Kosarek 2023 WBT Non-drama NT

Kosarek 2023 WBT Dramatized NT

Minggu sum taogpa, sum eneko lukunap kelabo tanekori song wali neneroba wero paiamekne tobekti, “Yesus nong alip toman song wali neneroba pail pukap,” aro Yesus kirik lom hogtobaag piboghag aneko piek. Yesus kirik lom hogtobaag piboghag aneko pina kemelamekag agha kirik ina siramag marukaek kirik aneko pemagto kolop tangtoba ina siram kuptoba ibek. Marukaek kirik aneko pemagto kolop taogti, ina siram kuptop wamogpa, wa'ina kemelamekag agha nu Saelba Uhiropne Yesus nong teptoba pibogha aneko ibek kom. Yesus nong teptoba orog wamogpa, “Sa'a agha uro yabil?” aro seneraglamekpa, lo'om aro nimi phende sin peramag sekamdeka ipsiek. Nimi phende abeneko ag enekamdek ana, lepna tingo arop saogne enekamdekti, peramag sekamdeka ipsiek. Ipsiekti sin log lelem so'oag u amupto malingkiekpa, nimi phende abenekori sinag yubu lelamdekti, “Sa'a sembe a'undi nimi teptoba paia urobag yingkina kamag wamlange poneko elamlom? Elna ane wamla kom aghana, el nen kamag tal. A'undi seneraglapmundi el tahilul nena, samenag el Galilea wamori, a'unag ambatsio yubu el talulom. A'unag ambarelamsio yubuna, ‘El mog so'oag nimi taogne poneko nimiri salero malia urop nimi saeag nembaikpa, kalag sipto ya'ag olobikpa, ik wilindip sum eneko kamag talul,’ aro ambarelamsionge el talulom,” aro ambatsirek.
Wene aro ambatsirekpa, kelabo tanekori seneraghekti, “Yesusti samenag undop yubu ambatsio,” aro el taek.
Wene aro ambatsirekpa, kelabo taneko kirik lom hogtobaag anekoa saombaekti, ambatto poa Yesusti ko'olombare nang wepto pogsiog nangap, yog nimi wamek nimi ni tanekoap sinag ni uro yabiogne sembe ambatsiek. Kelabo yubu payingkina Yesusti wepto pogsiog nangag ambatsiek kelabo tanekona, Maria as Magdala kel enekoap, Yohanaap, Maria Yakobus ilinap, yog kelabo sinap nhon yabalamek kelaboapti yubu poa ambatsiek.
Wene aro ambatsiek aghana, Yesusti wepto pogsiog nang tanekori ka'ebaekti sembaek nena, “Kelabo taneri yubu lelamangne nimiri seneragnep kom yubu lelamang,” aro sik sembaek kom. Sik sembaek kom aghana, Petrus elemag sekom agha merero piogti, kirik lom hogtobaag Yesus nong teptoba piboghag aneko til wa'iog. Til wa'alamoghag agha Yesus nong teptoba orog aghana, Yesus nong teptoba keleptop ag aneko mo wamog. Petrusti kembaogti, lo'om seogti, samoro pina, “Sa'a agha uro yabil?” aro wanaag haiptangto wamog.


Sum eneko sum babe Yesusag yubu ka'ero neleplamek nang phende as nhon si Emaus, “Pinunam,” aro palamdek. As Yerusalema as Emaus pinepne ina we uro palamekne kilometer ko'olombare ina we wamog. Sin palamdek abeneko ni Yesusag uro yabiogne sembe yubu leple ina toman palamdek. Sin palamdekti, yubu leple ina toman el nenep tang-tang palamdekpa, Yesus sin palamdeka peramag amik yaogpa, sinap nhon palamek. Sindi Yesus iptek aghana, sindi haing sepsiogpa, Yesus sembarek komdi, nimi orange sembarek.
Wene sembarekpa, Yesusti sinag hailamsiogti, “Sa'a yubu agha ina toman leple palamdom?” aro haibahiog.
Wene seogne ka'ebom agha paptekti, wana ikin uro wamdek. Sin palamdek nang nhon sina Kleopas ponekori, “Nai, as Yerusalemag wene abene ko'oag uro yabalamlange nimi ni el wamang semban aghana, an mo nimi sekelananne ka'ebaom komdi ekon te?” aro haibaog.
Wene aro haibaogpa Yesusti, “Sa'ange uro yabalamlange sembe leplam?” seogpa sin phenderi samoro, “Yesus Nazaretne ponekoag uro yabionge sembe lelamnam,” serek. “Elna Allahri yubu silimu tiptopne wamo. Allah whingag babe, nimi ni whingag babe Allahri mikipne elag pibogneag agha yubu ambarelamsiogti, kekneba ulamo. Aghana memnang Allah sembe palirop nang sikini yaboap, nu Yahudi nimi saelbamsiang nangapti el salero Roma nimi saeag nembaongpa, ‘El tebalul,’ aro yubu tam karebi agha sindi kalag sipto obong. Kalag sipto obong aghana, nuri samenag elag wana paliro nang-nangaro seneraglamobonge, ‘Eldi nu Israel nimi sae lobatsilul,’ sembabo. ‘Sae lobatsilul,’ sembabo aghana, ni aneko elag uro yabio sum enekoa ik wilindip sum wamap. Ik wilindip sum wamap aghana, sumene babe kelabo nunap nhon Yesusag nelepto ulamobo kelabo etpare sin lukun el teptoba kirik lom hogtobaag pibongag aneko kemel piang. Kemel piang aghana, Yesus nong teptoba orogtina, ibang kom. Yesus teptoba orog aghana, nunag ambarelamsiang yubuna, ‘Allah arukna imagnang malaikat nu whingag lag tarangdi, “Yesus kamag tal,” serang,’ aro yubu ambarel ahiangpa, nu wana enhaun alamsil. Kelabo tanekori yubu nene ambatsiangpa, nungkabo nunap nhon ma'ap tangtop nimi nhon-nhon, ‘Yesus kirik lom hogtobaag pibonga aneko nuri babe kemel pukap,’ aro piangdi, kembangag agha kelabo tanekori ambatsiang yubu sunsunum uro haingdi ibang. Ot Yesus nong haingdi ibang kom,” aro sin phende abenekori ambattek.
Wene aro ambattekpa, Yesusti samoro yubu lelamogti, “A'un sik uro ekon urop nimi! Allahri yubu silimu tiplamek nangdi samenag mome toro pibekne a'undi olog wanaag seneraglamlom kom te? Allahri yubu silimu tiplamek nangdi samenag mome toro pibekne sunsunum uro, ‘Kristus poneko seklena samenag seklebale taneogna, kibiang el sembe towalengkukang,’ aro mome toro pibek. Sindi samenag agha ambatsiekne olog sikne aro seneraglamlom kom te?” aro ambatsiog.
Wene aro ambatsiogti, Musari mome toro pairop yubuap, Allahri yubu silimu tiptop nangdi mome toro pibek yubuap alniro ambarelamsiogti, eldamne sembe Allahri yubu mome toro pibekne ni kiliro tibin nenero ambatsiog.
Yesusti sin ambarelamsiog abeneko leple palamekti sin, “Pukap,” sembaek as Emaus aneko peramag piek. Peramag piek aghana, Yesusti maneri as eneko phibom agha pinep saog ulamog. Unulamogpa sin phende nang abenekori Yesusag yubu mikip uro lelamdekti, “Wene ae inipna peram taldi, imbalba nunap nhon wamukap,” serekpa Yesus babe as anekoag, “Nhon wamukap,” aro wa'iek. Aeag wa'iekti, “Kwaneng tukap,” aro pukek. Pukekti Yesusti Allahag, “Naniong wali tatsilam,” aro kibogti, kwaneng roti aneko khepto-khepto tatsiog. Khepto-khepto tatsiog abeneko pere sindi haing ubalori, kwelekaloa saog uahiogpa, “Elna Yesus,” aro el tarek. El tarek abeneko Yesus sin whingag aneko kom tangom seog. Kom tangom seogpa, sin mamun nimi nhondi nhonag yubu lel dalamdekti, “Inaag yalamapti, Allahri yubu mome toro pairopne tagto ambare-ambare yalamsilba, nu wanaag yeng maikno sembanam kom te?” aro sin mamun yubu lelamdek.
Undo uro yabiog abeneko pere sekom agha samoro Yerusalem yarek. Sin samoro yalamdekpa, Yesusti ko'olombare nang wepto pogsiog nang tanekoap, yog nimiap winip taekpa, aneko yarek. Yarekpa winip taek nimi tanekori yubu lelamekti, “Ot sik uro nu Saelba Uhiropne Yesus kamag taori, Simon whingag agha lag nenep tao,” alamek. “Lag nenep tao,” seekpa sin phende nang abenekori babe nimi tanekoag, “Nu inaag palamnam abeneko undo uro yabil aghana, kwaneng roti khepto-khepto nunag tatsil taneogna, ‘Elna Yesus,’ aro el tanam,” aro ni aneko ambatsirek.


Sin poloro winip tangkamekti, ni uro yabiogne sembe yubu lelamekpa, lo'om aro sin whingag Yesus lag nenep taogti, sin nusamag sekamogti, “A'unag wana aingniro wamsut alamna,” aro kipsiog.
Yesus lag nenep taogti, wene alamog abeneko sin, “Phiari lag nenep taldi lelamla,” aro lo'om seekti, log sembaek. Log sembaek aghana, Yesusti sinag yubu lelamogti, “Sa'a sembe a'un wana ophag aro, ‘Sik uro yabinep to, kom to,’ aro a'un wanaag haiptangto senelamlom? Nari sae yan omneongag kembanululom. A'undi na kembanumundi, nari yan saeag meneng kat taonge babe saeri saelbitnululom. Phia eldi nong sop yo'o orog wamla aghana, a'undi na nong sop ane saelbitnumundi, ‘Na Yesus alamnange,’ sik sembalulom,” seog. Wene seog abeneko, el yan sae obeka taneko lag nenero, “Kembanuhut,” aro ambatsiog.
Eldi wene aro ambatsiogne sembe sin wamek nimi taneko lo'om aro awi senenne loloro uahiogne agha sindi wanaagna, “Sik uro Yesus kamag tal to, kom to?” aro olog sik sembaek kom. “Sik uro Yesus kamag talba ililamap,” sembamek kom abenekona, Yesusti nimi tanekoag hailamsiogti, “A'undi kwaneng tenne olog wamla te?” aro haibahiog. Wene aro haibahiogpa, sindi ikan sop aukag tabekne karepna nhon tarek. Ikan sop karepna tareka aneko tobogti, sin whingag agha teog.
Ikan tareka aneko teogti, Yesusti sin wamek nimi tanekoag yubu ambarelamsiogti, “Samenag a'unap nhon wamobori, yubu lelamnonge neneko nen sarikto sumene babe ambatsinun. Samenag ambatsino yubuna, ‘Sin samenag Allahri yubu mome toro pibek nangdi na sembe mome toro pibekne sik uro yabilul. Musari aruksirop yubuap, Allahri yubu silimu tiplamek nangap, Allah omektop sepna siptop nangapti na sembe samenag mome toro pibek yubu ni angkanep komdi, sik uro yabinepneog wamla,’ senonge sunsunum uro yabil,” aro ambatsiog.
Wene aro ambatsiogti, sin wamek nimi taneko wana heklamsiogti, tibin nenero ambarelamsiog andarina, sindi Allah yubu mome toro pairopne seneragto el taek.
Yesusti sinag yubu ambarelamsiogti, “Allahri yubu mome toro pibek nena, ‘Allahri wepto poglenge Kristus poneko seklena seklebaleri, tebalul aghana, ik wilindip sum eneko nen kamag talul. Kamag taleba, as Yerusalem anekoa el siag kekhaekto ma'ap tangtop nimiri alniro yubu ambarelamsiikti, “A'un mog so'oag nimiri mali-malia seneragto ulamlomne lipsimundi, Allahri senenne salelapmunba, mali-malia ulamlomne tam wailag nenero kom nembalul,” aro nimi sisa mog so'o tala-tala wamik nimiag ambarelamsukang,’ aro mome toro pibek. A'un tane wamlom nimina, ni uro yabiropne aneko sembe sikne lag nenero ambatsinep nimi wamlom. Na Naniri, ‘Mikipne tatsinun,’ aro salag lero pibogne sunsunum uro nari a'unag poghatsinun. Poghatsinun aghana, anam tatsin komag a'un as Yerusalem anea lamban koma nang-nangaro wapmuna kekman Allahri mikipne imag agha a'unag kaulbahilul. A'unag mikipne kaulbahile taneogna, as Yerusalem aneko lambalulom,” seog.


Wene aro ambatsiogti, Yesusti eldi yubu ka'ero neleptop nimi taneko menangalamsiogti, as Yerusalema enero poa lambahiog. As Betania peramag poa pihiogti, anekoa sae phende towalengkia sin kipto mikip nembahiog. Eldi sin kipto mikip nenelamsiog abeneko pere Allahri Yesus imag agha kiliro tobogpa, sin laplobi agha imag yingkiog. El imag agha kiliro tobogpa, Yesusti yubu ka'ero neleptop nimi tanekori Yesus omekto kiplamekti, sin yeng maikno uro as Yerusalem samoro piek. As Yerusalem piekti, sin sop-sop Allahri Mem Ae aramag agha yeng uro Allah omeklamek.
Abenda.

Počúvaj Lukas 24