Fíĉilum Eᵽájul élebur yay yaa Fíĉilum
Eᵽájul élebur yay yaa Fíĉilum
Elébur yauye yo guvoge me "Fíĉilum", emundum me elobolal mala gátut gaa mof ni gaa buroŋ, ni faŋ bal arafuhow (Fíĉilum 1 bi 11). Gurim gaugu gaa buju babu guhiĉihiĉ bi egiten wo Aláemit amaŋ me bi ni mof mamu, ni ᵽoᵽ wajout ró me ti wárien me ujow.
Elébur yauye netajen elobolal maa fíĉilum ésuh yay yal Israel, ni faŋ maa sipail gufan gaju yo me (Fíĉilum 12 bi 50).
Elébur yauye emundum me egitenolal sulob súuba : wo Aláemit amaŋ me ni mof mamu ni ᵽoᵽ bugan bugagu bugo nátut me. Firim fítinar (Fíĉilum 1) fuogolal wánowan wo Aláemit akane úariari. Fúuten fafu (Fíĉilum 2 bi 3) fo mala sílam saa buroŋ arafuhow. Ban gaunor arafuhow ni Aláemit gútañitañi, ni ᵽoᵽ arafuhow ni apalol, o ni mof, ni o ni súnuhureŋ sasu.
Anáine ni anaare gumaŋut Aláemit akiĉil to buroŋil búari me bire ; guffasut búoh dó ᵽe bi ni gásumay golil. Ti nujugal yo me ni fíreŋ fafu fal Eden fo nacokoril me, dó náᵽunnil me. Gagu gurim gugitenolal buyoh babu bo nihi bubaj me bugan balaler effas to buroŋil búju me bire. Mati gúju gujamor ni gupalil ti gulobolal me mala báyuer babu bámah basimen me mof mamu (Fíĉilum 6 bi 9). Mbiban, bugan bugagu nihi gumamaŋ egiten búoh bugo gufafaŋ gupalil, n’guteben guhoil gaa búoh gutotoh Aláemit, ti gurim gagu gulobolal yo me no gulih me eteᵽ etah yay babu Babel (Fíĉilum 11).
Firim fánofan n’eban fo figitenolal min Aláemit nah’apoy me buroŋ, min nah’ajjonen bo me.
Etut firim bi ni fupafo, baje ujow waa bugan waigi ró, wagitenolal jabbah bi ni jabbah : bugan bugagu bi emmeŋen ettam yay iki gúfaculor n’guilen súsuh.
Aktuálne označené:
Fíĉilum Eᵽájul élebur yay yaa Fíĉilum: bqjDBL2
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Wycliffe Bible Translators, Inc. All rights reserved.