Obľúbené biblické verše z मत्ती 24

Zdieľať

काःनाथेते माःइबा तामक्या फेल्देरा डोगेन एः ओःले माःङ्बुरा मीःक्याइ चीगकीइ राःङ्साला च्याःम्बु पेःजे पोर्केन एः। इःनाङ तीङथुपरा ङाःला सेमल्हुक लुदी तेःकेनक्यालादी थार्च्युगेन एः।

थाम्जेर मीःक्याइ लागी पाङ्बु काःल्ज्युक लाःती नाःम्खालीङगीइ क्याःल्खापकीइ बारेला दीखो याःबु लेःङ्‍गो साजाम्बुलीङ काःङ्‍रा कोःच्युगेन एः। ओः तीङ्ला साजाम्बुलीङगीइ अन्त ओःङेन एः।

ख्योक्याइ माकक्या क्याःप्क्योक ओःले थारीःङ्बुइ माकक्याइ बारेला हल्‍लाक्या कोःगेन एः, इःनाङ ओः तेःकासु माःजी। ओः थाम्जेर तामक्या ओःङ्‍रा कोःउए, इःनाङ ओः तेःकासुरादी जाम्बुलीङगीइ अन्त्य मेःयोःङेन एः।

देश चीगकीइ राःङ्सा देशला माक क्याःप्केन एः, क्याःल्खाप चीगकीइ राःङ्सा क्याःल्खापला माक क्याःप्केन एः। थाम्जेरछ्‍योले सायुक्या डोगेन एः ओःले माःङ्बुरा ठाउँक्याला मुःगी क्याःप्केन एः। इःनाङ दी थाम्जेर तामक्या नी तुःक्पु छुजे तोःङ्‍गीइ तामक्या चीग्रा इःङे।

नाम्सार्गा ओःले जाम्बुलीङ तोर्ती डोगेन एः, इःनाङ ङाःइ लाःक्योक ताम नाःमाङ मेतोर्केन एः।

चीलेलाःना माःङ्बुरा मीःक्या ङाःइ मीःनला ‘थार्च्युगेन ख्रीष्ट ङाःरा इःङे’ लाःतेरा ओःङेन एः ओःले खुङक्याइ माःङ्बुरा मीःक्याला स्योप क्युःर्केन एः।

ओः तेःकासु खुङक्याइ ख्याक्याला जुम्ङेन एः, दण्ड तेर्केन एः ओःले सेकेन एः। ङाःला सेमल्हुक लुक्योक सोङ्‍गारा थाम्जेर मीःक्याइ ख्याक्याला ङ्‍याप्च्युक पेःगेन एः। ओः तेःकासु माःङ्बुरा मीःक्याइ सेमल्हुक लुजे पोःर्केन एः, खुङक्या चीगकीइ राःङ्साला तुःक तेर्केन एः, ङ्‍याप्च्युक पेःगेन एः। स्योप क्युर्ती कोन्ज्योइ लेःङ्‍गो तेर्केन मीःक्या माःङ्बुरा थेङेन एः ओःले माःङ्बुरा मीःक्याला स्योप क्युःर्केन एः।

येशुइ खुङक्याला लाःसी, “च्यागाताःक्पु पेःदी तेः, ओः सोङ्‍गारा, सुइयाङ ख्योक्याला स्योप माःक्युःर्च्युक!

ओः सोङ्‍गारा, ख्योक्याङ च्यागाताःक्पु पेःदी तेः, चीलेलाःना ङाः मीःइ पुः ख्योक्याइ टेःम्बा माःसल्क्योक तीःजीला ओःङेन एः।

ओः सोङ्‍गारा, च्यागाताःक्पु पेःदी तेः चीलेलाःना ख्योक्याइ प्रभु काँःदी ङीःमु ओःङेन इःम्बा, ओःखो ख्योक्याइ छोर्ती म्याः।

ओः ङीःमा रा तीःजी नाःम ओःङेन इःम्बा, ओःखो सुइयाङ छोर्ती म्याः, नाः नाःम्खालीङगीइ स्वर्गदुतक्याइ नाः कोन्ज्योइ पुःइ छोर्ती एःपा, ओःखो नी आबा कोन्ज्योइ चीग्रा छोर्ती एः।

चीलेलाःना स्योप क्युःर्केन थार्च्युगेन ख्रीष्टक्या ओःले स्योप क्युःर्ती कोन्ज्योइ लेःङ्‍गो तेर्केन मीःक्या थोङेन एः, ओःले खुङक्याइ छ्‍योम्बो छ्‍योम्बो चुःन्डुलक्या तेःङेन एः ओःले याःमाछाककीइ लेःगाक्या पेःगेन एः ओःले कोन्ज्योइ दाम्क्योक मीःक्यालाङ खुबाथुप स्योप क्युःर्चे छोल्गेन एः।

ङाः मीःइ पुः ओःङ्जे छोल्क्योक ङीःमाक्याला नोआइ तीःनामला काःल्क्योक च्योःङ्‍रारा ओःङेन एः। चीलेलाःना बाढी ओःङ्जे तोःङ्‍गीइ ङीःमाक्यामीःजीक नोआ टुःला स्युःगेन ङीःमाथुपाङ मीःक्याइ साःदेरा एःके, थुङ्देरा एःके ओःले याःर्का क्याःप्‍तेरा एःके। ओःले बाढी ओःङ्दी थाम्जेरला छ्‍यामदाक जोदी माःखेरथुप खुङक्या काँःदीइयाङ माःछोर। ङाः मीःइ पुः ओःङ्‍गासुनाङ ओःन्डुबारा ओःङेन एः।