JOHN 12

Bethani a Mari’n Jesu thau a nuhna

1Huleh chiahkaan gual vaah na diing ni guup ma in Jesu chu misi laha kipana a kaihthoh Lazar umna Bethani khua ahung tung a. 2Hutah ah amah diingin nitaah an a bawl a; Martha in neeh a bawl a, hizongleh Lazar chu amah toh a ankuang uumpihte laha khat ahi. 3Huin Mari in Spiknard thau namtui man tamtah buuh kimkhat ahung tawi a, Jesu keeng a nuh a, a sam in a keengte a siaah a, huleh thau gimin inn chu a dimta hi. 4Huin nungjuite laha khat, amah mansah diingpa Juda Iskariot, Simon tapa in, 5Bang diing a hi thau gimtui makhai za thum a zuah a, tagahte kawma kipe lou ahiai? a chi a. 6Hichu ama’n tagahte a khawhsahpih jiah hilouin, guta ahi a, dangka-ip a kol a, huleh a sunga kikoih a laah veu jiahin a soi ahi zaw hi. 7Huin Jesu’n, A um um in umsah un; ka kivui ni a diingin ama’n huchu a koih ahi; 8Ta gahte chu na kawmvah a um ngiitngeet uh, hizongleh kei chu na kawmvah ka um ngiitngeet sih diing; a chi a. 9Hujiahin Judate tampiin amah hutah ah a um chih a heta va; Jesu jiah chauh hilouin, misi lah apat a kaihthoh Lazar zong a muhnop jiahun ahung uh. 10Hizongleh siampulalte chu Lazar zong a thah theihna diingun a kihou va. 11Ajiahchu amah jiahin Judate tampi a paimang va, Jesu a gingta ta uhi.

Jesu Jerusalem a gualzoua a luutna

12A jingni’n gual vaahna a hung mi tampi in, Jesu Jerusalem ah hung diing ahi chih a jah un, 13Tuum nahte a tawi va, amah lamtuah diingin a pawtdoh va, huleh, Hosanna, Lalpa mina Israelte Kumpipa hung chu a hampha hi, a chi uh. 14Huleh Jesu’n sabiltung nou khat a mu a, a tungah a tuang a, Hichia gelh bangin, 15Lau sin, Zion tanu; ngai in, na Kumpipa chu sabiltung nou tung a tuang in ahung hi, chih. 16Hi silte nungjuite’n a tuungin a he sih uh; hizongleh paahtawia a um nungin hi thute amah tungtaang a kigial ahi a, huleh a tungah hi silte a bawl uh ahi chih ahung hedohta uhi. 17Hujiahin haan apat Lazar a kouhdoh leh, misi lah apat a kaihthoh lai a, a kawma umte’n a thu a heetpih uhi. 18Hikhu jiahin mipite’n zong hi silmah a bawl chih a jah jiahun amah ana lamtuah uh ahi. 19Hujiahin Pharisaite a kihou va, Bangma na loh thei sih uh chih na he viai? en un, khovel in amah a juita hi, chi'n.

Grik kuate aha in Jesu muh a tupna uh

20Huleh ankuang luina a hungte lahah Grik mi kuate aha a um va. 21Amah u’chu Galili gam a Bethsaida khua a um Philip kawmah a hung va, Pu, Jesu muh ka ut uh, chi’n a ngen va. 22Philip chu a hung a, Andru a hilh a, huleh Andru leh Philipin Jesu a hilh uh. 23Jesu’n amah uh a dawng a, Mihing Tapa paahtawia a umna diing hun a tungta hi. 24Chihtahzetin, chihtahzetin ka hung hilh ahi, Buhtang khat lei a, a kiah a, a sih louhleh a ngenin a um zing; hizongleh a sih inchu tampiin a gah veu hi. 25Koipouh a hinna it in a taan diing a, huleh koipouh hi leitung a a hinna huain kumtuang hin dongin a humbit diing. 26Koipouhin ka nna a toh leh hung jui heh; ka umna ah ka suaahpa zong a um diing ahi; mi koipouh in ka nna a tohleh ka Pain amah a kipaahpih diing hi. 27Tuin ka lungsim a mangbang hi; huleh bang ahiai ka soi diing? Pa, Hi hun lahah hung hundamin ka chi diing adiai? hizongleh hikhu diing jiaha hi huna hung ka hi ngal a. 28Pa, na min paahtawi in, a chi a. Huin vaan apat aw ahung suaah a, Ka paahtawita a, huleh ka paahtawi kiit diing hi, chi’n. 29Hujiahin mipi a kawma ding leh hukhu jate’n vaan ging ahi, a chi va; a dangte’n lah, angel in amah a houpih ahi, a chi uh. 30Jesu’n a dawng a, Hi aw chu kei diing a hung suaah ahi sih a, nanguh diing a hung suaah ahi zaw hi. 31Tu chu hi khovel vaihawm lai ahi; tuin hi khovel lal paihkhiah ahi diing hi. 32Huleh kei lei apat a khaikaang a ka um leh mi zousiah ka kawmah ka hiip diing hi, a chi a. 33Hichu ama’n bangtobang sihna in ahiai a sih diing chih heetsahna a, a soi ahi. 34Mipite’n amah a dawng va, Khrist chu kumtuang in a um zing diing chih ka daan vapat ka ja uh, bang chidan a nangin, Mihing Tapa khaisanga a um ngei diing ahi, na chih ahiai? hi mihing Tapa chu koi ahiai? a chi va. 35Huin Jesu’n a kawmvah, Hun tomchakhat vaah na lahvah a um hi; vaah na neih laiun mialin ahung lap louh na diingin khohei un; ajiahchu koipouh miala khohei in khoilama pai ahih a he sih. 36Vaah na neih laiun vaah chu gingta un, vaah tate na hung hihtheihna diingun, a chi a. Hi thute Jesu’n a soi a, huin a pawta, amah vapat a kibuta hi. 37Hizongleh a ma vah silmah tampi mahmah bawl zongleh amah a gingta tuan sih uhi. 38Zawlnei Isaiah in, Lalpa, ka thusoi uh koi ahiai gingta? huleh Lalpa khut zong koi kawmah ahiai a kilat? chia a soi ahung taangtun theihna diingin. 39Hujiahin a gingta thei sih uh, ajiahchu Isaiah in, 40Ama’n a mit va a muh theih louh na diingun a mit uh a suhtawtsah a, huleh a lungtang va a heetsiamlouh na diingun a lungtang uh a suhkhauhsah ahi; ahung kihei kiit va, ka na suhdam louh na diingin, a chi kiit hi. 41Hi thute chu Isaiah in a loupina a muh laia a soi ahi a, huleh a tungtaang thu a soi na ahi. 42Ahihvangin vaihawmtu lamkaite lahah zong tampiin amah a gingta va, hizongleh Pharisaite jiahin amah a soiphuang ngam sih uh, huchilouin chu kikhopna inn apat nohdohin a umkha diing uhi. 43Ajiahchu amahun Pathian kipaahpiha um sangin mihingte phata um a deih zaw uhi. 44Jesu chu a kikou a, Koipouh kei hung gingta chu, kei hung gingta ahi sih a, ahung sawl pa gingta ahi zaw hi. 45Huleh koipouh kei hung mu chu ahung sawl pa mu ahi. 46Vaah diing a khovel a hung ka hi, koipouh ahung gingta chu miala a um zing louh na diingin. 47Mi koipouh in ka thusoite jain, gingta sih mah zongleh ke’n siamlouh ka tansah sih; ajiahchu khovel siamlouh tangsah diing a hung ka hi sih a, khovel hundam diing a hung ka hi zaw hi. 48Koipouh kei hung deihlou a, ka thusoite zong pomlouin siamlouh tangsah khat a nei hi, ka thusoite mahmahin ni tawpni chiangin amah siamlouh a tangsah diing hi. 49Ajiahchu keimah phuaahtawm in ka soi sih a, hizongleh Pa ahung sawlpa’n ka soi diing leh ka hilh diing thu ahung pia hi. 50Huleh a thupiah chu kumtuang hinna ahi chih ka he hi; hujiahin ka soi pouhmah chu Pain ka kawma a soi bangin ka soi veu ahi, a chi hi.

Aktuálne označené:

JOHN 12: SIMTBSI

Zvýraznenie

Zdieľať

Kopírovať