मत्ती 8
8
ईसु कोढीनै निरोगो कर्यो
(मरकुस 1:40–45; लूका 5:12–16)
1इकै पाछै जद ईसु डूँगरऊँ तळै उतर्यो जणा मिनखा की भीड़ बाकै गेल होलिनी। 2बामै एक कोढी बी हो। बो ईसु कनै आयो अर बाकै पगा म धोक खार बोल्यो, “म्हराज, ज थे चाओ तो मेरो कोढ धो सको हो।” 3आ सुणर ईसु बिपै हात धर बिऊँ खयो, “म चाऊँ हूँ क तेरो कोढ धुपज्या!” अर जदकी जदई बिको कोढ धुपगो। 4पण ईसु बिनै ओडायो, “इ बात क बारां म खिनई मना खिजे। पण याजक क कनै जार खुदनै दिखा अर मूसा की रीत गेल भेंट चढा जिऊँ मिनखानै तेरै निरोगो होबा को सबूत मिलै।”
सुबेदार क दास को निरोगो होबो
(लूका 7:1–10)
5अर जद ईसु कफरनूम नगरी आयो, जणा रोमी सुबेदार जखो सो सिपाईड़ा प हो, ईसु कनै आर अरदास करबा लाग्यो, 6“म्हराज मेरो एक दास घर क मांयनै रोगलो पड़्यो ह। बिकै हवा भेगी इ बजेऊँ बिनै पिड़ा होरी ह।” 7जणा ईसु बिऊँ खयो, “म बठै आर बिनै निरोगो करस्युं।” 8जणा बो सुबेदार ईसुऊँ बोल्यो, “म्हराज म इ जोगो कोनी क थे मेरै घरा पधारो। थे तो अठैऊँई आदेस कर द्यो जणा मेरो दास निरोगो होज्यासी। 9क्युं क म खुद दुसरा क तळै काम करबाळो आदमी हूँ अर मेरै तळै बी सिपाईड़ा काम करीं हीं, अर जद म बामैऊँ एकनै ओडाऊँ क, ‘तू जा ’ जणा बो चल्यो जावै अर दुसरानै ओडाऊँ क, ‘आ’ जणा बो आज्यावै ह। अर जद म मेरा दासऊँ खेऊँ हूँ क, ‘अंय्यां कर’ जणा बो बंय्यांई करै ह।” 10आ सुणर ईसुनै बि मिनख प ताजूब होयो अर बि भीड़ऊँ बोल्यो जखी बाकै गेल आरी ही, “म थानै सची खेऊँ हूँ इ जंय्यांको पक्को बिस्वास तो म इजरायल का मिनखा म बी कोनी देख्यो। 11#लूक 13:29म थानै बताऊँ हूँ क, बोळा मिनख अगुणी अर पाछुणी दिसाऊँ आसी अर बे ईस्बर नगरी राज म अब्राहम, इसाक अर याकूब क सागै जिमबा बेठसी। 12#मत्त 22:13; 25:30; लूक 13:28पण जखी पिडीनै राज मिलबाळो हो बिनै अँधेरा म गेर दिओ ज्यासी जठै रोबो अर दांत पिसबो होसी।” 13इकै पाछै ईसु बि सुबेदारनै ओडायो, “चल्योजा जंय्यां को तेरो बिस्वास ह बंय्यांई तेरै सागै होसी।” जणा बि टेमई बिको दास निरोगो होगो।
ईसु बोळासारा मिनखानै निरोगो कर्यो।
(मरकुस 1:29–34; लूका 4:38–41)
14जद ईसु पतरस क घरा गयो बठै पतरस की सासू बुखार म पड़ी ही। 15जणा ईसु बिकै हात अड़ायो अर बा निरोगी होगी। अर बा खड़ी होर बाकी सेवा-पाणी करबा लागी। 16जद दिन आथगो जणा लोग बा मिनखानै जामै फेंट होईड़ी ही बाकन लेर आया। ईसु बा ओपरी बलायानै हुकम देतो अर बे बाको हुकम मानर बाकै मांयनैऊँ निकळ ज्याती। अर बे बा सगळा मिनखानै निरोगो कर्या जखा रोगला हा। 17#यसा 53:4अंय्यां इ ताँई होयो क्युं क यसाया परमेसर की खेबाळो जखो खयो हो बो पूरो होवै:
बे आपणा रोगानै खुद प लेर अर आपणी बिमार्यानै सेण कर दूर कर दिनी।
ईसु को चेलो बणबा को मोल
(लूका 9:57–62)
18जद ईसु आपकै च्यारूमेर भीड़ देखी जणा बे आपका चेलानै दरिआव क परलै-पार जाबा को हुकम दिओ। 19बि टेम क एक यहूदि जिनै सास्तर को ज्ञान हो, बो ईसु कनै आर बोल्यो, “म्हराज थे जठै बी जास्यो म बी थारै गेल जास्युं।” 20बे बिकी इ बातनै सुणर बिऊँ बोल्यो, “गादड़ा की घुर अर अकास म उडबाळा पंछ्या का घुरस्ळा होवीं पण मिनख का बेटा को तो सीर लुखाबा को बी ठिकाणो कोनी।” 21अर ईसु को एक चेलो बाऊँ खयो, “ओ म्हराज मनै पेली जाबा दे की म मेरा बापनै गाड्याऊँ।” 22पण ईसु बिनै ओडायो, “मेरै गेल होले क्युं क परमेसर बा मिनखानै जाकै कनै जुग-जुग को जीवन कोनी बानै मरेड़ो समजै ह बा मरेड़ा मिनखानै बाका मरेड़ानै गाडबा दे।”
ईसु तौफाननै थाम्यो
(मरकुस 4:35–41; लूका 8:22–25)
23बिकै पाछै बे एक न्याव म जार बेठगा। बाकै सागै बाका चेला बी हा। 24जद बे न्याव क मांयनै हा बि टेम क दरिआव क मांयनै जोरको तौफान आयो अर न्याव म पाणी भरबा लाग्यो पण ईसु सोर्यो हो। 25जणा बे ईसु कनै गया अर बानै जगार बाऊँ बोल्या, “परबु म्हानै बचाओ। क्युं क आपा मरबाळा हां!” 26जणा ईसु बाऊँ बोल्या, “हे कम बिस्वास राखबाळो! थे अंय्यां क्युं डरो हो?” बिकै पाछै बे भाळनै अर दरिआवनै दकाल्या जिऊँ सक्यु स्यांत होगो। 27बे मिनख ताजूब म पड़गा, अर आपसरी म बतळाबा लाग्या, “ओ कूण ह? जिकी बाता तौफान अर दरिआव बी मानै ह!”
मिनखा मऊँ ओपरी बलाय काडी।
(मरकुस 5:1–20; लूका 8:26–39)
28बिकै पाछै ईसु गदरेनिया दिसावर म पुग्या, ओ दिसावर दरिआव क परलै नाकै हो। जणा बठै दो मिनख बानै मिल्या जखा मूसाणा मऊँ निकळर आर्या हा बाकै फेंट होईड़ी ही। बे अंय्यां का खतरनाक मिनख हा की बाकै बजेऊँ बि गेलै कोईबी कोनी जातो हो। 29बे जोरऊँ बोल्या, “हे परमेसर का बेटा, थारो म्हारो काँई लेणदेण? के थे थारा टेमऊँ पेल्याई म्हानै नास करबा आया हो?” 30अर बठैई क्युंक दूर एक सूल्डा को रेवड़ चरै हो। 31इ ताँई बे ओपरी बलाय बाऊँ अरदास कर बोली, “ज थे म्हानै आमऊँ काडो हो जणा बा सूल्डा का रेवड़ म भेज द्यो।” 32जणा ईसु बानै ओडायो, “जाओ!” जणा बे बा मिनखाऊँ निकळर बा सूल्डा का रेवड़ म रळगी। इकै बजेऊँ बे सूल्डा ढळानऊँ गुड़ता गुड़ता दरिआव क मांयनै जा पड़्या अर मरगा। 33अर सूल्डानै चराबाळा नगरी म जार जोक्यु बठै होयो हो बिकै बारां म अर जखा मिनखा म फेंट होईड़ी ही बाकै सागै काँई होयो बिकै बारां म खे सुणायो। 34आ सुणर बि नगरी का मिनख ईसु कनै आगा अर बाऊँ अरदास करबा लाग्या क बो अठैऊँ चल्यो जावै।
Aktuálne označené:
मत्ती 8: एस डब्लु वी
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
(c) 2010-2017, New Life Computer Institute. All rights reserved