Matayo 6
6
Kop ame Yecu opwonyo i kom konyo ocan
1 #
Mat. 23.5
“Gwokere wunu, kur iti wunu ticwu me kite atir i nyim jo me gin nen. Ka itimo wunu amannono, mom doŋ ibino nwoŋo wunu mottoro i baŋ Papawu a tye i palo.
2“Doŋ ba, ka ikonyo ocan, kur ikut bilo apel i nyimi oko con, acalo ogoba timo i kacokere kede i waŋa yo, me jo pakgi. Ateni akobbiwu ni, gin doŋ otyeko gamo motgi oko. 3Ento yin ka ikonyo ocan, kur imi ciŋi tuŋ cam ŋe gin a ciŋi tuŋ cem atimo, 4wek ikony ocan i muŋ; cite Pappi a neni i muŋ bino miyi mot.
Kop ame Yecu opwonyo i kom kwayo Obaŋa
(Nen daŋ Luka 11.2-4)
5 #
Luk. 18.10-14
“Dok ka itye wunu ka kwayo Obaŋa, kur ibed wunu acalo ogoba, pien gin omaro kwayo Obaŋa kun ocuŋ acuŋa i kacokere kede i akara yo, me jo nengi. Ateni akobbiwu ni, gin doŋ otyeko gamo motgi oko. 6Ento yin ka ikwao Obaŋa, dony i tyelo, eka ite cego doggolani oko, ite kwayo Pappi a tye i muŋ; cite Pappi a neni i muŋ bino miyi mot.
7“Ka itye wunu ka kwayo Obaŋa, kur ibed wunu duro kop acalo Orok a pe ŋeo Obaŋa; pien gin tamo ni Obaŋa bino winyogi pi lwak kopgi apol. 8Kur itimu bala gin, pien Papawu ŋeo gin a mitte baŋwu a mom ru ikwae wunu. 9Doŋ ba, kwa wunu Obaŋa kit man, ni,
‘Papawa a tye i polo,
nyiŋi bed me awora.
10Myero locci doŋ bin,
gin ame imito myero tiye, i lobo bala i polo.
11Miwa tin cam mewa me tin;
12timwa kica pi bannyi i baŋwa,
acalo wan daŋ otimo kica baŋ jo a tye kede bannyiwa.
13Kur imi bitwa,
ento ilarwa i baŋ Arac#6.13 Arac: Onyo: i gin arac..
[Pien loc kede teko kede kwogo
obedo meri atwal. Amen.’]
14 #
Mar. 11.25-26
Pien ka wun itimo wunu jo kica i bal megi, Papawu a tye i polo daŋ bino timowu kica; 15ento ka wun mom itimo wunu jo kica, Papawu mom daŋ bino timowu kica i balwu.
Kop ame Yecu opwonyo i kom kanyo kec
16“Ka ikanyo wunu kec, kur ibed wunu bala ogoba a waŋgi nen myemye, pien gin balo waŋgi ni jo nen ni gin otye okanyo kec. Ateni akobbiwu ni, gin doŋ otyeko gamo motgi oko. 17Ento yin ka ikanyo kec, wir wii kede moo ilog waŋi daŋ, 18me kur inen baŋ jo ni ikanyo kec, kono ka baŋ Pappi me i muŋ; cite Pappi a neni i muŋ bino miyi mot.
Lonyo ame akano i polo
(Nen daŋ Luka 12.33-34)
19 #
Yak. 5.2-3
“Kur ikan wunu lonyo pirwu kenwu i wi lobo, kan ame nyenye kede nyalli balo oko ni, anaka okwo turo ot te kwalo oko. 20Ento kan wunu lonyowu i polo, kan ame nyenye kede nyalli mom balo, anaka okwo mom turo ot, te kwalo. 21Pien kan ame lonyowu bedo iye, cunywu daŋ bedo kuno.
Tara me kom
(Nen daŋ Luka 11.34-36)
22“Tara me kom en waŋ; ka waŋi tye boŋo balloro, mio komi luŋ bedo aler. 23Ento ka waŋi rac, komi luŋ bedo i colpiny. Doŋ ka lero iyii odoko col, collere doŋ rom mene!
Tiyi Obaŋa kede tiyi lim
(Nen daŋ Luka 16.13)
24“Mom tye dano moro a twero tiyi odoŋe aryo; pien bino dago ŋat acel, eka te maro en ocele, onyo bino moko i kom moro acel, eka te cayo en ocele. Pe itwero wunu tic pi Obaŋa kede pi lim.
Bedo kede tam apol
(Nen daŋ Luka 12.22-31)
25“En omio akobbiwu ni, kur ibed wunu kede par apol pi kwowu, ni ibino camo wunu ŋo, onyo ibino mato wunu ŋo, onyo pi komwu ni ibino ruko wunu ŋo. Kwo pire mom tek kato cam? Kede kom mom pire tek kato ruk? 26Koŋ inen wunu winy a twarre; gin mom ocoo koti, daŋ mom okao, mom ocoko i dero, ento Papawu a tye i polo pitogi. Wun mom pirwu tek kato gin? 27Kara ŋa i akinawu ame twero medo bat acel i kom kwo mere pi bedo kede par apol? 28Doŋ piŋo ibedo wunu kede par apol pi ruk? Tam wunu koŋ pi kalanweka me tim, kite ame gin doŋo kede. Mom owio uci, mom acweo boŋo; 29#1 Obak. 10.4-7; 2 Tek. 9.3-6ento akobbiwu ni, kadi bed Culeman orukere kede kwogo mere ducu, en mom orukere acalo moro acel i akinagi. 30Ka Obaŋa ruko lum ame tye i tim, ame bedo ka tin keken, dik i ote bolo oko i keno, en mom bino rukowu akato, wun jo ame iyeewu nok? 31Pi mannono kur ibed wunu i par apol, ni, ‘Obino camo ŋo?’ onyo ‘Obino mato ŋo?’ onyo ‘Obino ruko ŋo?’ 32Pien jami magu ducu Orok a pe ŋeo Obaŋa yenyogi; Papawu a tye i polo ŋeo ni ginnogo luŋ mitte baŋwu. 33Ge wunu koŋ yenyo yo me donyo i loccere kede me nwoŋo kite atira mere, jami magu ducu obino medo baŋwu. 34Kur ibed wunu kede par apol pi diki, pien ceŋ a diki bino paro pire kene. Nino acel acel cannere rome.
Aktuálne označené:
Matayo 6: La79
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Lango New Testament © Bible Society of Uganda, 1979.