YOANO 6
6
1KUNYUMA kwa bintu bebi, kwakaya Yisu ku dixia dia kitelenena kia Ngalili, kidi kia Tibeliasa. 2Yi kimbukuma kinene kiakamulanda bwalo bwakamonabo bilayixilu biakakwencayi kudi batati ba masama. 3Yisu lolo akabanda pa lupongo yi akaxikama papa yi beyi banci. 4Mo Kidikixilu (kitula kia bena Yuda) kiakadi pepe.
5Mbwôso Yisu akasangola meso anci, akamona kimbukuma kinene kilolwa kudiyi, yi akatôyela Filipi ene, Tunakwola mampa kupai, bixedya bantu baba ? 6Mo akatôya noku ndo kumwelekyesa, bwalo bwakalubukwayi mikyenci bixekwencayi. 7Filipi akamupingasa ene, Mampa a diso dia nkama ibidi ya denalio kasobakuka, bixeangata muntu mwoso isanga kicini kibende. 8Umo mweyi anci, Andelo, Ximono Pita mwakunyenci, akamwambila ene, 9Kunu kudi mwana a babalumi udi yi mampa atano a bali, yi tuyixi tubende, kate nako kudi beci bwalo bwa bantu bungi noku ? 10Yisu ene, Nuxikiki bantu. Mu kidi kieki lolo mwakadi maxindi mangi. Mbwôso babalumi bakaxikama, lwedi lwabo Iwakadi pepe yi nkone itano. 11Yisu lolo akangata mampa, yi pakadi amaxinga, akakwabanyila bantu bamaxikama ; mo nako kabidi yixi, ku lwedi lwakadilabo. 12Yi pakadi bamakwokutixibwa, akatôyela beyi banci ene, Nukokyeyi bi cini biamasala, bitaxencimina kintu kioso kanana. 13Mbwôso bakabikokyeya, yi bakakwolubisa bibata disangi yi bibidi tô tô tô bia bicini bia mampa atano a bali biakasala kudi bantu bakadya. 14Mbwôso pakamona bantu kilayixilu kiakakwencayi, bakatôya ene, Sôsôlwo, you udi mudimuxi you ulolwa ku loboko.
15Yisu lolo, pakalubukwayi ene, baxelwa mukwata ku ngulu ndo kumuteka fumu a mbata akancuka kabidi kuya ku lupongo, mikyenci mutupu. 16Mo pakakwela butuku, beyi banci bakapweka ku mai ; 17yi pakadi bamakondela mu kibusu, bakalekyeia mu kitelenena kuya ku Kapenaumu. Kwakadi lolo mwedima nkyekyu, yi Yisu akadi kasolwa kudibo. 18Yi mai akatepa tepa bwalo bwa lupepele lukola lwakapupuya. 19Mbwoso pakadi bamafuba “ stadia ” ndo masangi abidi yi itano ndo masangi asatu, bakamona Yisu udi mu kwenda kulu kwa mai, ulu kulwa pepe yi kibusu, yi bakadi yi bowa. 20Kaninga akabambila ene, Meme kayou ; kanucini. 21Ndo biakanangabo kumwangata mu kibusu ; yi kibusu kiakafika nkyekyu nkyekyu ku mbata kwakayabo.
22Mankyelo kimbukuma kiakakwemana ku dixia dia kitelenena bakamona kamo kabusu kakyenako katena kamokamwe, yi Yisu akadi kayili yi beyi banci mu kibusu, kate beyi banci bakancuka mikyeabo ; 23(kaninga tumo tubusu tubende twa ku Tibeliasa twakalwa pepe yi kidi kiakadyabo mampa pakadi Fumu amaxinga ;) 24mbwôso pakamona bantu Yisu kiena koku ndo beyi banci, mikyeabo bakakondela mu tubusu yi bakalwa ku Kapenaumu badi mu kupalala Yisu.
25Yi pakadi bamamusañana ku dixia dia kitelenena bakamwambila ene, Labi, wapulwa kunu ku kikondo kai ? 26Yisu akapingasa yi akabambila ene, Sôsôlwo, sôsôlwo, nwatôyela ene, Nungwapalala, kumoni bwalo bunwakamona bilayixilu, kate bwalo bunwakadya mampa yi nwakakwokuta. 27Kanukambidi bidya biancimina, kate bidya biasala ku môyo ă kô kô, binanupa Mwana a muntu, bwalo bwamamutekyela Tete kilembetelu, isanga Ncembi. 28Mbwôso bakamwambila ene, Tunakwenca kai bituxekisa makisa a Ncembi ? 29Yisu akapingasa yi akabambila ene, Kunu kudi mudimo ă Ncembi, ene, nwetabuxili you amatumayi. 30Ndo biakamwambilabo ene, Kilayixilu kai kiencenca owe, bituxemona yi bituxekwetabuxila ? Wakisa kai ? 31Batetecu bakadya “ mana ” mu mbata a kisobe, bea biakafundibwa ene, Akabapa bidya bia mu diulu kudya. 32Mbwôso Yisu akabambila ene, Sôsôlwo, sôsôlwo, nwatôyela ene, kakwakadi Mosese akanupela bidya bia mu diulu ; kate Tetemi unupapa bidya bia sôsôlwo bia mu diulu. 33Bwalo budi bidya bia Ncembi bebi biapweka mu diulu, yi bipapa loboko môyo.
34Mbwôsô bakamwambila ene, Fumu, utupi bebi bidya matuku moso. 35Yisu akabambila ene, Meme ndi bidya bia môyo ; you ulolwa kundi kanakwombwa ncala nyô, yi you ungwetabuxila meme kanakwombwa nyota nyô. 36Kate napunwambila ene, nwamangumona kabidi yi kanusokwetabusa. 37Bungi bwa bantu bangupapa Tete banalwa kundi ; yi you ulolwa kundi, meme kinamupiya pô. 38Bwalo bunamapweka mu diulu, kumoni kukisa nyinga yamene mikyemi, mo nyinga ya you akangutuma. 39Yi kunu kudi nyinga ya you akangutuma ene, bintu bioso biakampayi, meme kixencimisa kintu kimokimwe, kate nxekibisa ku dituku dia ku sula. 40Yi kunu kudi nyinga ya Tetemi, ene, muntu mwoso amona Mwana, umwetabuxila, uxeakala yi môyo ă kô kô ; yi meme nakumubisa ku dituku dia ku sula.
41Mbwôso bena Yuda bakamupindudila bwalo bwakatôyayi ene, Meme ndi bidya biamapweka mu diulu. 42Yi bakatôya ene, Ki yei ndo Yisu, mwana a Yosefe, utwamalubukwa tetenci yi mamanci ? Ape yei atôya nkyekyu beci ene, Namapweka mu diulu ? 43Yisu akapingasa yi akabambila ene, Kanupindulanani. 44Muntu kabiyi kulwa kundi kutena Tete akangutuma amamuputa ; yi meme nakumubisa mu dituku dia ku sula. 45Ku mikanda ya badimuxi kwamafundibwa ene, Banakweyexebwa bungi bwabo kudi Ncembi. Muntu mwoso amakwombwa kudi Tete, yi amakweya, ulolwa kundi. 46Kakulexi yi kutôya ene, muntu amamona Tete ; you mutupu udi a Ncembi, yei amamona Tete. 47Sôsôlwo, sôsôlwo, nwatôyela ene, You ungwetabuxila meme udi yi môyo ă kô kô. 48Meme ndi bidya bia môyo. 49Batetenu bakadya “ mana ” mu mbata a kisobe yi bakamafwa. 50Bebi noku bidi bidya biapweka mu diulu bixebidya muntu, yi bitaxefwayi. 51Meme ndi bidya bebi bitani yi môyo biamapweka mu diulu ; aka muntu unakala amadya bidya bebi unakala yi môyo matuku moso ; mo bidya binapa bidi munyu ămene, bwalo bwa môyo ă loboko.
52Mbwôso bena Yuda bakakwelesañana mbata, ene, Ape yei unatupa munyu ănci kudya beci ? 53Biakabambila Yisu ene, Sôsôlwo, sôsôlwo, nwatôyela ene, Kutena nunakala nwamadya munyu ă Mwana a muntu, yi nwamanwa maxi anci, kanuna yi môyo munda mwenu. 54You udedya munyu ămene, unonwa maxi amene, udi yi môyo ă kô kô, yi meme nakumubisa ku dituku dia ku sula. 55Bwalo budi munyu ămene bidya bia sôsôlwo, yi maxi amene adi mai a sôsôlwo. 56You udedya munyu ămene, unonwa maxi amene ndo asala munda mwamene, yi meme munda mwanci. 57Bea biakangutuma Tete a môyo, yi meme ngwakala yi môyo ku bwalo bwa Tete, ndo bidi you ungudedya meme, yei kabidi unakala yi môyo ku bwalo bwamene. 58Bebi ndo bidya biakapweka mu diulu. Kumoni bea biakadya batete yi bakafwa ; you udedya bidya bebi, unakala yi môyo kô ko. 59Malo aa noku ndo akatôyayi mu kixingidilu biakakweyesayi mu Kapenaumu. 60Mbwôso beyi banci bangi, pakakwombwabo, bakatôya ene, Diyi dedi didi kukola ; ñani ubili kudiombwa ? 61Kaninga Yisu, akadi amadilubukila munda mwanci ene, beyi banci bamapindudila bwalo bobu, akabambila ene, Bwalo bobu bwamanuponesa ? 62Ape ndo nuxemona Mwana a muntu udi mu kuximuna kwakadiyi kalikali ? 63Kudi Mwoxixi upapa môyo, munyu kausotetowa kintu ; meyi anamanwambila adi mwoxixi, yi adi môyo. 64Kate banga badi yinenu batasokwetabusa. Bwalo bwakalubukwa Yisu bantu pôi bubangabanga bakadi kabasokwetabusa, yi muntu you uxemwenga. 65Yi akatôya ene, Ndo binapunwambila ene, Muntu kabiyi kulwa kundi kutena kwamamupebwa kudi Tete.
66Pôi kikondo kieki pakapiñana banga beyi banci bangi, yi bakadi kabasokwenda yinanci kabidi. 67Mbwôso Yisu akatôyela disangi yi babidi ene, Nonu kabidi nwakyeba kuncuka ? 68Ximono Pita akamwambila ene, Fumu, tunaya kudi ñani ? Owe udi yi meyi a môyo ă kô kô. 69Yi coco twamakwetabusa yi twamalubukwa ene, owe udi Muntu a babala a Ncembi. 70Yisu akabapingasa ene, Ki nakanusungula disangi yi babidi ? yi umoumwe udi yinenu udi diabolo. 71Akatôya lolo dia Yudaxi, a Ximono, muna Ixikalioto, bwalo buxemwenga you noku, muna disangi yi babidi.
Выбрано:
YOANO 6: Luna_NT
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© La Société biblique de Genève