मत्ती 2
2
ज्योतिसी माराज को आणो
1हेरोदेस राजा का राज करबा की टेम में जद्याँ यहूदियाँ परदेस का बेतलेम नगर में ईसू को जनम व्यो, तो उगमणी दसाऊँ नरई ज्योतिसी माराज यरूसलेम में आन यो पूँछबा लागा के, 2“यहूदियाँ को राजा, ज्यो जनम्यो हे वो कटे हे? काँके माँकाणी उगमणी दसा में वींको तारो देक्यो अन वींने नमस्कार करबा ने आया हा।”
3यो हुणन राजा हेरोदेस अन वाँकी लारे यरूसलेम का नरई मनक घबराग्या। 4तद्याँ वणी राजा हारई मोटा याजकाँ अन मूसा का नेमा ने हिकाबावाळा ने बलाया अन वाँकाऊँ पूँछ्यो, “मसी को जनम कटे वेणो छावे?”
5वणा क्यो, “यहूदियाँ परदेस का बेतलेम नगर में, काँके परमेसर का आड़ीऊँ बोलबावाळा अस्यान लिक्यो हे के,
6“‘हो यहुदया के बेतलेम नगर का मनकाँ,
थाँको नगर दूँजा नगराऊँ कम ने हे,
काँके अटाऊँ एक मनक राजा बणी।
जो इजराएल में रेबावाळा मारा मनकाँ की आगेवाणी करी।’”
7तो हेरोदेस छानेऊँ ज्योतिसी माराजा ने बलान पूँछ्यो के, तारो कणीक दाण दिक्यो हो? 8वणी वाँने यो केन बेतलेम खन्दाया के, “जावो, वीं बाळक का बारा में सई-सई पतो करो। अन जद्याँ वो लाद जावे तो मने हमच्यार करज्यो, ताँके मूँ भी आन वींने नमस्कार करूँ।”
9वीं राजा की बात हुणन पराग्या अन ज्यो तारो वाँने उगमणी दिसा में दिक्यो, वो भी वाँकी लारे-लारे चालबा लागो अन जटे बाळक हो, वटे पोछन ढबग्यो। 10वीं तारा ने देकन घणा राजी व्या। 11वीं वणी घरे ग्या, जटे बाळक ने वींकी बई मरियम की लारे देक्यो अन गोडा टेकन वींको नमस्कार किदो। आपणी–आपणी जोळ्या खोलन वींने होना, लोबान अन अंतर भेंट किदा।
12परमेसर वाँने हपना में हेंचेत किदा के, हेरोदेस के नके पाच्छा मत जाज्यो, तो वे दूजाँ गेलाऊँ आपणे देस पराग्या।
ईसू का परवार को मिसर देस में जाणो
13वणा जोतिसी माराज के पाच्छा जाबा केड़े, परबू को एक हरग-दुत युसुप ने हपना में दिक्यो अन वींने क्यो, “उठ, बाळक अन वींकी माँ ने लेन मिसर नाम का देस में परोजा अन जतरे मूँ थने ने कूँ, वतरे वटेई रिज्ये। काँके हेरोदेस ईं बाळक ने होदरियो हे के, वींने मरबा नाके।”
14तद्याँ वो रात नेई उटन बाळक अन वींकी माँ ने लेन मिसर देस के वाते निकळ्ग्यो। 15#होसे 11:1अन जतरे हेरोदेस ने मरियो वतरे वटेईस रियो, ईं वाते के, वो बचन ज्यो परमेसर का आड़ीऊँ बोलबावाळा क्यो हो वो पूरा वेवे के, “में आपणाँ पूत ने मिसरऊँ बारणे बलायो।”
16जद्याँ हेरोदेस यो देक्यो के, ज्योतिसी माराज वींकी लारे धोको किदो हे, तो वो रीस में आग्यो अन आदेस देन मनकाँ ने खन्दान, ज्योतिसी माराज क्यो वीं टेम के, लगे-भगे का जनम्याँ बेतलेम अन वींकी अड़े-भड़े का गामड़ा का हाराई दो वर तईं का बाळकाँ ने मरबा नाक्या।
17तद्याँ ज्यो बचन यरमिया नाम का परमेसर का आड़ीऊँ बोलबावाळे क्यो हो वो पूरा व्यो के,
18 #
यर 31:15
“रामाह नगर में एक दुक भरी अवाज हुणई गी,
अवाज रोणो-धोणो अन हाका-भार की ही,
राएल आपणाँ बाळकाँ का वाते रोरी ही,
अन छानी भी ने रेणी छारी ही,
काँके वींका हाराई बाळक अबे ने रिया हा।”
ईसू का परवार को मिसर देसऊँ पाछो आणो
19-20हेरोदेस के मरिया केड़े परबू के हरग-दुत मिसर में युसुप के हपना में आन क्यो, “उठ, अन बाळक अन वींकी माँ ने लेन इजराएल देस में परोजा, काँके ज्यो बाळक ने मारणो छातो हो, वो तो मरग्यो हे।”
21तो पछे युसुप उट्यो अन बाळक अन वींकी माँ ने लेन इजराएल देस में आग्यो। 22पण, युसुप यो हुणन के अरखिलाउस आपणाँ बाप हेरोदेस की जगाँ राज कररियो हे, तो वो वटे जाबाऊँ दरपग्यो, पछे पाच्छी हपना में परमेसर की आग्या हुणन गलील परदेस में परोग्यो। 23#मर 1:24; लूका 2:39; यहु 1:45अन नासरत नाम का नगर में घर बणान रेवा लागग्यो, अस्यान वो बचन पूरो व्यो, ज्यो नरई परमेसर का आड़ीऊँ बोलबावाळा क्यो हो, “वो नासरी नामऊँ जाण्यो जई।”
Aktuálne označené:
मत्ती 2: एम टी आर
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
(c) 2010-2017, New Life Computer Institute. All rights reserved