Эхин 33
33
Яков Эсаав ахатайгаа уулзана
1Яковай харахада, урдаһаань Эсаав ерэжэ ябаба, тэрээнтэй дүрбэн зуун хүн ябалсана. Тиигээд тэрэ Лэһаа, Рахээлые тус бүриин хүүгэдүүдтэйнь, хоёр зараса эхэнэрые тус бүриин үхи хүүгэдүүдтэйнь суг илган байлгаад, 2зараса эхэнэрнүүдые хүүгэдтэйнь хамта урда, хойноһоонь Лэһаае үхи хүүгэдтэйнь, удаань Рахээлые Иосифтой хамта зогсообо. 3Өөрөө Яков урагшаа гаража, ахадаа дүтэлхэ зуураа тэрэнэйнгээ урда долоо дахин газар мүргэбэ.
4Зүгөөр Эсаав тэрээндэ гүйжэ ерээд, шангаар тэбэрин, үбсүүндээ хашаба, таалаба, тиигээд хоюулаа бархирбад. 5Эсаав һэгээ орожо, эхэнэрнүүдые, үхибүүдые обёороод, асууба:
– Эдэшни хэд гээшэб?
Яков харюусаба:
– Танай барлаг болохо намайе Бурхан үреэжэ, иимэ үхи хүүгэдые үршөөгөөл.
6Зараса эхэнэрнүүд үхибүүдтэеэ ерэжэ, Эсаавта доро дохибо. 7Һүүлээрнь Лэһаа хүүгэдтэеэ ерэжэ дохибо, эгээ һүүлдэ Иосиф Рахээл эхэтэеэ ерээд, Эсаавта доро дохин мүргэбэ.
8– Минии урдаһаа тиимэ олон мал һүрэг эльгээһэншни ямар удхатайб? – гэжэ Эсаав асууба.
– Хүндэтэ ахамни! Танай һанаанда тааруу байхын тула бэлэг эльгээгээ һэм, – гэжэ Яков харюусаба.
9– Намда хамаг юумэн биил даа, – гэбэ Эсаав. – Энэ эд зөөриеэ өөртөө үлөө.
10– Үгы, – гэжэ Яков харюусаба. – Хэрбээ танай һанаанда минии тааруу болбол үгэһэн бэлэгыемни абыт даа. Намайе илдам һайханаар угтаһантнай, танайнгаа нюур шарай дахин хараһамни Эзэн Бурхантай уулзажа байһандал мэтэ! 11Минии танда асарһан бэлэг, үреэлым тогтоон абыт. Бурханай ашаар намда хамаг юумэн бии.
Энэ мэтээр Яков Эсаавые ехэл гуйжа, тэрэнь бэлэгыень абаба.
12– Зай, манайда ошоё даа. Би урдатнай ороод, зам заажа үгэхэб, – гэжэ Эсаав хэлэбэ.
13– Хүндэтэ ахамни! Үхибүүдни бага, хүсэ шадалгүй. Тиигээдшье малаймни нарай түлтэйе хараа ёһотойт. Нэгэ үдэрөөр шанга туубал, үхэхэ. 14Тиимэһээ та намһаа урид харигты. Харин би бага балшар хүүгэдэйнгээ, түл малайнгаа аяар аажамхан ябажа, танай Сэһиир нютаг ерэхэб, – гэжэ Яков харюусаба.
15– Тиигээ һаа, би хэдэн зарасаяа үлөөһүү. Тэдэ танда туһалха, – гэжэ Эсаав дурадхаба.
– Хэрэггүй даа. Эгээл шухалань – танай һанаанда минии тааруу болоһон ушар юм, – гэжэ Яков хэлэбэ.
16Тэрэл үдэртөө Эсаав һөөргөө Сэһиир тээшээ мордобо. 17Харин Яков холо ябаха дурагүй байһан ушарһаа тэндэһээ холо бэшэхэнэ отог бодхоогоод, малдаа хашаа бариба. Тиимэһээ тэрэ газар «Суккоот», оршуулбал, «отогууд» гэжэ нэршэһэн юм.
18Удаань Яков Иордан голые гаталан, Ханаһаан орон руу ерээд, Шэхээм хотын хажууда буусаяа түхеэрэн байрлаба. Иигэжэ Яков Месопотамиин хойто зүгһөө гараад, Ханаһаан орон нютагта амар мэндэ ерээ бэлэй. 19Тэрэ хотын һуури анхан табигша Шэхээм гэдэг хүнэй хүбүүн Хамоорой үри һадаһадһаа зуун мүнгөөр тэрэ уужам газарые үмсын зөөри болгон, худалдажа абаад, майхангуудаа бодхоон һуурижаба. 20Тэндээ тэрэ үргэлэй шэрээ түхеэржэ, «Израильшуудай шүтэдэг Эзэн Бурханай үргэлэй шэрээ» гэжэ нэрлээ һэн.
Выбрано:
Эхин 33: BurBBL2024
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024