад өөһэд өөһэдын хэлэтэй обог аймагууд боложо, өөһэдын мэдэлэй харьяата газар нютагтай болоһон гэхэ.
21Яапэдэй аха Шээм Ээбэрэй хүбүүдэй элинсэг эсэгэ болоно. 22Шээмэй хүбүүд гэбэл: Элаам, Ашшуур, Арпахшаад, Лүүд ба Араам.
23Араамай хүбүүд: Ууц, Хуул, Гээтэр ба Мааш.
24Арпахшаад Шээлах гэдэг хүбүүтэй һэн, Шээлахэй хүбүүн Ээбэр. 25Ээбэр хоёр хүбүүтэй болоһон юм. Тэрэ үедэ олон обог аймагуудай бэе бэеһээ таһаран һалажа байһан ушарһаа Ээбэр нэгэ хүбүүндээ «хубаарилга» гэһэн удхатай Пээлэг гэжэ нэрэ үгэбэ. Нүгөөдэ хүбүүнэйнь нэрэ – Ёктаан.
26Ёктаанай хүбүүд: Алмодаад, Шээлэп, Хацармаавэт, Яарах, 27Һадораам, Узаал, Диклаа, 28Обаал, Абимаһээл, Шэбаа, 29Опиир, Хавилаа, Ёваав. Эдэ хүбүүд булта Ёктаанай болоно.
30-31Иигээд Шээмэй үри һадаһад өөр өөрын хэлэтэй обог аймагууд боложо, Мэшаа хотын ба зүүн зүгтэ хада уулатай газарта оршодог Сэпаар хотын хоорондо һуурижаһан гэхэ.
32Нойн хүбүүдһээ эдэ олон обог аймагууд үдэжэ, хожомынь ами аминдаа арадууд болоһон гэхэ. Үерэй удаа тэдээнһээл бүхы дэлхэйн арад түмэн эхи абаһан түүхэтэй.
Выбрано:
Эхин 10: BurBBL2024
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024