Yowani 1
1
eChinwa cháhubaa mundu
1Mwa ndangiriso, era muhondo se'kubumba chira kandu, Wachinwa ábaa era anátula'o. Kanji mwe'si suku, Wachinwa ábaa àli ala'uma na Ongo, kanji iwánabaa Ongo kanangana. 2Kutengera esi suku soshi, buna Ongo bu bábaa banátula.
3Ongo ábumbaa ebindu byoshi, kurengera Wachinwa. Rero, kutáli chiro na kandu kasibya ka kábumbwaa busira'i. 4Mwo'yu Wachinwa, mu mwábaa mutúla ekalamo. Na'ku kalamo, bu bwábaa bulangare kwa bandu. 5Obu bulangare, bwéndee bwálomeka mwa musimya. Ne'musimya chiro ákaala kusimya'bo.
6 # 1:6 Anola bàhambere era luulu sa Yowani Mubatisayi. Rero, Ongo átumaa mundu muuma mbu i'Yowani. 7Oyu Yowani, ábahaa kuhambala kwa bya áchiloreraa'ko era luulu so'bu bulangare, chasiya mwa kumurengera ko, ebandu boshi bêmerere mwa michima yabo. 8Yowani, atá iwábaa obu bulangare, si ábahaa kuteta emyasi era áchiloreraa'ko era luulu so'bu bulangare. 9Wachinwa iwábaa bulangare bwe'kanangana. Obu bulangare bwáikire mwa butala na bu bwénde bwálomekera ebandu boshi. 10Si mango ábaa era àli muno butala, besha'mo chiro bákamumenyerera, no'ku iwábumbaa'bo. 11Áikaa no'mwa lubaa lwabo, si banyakabo nabo chiro bákanamuhuukasa.
12Si boshi ba bámuhuukasaa na kumwemerera mwa michima yabo, beke áberesise ebuashi bwe'kuba bana ba Ongo. 13No'ku kuba bana ba Ongo, kutali ngo'kwa ebandu bénde bábutwa, nesi kuhonda kwa mubiri, nesi kuhonda kwa mundu murebe, si Ongo yeine iwábairire kuba bana bai.
14Wachinwa áhubire mundu. Era kuba no'mwa kachi-kachi ketu, éte na bonjo bunene na myasi ya kanangana. Twera kunalola no'kwa bulangare bwai bwa ábaa atúsa. Obu bulangare, Ongo Tata yeine iwêresaa'bo eMwana wai we'chihwa.
15Yowani áhambalaa kwa bya yeine áchiloreraa'ko era luulu so'yu Mwana wa Ongo. Átetaa na murenge munene mbu: «Ono mundu i'nátetaa era luulu sai mbu: ‹Angábaha era nyuma sanyi, si anyírenzise bushi mango nábaa ndasa kubuchibwa, yeke ábaa anátula'o.›»
16Atúsa na bonjo bunene ngachi. Rero bushi no'bu bonjo, tuboshi twàbonyire ewetu mwango wa ngahanyi sinene busese. 17Ongo átweresaa eMwaso* kurengera Musa. Si ebonjo ne'myasi ye'kanangana byeke, ábiretaa kurengera Yesu Kirisito. 18Kutali ola ùfuraa kulola ku'Ongo chiro na hicha. Si oyu Mwana wai we'chihwa anátula Ongo, ola utúla ala'uma na Ongo Tata. Kanji yeine iwánatulosise'i.
Yowani Mubatisayi âna ebubeyi
(Mat 3:1-12; Mar 1:1-8; Luk 3:1-18)
19Lusuku luuma, ebakulu-kulu be'Bayuta be'Yerusalemu bátumaa ebakuhanyi*, ne'Balawi* era mwa Yowani, bamúbuse mbu àli nde. Era kuhambala emyasi era ábaa eshi. 20Era kubǎkula changanama busira kubabisha mbu: «Nyono, atá nyi Kirisito*.»
21Nabo bera kwire bámubusa mbu: «Rero, u'wera nde? Eri u'Eliya?» Nai mbu: «Nânga, atá nyi Eliya.» Bera kumubusa kanji mbu: «Eri ùli murebi* wa Ongo?» Nai mbu: «Nânga!» 22Chasinjire, bera kwire bámubusa mbu: «Ewashe! Woyo, u'wera mundu muchiye kasi? Utúburaa chi wàtechire era luulu sao weine, tuménye cha tungábura ba batútumaa.»
23Yowani era kwire ábǎkula ngo'kwa murebi* Isaya átetaa mbu:
«Nyono, nyìri mundu ola wábarangira mwa buyeye* mbu:
‹Mukunganyisisaa Enawetu enjira kubuya-buya.› #1:23 Somaa Isaya 40:3. »
24Bauma mwa ba bátumwaa era mwa Yowani, bábaa Bafarisayo*. 25Abu Bafarisayo*, bera kumubusa mbu: «Akaba atá u'Kirisito*, nesi atá u'Eliya, utá na murebi*, rero chi chera chénjire chátuma wábatisa ebandu?» 26Nai mbu: «Nyono, nénjire nábatisa ebandu mwa meshi. Si mwa kachi-kachi kenyu mùli mundu muuma ola mùteshi. 27Oyu mundu, angábaha era nyuma sanyi. Si ndéte kwa nyìri kwa kùngatuma náboola emirisi ye'birato byai.»
28Ei myasi yoshi yábaa ala Yowani éndee ábatisisa ebandu, mwa musi we'Betaniya#1:28 Betaniya: ábaa unji musi ola wábaa utúla kwa lunji lunda lwe'lwishi lwe'Yoratani. Oyu musi atá imuuma ne'we Betaniya ola Mariya na Marata bábaa batúla'mo. , kwa lunji lunda lwe'lwishi lwe'Yorotani.
Yowani âna ebubei era luulu sa Yesu
29Ábere mwe'i mishangya, Yowani era kulola ku'Yesu ábaha ofu nai. Era kubura ebandu mbu: «Onola i'Mwana we'Mbuli wa Ongo, ola wénde wákula ebibi bye'bandu bo'mwa butala! 30Mango nabáburaa mbu mundu muuma angábaha era nyuma sanyi, onola i'nabáa nâmaana. Kanji nàtetaa mbu anyírenzise, bushi mango nábaa ndasa kubutwa, yeke ábaa anátula'o. 31Anabe nanyi nabáa ndanámwishi. Si naíkire kubatisa ebandu mwa meshi, chasiya nyìmukangane kwa lubaa lwe'Baisiraeli.»
32Yowani era kuteta kanji era luulu sa Yesu mbu: «Nalólaa kwa Muchima Mubuya-buya ândaala nga chiruka átenga kwa nguba, na ámuúmbirira'ko. 33Nyono nabáa ndàngamumenyire. Si ola wányitumaa mbu nyíndaa nábatisa ebandu mwa meshi, iwànyiburaa mbu ola nyingálola eMuchima Mubuya-buya ândaalira na ámuúmbirira'ko, oyola i'ukénde wábatisa ebandu kwa njira ye'Muchima Mubuya-buya. 34Rero ei myasi yoshi, nyeine nanáchilorere kui. Kubinali, nábabura kwa ono mundu i'na Mwana wa Ongo kanangana.»
Ebanafunzi babere-bere ba Yesu
35Mwe'i mishangya, Yowani ábaa anáchiri mwe'chi chisiki na banafunzi* bai babiri. 36Mango álolaa kwa Yesu árenga, era kuteta mbu: «Mulólaa! Onola i'Mwana we'Mbuli wa Ongo.»
37Ba banafunzi* babiri bômvire bacha, kuna kukulikira Yesu. 38Yesu mwa kubinduka, era kulola kwa bamúkulikire. Era kubabusa mbu: «Chi mwáhonda?» Nabo mbu: «Rabi, ngai yi utúla?» (Rabi kukuteta mbu Mukangirisi.)
39Nai mbu: «Mubáhaa, mulóle ala nyitúla.» Kwa bánali babiri, bera kuchiuma báya kulola ala Yesu ábaa atúla. Olu lusuku loshi, bera kubera ala'uma nai. Kanji ebi bihangi byábaa byera bya saa nge'kumi sa luolo-olo.
40Abu babiri ba bômvaa kwe'i myasi ya Yowani, bu bákulikira Yesu. Muuma mubo iwábaa Andereya, munyakabo Simoni Petero.
41Andereya kuna kuya kufulira tanga oyu munyakabo kwo'yu mwasi. Ámulolire'ko, era kumubura mbu: «Era! Twalólire ku Masiya*!» (Masiya* kukuteta mbu Kirisito*.) 42Chasinda, era kwêka Simoni era mwa Yesu. Yesu era kumutumbikisa, na ámubura mbu: «Woyo, u'Simoni mwenyi Yowani.#1:42 Yowani: Bitabo biuma bitúla bitechire mbu Yona. Rero kutengera lwarero bakére bénde bákwěrika mbu u'Kefa.» (Kefa#1:42 Kefa: Lìri sina lya Chieburaniya, na Petero lìri lya Chikiriki. Amu masina mabiri, kuuma ku manátula màtechire mbu: «Koi.» mwa manji mateta kukuteta mbu "Petero".)
Yesu âmaala Firipo na Natanaeri mwa mulimo
43Ábere mwe'i mishangya, Yesu era kulola kwa kukomire áye eKalilaya. Era kubuana Firipo, na ámubura mbu: «Unyíkulikiraa!» 44Oyu Firipo, ábaa mwesha mwa musi we'Betesaita. Mwo'yu musi, mu Andereya, na Petero nabo bábaa batúla.
45Chasinda, Firipo era kubuana Natanaeri. Era kumubura mbu: «Twalólire kwa mundu ola bitabo bye'Mwaso* wa Musa ne'bye'barebi* bitúla byǎnjikire era luulu sai. No'yu mundu i'Yesu, Mwenyi Yosefu, mwesha mwa musi we'Nasareti.» 46Natanaeri ômvire bacha, kukwera kubusa Firipo mbu: «Ewashe! eNasareti nayi ìnganatenga kandu kabuya?» Firipo nai mbu: «Woyo, kubaha ku unábaa ùchilorere!»
47Mango Yesu álolaa kwa Natanaeri ábaha era àli, era kuteta era luulu sai mbu: «Mulólaa! Ono mundu análi Muisiraeli tenene, no'mwa muchima wai mutáli chiro na butebanyi busibya!» 48Natanaeri, era kubusa Yesu mbu: «Kute ku unyîshi kasi?»
Yesu nai mbu: «Mango Firipo abáa àtasa kukwamaala, nabáa nàkulorire'ko mira mango wabáa wěkese mwa chisina che'muchi we'tini.» 49Natanaeri era kwire ámubura mbu: «Mukangirisi, woyo unáli Mwana wa Ongo! Kanji woyo u'Mwami we'Baisiraeli!»
50Yesu kukwera kumubusa mbu: «Nyono ekukubura kwa nábaa nàkulorire'ko mira mango wábaa wěkese mwa chisina che'muchi we'tini, ku kwatúmire wêmerera mwa muchima wao? Rero, uchíri ungálola ku inji myasi inene era irenzise eyera!»
51Chasinjire, Yesu era kuteta kanji mbu: «Kubinali! Nábabura kwa kuika munálole kwa nguba yábookala. Kanji mungálola no'kwa bamalika* ba Ongo bénjire bátenga kwa nguba bányandaalira nyi Mwana we'Mundu*, chasinda bánahuba kwérukira'ko.»
Aktuálne označené:
Yowani 1: tbt
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2017 Wycliffe Bible Translators, Inc.