Text: © The Bible Society of Ghana 2006 Audio: ℗ 2007 Hosanna

Sehwi - 2006 Edition (Drama NT)

Esahie Bible © Bible Society of Ghana, 2018.

Né anwonyerɛ abɔ biaa bie bɔ ye dumaa li Lasarɔso bɔ ofi Betania, bɔ ɔte Maria ne oliɛma Maata bɛ kuro ne. Maria he yeɛ ɔfale sakyeɛfona popale Awurade, ná ɔfale ye ti nwiaa nununi ye gya bo ne, na oliɛma Lasarɔso yeɛ né anwonyerɛ abɔ ye ne. Yiti oliɛma mmrasua nemɔ bɛsomane maa bɛwale Yesu berɛ beesele ye kyɛ, “Yieee, Awurade, bɔ ekuro ye dwirɛ ne, anwonyerɛ abɔ.”
Na Yesu tele ɛhe nen, ɔhane kyɛ, “Sɔ anwonyerɛ he, nna ewue anwonyerɛ ɔ; na mmom Nyameɛ animnyam ti ɔ, amaa ɔnate ɛhe aso bahyɛ Nyameɛ Awa ne animnyam.”
Né Yesu kuro Maata ne oliɛma brasua ne ne Lasarɔso bɛ dwirɛ Na ɔtele kyɛ ye nwo yɛ ye yea nen, olili elenyɔ wɔ nekaa bɔ né ɔwɔ ne. Na nziɛ ye, osele ye asuafoɛ nemɔ kyɛ, “Ɛmɔma yɛsa yɛhɔ Yudea!”
Na asuafoɛ nemɔ sele ye kyɛ, “Rabi, anomasi wa ala yeɛ Yudafoɛ bɛyɛle kyɛ bɛkɔboro wɔ nyɔboɛ ɔ, na esa kɔ dɔ bieku anaa?” Yeɛ Yesu buale kyɛ, “Aso nna dɔnhwere buru ne nyɔ yeɛ ɔte ɛlɛho ɔ? Sɛ ebie nate eyia a, onzoti, ofikyɛ onwu ewiase kanea ne. Nakoso sɛ ebie nate kɔngɔen a, osoti, ofikyɛ kanea biala nne ye nu.” Yesu hane sɔ dwirɛ nemɔ nen, ye si ye osele bɛ kyɛ, “Yɛ damvo Lasarɔso walafe, nakoso mekwaatingye ye.” Yeɛ ye asuafoɛ nemɔ sele kyɛ, “Awurade, sɛ walafe de a, nzaade ɔkɔte apɔ.”
Na Yesu de, Lasarɔso wue nwo dwirɛ yeɛ ɔhane ɔ; nakoso bɛ de, besusuli kyɛ nnafelɛ nwo dwirɛ yeɛ ɔhane ɔ. Afei Yesu sele bɛ pefee kyɛ, “Lasarɔso awu; na ɛmɔ ti ɔyɛ me fɛ kyɛ né nne dɔ ɔ, amaa ɔnate so ɛmɔale bali. Nakoso ɛmɔma yɛhɔ ye dɔ!” Yeɛ Tɔmase bɔ bɛfrɛ ye Ata ne, osele ye mmango asuafoɛ nemɔ kyɛ, “Ɛmɔma yɛ koso yɛhɔ bie, ná yɛne ye yɛɛwu!”

Na Yesu dwuli berɛ nen, onwuni kyɛ Lasarɔso ali asieleɛ ne anu ɛlɛnna dada. Né Betania pingye Yerusalem, ɔkɔyɛ kwanzii nyɔ; na né Yudafoɛ pee bawa berɛ kyɛ bɛbaayɛ Maata ne Maria yaakɔ, ɔnate b’eliɛma ne ati.
Na mmerɛ bɔ Maata tele kyɛ Yesu ɔ́ba nen, ooyiale ye; na Maria de, né ɔte awuro berɛ. Yeɛ Maata sele Yesu kyɛ, “Awurade, sɛ né ɛwɔ wa a, ahaa nniɛma bienzua ne anwu. Na kekesaala ye po, mese kyɛ nikyee biala bɔ ekobisa Nyameɛ nen, Nyameɛ kɔfa kɔma wɔ.”
Yesu sele ye kyɛ, “Eliɛma bienzua ne, okotingye bieku.” Na Maata sele ye kyɛ, “Mese kyɛ ewutingyelɛ ne anu, kyẽa bɔ ɔpɛ ye bo ne, okosa kotingye.” Na Yesu sele ye kyɛ, “Me ole ewutingyelɛ ne ɔne ngoa ne; ebiala bɔ ode me di ne, sɛ owu po a, okonya ngoa. Na ebiala bɔ ɔte ase ná ode me di ne, ongowu le. Ede he di anaa?” Na obuale ye kyɛ, “Yoo, Awurade, mede medi kyɛ wɔ ole Kristo ne, Nyameɛ Awa ne bɔ ɔ́ba wiase ne.”
Na ɔhane ɛhe nen, osa hɔle ɔɔfrɛle oliɛma Maria hã hyirele ye kudɛɛ kyɛ, “Kyerɛkyerɛniɛ ne, wawa, na ɔfrɛ wɔ.” Na ɔtele ɛhe nen, odwɔsole ndɛndɛ ooyiale ye. Né Yesu onnya oddwuli kuro ne anu; né ɔtɛwɔ nekaa bɔ Maata ooyiale ye ne. Yeɛ Yudafoɛ bɔ né bɛ ne Maria bɛwɔ awuro berɛ bɛyɛ ye yaakɔ ne, benwuni kyɛ wadwɔso ndɛndɛ wafite nen, belili ye si bɛhane kyɛ: Ɔ́kɔ asieleɛ ne aso dɔ okosũ.
Yeɛ Maria dwuli nekaa bɔ né Yesu wɔ ne, na onwuni ye nen, ɔkotole ye gya bo berɛ sele ye kyɛ, “Awurade, sɛ né ɛwɔ wa a, ahaa nniɛma bienzua ne anwu.” Na Yesu nwuni kyɛ osũ, ná Yudafoɛ bɔ bɛ ne ye wale ne koso besu nen; oguale anwongokoɔ sunzum nu, na ye wora bɔle. Na obisale kyɛ, “Nisua yeɛ ɛmɔfale ye bɛtole ɔ?” Bebuale ye kyɛ, “Awurade, bra baanea.” Yesu suni. Yiti Yudafoɛ nemɔ hane kyɛ, “Nea kyɛbɔ osi kuro ye dwirɛ ɔ!” Nakoso bɛ nu biemɔ hane kyɛ, “Biaa he bɔ ɔtele anyesiniwaaniɛ nye ye, yiti ahaa ɔngɔhora ngɔyɔ ye nwo hwee bɔ ɔngɔma biaa he ongowu ɔ?”

Yeɛ Yesu guale anwongokoɔ wɔ ye nu bieku, na ɔwale asieleɛ ne aso. Né ɔte nyɔboɛ sua, bɔ bafa nyɔboɛ bawaka ye noa ɔ. Na Yesu hane kyɛ, “Ɛ́mɔye nyɔboɛ ne!” Na bɔ wawu n’aliɛma brasua Maata sele ye kyɛ, “Awurade, kekesaala ye de, ɔbõ, ɔnate kyɛ owuli ɔ ɛlɛnna ɛhe.”
Yeɛ Yesu sele ye kyɛ, “Manga mangyire wɔ kyɛ, sɛ ede di a ekonwu Nyameɛ animnyam?” Yiti bɛyele nyɔboɛ ne. Na Yesu neane anwuro hane kyɛ, “Baba, meda wɔ ase kyɛ atie me ɔ. Me de, mese kyɛ etie me daa; na mmenia bɔ begyigyi wa ye ati yeɛ ɔmaa mahã sɔ ɔ, amaa ɔnate so bale bali kyɛ wɔ yeɛ ɛsomane me ɔ.” Na ɔhane sɔ nen, ɔteane nu serɛserɛ kyɛ, “Lasarɔso, fite bra!” Na bɔ wawu ne fite wale; né ɛtena kyekye ye gya ne ye sa, na eduku kyekye ye nyunu. Na Yesu sele bɛ kyɛ, “Ɛmɔsangye ye, ná ɛmɔma ɔhɔ!”

Na Yudafoɛ nemɔ anu pee bɔ bɛwale Maria berɛ, ná benwuni bɔ Yesu yɔle nen, belele ye belili. Nakoso bɛ nu biemɔ de, besili nu bɛhɔle Farasiifoɛ nemɔ berɛ bɛɛhane bɔ Yesu ayɔ ne behyirele bɛ. Yiti asɔfo mbanyi ne Farasiifoɛ nemɔ bɛmane badwafoɛ nemɔ beyiale, na bɛhane kyɛ, “Nzikyɛ yeɛ odi kyɛ yɛyɔ ɔ? Ofikyɛ sɔ biaa ne ɔyɔ nzɛngyerɛnneɛ pee. Sɛ yɛyakyi ye maa ɔtoa so sɔ a, mmenia amukoraa bekole ye bekoli, na Romanfoɛ kɔwa kɔɔsɛkye yɛ wa ne yɛ maen ne!”
Na bɛ nu ko bie bɔ ye dumaa li Kaifa, bɔ né ɔte ɔsɔfo panyi paa wɔ afoɛ hene anu ne, osele bɛ kyɛ, “Ɛmɔ de, ɛmɔnze hwee; ɛmɔndwene kyɛ ɔte paa ma yɛ, kyɛ sona ko kowu kɔma maen ye, bɔ ɔnate so maen ne amukoraa ngɔbɔ ɔ?” Na ɛhe de, nna ye bɔbɔ ye ti anu dwirɛ yeɛ ɔhane ɔ, na mmom kyɛ ɔte ɔsɔfo panyi paa wɔ sɔ afoɛ ne anu ati, ɔhyɛle ngɔm kyɛ ɔsɛ kyɛ Yesu wu ma maen ne; nna kyɛ maen ne ngome, na mmom kyɛ ɔkɔboaboa Nyameɛ mma bɔ bato bapete aseɛ mɔ so noa ɔkɔyɛ bɛ mmenia ko ɔ. Yiti ofi sɔ kyẽa ne bɔ ɔkɔ ɔ, bɛbɔle porɛ kyɛ bekohu ye. Yiti Yesu anye ye nwo ali pefee wannatenate wɔ Yudafoɛ nemɔ anu ko. Na ofili berɛ hɔle aseɛ bie bɔ opingye ɛserɛ so ɔ so, wɔ kuro bie bɔ bɛfrɛ ye Efraim so, na ɔne ye asuafoɛ nemɔ bɛtenane berɛ.
Né Yudafoɛ Abɔtra ne apingye, na mmenia pee befili b’aseɛ mɔ so bɛhɔle Yerusalem kyɛ bɛbaapete bɛ nwo koraka né Abɔtra ne adwu. Né bɛpena Yesu, na begyigyi asɔneyɛɛ sua ne anu berɛ ne, né bebisabisa bɛ nwo kyɛ, “Ɛmɔdwene ye nwo sɛ? Gyamea ɔngɔwa aluolue ne abo anaa?” Né asɔfo mbanyi ne Farasiifoɛ nemɔ bahyɛ mmeraa kyɛ, sɛ ebie se nekaa bɔ ɔwɔ a, ohyire bɛ ma bɛɛhye ye.

Počúvaj Yohane 11