Kosarek 2023 WBT Non-drama NT

Kosarek 2023 WBT Dramatized NT

Nia mangkina wamna komag, yum-yum samenag Allah Yubu aneko wamog. Yubu aneko Allahap nikag wamdekti, Yubu aneko Allah Eldamne wamog. Nia mangkina wamna komag, yum-yum samenag Allah Yubu poneko Allahap nhonag wamog.
Allahri nia ni sumbaogne Allah Yubu poneko pere agha sumbaog. Nia ni el pere agha sumbaogpa, nhon babe el pere agha sumban koma uropne wamla kom. Kamag uro unne elag wamogpa, kamag uro unne neneko mog so'oag nimi sembe tibin wareropne wamog. Tibin wareropne nenekori inibin uro urobag warelamla aghana, inibinne nenekori tibin aneko salero niknibanep koma wamog.
Allahri poghog nimi nhon si Yohanes wamog. Allahri nimi eneko poghog nena, “Nimi niri el pere agha sik sembaukang,” aro poghogpa, nimi eneko, “Tibin wareropne neneko sembe sik yubu lag nenero ambarelamsinun,” aro yaog. Yaog nimi eneko eldamne tibin wareropne neneko wamog kom aghana, “Tibin wareropne neneko sembe sik yubu lag nenero ambarelamsinun,” aro yaog. Ambarelamsiog sum eneko, tibin wareroba taptopne nimi ni tibin warebahinepne poneko mog so'oag yalamog. Yaogti mog so'oag wamog. El pere agha mog so'o ane sumbaog aghana, mog so'oag nimi tanekori el ilirop kom.
Elna elenge mog so'oag wamek nimiag yaog aghana, elenge mog so'oag wamek nimi tanekori toro piro aek kom. Toro piro aek kom aghana, nimi nenneri toro piro aekti, el siag sikne aro wana palilamek. El siag wana palirop nimi tanekoag mikiba tatsiog andarina, sin Allah elmabo tanep. Sin Allah elmabo tanep nimi taneko mangap tangto yabinep nena, nimi enengag olmagha pogtop agha kom. Apna nimiri, “Wana bobonge agto yaboho,” seneropneap, “Me pairo liksisebe,” seneropneap abeneko agha kom aghana, Allah elmabo tanep nimi taneko ot Allahri seneropne agha mangap tangtop.
Allah Yubu aneko mog so'oag nimi taogti, nu nusamag ua ulamog. El ponekoag sikneap nimiag wana yororo senehinneap to'opto wamog. Undo wamogpa, sunsunum uro Iliri Elme ot nhonogne ponekoag imang wareroba pibogpa, elag imang warelamogha haingdi ibubu.
El sembe Yohanes ponekori haum aro ambarelamsiogti, “Nimi eneko sembe samenag ambarelamsisiri, ‘Na wene wamna aghana, amik yalulne pone na anam wamna komag el yum-yum samenag wamog. Ane sembe na phelekto el nubunge tal,’ sehinge pone ane wamla,” aro sik yubu lag nembarelamsiog.
Nimiag wana yororo senehinne elag to'opto wamogneag agha tarelamsildi, nen ma'aro wana yororo tarelamsilne nu niri toro salelamap. Eldi tatsiropne nunag taog nena, Musa pere agha aruksirop yubu eneko tatsiog. Apna wana yororo senehinneap sikneap Yesus Kristus pere agha nunag taog. Nimi nhondi babe Allah ilirop kom. Aghana Elme ot nhonogne, Allah wamlange poneko, Ili puka urobag pukamlange ponekori Ili sembe nunag el nenero ambarelamsil.


Yohanes sembe ka'ebaekti, Yahudi nimi nubunang as Yerusalem wamek nangdi memnang Allah sembe palirop nangap Lewi nangap elag pogsiek. Poglamsiekti, “Yohanesag pimundi, ‘Anna etne?’ aro haibalulom,” seek.
Wene seekpa, yaekti haibaekpa, Yohanesti sik yubu ambatto lag nembatsiog. Sik yubu lag nembatsiog nena, lag phoro lemnepne likipto lemna koma ambatsiog. Lag phoro ambarelamsiogti, “Nana Allahri weptopne, ‘Saelbamsululam,’ aro pogtopne Kristus wamna kom,” seog.
Wene seogpa sindi, “Wene selamba, anna etne? Anna Allah yubu silimu tiptopne Elia poneko samoro yingkina wamlam te?” aro haibaek.
Wene aro haibaekpa Yohanesti, “Kom,” seog.
Kom seogpa, nen hailamekti, “Anna Allahri yubu silimu tiptopne nubunge, ‘Pognun,’ seogne poneko wamlam te?” aro haibaek.
Wene aro haibaekpa Yohanesti, “Kom,” seog.
Kom seogpa hailamekti, “Kom selam tanena, anna etne nunag ambatsi. Ambatsimenba nu pogsiang nimiag yubu poa ambarel phukap. Andamne sembe tibin nembatsululam te?” aro haibaek.
Wene aro haibaekpa, Yohanesti sinag samoro ambarelamsiogti, Yesaya Allah yubu silimu tiptopneri lebog yubu tagto lelamogti, “Na wamnangena,
‘Pai aldesag nimi nhondi yubu haum aro nimi yoplamsilul nena,
“Nu Saelba Uhiropne yanepne sembe ina yarelamlulom.
El yanep ina porog nenelamlulom,” ’
aro ambatsirop nimi eneko wamna,” seog.
Wene aro ambatsiogpa, sin Farisi nimi agha pogsiek nimi tanekori ka'ebaekti, elag hailamekti, “Andi andamne sembe, ‘Na Kristus poneko kom. Na Elia poneko kom. Na Allahri yubu silimu tiptopne nubunge poneko babe kom,’ selam. Undop pagha tanena, sa'a sembe nimi maghag pelengelamsilam?” aro haibaek.
Wene aro haibaekpa, Yohanesti sinag samoro, “Nari nimi maghag pelengelamsin aghana, nimi nhon a'undi el ilirop komne a'un nusamag sekamlari, amik yalul. Na wene wamna aghana, amik yalulne poneko nimi nubunge nanap sunsunum komne yalul. Nubunge poneko yaleba, na ologne wamnangeri eldi yan wangana haing lopnepne babe nanap sunurop kom,” aro ambatsiog.
Ni ane uro yabiogne mag Yordan kauro heng walelingkirobag sip Betania so'oag wamekpa, Yohanesti nimi maghag pelengelamsioghag anekoa uro yabiog.

Imbaogti kwelekaogpa, lukunne neneko Yesus yalamogha tiboghaogti, Yohanesti nimiag ambarelamsiogti, “Tibogahut! Allahri Pham Domba Me yalamla. Nimi mog so'oag urop nimiri malia uroba toro tobogahinepne poneko yalamla. Nari samenag yubu lelamnori, ‘Na wene wamna aghana, amik yalulne pone na anam wamna komag el yum-yum samenag wamog. Ane sembe na phelekto el nubunge tal,’ senonge poneko wene ane yalamla. Anamagna el sembe etne wamla aro nari babe iamsi kom. Ekon wamsi aghana, ‘El poneko etne wamla aro Israel nimi whingag lag talul,’ aro nari nimi ambatto maghag pelengel alamsin,” seog.
Samenag uro yabiogne sembe Yohanesti sik uro lag nenero ambarelamsiogti, “Nari haingdi kemelamnoba, Allah Yame Walinge winang yalma saog uro imag agha kulukul ingkina el alibag pukamori, wamoa imno. Na pogneonge ponekori nanag ambatneho komba, nari babe el etne wamla aro iamsene kom. Aghana Allahri nanag, ‘Nimi ambatto maghag pelengelamsululam,’ aro pogneonge ponekori anamag el nembatneo. Yubu ambarelamneori, ‘Kemelapmenba Allah Yame Walinge nimi nhon alibag kulukaleri pukamlul. Elag pukamleri wamle nimina, el ponekori Allah Eldamne Yame Walinge nimiag pelengero tatsilul,’ aro ambatneo. Nadamneri haingdi imnori, sikne aro lag nenero ambarelamsino yubuna, ‘Nimi eneko Allah Elme wamla,’ aro lemna,” seog.

Wene aro lebogpa, imbaogti kwelekaog sum eneko Yohanes samen wamoghag aneko wamogpa, eldi yubu ka'ero neleptop nang phendeap elap nhon wamek. Wamekti kemelamogpa, Yesus yabaloghogha tiboghaogti, “Tibogahut! Allahri Pham Domba Me ano,” seog.
Wene seogpa, Yohanesti yubu ka'ero neleptop nang abenekori ka'ebarekti, Yesusag nelepto pirek. Neleplamdekpa wailag sip tangabom agha sin neleplamdeka ipsiogti, Yesusti hailamsiogti, “A'un sa'a elamdom?” aro haibahiog.
Wene aro haibahiogpa, sindi samoro elag, “Rabi,” serek. “Rabi,” serek nena, nuri yubuag tiptona, “Yubu amohinne nubunge,” aro kiptop yubu wamla. Sin abenekori elag, “An tala sip wapmenba, anag yanunam?” aro haibarek.
Wene aro haibarekpa, Yesusti sin phendeag, “Yarumundi a'undi haingdi kembarurom,” seog.
Wene seogpa, sin elap nhon pirek. El ua ulamoghag kembarek nena, ae sinag agha pirekti, sum eneko sum elap nhon wamek.
Sin phende Yohanesti yubu lebogne ka'ebarekti, Yesusag nelebarek nimi abeneko nhonna si Andreas. Sin phende abeneko Yesusap nhon wamekne kolbi agha Andreasti peket elkae Simon Petrus ero ibog. Andreas poneko Simon Petrus ilipsae taptopne wamog. Andreasti ambarelamogti, “Allahri wepto poghogne Mesias poneko imnamdi, elap haiptaap,” aro ambarog. Mesias seogne neneko Yunani yubuag tipto lerop tanena, Kristus aro engerop.
Wene aro ambarogti, Andreasti Simon enero poa Yesusag payaog. Yesusag enero poa yaogpa, Yesusti yop-yoba kembaogti yubu lelamogti, “An Simon, Yohanes elme. An si, ‘Kefas’ aro engelangkukang,” seog. Si Kefas nenekona, “Yimag kirik,” aro engerop. Yunani yubuag seneragna nikne, “Petrus,” aro lemnep.

Imbaogti kwelekaog sum eneko Yesusti, “Galilea so'oag pinun,” aro seneraghogti, Filipus ibog. Filipusap haiptarek abeneko pere Yesusti yubu lelamogti, “Yae, nanag nelebanululam,” seog.
Filipus eldi asna Andreasap Petrusap wamdekag as soro kalurop as Betsaidange wamog. Filipusti Natanael ero ibogti, yubu ambarelamogti, “Nuri wene haiptaapne ponekona, Musari aruksirop yubu mome toro pibogneap, Allahri yubu silimu tiptop nangdi mome toro pibek yubuap abeneko toman, ‘Yalul,’ seekne poneko ibap. Elna Nazaretne Yusup elme si Yesus wamla,” seog.
Wene seogpa, Natanael ponekori, “As Nazaret selamne nenekoag agha walinge nhon lag tanep te?” seog.
Wene seogpa, Filipusti elag samoro, “An yamendi, haingdi iplulam,” seog.
Wene seogpa, palamdek abeneko Natanael Yesusag yalamog. Yalamogha ibogti, Yesusti el sembe yubu lelamogti, “Kembahut! Israel nimi enena, sik uro nimi pan khero seneropne nhon babe elag wamla komne,” seog.
Wene seogpa, ka'ebom agha Natanael ponekori, “Welaro na el wamnelam?” aro Yesusag haibaog.
Wene aro haibaogpa, Yesusti samoro elag yubu lelamogti, “Filipusti anag anam yopken komag, an kal ara tamag aneko ulamoma haingdi ipkeno,” seog.
Wene seogpa, Natanael ponekori elag, “Nai, an yubu amohinne nubunge wamlamne, an Allah Elme wamlam. An Israel nimi sembe yubu sia lero saelba uhiropne wamlam,” seog.
Wene seogpa, samoro Yesustina, “Nari anag, ‘Kal ara tamag wamomba haingdi ipkeno,’ senne sembe andi nanag sikne aro wana palilamnelam te? Nari an ipkenonge olog umag wamla aghana, amik uro yabilulne nubu sirikne wamleba, andi haingdi iplulam,” aro ambarog. Elag nen tipto yubu lelamogti, “Yubu sikne agha a'unag ambatnuahin. Im phologleba, na mog so'oag nimi tangtopne ponekoag Allah arukna imagnang malaikat kululung walelem alamukanga iplulom,” aro ambarog.

Počúvaj Yohanes 1