Matyu 2
2
Amam gawaimi owa' mogawa Godi mafi'i mati Jisas
(Lu 2:1-7)
1Maria kola Jisas Betlehem, etap hiagoma Judia. Nogota anama anona aman king Herot dembinai ma gavman nape numafi enis epes sape anona etap hiagoma Judia. Akwa'w kolana ea', anom amam dambami gawaimi owa' mogawa Godi mafi'i laogoma gani aon natefima mafi'i mafi'i mataga Jerusalem ea' mahali'as ma'i, 2“Dei' awani dambaini nataga king dembinai esis Judai nape eti? Afa' ata' wapani gani aon natefima, wati ondo'w anani'wi kwatefi, ea' dei' wafi'i wa'i onda' lotumana ofela agel ananinai.”
3Nemaf anama Dembinai King Herot name' basef amama, okom ananinai aona natanea nafe' na'i nambimb awani inima netaga damben nili'amonana. Ea' esis hiesi sape Jerusalem wapoti' umbamahas sa'i nambimb nemaf aonai notaga. 4Ea' king Herot nefala amam pris hiami dambami maloma amam dambami mawalipasa mi'uli Godi hiami mafi'i ea' nahali'am na'i, “Aman anama Krais God nandandepana nosapa'ana niefi'i, nambimb anan neataga wambel enima?”
5Ea' amam magwamana basef ma'i, “Mama'wana kolana Betlehem, etap hiagoma Judia. Dei' main, anona profet fowa'inai na'i basef mail okwatip ma'i, God na'i,
6‘Ipe' Betlehem etap hiagoma Judia, ipe' ina epes falafipei, owa'. Ipe' ina pape pagi' ma amam gavman dambami mumafi ipe' Judia, owa'. Dei' main, anona Dembinai anona nemaf neataga wambel ipe'inai Betlehem. Anan nope dembinai ma ipe' amam nematawa Ae'ipei Israel ea' numafi ipe' hipei ma peape andeande'.’ ”
7Ea' king Herot nandambaho' etin nofalai amam gawaimi amama mafi'i aon natefima mandambaho' mandatama etifigin nahali'am na'i, “Maina nemaf ipe' pati ondo'w akwama kwataga?”
8Amam ma'ipana ma ea', king Herot nasapa'am mafe' Betlehem na'ipam na'i, “Ipe' fo'o pegolopa awani inima. Ama pitilin, pifi'i pi'ipa ae' wapoti'. Ae' wapoti' a'i efe' itilin enda' lotuman efela agel ananinai lu'una wapoti'.”
9Amam mame' basef ananimi ea', mohafel makwaha anan mafe' mati ondo'w akwama fowa' mali' matolo'w gani aon natefima, kwafe' kwali'amam. Ea' kotawa ipat anama ilif awani inima Jisas napeinai. 10Amam mati ondo'w akwama kotawa na'ama ea' wandanifel endilisi. 11Ea' mawis ipat anama mati awani inima naloma mama'wana Maria. Ea' amam mindiwa nembawa motawa manda' lotumana mafela agel ananinai lu'una. Ea' mupalia paus amamumi mowafa hiahaom amama amam matalom otamba lu'wami alogw bu'wami ma'ami mase'anam. Ea' mase'ana gol naloma enin paura sa'i frankinsens, alogw bu'wami ma'ami maloma anom sanda bu'wami sofalam sa'i mer, mase'anam awani inima Jisas. 12Mase'anam ea', God na'ipam na'i, “Ipe' ina ata' pitanima pefe'ma king Herot, owa'. Ea' pila anona eaf pitanima pefe' wambel ipe'inai.”
Ea' amam maila anona eaf motanima mafe' wambel amamunai laogoma.
Josep naloma waulu'mana sao'wa awani Jisas safe' sapani gani laogoma etap hiagoma Isip
13Amam amama gawaimi mafe' ea', Josep na'oh nandondo'oh anona ensel Dembinai nafi'mai anan na'ipana na'i, “Ine' hafel ne'wa awani inima neloma mama'wana anani'wi pefe' laogoma etap hiagoma Isip. Ea' pipani Isip ama nambimb peme' ae' i'ipina wapoti', pitanimani. Dei' main, King Herot atuwasi ni'ipa soldia ananimi mogolopa awani inima ma mohan neaga'.”
14Ea' Josep nehafel owamb anama atona nao'wa awani naloma mama'wana Maria safe' Isip laogoma. 15Josep napani Isip ama King Herot naga', ea' nao'was sotanimani si'i anom basef Dembinai God na'ipa anona aman profet, amama dei' mataga mandawalap ma'i, God na'i, “Nogalome ae'anai napani Isip ea' ae' efalana notanima nafi'i.”
King Herot na'ipa soldia mafe' maha awasi amam hiami maga'
16King Herot nogawa amam amama gawaimi ina mutanimani, owa', mambaso'mana mafe' anona eaf. Ea' okom ananinai wandafuna kwapete' na'i noha Jisas neaga'. Dei' anan okom nandanda'ma basef amama amam gawaimi mali' ma'ipanam ma nemaf anama ondo'w kwataga anai. Na'ama dei' nasapa' anom soldia mafe' Betlehema wambel anama nape felefele'i maha awasi amam hiami dei' solam dambaim mafe' mataga afagof biam malo'ami maga' hi'alam.
17Ea' dei' anom basef fowa' God na'ipanam profet Jeremaia mataga endilisi mandawalap. 18Anan na'i,
“Esis sape anona wambel Rama same' esis salef. Esis salef sandahowe mehip sa'i uwahipisa awasi sa'i, ‘Ano'w nemata'w Resel kwalopa batawisa'w akwa'usi, kwandaiwa' ma nambimb enis sonda' okom akwo'unai bo'ona awanena, owa'. Dei' main, awasi akwa'usi saga' hi'alas.’ ”
Josep naloma waulu'mana sao'wa awani sotanimani safe' Nasaret
19Josep ata' napani Isip ama King Herot naga', ensel Dembinai Godi nafe' na'ipana ma na'oh nandondo'oh 20na'i, “Ine' hafel ne'wa awani neloma mama'wana anani'wi pitanima pefe' etap hiagoma Israel. Dei' main, amam ma'i meaha awani neaga' maga' hi'alam.”
21Ea' Josep nesafel nao'wa awani naloma mama'wana anani'wi safe' sataga etap hiagoma Israel. 22Ea' Josep name' basefa anona aman Arkelaus king Herot nogalomana nataga nofa' wambel naho'ofana nape dembinai king ma esis Judai. Ea' Josep umbamahana ma neafe' Judia. Ea' na'oh nandondo'oh wapoti', God na'ipana ma neafe' anama etap hiagoma Galili. 23#Lu 2:39; Ais 11:1, 53:2; Mt 12:34, 23:3Ea' nafe' nape enin taun sa'uni sofalagon Nasaret si'i anom basef amam profet fowa' ma'iami ma'i, “Owagama esis sofalana si'i Nasaretinai.”
Basef amama dei' mataga mandawalap endilisi.
Выбрано:
Matyu 2: aojF
Выделить
Поделиться
Копировать
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fru.png&w=128&q=75)
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2013, Wycliffe Bible Translators, Inc. All rights reserved.