These Scriptures are a new translation into the Naskapi language spoken at Kawawachikamach, Quebec. We the Naskapi people have been eager to have our own translation of the Bible. For many decades we have had to make do with Scriptures that were translated for indigenous languages that are different from our own: most notably Bishop Horden's Moose Cree New Testament and prayer book, and Rev. W. G. Walton's prayer book. The Naskapi Development Corporation has been engaged with this work since the 1990s, facilitated by Wycliffe Bible Translators and the Canadian Bible Society. The Naskapi community grateful acknowledges the help of all who participated with us in producing these Scriptures. Our prayer is that these Words of God will be cherished by our people for generations to come.

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ The Naskapi text is copyright © Naskapi Development Corporation Naskapi Development Corporation Kawawachikamach, Québec G0G 2Z0 Canada New Testament published by the Canadian Bible Society (CBS) © 2007 Canadian Bible Society 10 Carnforth Road, Toronto Ontario M4A 2S4 Canada

ᒋᓴᒪᓂᑐᐤ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ God's Word in Naskapi

ᒥᓯᐛ ᒪᒃ ᒪᒧᐤ ᐊ ᑎᓯᒡ ᒋ ᐃᑐᑕᐊᐅᒡ ᒋᓴᓴ ᐊᓐᑕ ᕈᒻ ᒋᓴᐅᒋᒪᐛ ᐊ ᑕᔨᒋ, ᑈᓚᑦ ᑲ ᐃᓯᓂᐧᑲᓱᔨᒋ᙮ ᐊᑯ ᓂᑎᒥᒄ ᑲ ᐃᓯ ᒪᒥᓯᒪᒡ ᐊ ᐃᔅᒋᔄᒡ, “ᐅ ᒪ ᓇᐸᐤ ᓂ ᒥᔅᑯᐛᓇᓐ ᐊ ᒥᒋᑭᒐᔅᒋᒪᑦ ᓂᑦ ᐃᔨᒥᓇᓇ, ᐊ ᒋᑕᐊᒧᐛᑦ ᒐᒋ ᒋᓯᐧᑯᐛᔨᒋ ᓱᓇᔭᔪᐤ ᕈᒻ ᒋᓴᐅᒋᒪᐛ ᓯᓴᕋ, ᑭᔭ ᐊ ᐎᑎᒧᐛᑦ ᐎᔾ ᐊ ᐊᐎᑦ ᙭, ᒋᓴᐅᒋᒪᐤ ᐊ ᐃᑕᐃᓱᑦ᙮”
ᑈᓚᑦ ᒪᒃ ᒋ ᑯᒂᒋᒪᐤ ᐊ ᐃᑕᑦ, “ᒋᔾ ᐊ ᒍᐤ ᐃᔪᒡ ᐅᒋᓴᐅᒋᒪᒧᐛᐛ ?” ᒋᓴᔅ ᒪᒃ ᒋ ᐃᓯ ᐎᑎᒧᐛᐤ ᐊ ᐃᑕᑦ, “ᐊᐅᑯᓐ ᐊ ᐃᔅᒋᔄᔨᓐ᙮”
ᐊᑯ ᑈᓚᑦ ᒂ ᐃᑕᑦ ᐊᓂᔭᔪᐛ ᑲ ᓂᑲᓂᐱᔨᒋ ᐊᔭᒥᐊᐅᒋᒪᐛ ᑭᔭ ᐊᓂᔭᔪᐛ ᐃᔪᐛ ᐊᓐᑕ ᑲ ᒪᒧᐱᔨᒋ, “ᓇᒪ ᓇᔅᒡ ᓂ ᒥᔅᑭᒺᓐ ᒥᒋᑥᐅᓂᔪᐤ ᒐᒋ ᐊᔭᑦ ᐅ ᓇᐸᐤ᙮”
ᐊᑯᑕ ᐊᑐᐎᔅ ᓱᒃ ᑲ ᐎ ᑕᑈᒡ ᐊ ᐃᔅᒋᔄᒡ, “ᐅ ᓇᐸᐤ ᒥᒋᐱᔨᑕᐤ ᑕᓐ ᐊ ᐃᓯ ᒋᔅᑯᑎᒪᒐᑦ ᒥᓯᐛ ᐊ ᐃᔅᐱᓴᔨᒡ ᒍᑎᔭ ᐊᔅᒋᔪᐤ᙮ ᑲᓕᓕᒡ ᒋ ᐅᒋ ᒋᒋᐱᔨᑕᐤ ᐊ ᒋᔅᑯᑎᒪᒐᑦ ᐅᑕ ᒪᒃ ᒋ ᐃᓯ ᒋᔅᑯᑎᒪᒐᐤ ᒋᕈᓯᓕᒥᒡ᙮”

ᐃᔅᐱ ᒪᒃ ᑲ ᐸᑕᐧᒃ ᐊᓂᔭᔪᐤ ᑈᓚᑦ, ᒋ ᑯᒂᒋᒪᐤ, “ᑲᓕᓕᒡ ᐊ ᐅᒋᐤ ᐅ ᓇᐸᐤ ?” ᐃᔅᐱ ᒪᒃ ᒐᔅᒐᔨᑕᐧᒃ ᑈᓚᑦ ᑲᓕᓕᒡ ᐊ ᐅᒋᔨᒋ ᒋᓴᓴ ᐊᑯ ᑲ ᐃᑎᓴᐛᑦ ᐊᕈᑕ ᐊ ᑕᔨᒋ ᐛᔅ ᑲᓕᓕ ᐊᔅᒋᒡ ᒋ ᒋᓴᐅᒋᒪᐎᔪᐛ᙮ ᒪᒂᒡ ᒪᒃ ᐊᓐᑕ ᒋᕈᓯᓕᒥᒡ ᒋ ᑕᐤ ᐊᕈᑦ᙮
ᐃᔅᐱ ᒪᒃ ᐊᕈᑦ ᐎᔭᐱᒪᑦ ᒋᓴᓴ ᓇᔅᒡ ᑕᑈ ᒋ ᓯᒋᔭᓱᐤ ᐛᔅ ᒋ ᐸᑎᒻ ᓂᓇᐧᑯᐤ ᐊ ᐃᓯ ᑎᐸᒋᒪᑭᓄᔨᒋ ᑭᔭ ᓴᔅ ᓇᔅᒡ ᑕᑈ ᐛᔅᑭᒡ ᒋ ᐎ ᐛᐱᒪᓯᐱᓐ᙮ ᒋ ᐱᑯᓴᔨᑎᒻ ᑭᔭ ᒐᒋ ᐛᐱᒪᑦ ᒋᓴᓴ ᐊ ᐃᑐᑎᒥᔨᒋ ᒪᒥᔅᑲᒡ ᒐᒂᔪᐛ᙮ ᐃᔅᐱ ᐱᔭᓱᐛᑭᓄᔨᒋ ᒋᓴᓴ, ᐊᕈᑦ ᓇᐅᔅ ᒪᒪᒡ ᒋ ᐃᓯ ᑯᒂᒋᒪᐤ᙮ ᓇᒪ ᒪᒃ ᒐᒂᔪᐤ ᐅᒋ ᐃᓯ ᐎᑎᒪᑯᐤ᙮ ᐊᓐᒡ ᒪᒃ ᑲ ᓂᑲᓂᐱᒡ ᐊᔭᒥᐊᐅᒋᒪᐅᒡ ᑭᔭ ᐊᓐᒡ ᑲ ᒋᔅᑯᑎᒪᒐᒡ ᐎᓱᐛᐅᓂᔪᐤ ᒋ ᓂᐳᐎᒡ ᐊᓐᑕ ᓱᒃ ᐊ ᐃᔨᒥᒡ ᓂᓇᐧᑯᐤ ᒐᒂᔪᐛ ᐊ ᐃᓯ ᒪᒥᓯᒪᒡ ᒋᓴᓴ᙮ ᐊᑯ ᒪᒃ ᐊᕈᑦ ᑭᔭ ᐅᑦ ᐊᓯᒪᑭᓂᓯᒪ ᒋ ᐎᔭᐅᒡ ᒋᓴᓴ ᐊ ᒪᔭᔨᒪᒡ ᑭᔭ ᐊᔭᒡ ᐊ ᐃᑐᑐᐛᒡ ᐊ ᐳᔅᑎᔅᑭᒧᑎᔭᒡ ᐊᑯᐱᔪᐤ ᐊ ᒥᔽᓯᔨᒡ᙮ ᐊᑯ ᒪᒃ ᐊᕈᑦ ᑲᐤ ᒂ ᒋᐛᑎᓴᐛᑦ ᒋᓴᓴ, ᑈᓚᑕ ᐊ ᑕᔨᒋ᙮ ᐊᑯᑕ ᒪᒃ ᐊᓐᑕ ᒂ ᐅᒋ ᐎᒐᐛᑭᓂᑐᑕᑐᒡ ᐊᕈᑦ ᑭᔭ ᑈᓚᑦ ᐛᔅ ᐊᓐᑕ ᐅᑕᒡ ᒋ ᐛᐧᑲᑎᑐᐅᒡ᙮


ᑈᓚᑦ ᒋ ᓂᔅᑐᐅᓇᐤ ᐊᓂᔭᔪᐛ ᑲ ᓂᑲᓂᐱᔨᒋ ᐊᔭᒥᐊᐅᒋᒪᐛ, ᒍᐤ ᐃᔪᐛ ᑲ ᓂᑲᓂᔅᑯᐛᔨᒋ ᑭᔭ ᐊᓂᔭᔪᐛ ᐃᔪᐛ ᐊᓐᑕ ᑲ ᑕᔨᒋ ᒐᒋ ᐃᔨᒪᐊᑦ᙮ ᐊᑯ ᒂ ᐃᑕᑦ, “ᔅᒋ ᐸᓱᐛᐛᐤ ᐅ ᓇᐸᐤ ᐅᑕ ᐊ ᑕᔭᓐ ᐊ ᐃᑕᒄ ᐊᒋ ᒥᒋᑭᒐᔅᒋᒪᑦ ᐃᔪᐛ ᐊ ᐃᑕᑦ ᒐᒋ ᓂᔅᑯᔅᑐᐛᔨᒋ ᒋᓴᐅᒋᒪᐛ᙮ ᓂᒋ ᓂᑐ ᒋᔅᒐᔨᒪᐤ ᐅᑕ ᐅᑎᔅᑯᐤ ᐊ ᑕᔭᒄ ᓇᒪ ᒪᒃ ᓂ ᒥᔅᑭᒺᓐ ᑕᓐ ᑲ ᐃᓯ ᒥᒋᑐᑎᒧᒂ᙮ ᐊᕈᑦ ᑭᔭ ᓇᒪ ᐅᒋ ᒥᔅᑭᒺᐤ ᑲ ᒥᒋᑐᑎᒥᒂᓂ, ᐛᔅ ᒥᓐ ᑲᐤ ᒋ ᐸᒋ ᒋᐛᑎᓴᐛᐤ᙮ ᐅ ᓇᐸᐤ ᓇᒪ ᒐᒂᔪᐤ ᐅᒋ ᒥᒋᑐᑎᒻ ᒐᒋ ᐅᒋ ᐃᑕᔨᑕᑯᓂᔨᒡ ᒐᒋ ᓂᐸᐊᑭᓄᐅᑦ᙮ ᐊᑯ ᒪᒃ ᓂᑭ ᐃᑎᓱᐛᓐ ᒐᒋ ᐸᐱᓯᔅᑕᐛᑭᓄᐅᑦ ᑭᔭ ᒐ ᐱᔅᑎᓂᒃ,” ᐊᐅᑯᓐ ᑲ ᐃᔅᒋᔄᑦ ᑈᓚᑦ᙮ ᐊᓯᑯᒻ ᐱᐳᓇ ᒪᒃ ᐃᔅᐱ ᐛᑎᒋᐱᒋ ᐎᒪᔅᑲᒐᐅ-ᒥᑯᓴᐅᓐ ᑲ ᐃᓯᓂᐧᑲᑕᒡ, ᑈᓚᑦ ᒋᐸ ᐱᔅᑎᓇᐱᓐ ᐸᐃᒄ ᐊᐛᔪᐛ ᐊᒋ ᒋᐸᐛᑭᓄᔨᒋ᙮
ᐊᑯ ᐊᓐᒡ ᐃᔪᒡ ᑲ ᐃᓯ ᒪᒧᐤ ᑕᑈᒡ, “ᓂᐸᐊᐧᒄ ᒋᓴᔅ᙮ ᐸᕋᐸᔅ ᐊᐅᒄ ᐱᔅᑎᓇᐧᒄ᙮” ᐅ ᒪᒃ ᓇᐸᐤ ᐸᕋᐸᔅ ᒋ ᒋᐸᐛᑭᓄᐤ ᐛᔅ ᒋ ᒋᒋᐱᔨᑕᓯᐱᓐ ᐊ ᒥᒋᐱᔭᐊᑭᓄᔨᒋ ᒋᓴᐅᒋᒪᐛ ᐊᓐᑕ ᒋᕈᓯᓕᒥᒡ᙮ ᑭᔭ ᒋ ᓂᐸᐊᓯᐱᓐ ᐊᐛᔪᐛ᙮
ᑈᓚᑦ ᒪᒃ ᒋ ᐎ ᐱᔅᑎᓇᐤ ᐊᓂᔭ ᒋᓴᓴ ᐊᑯ ᒥᓐ ᒂ ᑯᒂᒋᒪᑦ ᐊᓂᔭᔪᐛ ᐃᔪᐛ ᒐᒋ ᐱᔅᑎᓇᑦ ᒋᓴᓴ᙮ ᐊᑯ ᒪᒃ ᒂ ᐃᓯ ᒥᔅᑎ ᑕᑈᒡ, “ᒋᔅᑕᔎᑕᐧᒄ, ᒋᔅᑕᔎᑕᐧᒄ !”
ᐊᐅᒄ ᐊᑯ ᓂᔍᐤ ᑈᓚᑦ ᑲ ᐃᑕᑦ, “ᒐᒄ ᒥᒋᑐᑎᒧᐅᓂᔪᐤ ᒪᒃ ᑲ ᐃᑐᑕᐧᒃ ᐅ ᓇᐸᐤ ᐊᓂᔭ ᒐ ᐅᒋ ᓂᐸᐊᑭᓄᐅᑦ ? ᓂᑭ ᐃᑎᓱᐛᓐ ᒐᒋ ᐸᐱᓯᔅᑕᐛᑭᓄᐅᑦ ᐊᑯ ᒐ ᐱᔅᑎᓂᒃ᙮”
ᐊᑯ ᐊᓐᒡ ᐃᔪᒡ ᐃᔭᐱᒡ ᒂ ᐃᓯ ᑕᑈᒡ ᓇᔅᒡ ᓱᒃ ᐊ ᓂᑐᐛᔨᒪᒡ ᒋᓴᓴ ᒐᒋ ᒋᔅᑕᔎᑕᑭᓄᔨᒋ᙮ ᒋ ᓴᐧᑯᒋᒪᐅᒡ ᒪᒃ᙮ ᐊᑯ ᑈᓚᑦ ᑭᑈ ᒂ ᐃᔅᒋᔄᑦ ᒐᒋ ᐃᑐᑕᑭᓄᐎᒡ ᐅᔭ ᑲ ᐃᓯ ᓂᑐᐛᔨᑎᒥᔨᒋ᙮ ᒂ ᐱᔅᑎᓇᑦ ᐊᓂᔭ ᓇᐸᐛ ᐸᕋᐸᔅ ᑲ ᐃᓯᓂᐧᑲᓱᔨᒋ ᐊᓐ ᑲ ᒋᒋᐱᔨᑕᒂ ᐊ ᒥᒋᐱᔭᐊᑭᓄᔨᒋ ᒋᓴᐅᒋᒪᐛ ᑭᔭ ᐊᒋ ᓂᐸᐃᐛᒂ᙮ ᐊᑯ ᐊᓐᒡ ᐃᔪᒡ ᒂ ᐱᔅᑎᓂᒧᐛᑭᓄᐎᒡ ᒐᒋ ᐃᑐᑐᐛᒡ ᒋᓴᓴ ᑕᓐ ᑲ ᐎ ᐃᑐᑐᐛᒡ᙮


ᒪᒂᒡ ᒪᒃ ᐊ ᐊᑎ ᐱᒧᑕᐊᒡ ᒋᓴᓴ ᐊᓐᑕ ᒐ ᒋᔅᑕᔎᑕᑭᓄᔨᒋ, ᒋ ᓂᒋᔅᑯᐛᐅᒡ ᓇᐸᐛ ᓴᐃᒥᓐ ᐊ ᐃᓯᓂᐧᑲᓱᔨᒋ, ᓴᐃᕆᓐ ᐅᑕᓇᒡ ᐊ ᐅᒋᔨᒋ, ᒪᒂᒡ ᐅᑕᓇᒡ ᐊ ᐎ ᐸᒋ ᐃᑐᑕᔨᒋ᙮ ᒋ ᒪᑯᓇᐅᒡ ᒪᒃ ᒂ ᒥᔭᒡ ᐊᓂᔭ ᒋᐱᔭᑎᒂ ᒐᒋ ᐅᓂᑲᑕᐛᔨᒋ, ᐊᑯ ᒂ ᐊᑎ ᓇᓴᐛᔨᒋ ᒋᓴᓴ᙮ ᒥᒐᑦ ᒪᒃ ᐊᐛᔪᐛ ᒋ ᓇᓴᐅᑯᐤ ᒋᓴᔅ ᑭᔭ ᐃᔎᐛ ᒋ ᒪᑕᑯᐤ ᑭᔭ ᒋ ᒧᔅᑯᐛᑎᑯᐤ᙮ ᐊᑯ ᒋᓴᔅ ᒂ ᒂᔅᒋᑲᐳᔅᑐᐛᑦ ᐊᓂᔭ ᐃᔎᐛ ᒂ ᐃᑕᑦ, “ᒋᔨᐛᐤ ᐃᔎᑐᒄ ᒋᕈᓯᓕᒥᒡ ᑲ ᐅᒋᔭᒄ, ᐊᑲᐎᔾ ᒧᔅᑯᐛᓯᒄ, ᒋᔨᐛᐤ ᒧᔅᑯᐛᑎᓱᒄ, ᑭᔭ ᒋᑦ ᐊᐛᓯᒧᐛᐅᒡ ᒧᔅᑯᐛᑕᐧᑯᒡ᙮ ᐛᔅ ᐊᔅᒄ ᐊᑐᐎᔅ ᒋᑭ ᐊᔨᒥᓐ ᐊᑯᑕ ᒪᒃ ᒐ ᐃᓇᓄᐅᒡ, ‘ᓱᐛᔨᑕᑯᓱᐅᒡ ᐊᓐᒡ ᐃᔎᐅᒡ ᐊᑲ ᓂᑕ ᐅᒋ ᐊᔭᐛᒡ ᐊᐛᓴ, ᐊᓐᒡ ᐊᑲ ᓂᑕ ᐅᒋ ᓄᓴᓇᐊᐅᓱᒡ᙮’
ᒐ ᐃᔅᐱᔅ ᐊᔨᒪᒡ ᒪᒃ ᐅ ᒐ ᓂᓇᐧᑲᑕᔨᒧᓇᓄᐅᒡ ᒋᑭ ᓂᑐᐛᔨᑎᒧᒡ ᐊᐛᓐᒋ ᐃᔭᐱᒡ ᒐᒋ ᐱᑎᔅᑕᐅᑯᒡ ᐱᔅᑯᑎᓇᐛ ᒪᒃ ᒐᒋ ᐊᑯᓇᐅᑯᒡ ᐱᔅᑯᑎᓇᓴ ᐃᔅᐱᔅ ᐎ ᒐᒋ ᐛᐎᓯᒐᔨᑕᒡ᙮
ᐛᔅ ᐅ ᐊ ᐃᔅᐱᔅ ᑎᒂᒡ ᓂᓇᐧᑲᑕᔨᒧᐅᓐ ᒪᒂᒡ ᐊ ᐊᔅᑲᔅᑯᐅᑦ ᒥᔅᑎᒄ ᑕᓐ ᒐ ᐃᔅᐱᔅ ᑎᒂᒡ ᓂᓇᐧᑲᑕᔨᒧᐅᓐ ᐸᒂᑎᑯᐅᒐ ?” ᐊᐅᑯᓐ ᑲ ᐃᑕᑦ ᒋᓴᔅ ᐊᓂᔭᔪᐛ ᐃᔎᐛ ᑲ ᒧᔅᑯᐛᑎᑯᑦ᙮
ᒋ ᓂᓱᐅᒡ ᒪᒃ ᑲᒋᒧᑎᒡ ᑭᔭ ᐎᔨᐛᐤ ᐊ ᐃᑐᑕᐊᑭᓄᐎᒡ ᐊᓐᑕ ᒐ ᐊᓯᒋᓂᐸᐊᑭᓄᐎᒡ ᒋᓴᓴ ᓂᐸᐊᑭᓄᔨᒐᓂ᙮

ᐃᔅᐱ ᒪᒃ ᐛᑎᑕᒡ ᐊᓂᔭ ᐱᔅᑯᑎᓇᔪᐤ, ᐅᔅᑎᒂᓂᑭᓐ ᑲ ᐃᓯᓂᐧᑲᑕᔨᒡ, ᐊᑯᑕ ᑲ ᒋᔅᑕᔎᑕᒡ ᒋᓴᓴ ᒋᐱᔭᑎᑯᒡ᙮ ᐊᑯ ᐊᓂᔭᔪᐛ ᓂᓱ ᑲᓂᑕᐅᒋᒧᑎᔨᒋ ᐅᐱᒪ ᐊᓐᑕ ᐃᑐᐤ ᐊ ᑕᑦ ᒋ ᐊᑯᒋᓂᔪᐛ᙮ ᐊᑯ ᒋᓴᔅ ᒂ ᐃᔅᒋᔄᑦ, “ᓄᑕ, ᐛᐸᔨᑎᒧᐅᒡ, ᐛᔅ ᓇᒪ ᒋᔅᒐᔨᑎᒧᒡ ᑕᓐ ᐊ ᐃᑎᒡ᙮” ᐊᑯ ᐊᓐᒡ ᐊᓯᒪᑭᓂᓯᒡ ᒂ ᐎᐅᑕᐅᑐᒡ, ᐊᑯᑕ ᑲ ᐅᒋ ᐎᔭᔨᑕᒡ ᐊᐛᔪᐛ ᒐ ᐊᔭᔨᒋ ᐊᓂᔭᔪᐛ ᐅᑦ ᐊᐱᒋᑕᐅᓂᔪᐛ᙮
ᒋ ᓇᓂᐳᐅᒡ ᐊᓐᑕ ᐊᐛᓐᒋ ᐊ ᑭᓄᐛᐱᒡ ᐊ ᒪᔭᔨᒥᑯᔨᒋ ᐊᓂᔭᔪᐛ ᒍᐤ ᐃᔪᐛ ᑲ ᓂᑲᓂᔅᑯᐛᔨᒋ ᐊ ᐃᔅᒋᔄᔨᒋ, “ᒋ ᐎᒋᐊᐤ ᑯᑎᑲ ᐊᐛᔪᐛ, ᒋᑭ ᐎᒋᐃᓱᐤ ᒪᒃ ᑕᑈ ᙭ ᐊ ᔭᐅᒂ, ᐊᓂᔭ ᒋᓴᒪᓂᑐᐤ ᑲ ᐅᑎᓇᑦ᙮”
ᐊᓯᒪᑭᓂᓯᒡ ᑭᔭ ᒋ ᒪᔭᔨᒪᐅᒡ ᒋᓴᓴ, ᐊᑯ ᒂ ᓇᑕᒡ ᒥᒋᒪ ᒂ ᐎ ᒥᓇᐊᒡ ᐊ ᐎᓯᑲᐧᑭᒥᔨᒡ ᓱᒥᓇᐳᔪᐤ᙮ ᒋ ᐃᑕᐅᒡ ᑭᔭ, “ᐎᒋᐃᓱᐤ ᒪᒃ ᑕᑈ ᐊ ᐊᐎᓇ ᒍᐤ ᐅᒋᓴᐅᒋᒪᒧᐛᐛ᙮”
ᒋ ᒋᑭᒧᑕᑭᓄᐎᔪᐤ ᒪᒃ ᒥᓯᓇᐃᑭᓂᔪᐤ ᐃᑉᕈᐤ, ᓚᑎᓐ ᑭᔭ ᑯᕆᒃ ᐊ ᐃᓯ ᐃᔨᒥᓇᓄᐅᒡ, ᐅᒋᐱᔭᑎᑯᒥᒡ ᐊᓐᑕ ᐃᔅᐱᒥᓯᔅ ᒋᓴᔅ ᐅᔅᑎᒂᓂᒡ ᐊᑎᔅᑕᔨᒡ, “ᐊᔪᑯᓐ ᐅᔭ ᒍᐤ ᐃᔪᒡ ᐅᒋᓴᐅᒋᒪᒧᐛᐛ᙮”
ᐸᐃᒄ ᐊᓐ ᑲᒋᒧᑎᑦ ᐊᓐᑕ ᑲ ᒋᔅᑕᔎᑕᑭᓄᐅᑦ ᑭᔭ ᐎᔾ ᒋ ᒪᔭᔨᒪᐤ ᒋᓴᓴ ᐊ ᐃᑕᑦ, “ᓇᒪᔭᐤ ᐊ ᒪᒃ ᒋᔾ ᙭ ? ᐎᒋᐃᓱᐤ, ᑭᔭ ᓂᔭᓐ ᐎᒋᐃᓇᓐ᙮”
ᐊᓐ ᒪᒃ ᑯᑎᒃ ᑲᒋᒧᑎᑦ ᒂ ᐎᑎᒧᐛᑦ ᐊᓂᔭ ᐎᒋ ᒋᒧᑐᐛ ᐊ ᐃᑕᑦ, “ᓇᒪᐎᔾ ᐊ ᒋ ᑯᔅᑕᐤ ᒋᓴᒪᓂᑐᐤ ? ᔅᒋ ᐃᓯ ᑎᐸᔅᑯᓂᑯᓇᓄᐤ ᑕᐱᔅᑯᓐ ᐎᔾ ᐊ ᐃᓯ ᑎᐸᔅᑯᓇᑭᓄᐅᑦ᙮ ᒋᔭᓄᐤ ᒪᒃ ᐃᓯᓇᑯᓐ ᒐᒋ ᒋᔅᑕᔎᑎᑯᐅᔭᐧᒄ ᑕᓐ ᑲ ᐃᓯ ᒥᒋᑐᑎᒪᐧᒄ᙮ ᐅ ᒪᒃ ᓇᐸᐤ ᓇᒪ ᐅᒋ ᒥᒋᑐᑎᒻ᙮”
ᐊᓐ ᒪᒃ ᑲᒋᒧᑎᑦ ᒋ ᐃᑕᐤ ᐊᓂᔭ ᒋᓴᓴ, “ᒐ ᒋᔅᒋᓯᑐᐎᓐ ᐃᔅᐱ ᑎᑯᓯᓂᔨᓇ ᐊ ᒋᓴᐅᒋᒪᐎᔨᓐ᙮”
ᒋᓴᔅ ᒂ ᐃᑕᑦ, “ᒋᒋᐛ ᒋᑦ ᐃᑎᓐ, ᐊᓄᒡ ᒋᑭ ᑕᓇᓄᐤ ᐸᕋᑕᐃᓯᒡ, ᐊᓐᑕ ᐊ ᒥᔽᔨᑕᒂᒡ ᐊ ᑕᓄᐅᒡ᙮”

ᓴᓯᑲᓐ ᒪᒃ ᐊ ᐊᐱᑕᒋᓯᑲᒡ ᐊᑯ ᒂ ᑎᐱᔅᒋᐱᔨᒡ ᒂ ᐊᑎ ᐅᑲᔅᑕᔭᒡ ᒥᓯᐛ ᐊᓐ ᐊᔅᒋᔾ᙮ ᐸᑐᔅ ᓂᔅᑐ ᑲ ᐃᔅᐱᔨᒡ ᐊᑯ ᒥᓐ ᒂ ᐊᑎ ᐛᓴᔭᒡ᙮ ᐊᓐᑕ ᒪᒃ ᒋᓴᐊᔭᒥᐊᐅᒋᐛᐱᒡ ᑲ ᐊᑯᑕᒡ ᐊᑯᐛᑲᐃᑭᓐ ᓇᔅᒡ ᒋ ᑕᔅᒋᐱᔪᐤ᙮ ᒋᓴᔅ ᒪᒃ ᒋ ᐃᓯ ᑕᑈᐤ, “ᓄᑕ, ᒋᔾ ᐊ ᑕᔨᓐ ᓂ ᐱᔅᑎᓇᐤ ᓂᑦ ᐊᒐᐧᒄ ᒐᒋ ᑭᓄᐛᔨᒥᑦ᙮” ᐃᔅᐱ ᒪᒃ ᐅᔭᔪᐤ ᑲ ᐃᔅᒋᔄᑦ ᐊᑯ ᒂ ᓂᐱᑦ᙮
ᐊᓐ ᒪᒃ ᐊᓯᒪᑭᓂᓯᐤ ᐅᒋᒪᐤ ᐃᔅᐱ ᑲ ᐛᐸᑕᐧᒃ ᑕᓐ ᑲ ᐃᔅᐱᔨᒡ, ᒋ ᒋᔅᑕᒋᒪᐤ ᒋᓴᒪᓂᑐᐛ ᑭᔭ ᒋ ᐃᔅᒋᔄᐤ, “ᒐᔅᑎᓇᔅ ᑕᑈ ᒋ ᑯᐃᔅᑯᑕᑎᓯᒐ ᐅ ᓇᐸᐤ᙮” ᐃᔅᐱ ᒪᒃ ᐊᓐᒡ ᐃᔪᒡ ᑲ ᐸᒋ ᑭᓄᐛᐱᒡ ᑲ ᐛᐸᑕᒡ ᑕᓐ ᑲ ᐃᔅᐱᔨᒡ, ᒋ ᒋᐛᐅᒡ ᐊ ᐅᑎᑕᒪᔅᒋᑭᓇᐅᓱᒡ ᐊ ᐛᐸᑎᔨᐛᒡ ᐊᔅᐱᔅ ᒥᓯᒪᔨᑕᒡ᙮ ᒥᓯᐛ ᒪᒃ ᐊᓐᒡ ᐃᔪᒡ ᑲ ᒥᔪ ᒋᔅᒐᔨᒪᒡ ᒋᓴᓴ ᑭᔭ ᐊᓐᒡ ᐃᔎᐅᒡ ᑲ ᐱᐸᐎᒐᐛᒡ ᒋᓴᓴ ᑲᓕᓕᒡ ᐅᒋ, ᐛᔪᐎᔅ ᐊᓐᑕ ᒋ ᓂᐳᐅᒡ ᐊ ᑭᓄᐛᐱᒡ᙮

ᒋ ᑕᐤ ᒪᒃ ᐊᓐᑕ ᓇᐸᐤ ᒍᓯᑉ ᐊ ᐃᓯᓂᐧᑲᓱᑦ ᒍᑎᔭ ᐊᔅᒋᒡ, ᐊᕆᒪᑎᔭ ᐊ ᐃᓯᓂᐧᑲᑕᔨᒡ ᒍᐤ ᐅᑕᓇᔪᐤ ᐊᒋ ᐅᒋᑦ᙮ ᒋ ᑯᐃᔅᑯᐱᒪᑎᓯᐤ ᑭᔭ ᓇᔅᒡ ᒋ ᒥᔽᔨᑕᑯᓱᐤ ᐅ ᓇᐸᐤ, ᑭᔭ ᐎᔾ ᒋ ᐊᓱᐛᐸᑎᒻ ᒋᓴᒪᓂᑐᐛ ᐅᒋᓴᐅᒋᒪᐅᓂᔪᐤ ᒐᒋ ᐅᑎᒋᐱᔨᒡ ᑭᔭ ᒋ ᐎᒋᐃᐛᐤ ᒍᐤ ᐃᔪᐛ ᐊ ᓂᑲᓂᔅᑯᐛᑭᓄᔨᒋ᙮ ᓇᒪ ᒪᒃ ᐅᒋ ᓇᐊᔨᑎᒻ ᑕᓐ ᑲ ᐃᓯ ᐃᑕᔨᑎᒥᔨᒋ ᒐ ᐃᑐᑐᐛᔨᒋ ᒋᓴᓴ ᑭᔭ ᓇᒪ ᐅᒋ ᓂᔅᑯᒧᐤ ᒐᒋ ᐃᑐᑐᐛᑭᓄᔨᒋ ᐊᓂᔭ ᑕᓐ ᑲ ᐃᑐᑐᐛᑭᓄᔨᒋ᙮ ᒋ ᓂᑐᐛᐱᒪᐤ ᑈᓚᑕ ᒂ ᓂᑐᑎᒧᐛᑦ ᒋᓴᓴ ᐎᔭᔪᐤ᙮ ᐊᑯ ᒪᒃ ᒂ ᐅᑎᓇᐧᒃ ᐊᓂᔭ ᒥᔭᔪᐤ ᒋᐱᔭᑎᑯᒡ ᐅᒋ, ᒂ ᐎᔎᔭᒋᓇᐧᒃ ᐱᒍᐎᔭᓂᒡ ᑭᔭ ᒂ ᓇᐅᔅᑕᑦ ᐊᓐᑕ ᐊᒋ ᐛᑎᒂᐱᔅᑲᐃᑭᓄᐎᒡ᙮ ᓇᒪ ᒪᒃ ᓂᑕ ᐅᒋ ᐊᐱᑎᓂᔪᐤ ᐊᓂᔭ ᑲ ᐛᑎᒂᐱᔅᑲᐃᑭᓄᐎᒡ ᐊᓐᑕ ᑲ ᐊᔅᑕᐛᑦ ᒋᓴᓴ ᐎᔭᔪᐤ᙮ ᐊᐅᒄ ᐅ ᐊ ᒋᓯᑲᒡ ᑲᒋ ᐊᔭᔅᑯᐎᔅᑕᑭᓄᐅᒡ ᐎᒪᔅᑲᒐᐅ-ᒥᑯᓴᐅᓐ ᑭᔭ ᒪᒃ ᓴᔅ ᒋ ᐸᓱᓇᑯᓐ ᐊ ᒍᐤ ᐊᔭᒥᐊᐅᒋᓯᑲᒡ᙮
ᐊᓐᒡ ᒪᒃ ᐃᔎᐅᒡ ᑲᓕᓕᒡ ᑲ ᐅᒋ ᐎᒐᐛᒡ ᒋᓴᓴ ᒋ ᐎᒐᐛᐅᒡ ᐊᓂᔭᔪᐛ ᒍᓯᐸ᙮ ᒋ ᐛᐸᑎᒧᒡ ᒪᒃ ᐊᓂᔭ ᒋᐱᐃᒋᐛᐱᔪᐤ ᑭᔭ ᑕᓐ ᑲ ᐃᑎᔅᑕᑭᓄᐎᒡ ᒋᓴᓴ ᐎᔭᔪᐤ ᐊᓐᑕ᙮ ᐊᑯ ᒪᒃ ᒂ ᒋᐛᒡ ᒂ ᐊᔭᔅᑯᔅᑕᒡ ᐊᓂᔭ ᑲ ᐎᒋᒪᑯᓯᔨᒋ ᒥᔅᑯᓱᐛ ᑭᔭ ᑐᒥᓂᑭᓇ ᐊᓂᔭᔪᐛ ᒐ ᐊᐱᒋᑕᒡ ᐊ ᒥᔪᐧᑲᒡ ᐊᓂᔭ ᒥᔭᔪᐤ᙮ ᐊᓂᔭ ᒪᒃ ᒍᐤ ᐅᑦ ᐊᔭᒥᐊᐅᒋᓯᑲᒥᔪᐤ ᒋ ᐊᔅᑕᔭᔅᑯᓯᐅᒡ ᐛᔅ ᐊᑯᓐ ᑲ ᐃᓯ ᐃᑎᓱᐛᑕᑭᓄᐎᒡ ᒋᓴᒪᓂᑐᐛ ᐅᐎᓱᐛᐅᓂᒡ ᒐ ᐃᑐᐛᒂ᙮

Počúvaj ᓗᒃ 23