SAN MATEO 3
3
Ngwaꞌu Xuwa ꞌin nten nu mdiyan niꞌ kixinꞌ seꞌen ndiꞌin yu
1Wa mdiya yaꞌ mdyisnan Xuwa ngwaꞌu yu ꞌin nten nu mdaꞌan seꞌen ndiꞌin yu ska ti yu niꞌ kixinꞌ; mdukwatya yu ꞌin neꞌ bra kanꞌ. Ti kwiꞌ lo yuu ꞌin Judea ndiꞌin yu; wtyi ꞌa yuu seꞌen ndiꞌin Xuwa kanꞌ, ndiꞌin ꞌa kee, loꞌo ja tukwin ndiꞌin nde kwa.
2―Ka jyuꞌu tiꞌ wan ―ndukwin Xuwa ꞌin neꞌ―, kulaa yaꞌ wan chaꞌ kuxi nu ngiꞌni wan ―ndukwin yu―. Wa tyisnan ti chaꞌ ka Ndiose ndloo la niꞌ kasiya ꞌin nten chalyuu.
3Loꞌo Xuwa, lka yu ska nten nu wa ykwiꞌ ayman kula Isaías sꞌni chaꞌ ꞌin. Nde ndiya chaꞌ nu ngwaꞌan yu kula lo kityi:
Kwen xiꞌya ska nten niꞌ kixinꞌ:
“Slaa lya wan ska tuwiin seꞌen kan nu nka Xꞌnaan, xñi suꞌwe wan tuwiin seꞌen tyijin yu” ndukwin nten kanꞌ.
Ngwañaꞌan ngwaꞌan ayman kanꞌ chaꞌ ꞌin Xuwa.
4Loꞌo Xuwa kanꞌ ni, lkuꞌ yu ska teꞌ kichanꞌ camello, loꞌo nchkanꞌ kijin siꞌ yu; nchku yu skuꞌ loꞌo kwiñaꞌ kwitun. 5Loꞌo bra kanꞌ ndyoꞌ tiꞌin kaꞌan nten seꞌen ndiꞌin yu; mdiyan neꞌ kichen Jerusalén nde kwa, loꞌo neꞌ nchga kichen xuwe nu kwenta ꞌin Judea kanꞌ, loꞌo neꞌ nu ndiꞌin kwiꞌ seꞌen ti tuꞌwa chku Jordán, taꞌa neꞌ mdiyan neꞌ seꞌen ndiꞌin yu. 6Mdukwatya Xuwa ꞌin neꞌ kanꞌ lo tyiꞌa chku Jordán bra kanꞌ, mdukwatya yu ꞌin nchga nten nu nchkwiꞌ chaꞌ ngwa jyuꞌu tiꞌ ꞌin chaꞌ kuxi nu ngiꞌni.
7Ngwa ska tsan naꞌan Xuwa ꞌin tyun neꞌ fariseo loꞌo neꞌ saduceo bra kanꞌ; kti ꞌa ngiꞌni neꞌ kanꞌ loꞌo Ndiose, nxkeꞌ tiꞌ neꞌ, lye ꞌa ngiꞌni siyeꞌ neꞌ loꞌo taꞌa nten neꞌ. Loꞌo chinꞌ neꞌ kanꞌ mdiyan neꞌ chaꞌ tukwatya Xuwa ꞌin neꞌ, loꞌo ja ndiya tiꞌ Xuwa chaꞌ ngwañaꞌan ngiꞌni neꞌ kanꞌ.
―Sa ñaꞌan lka kunan tlá, kwiꞌ ngwañaꞌan lka wan ―ndukwin Xuwa ꞌin neꞌ kanꞌ―. ¿Ta wa mxitsen neꞌ ꞌwan sikwa a? ¿Ti ka nu ndukwin ra ꞌwan chaꞌ lyaa wan ꞌin nu tiꞌí nu ndijyan xa nu tyii chalyuu a? ―ndukwin yu―. 8Suꞌwe sikwa, kwaꞌu wan ꞌwa si chañi chaꞌ wa ngulaa yaꞌ wan chaꞌ kuxi nu ndiꞌin ꞌwan. 9Ja xkeꞌ ꞌa tiꞌ wan chaꞌ ka suꞌwe ꞌwan tloo Ndiose si xkwiꞌ ndyuꞌwi tiꞌ wan ꞌin ayman kula ꞌwan, ñaꞌan tiꞌ ayman kula Abraham kanꞌ. Ja talo Ndiose ꞌin chaꞌ kuxi nu ngiꞌni wan siyaꞌ ti, ni siya nten taꞌa ayman Abraham lka wan, nchkwiꞌ wan. Nan kwiñi wan. Si nchka tiꞌ Ndiose, ka ꞌin Ni kwiñan Ni xka ta nten loꞌo kee ndiꞌin tuꞌwa chku re, chaꞌ ka neꞌ taꞌa ayman Abraham; ka ꞌin Ni si nchka tiꞌ Ni. Loꞌo ja tukwa Ndiose chaꞌ ꞌwan bra kanꞌ. 10Sa ñaꞌan nduun ska nten loꞌo chkwan yka ꞌin yu chaꞌ suwi yu lo yka kwiñii ꞌin yu, ngwañaꞌan lka Ndiose; siꞌyu yu kanꞌ ꞌin nchga yka nu ja nda nan suꞌwe, chaꞌ tikin yu ꞌin ran lo kiiꞌ, kwiꞌ ngwañaꞌan ta Ndiose nu tiꞌí ꞌin nten nu ja xlyaa kulaa yaꞌ chaꞌ kuxi nu ngiꞌni neꞌ. 11Loꞌoǔn ni, ndukwatyaǎn ꞌwan loꞌo tyiꞌa chku re, si chañi chaꞌ wa ngwa jyuꞌu tiꞌ wan ꞌin kiꞌya nu ndukwi wan; loꞌo wa kan ti xka nu tnun la chaꞌ nchka ꞌin ke naꞌ. Loꞌoǔn, kuꞌni tnuǔn ꞌin yu kanꞌ; suꞌwe ꞌa ka tiyeěn, ni siya xtiǐnꞌ tiǎn ti ndukwa snan yu kanꞌ. Loꞌo yu kanꞌ ni, ja tukwatya yu ꞌin nten loꞌo tyiꞌa ti; kuꞌni yu chaꞌ kanun Tyiꞌi Ndiose niꞌ kasiya ꞌin nten xa nu tukwatya yu ꞌin neꞌ. Kwiꞌ ngwañaꞌan, kuꞌni luwi yu kasiya ꞌin neꞌ loꞌo xaa ꞌin yu. 12Sa ñaꞌan ngiꞌni nten bra nu nxoꞌ tiꞌin neꞌ nskwaꞌ niꞌ juꞌwa, loꞌo nxoꞌ neꞌ lkaꞌ tlaꞌ xka seꞌen chaꞌ skin ran lo kiiꞌ, ngwañaꞌan suwi Ndiose ꞌin nten, xa nu suꞌwa Ni ꞌin nten xaꞌan chaꞌ skin lo kiiꞌ seꞌen ja tsaa tii ꞌa chaꞌ nchkin.
Ngwañaꞌan ngwaꞌu Xuwa ꞌin nten nu ndyaꞌan seꞌen ndiꞌin yu.
Mdukwatya Xuwa ꞌin Jesús
13Ti mdiꞌin Xuwa tuꞌwa chku Jordán, bra kanꞌ mdoꞌo Jesús lo yuu ꞌin Galilea mdiyan seꞌen ndiꞌin Xuwa, chaꞌ loꞌo Jesús nchka tiꞌ chaꞌ tukwatya Xuwa ꞌin. 14Loꞌo ngwa tiꞌ Xuwa chaꞌ ja tukwatya yu ꞌin Jesús.
―Ja suꞌwe tukwatyaǎn ꞌiin. Suꞌwe la nuꞌwin tukwatyaa ꞌñaǎn ―ndukwin Xuwa ꞌin Jesús.
15Ykwiꞌ Jesús loꞌo yu bra kanꞌ:
―Suꞌwe tukwatyaa ꞌñaǎn ni ―ndukwin Jesús ꞌin Xuwa―, chaꞌ ngwañaꞌan suꞌwe kuꞌnian nchga tñan nu nchka tiꞌ Ndiose chaꞌ kuꞌnian.
Bra nu ynan Xuwa chaꞌ nu ykwiꞌ Jesús loꞌo yu, mdukwatya yu ꞌin Jesús bra kanꞌ. 16Xa wa ngwa chaꞌ kanꞌ, mdoꞌo Jesús lo tyiꞌa, kanꞌ ngalaa nde niꞌ kwan. Loꞌo bra kanꞌ naꞌan Jesús chaꞌ ngwiꞌya Tyiꞌi Ndiose chunꞌ yu; sa ñaꞌan ndiꞌya ska kiñi cha kuun lo yuu, ngwañaꞌan ngwiꞌya Tyiꞌi Ndiose chunꞌ Jesús. 17Ynen ykwiꞌ Ndiose nde seꞌen ndiꞌin Ni nde niꞌ kwan bra kanꞌ. Nde ñaꞌan ndukwin Ni:
―Nu nde lka Sñiěnꞌ ―ndukwin Ni―. Ndiya ꞌa tiǎnꞌ ꞌin yu, chaꞌ suꞌwe ꞌa nsuꞌwi tiyeěn ñaꞌaǎn ꞌin yu.
Aktuálne označené:
SAN MATEO 3: ctp
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 1992, Wycliffe Bible Translators, Inc. All rights reserved.