Yowann 2
2
An Demmedhyans yn Kana
1Y'n tressa dydh, yth esa demmedhyans yn Kana a Alile, hag yth esa mamm Yesu ena; 2ha Yesu ha'y dhyskyblon a veu gelwys dhe'n demmedhyans. 3Ha pan fyllis an gwin, mamm Yesu a leveris dhodho, ‘Nyns eus gwin gansa.’ 4Yn-medh Yesu dhedhi, ‘Pandr'yw henna dhymmo vy ha dhiso jy, a venyn? Nyns yw ow eur hwath devedhys.’ 5Yn-medh y vamm dhe'n servysi, ‘Gwrewgh pypynag a lavarro dhywgh.’ 6Hag yth esa ena hwegh seth-dowr gwrys a ven rag glanheansow an Yedhewon, ow synsi pubonan dew po tri firkin.#2:6 firkin: Greka metretes, musur linyel, a-dro dhe 40 liter. 7Yn-medh Yesu dhedha, ‘Lenwewgh an sethow a dhowr.’ Hag i a's lenwis bys y'n topp. 8Hag yn-medh ev dhedha, ‘Tennewgh yn-mes lemmyn ha'y dhoen dhe rewler an kevewi.’ Hag i a'n dug. 9Ha pan dastyas rewler an kevewi an dowr o devedhys ha bos gwin (ha ny wrussa godhvos a-ble feu, mes an servysi a dennas an dowr a wrussa godhvos), rewler an kevewi a elwis an gour pries, 10ha leverel dhodho, ‘Pub den a worr an gwin da yn kynsa, ha wosa i dhe vedhwi, an gweth; mes ty re withas an gwin da bys lemmyn.’ 11Yesu a wrug henna, dalleth y doknys, yn Kana a Alile, ha diskwedhes y wolewder; ha'y dhyskyblon a grysis ynno.
12Wosa hemma, ev eth yn-nans dhe Kapernaum, ev ha'y vamm ha'y vreder ha'y dhyskyblon; ha ny wortsons ena saw nebes dydhyow.
Glanhe an Tempel
Mat 21:12-13; Mark 11:15-17; Luk 19:45-46
13Hag ogas o pask an Yedhewon, ha Yesu eth yn-bann dhe Yerusalem, 14hag ev a gavas y'n tempel tus ow kwertha oghen ha deves ha kelemmi, ha'n arghansoryon, esedhys. 15Hag ow kul skorja a gerdyn ev a's tewlis oll mes a'n tempel, ha'n deves ha'n oghen, hag ev a skoellyas bathow an arghansoryon, ha domhwel an moesow, 16ha leverel dhe neb a wertha an kelemmi, ‘Kemmerewgh an taklow ma alemma; na wrewgh chi ow Thas yn marghatti.’ 17Ha'y dhyskyblon a borthas kov bos skrifys, ‘Avi a-barth dha ji a'm devor.’ 18Ytho an Yedhewon a worthybis ha leverel dhodho, ‘Py tokyn a yll'ta y dhiskwedhes dhyn, rag ty dhe wul hemma?’ 19Yesu a worthybis ha leverel dhedha, ‘Diswrewgh an tempel ma, ha kyns penn trydydh my a'n drehav.’ 20Ena yn-medh an Yedhewon, ‘Hwegh blydhen ha dew-ugens yth esa an tempel ma ow pos drehevys, ha ty a'n drehav kyns penn trydydh?’ 21Mes ev a gewsi a dempel y gorf ev. 22Ytho pan veu drehevys dhiworth an re varow, y dhyskyblon a borthas kov ev dhe leverel hemma, hag i a grysis an skryptor, ha'n ger a gewsis Yesu.
Yesu yn Yerusalem rag an Pask
23Ytho pan esa ev yn Yerusalem y'n pask, y'n goel, lies a grysis yn y hanow ev, pan welsons an toknys a wrug. 24Mes ny omdrestyas Yesu y honan dhedha, rag ev a aswonni peub, 25ha nyns esa edhomm dhodho denvyth dhe dhustunia a-dro dhe dhen; rag ev a aswonni pandra esa yn den.
Aktualisht i përzgjedhur:
Yowann 2: ABK
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© Kesva an Taves Kernewek 2004, 2024
© Cornish Language Board 2004, 2024