Amis: O NO 'AMIS A FANGCALAY CUDAD FA^LOHAY KATATLEKAN ATO 'OLIC, TANENG (New Testament+)

O NO 'AMIS A FANGCALAY CUDAD FA^LOHAY KATATLEKAN ATO 'OLIC, TANENG

Nanoya, coroken ni Yis a mirakat ko tata'angay ato mamangay a niyaroaro' a mipatnak to Nga'ayay Ratoh to pakayniay i pikowan no Kawas. Mihaklong koya tosa ko safaw a tarokos i Cingraan. Ira ko papinapina a fafahiyan a mihaklong. Onini a fafahiyan i, o nano mafahfahay ko palafoay ato nano maadahay ko adada nangra. Oya nano mafahfahay ko papitoay a palafoay i, ci Maktala hananay a Mariya ko ccay. O roma i, ci Yoana o fafahi ni Kuca o citodongay to tayal i loma' ni Hiroti, ci Susana ato romaroma a 'alomanay a fafahiyan. O dafong nangra ko sapipadang nangra a matayal ci Yisan.


Masa'opo ko nai cowacowaay a niyaro' a finawlan a mi'araw ci Yisan. Yo masa'opoto ko finawlan i, patinako han ni Yis cangra a somowal,
<<Ira ko ccay a tamdaw a talaomah a mifolsak. Yo mifolsak cingra i, ira ko matfaday i lalan a sapaloma. Maripa' no tamdaw, kaenen no ma^feray a 'ayam konini. O roma a sapaloma i, matfad i fokloklohan. Talacowa molngaw ito, tona caay ka so^met ko sra saka, ma'icang koya lngaw. O roma a sapaloma i, matfad i cifadalay a sra. Haloya fadal a lomahad saka, ma'co koya lngaw. O roma a sapaloma i, matfad i nga'ayay a sra. Molngaw a lomahad konini a cihci to smo'ot,>> han Ningra.
Pasowal sa ci Yis, <<Pitngil kamo, o pakatngilay ko tangila a tamdaw,>> han Ningra.


Tayra i ci Yisan ko nisawawaan a milicay i Cingraan to tatodong nonini a tinako. Pasowal sa Cingra, <<Mapaflito i tamowanan ko pakakmoday a sowal to pakayniay i Kitakit no Kawas. Nikawrira, i taowanan sa i, o tinako ko sapasowal. Onini i, o saka^caaw paka'araw nangra to ninengnengan nangra. O saka^caaw ka fana' nangra to nitngilan nangra,>> han Ningra.


<<O tatodong nonini a tinako i, o matiniay. O sapaloma hananay i, o sowal no Kawas. Matiya o katfadan no sapaloma i lawac no lalan ko faloco' no romaroma a tamdaw. Mahrek cangra a mitngil i, ira ko Palafoay a mi'afas to sowal no Kawas i faloco' nangra. Onini i, o saka^caaw paso'lin nangra a mapa'orip. Matiya o matfaday i fokloklohan a sapaloma ko faloco' no romaroma a tamdaw. Yo mitngil cangra to sowal i, tangsol sa cangra a lipahak a milayap. Nikawrira, awaay ko palamitan i faloco' nangra. Saka, itiya a ccay ko pipaso'lin nangra, yo ira to ko salifet i, tangsol sa a mapolin. Matiya o matfaday a sapaloma i cifadalay a sra ko faloco' no romaroma a tamdaw. Talacowa mitngil cangra to sowal no Kawas, nikawrira, ira ko rawraw no faloco' to saki'orip ato 'anof to sakidafong ato sawi no acang a mi'co to sowal no Kawas. Saka, caay ka cihci to marohmay. O tatodong no matfaday a sapaloma i nga'ayay a sra hananay i, yo mitngil ko tamdamdaw to sowal no Kawas i, o mo^celay ato so'linay a faloco' ko sapi'imer ato kodaitay a faloco' a hinatala, tangasa i nika cihcian.


<<Milikat ko tamdaw to dawdaw i, awaay ko mitahpoay to sato. Awaay ko mitliay i la^no no kafoti'an. O tatlien ningra i padawdawan to sakata^ngad no micomoday a tamdaw.
<<O tatalahkal a ma^min ko masimeday a maamaan. O mamahapinang a ma^min ko nikilifan a dmak, a o kafana'anto no tamdamdaw.
<<Orasaka, pina'on kamo a mitngil. Nawhani o iraay ko nitatoyan i, o mamapatongal a mapafli cingra. O awaay ko nitatoyan i, halonitatoyan ako hananay ningra a mamangay a ma'afas,>> han ni Yis.


Tayra ci Yisan a minengneng ko ina ato salikaka Ningra. Nikawrira, 'aloman ko finawlan saka, awaay ko pakayraan nangra a miraod i Cingraan. Ira ko pasowalay i ci Yisan, <<Ira i papotal a tomireng ko ina ato salikaka Iso, mangalay cangra a mi'araw i Tisowanan,>> han ningra.
Pasowal sa ci Yis i cangraan, <<O mitngilay a mido^do to sowal no Kawas i, orira ko ina Ako ato salikaka Ako,>> han Ningra.


Yo ccay a romi'ad malahaklong ca Yis ato nisawawaan Ningra a midakaw to tamina. <<Tatata, milacal kita a tayra i ti:raw a lawac no fanaw,>> han ni Yis cangra a somowal. Saka, lowad sato cangra. Yo pakatamina cangra a milacal i, marda' ci Yis a mafoti'. Itiya i, talifahal sa a mafaliyos i fanaw, matomesto no nanom ko tamina saka, sacalemcem sa cangra. Tayra a miraod i ka'ayaw Ningra ko nisawawaan a mipalal i Cingraan, <<Singsiaw, singsiaw, o mamapatay to kita!>> han nangra.
Saka, lowad sato ci Yis a mikakter to fali ato lodis. Trep sato koya fali ato lodis. Sarimadac sato koya fanaw. Licay han ni Yis cangra, <<I cowaayto ko paso'lin no faloco' namo saw?>> han Ningra.
Safahka' sa cangra a matalaw. Saka, sasowasowal sa cangra, <<O maan hakini konini a tamdaw? Halofali ato lodis a mitngil to pipalimo'ot Ningra!>> saan.


Nanoya, tahirato cangra i ti:raw no Kalili i Kirasa hananay a pala. Yo macakat ci Yis a talahkal i, ira nanitira toya niyaro' ko ccay a fa'inayan to maaro'ay no palafoay a militmoh i ci Yisan. Halafinayto cingra a caay ka ciriko', caay ka maro' i loma', itira sa i dihif no tadetademan ko aro' ningra. Paka'araw cingra ci Yisan i, cli' sa cingra. Ta hinokop sa i ka'ayaw ni Yis. Satata'ang sa ciira to ngiha' a somowal, <<O Wawa no Isatakaraway a Kawas, Yisaw, nawiro tayni Kiso a mirawraw i takowanan saw? Ngitangiten ako Kiso, aka pasemsemen kako,>> saan. O sakasaan nira i, o nano nisowalanto ni Yis koya kaackan a 'adingo to sapiliyasaw nira toya tamdaw. Kinapinapi:na a marpet noya kaackan a 'adingo cingra. Saka, talacowa paliten to lonayi', mapakadang ko kamay ato wa'ay a mirofo cingraan i, lafot han ningra. Laplapen noya palafoay cingra a patayra i kohkohan.
<<Cima ko ngangan iso,>> han ni Yis a milicay.
<<Ci Likiyon kako,>> saan ciira a paca'of. Nawhani 'aloman ko palafoay a micomod i cingraan. Ngitangiten noya palafoay ci Yis, aka fahfahen cangra a pacomod i awaay ko tolas a rfong.
Ira i ngata noya taporo ko 'alomanay a masaflaway a komaenay a fafoy. Ngitangiten no palafoay ci Yis, haydaen ko nipicomod niyam toya fafoy saan. Hayda hanto ni Yis. Saka, sadak sato koya palafoay nanitira toya tamdaw a micomod toya fafoy. Ta cikay sato koya masaflaway a fafoy a maloklon i tono' a mihitfo i fanaw a ma'alol a mapatayto.
Ma'araw no pakaenay to fafoy a tamdamdaw konini a dmak i, laliw sato ta tayra i niyaro' ato i omahay a paratoh tonini a dmak. Masadak ko finawlan noya niyaro', a minengneng tonini a dmak. Yo tahira cangra i ci Yisan i, ma'araw nangra ko nika ciriko'to noya namiliyasan no palafoay a masatamdaw a maro' i ka'ayaw no wa'ay ni Yis. Saka, talaw sato cangra. Oya napaka'araway a tamdaw tonini a dmak i, pasowal i tamdamdaw to nika masamaan ko nika nga'ayto a maadah noya namaaro'ay no kalaha'ay a palafoay. Itiyasato tata'ang ko talaw no finawlan no Kirasa a ma^min. Saka, ngitangiten nangra ci Yis a papiliyas to pala nangra. Saka, dakaw sato ci Yis to tamina a minokay. <<Mihaklong kako i Tisowanan,>> saan koya nano maaro'ay no palafoay a mingitangit i ci Yisan.
Sowal sa ci Yis i cingraan, <<Pinokay i loma' iso a pasowal to nano dmak no Kawas i tisowanan,>> han ni Yis cingra a papinokay.
Saka, tayra sato cingra i polong noya niyaro' a patnak to nano dmak ni Yis i cingraan.


Nanoya, yo minokay ci Yis nai ti:raw no fanaw i, hamhamen no 'alomanay a finawlan Cingra a militmoh, nawhani hinatala cangra i Cingraan. Ira ko ccay a citodongay to kasa'opoan a kakridan ci Yayrus hananay, ira a tayra a miraod. Hinokop sa cingra i ka'ayaw ni Yis, mingitangit ci Yisan a tayra i loma' ningra. Nawhani sakapatayanto koya tosa ko safaw no mihcaan a dengan a fafahiyan a wawa ningra.
Yo tayra ci Yis i, macaco^co^co ko finawlan i taliyok Ningra. Ira ko ccay a malacaanay a fafahiyan. Tosato ko safaw no mihcaan a malesles ko rmes ningra. Ma^minto a malasapaising ko dafong ningra i, awaay ko pakaadahay a tamdaw i cingraan. Raod sa cingra i aikor ni Yis a mitfing to parongapingan no kafafang ni Yis i, tangsol sa a tomrep ko nika lesles no rmes ningra. Licay sa ci Yis, <<Cima ko mitfingay i Takowanan saw?>> saan Cingra.
Mihakeno ko 'alomanay a tamdaw. Pasowal sa ci Pitiro, <<Singsiaw, o nika 'aloman no finawlan a mitihlom a mico^co i Tisowanan,>> han ningra.
Nikawrira, pasowal sa ci Yis, <<Iraay ko mitfingay i Takowanan, nawhani mahapinang Ako ko nika sadak no 'icel nai tireng Ako,>> han Ningra. Tona mafana'to koya fafahiyan a caay to ko sasimeden ko dmak no niyah, sakamirmir sato a tala'a'ayaw ni Yis a mihinokop, ta i ka'ayaw no 'alomanay a pasowal i ci Yisan to nika nawiro mitfing cingra i Cingraan ato nika masamaanay ko nika tangsolto a maadah. Saka, sowal sa ci Yis i cingraan, <<Wawaaw! O nano paso'lin iso to Kawas ko sakaadah iso. Sanga'ayen ko rakat iso a minokay,>> han Ningra.
Yo pasowal iho ci Yis i, ira ko ccay a tamdaw to naniloma'ay no citodongay to kasa'opoan a kakridan a tayra ci Yayrusan a somowal, <<Mapatayayto ko fafahiyan a wawa iso. Akato pakalifoten ko singsi,>> han ningra.
Matngilto ni Yis konini a sowal i, sowal sa ci Yayrusan, <<Aka ka talaw, deng o nipiti'er to Kawas ko nga'ay! Ta mapa'orip ko wawa iso,>> han Ningra.
Yo tahirato ci Yis i loma' ni Yayrus i, caay haydaen Ningra ko cimacima a micomod toya loma', deng ci Pitiro aci Yohani aci Yakop ato mama ato ina noya fafahiyan a wawa ko nihaydaan Ningra a mihaklong i Cingraan a micomod. Tomangic ko i tiraay a tamdaw a ma^min a mararom to nika patay noya wawa. Sowal sa ci Yis, <<Aka ka tomangic kamo. Caayay ko mapatayay koya fafahiyan a wawa, o mafoti'ay,>> han Ningra.
Mafana' cangra to nika patayto noya wawa saka, katawaen no 'alomanay ci Yis. Tengteng han ni Yis ko kamay noya wawa, cli' sa a somowal, <<Wawaaw, kalomowad,>> han Ningra. Patatikolto ko 'adingo noya wawa. Tangsol sa a lomowad koya wawa. Ta paflien to kakaenen koya wawa han ni Yis a pasowal cangra. Safahka' sa ko mama ato ina noya fafahiyan a wawa, solinga'en ni Yis a palimo'ot cangra, aka ka pasowalen ko cimacima tonini a dmak, han ni Yis.

Počúvaj Luka 8