JENESIS 15
15
Abrambe dage Hera ne Samhatkaibe
1Aipau chângge keliâbe gene Tingwang gu sam Abrambe dage wang de lei, “Hing se lau, Abram gau, I ze ning gu hinggei de lei; ning gu getoabehi di-desang gu lei,” ze kacheu de lei.
2Kane Abrambe ne kak ze “Hei Tingwang Hera gau, achu nang ’ndaikau pei ra lau? I â chuna riâ du a na ga ze larei da zai a ki heurâ teirapeu â Damaska’mpeu Eliezerbe daseu?” ze kacheu de lei. 3Zai Abrambe ne “Pie le lau, a haîhik hang nang ne achu pei gai mak lei; zai a ki ge kebang hangkat lungkeupeu ne a ki-heurâ ze tei gu de zeî lau,” ze kacheu de lei. 4Zai pie le lau, Tingwang gu sam pe dage wang ze, “Aipaupeu ne ning heu ramme tei ra mak lei; ning na gîmsing ne ning heu ramme nguaheu gu lei,” ze kacheu de lei. 5Dadege Tingwang ne pechu hela nguapat lu, pechu, “Tinggîm ’ngngangchu pie gai lu hegi ramme nang seikam dui mei ze sei gai ni lau; ning chaname du chigumbe riâ bam gu lei,” ze kacheu de lei. 6Zai Tingwang je pa ’nnumka’mmi de lei; zai pa ne pechu ka’nzeibe kau hang riam gai bei de lei.
7Dadege Tingwang ne pechu, “Aipau ram ze ning hang pei gai ra Kaldiaram Ur gene ningchu nguapatkaipeu, Tingwang ze I de lei,” kacheu de lei. 8Kane pa ne sa ze, “Hei Tingwang Hera gau, aize a ram hang chang gu de lei be ’ndaigum ze I chî le ra lau?” kacheu de lei. 9Tingwang ne pechu, “Getum poine kum chum kau kat, kemeipui kum chum kau kat, kemei’nsei kum chum kau kat, zai temaune kat benai depeine kat a dage teiwang gai lau,” ze kacheu de lei. 10Dadege pa ne airamme Hera dage teiwang gai lu, pa’mpi-pi dângtap kai lu, pe pumdâng ramme teikedetrim ze ’nria kena teleu gai de lei; kane ’nruine kena ze â dângtap kai mak te lei. 11Aipau herum ge Lawai ramme liamkeu de lei, kane Abrambe ne guâtua ’ndi de lei.
12Naimikkeube riâ chang dege, Abrambe jeihungkeu di de lei, zai kehingbe benai kemuîbe pe peireige wangchang di de lei. 13Tingwang ne Abrambe je, “Ning chaname â miramme dei ge hesang chang ze bam gu lei; kum haî medai riâ chige penui kebang chang gu zai penui je tewsâ gu lei; 14kane penui je kebang hang tewgaibe kau zat je I ne tewsâ gu lei, zai chi hesangram penui sâu dai dezai, penui heurâ misongga ze penui ne tei lu zuapat dai gu lei. 15Nang â ning peume lam temichai ze tat ku lei; chîng’mmihâm gai dezai ningchu â bai gai gu lei. 16Rehei medai chang dezai aige penui lungwang dai gu lei; Amorme gu hemui tâ tewbe ’nsang gai mak larei daseu,” acheu bei de lei.
17Naimik keu di, zai muî de muî di dege, pie le lau, hemi kaluibe benai hemimelei taubenbe keleu ze hekaune pumdâng ramme kakgene tatpelatat ti de lei. 18Chipau mai ge Tingwang ne Abrambe dage samhat kai ze, “Ning chaname hangge aipau heram ze I pei lei, Ijipram geuki gene Euphrates geuki riâ 19Kenme ram, Kenizme ram, Kadmonme ram, 20Hethme ram, Perizme ram, Rephaimme ram, 21Amorme ram, Kanaanme ram Girgashme ram, zai Jebusme ram riâ chang zeu,” ze kacheu de lei.
Aktualisht i përzgjedhur:
JENESIS 15: ZEMEBSI
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.