Athpariya 2023 WBT (NT) Non-Dramatized

Athpariya 2023 WBT (NT) Dramatized

येसुङा बारो जाना ओचेलाचि हिसिक्‍मा हिडुचिउङ् उन् हिट्‌निलाम्‍मा गालिलङाना आरु खालाङ्‌गाङि याप्‌मिचिलोङ्‌सा हिसिक्‍मा हिट्‌नुङ् पारचार चोक्‌सिङा खाडे॥
बाप्‌टिस्‍मा कापि युहान्‍ना खाम्‍बाङ्‌ङि ठायाना बेला खिरिस्‍टङा चोगुना टोॽवा बारेङि उन्‍ङा खेम्‍सुए, हिट्‌नुङ् ओचेलाचि नाड्‌डेना रिङ् सिलाप्‍मा उन् सोरि पाङ्‌सुचे, “टायुगेट्‌ना खिरिस्‍ट खान् डोक् इ, आन्‍याँ आरु कोइङाना लाम्‍बो पुयुम्‍मानि?”
येसुङा हिट्‌नागा लोडुचे, “खाडानिउङ् खानिङा आखेम्‍सुम्‍गा लोक् आनिसुम्‍गा रिङ्‌चि युहान्‍ना लोडानुम्, याङ्‌कानिनिबाचिङा उनिसुएट्‌टु, लाङ्‌गाडाचि ओलाम्‌टियेट्, कोर रोगिचि नुमानिङ् उलिएट्, याङ्ओखेम्‌निगाँ ओखेम्‍सुएट्‌टु, उसियागा उहिङ्‌ग्‍वाट् उलियुङ् ओकोब्‍एट्, हिट्‌नुङ् पाक्‍चा ओवानिगाँ ओचेट्‌नुना खाबोर खेम्‍मा ओटोगुएट्‌टु॥ हिट्‌नुङ् आङाना कारानङा उन्‌चि निङ्‌ग्‍वा खोनालेङ् चा उरिसुन्‍गा लोङ्‌सा माङ्‌हाङ्‌ङा आसिक् पिडुचिचि॥”
युहान्‍ना ओचेलाचि नोक्‍टा ओखाडाउङ् येसुङा युहान्‍नाङाना बारेङि याप्‌मिचिगा खिमेयाङ्‌मे नाड्‌डे लोडुचे, “खानि साक्‍चा उयुङ्‌निना डेन्‌ङि पाक् पुसिङा आखाडिएगा? पाक् हिॽवाङा वान्‍डुना पारयाङ् पुसिङा आखाडेइगि? हिट्‌डे भोने खानि पाक् पुसिङा आहोन्‌डिएगा टे? पाक् ओफाङ्-ओफाङ् लोट्‌लिङ् वाडुना याप्‌मि पुसिङा इ? हिट्‌डेगा ओफाङ्-ओफाङ् लोट्‌निङ् ओवाड्‌गा याप्‌मिचि हाङ्‌पाङ्‌ङि गो उयुङ्‌युक्॥ हिट्‌डे भोने खानि पाक् पुसिङा आहोन्‌डिएगा टे? माङ्‌काटा पुसिङा इ? आए, छेम्‍बा डोक्, आङा खानि लोनाँनि, खानिङा माङ्‌काटा नुङ्‌ना चा ठेना ठिबाङ् याप्‌मि आनिसुएसुम्‍मे॥ धारमाछाप्‍लाङि युहान्‍ना बाप्‌टिसङाना बारेङि माङ्‌हाङ्‌ङा नाड्‌डे माट्‌टुएसुए–
‘खेम्‍सानुम्, आङा आङाना खाबोर कालो खान् नुङ् आघि-आघि पाङ्‌सुङ्‌टुङ्,
उन्‍ङा डोक् कालाम्‍बो टेयार माचोक्‌युबियुक्॥’
“छेम्‍बा डोक् आङा खानि लोनाँनि, बाप्‌टिस्‍मा कापि युहान्‍ना नुङ्‌ना माङ्‌ठेना आरु साक्‍चा ओपोङ्‌निगेट्‌निगा॥ हिड्‌डेउङ् चा टोनालोग्‌ङिना मुलुक्‌ङि सोब्‍बे नुङ्‌ना खाट्‌टिउना, हिट्‌ना युहान्‍ना नुङ्‌ना चा ठेना ए॥” बाप्‌टिस्‍मा कापि युहान्‍नाङाना टाला नुङ् ना बेला सोम्‍मा टोनालोग्‌ङिना मुलुक् औधि जाबारजास्‌तिलोक् पोसा खाट्‌युगेट्, हिट्‌नुङ् बिरोधि याप्‌मिचिङाम्‍बाक् जाबारजास्‌ति हिट्‌ना लाप्‍मा ओकोलुएट्‌टु॥ पोङ्‌भोने युहान्‍नाङाना ओबेला सोम्‍मा मोसाङाना धारमाबिधि हिट्‌नुङ् सोब्‍बे माङ्‌काटाचिङा माङ्‌हाङ् उमुलुक्‌ङाना बारेङि ओमाट्‌टुए॥ हिट्‌नुङ् आङा माट्‌टुङ्‌ना रिङ् खानिङा बिस्‍वास आचोगुम्‍टुम् भोने हिट्‌नागाँ टायुक् नुङ् ओमाट्‌टुना एलियाम्‍बाक् उन् डोक् ए॥ खेम्‍माना नुभेक् लोक्‍गाङा ना रिङ् नुलोक् खेम्‍सानुम्॥
“हाट्‌ले ना टालाङिगा याप्‌मिचि आङा पाक्‌लोक् टोङ्‌सुङ्‌चिङ्‌गा? हिट्‌नागाम्‍टे बाजारङि ओपाङ्‌ग्‍वागा पिच्‍छाचि गाड्‌डेगा, हिट्‌नागा आ-आप्‍पे नाड्‌डे ओमाट्‌टुगा–
‘आन्‍याँ खानि लोङ्‌सा मुरालि टेनुम्‍मे, टरो खानि आलाॽवास्‍याट्‌टिन्,
आन्‍याँ सानिङ्‌ग्‍वा लोसिङे, टरो खानि आहाबेट्‌टिन्॥’
“पोङ्‌भोने युहान्‍ना आरु याप्‌मिचि गाड्‌डे चासा हिट्‌नुङ् ठुङ्‌सा एडोक् टानेट्‌नि, हिट्‌नुङ् खानिङा उन् टोन्‍डेबाङा लिन्‍डोएसुए आलोडुम्‍मे॥ याप्‌मि छा चासा लोक् ठुङ्‌सा टाए, हिट्‌नुङ् खानिङा ओलोडुम्‍टुम्, ‘पुयानुम्, हिट्‌ना राक्‍पा, टेडुबा, तिरो काफोक्‍बाचिगा हिट्‌नुङ् पापिचिगा टाक्॥’ ठोना माहामाना नुङ् हिट्‌ना गाड्‌डे काचोक्‍बा याप्‌मिङा एडोक् पारमान् पिडुटु॥”


जुन् जुन् खालाङ्‌गाङि येसुङा आम्‍टेप्‍मा डोङ् ठोङ्‌डिगा टोॽवाचि चोगुना डाना, हिट्‌ना खालाङ्‌गाङिगा याप्‌मिचि उन्‌चि पापलाम्‍मा काएल्-काबु उलिनेट्‌निउङ् हिट्‌नागा नाड्‌डे पिक्‍सा खेमा लाप्‍टुचे,
“इनामा, हाउ खानि खोराजिन हिट्‌नुङ् बेथसेदा खालाङ्‌गाङिगा याप्‌मिचि! खानि माझै चोक्‍बालाक् डोङ् ठोङ्‌डिगा टोॽवाचि टुरोस लोक् सिदोन खालाङ्‌गाङिगा याप्‌मिचिङि चोगानाँ बे हिट्‌निगा याप्‌मिचिङा पाइले डोक् सानिङ्‌ग्‍वा लोसा बोराङाना लोट्‌लिङ् ओवाडुङ् हिट्‌नुङ् ठाबुट् ओनेक्‍टुङ् काएल्-काबु उलिसाएट्‌टे बे॥ टरो आङा खानि लोनाँनि, न्‍याएङाना लेम्‍बा माङ्‌हाङ्‌ङा टुरोस लोक् सिदोनङिगा याप्‌मिचि नुङ्‌ना चा खानि जोम् साजाए मापिडिटि॥
“हाउ काफारनाहुम खालाङ्‌गाङिगा याप्‌मिचि, पाक् खानि टोनालोग् सोम्‍मा डोक् टासुम्‍टुम्‍मा नुङ् आमिट्‌टिटिगि? खानिउम्‍टे यो-यो योनालोग्‌ङि आठाइटिटि, पोङ्‌भोने खानिङि चोक्‍बालाक् डोङ् ठोङ्‌डिगा टोॽवाचि सादोमङि चोगानाँ बे सादोम खालाङ्‌गा हाट्‌ले सोम्‍मा लिसायाक्‍टे बे॥ टरो आङा खानि लोनाँनि, न्‍याएङाना लेम्‍बा माङ्‌हाङ्‌ङा सादोमङिगा याप्‌मिचि नुङ्‌ना चा खानि जोम् साजाए मापिडिटि॥”


हिट्‌ना बेला येसुङा माट्‌टुए, “हाउ माङ्‌हाङ् आप्‍पा, टोनालोग् हिट्‌नुङ् नाराङिना टाङ्‌बा, आङा खान्‌ङि पोए-पोए ठाङ्‌सुङ्‌टुङ्, पोङ्‌भोने ओचाप्‍पाङ् याप्‌मिचि हिट्‌नुङ् जोम् ठोना उलिसागा याप्‌मिचिलाम्‍मा आठोबुङ् आयुङ्‌सुना नागा रिङ् खान्‍ङा पिच्‍छाचि गाड्‌डेगा याप्‌मिचि आनिमेट्‌टुचे॥ छेम्‍बा डोक् आप्‍पा, नाड्‌डे चोक्‍मा डोक् कानिङ्‌ग्‍वाङि नुलोक् आलोसे॥
“ख्‍वाप्‍पा रिङ्‌चिगा आधिकार आप्‍पाङा आङा याङ्‌पिडैसे॥ उप्‍पाङा एडोक् उइछा मिसेन् निसुटु, हिट्‌नुङ् उइछाङा एडोक् उप्‍पा मिसेन् निसुटु, आरु साङा चा मिसेन् उनिसुन्‍ना, टरो माङ्‌हाङ् पाबा साइना नुङ् उइछाङा सेगुचिगा याप्‌मिचिङा एडोक् उन् मिसेन् उनिसुटु॥
“हाउ सोब्‍बे आपोप्‌टिगा हिट्‌नुङ् माफेङ्‌डिगा खानि सोब्‍बे आङा सोरि आबानि, आङा खानि आराम पिनाँनि॥ आङाना जुवा खुयानुम् हिट्‌नुङ् आङालाम्‍मा सिकाँ लिसानि, पोङ्‌भोने आङा मेयोक्‍ना हिट्‌नुङ् आनिङ्‌ग्‍वा दायालु ए, हिट्‌नुङ् खानिङा आराम आटोगुम्‍टुम्॥ पोङ्‌भोने आङाना जुवा साजिलो हिट्‌नुङ् आङाना भारि याङ्‌ना ए॥”

Počúvaj मात्‌ति 11