Cenisihs 11
11
KaaTipenciketc Pepahkaan Kii'ishikiishwe'aatc Kahkina Pemaatisinitc
1Maawac tahsh iko nihtam kahkina kaakiih pimaatisiwaatc o'omaa ahkiink peshikwan kii‑ishikiishwewak, peshikwan kaye ihkitowinan okii aapacihtoonaawaan. 2Miitahsh ehpapaami ayaawaatc waapanonk inahke eishaawaatc, okii otihtaanaawaa ahkiini ehpashkwaanik Shaainar (Shinar) ekii ishinihkaatenik. Mii 'imaa kaaishi kapehshiwaatc. 3Miitahsh kaaihkitowaatc ehkakanoonitiwaatc, “Ampeyohk, taka oshi'aataanik kahkahkeyaapihkahsiniik, caakiswaataanik kaye cimashkawisiwaatc.” Miitahsh i'i kahkahkeyaapihkahsinii' kaa‑aapaci'aawaatc, pikiwan kaye okii aapaci'aawaan keonci kihciwaapihkihshininitc i'i ahsinii'. 4Kii‑ihkitowak kaye, “Ampeyohk, taka oshihtamaasotaa kihci ootena, ompahkitootaa kaye kekoon ci‑ishpahkitek, wakicaya'ii ciotihtaahkitek weti kihci kiishikonk. Miitahsh keonci kihkenimikooyank, kaawiin tahsh kaye misiwe kika ishi misihteshkaahsiimin o'omaa ahkiink.”
5KaaTipenciketc tahsh kiihpinaashii ewii waapantank i'i kihci ootenaani, i'i kaye ishpaapihkinikan kaakii oshihtoonitc pemaatisinitc. 6KaaTipenciketc tahsh kii‑ihkito, “Inashke mihci peshikwewaanakisiwak pemaatisiwaatc, kahkina kaye peshikwan ishikiishwewak. Miitahsh o'o kaamaacii ishihcikewaatc, kaawiin kaye kekoonini oka pwaanawihtoohsiinaawaa ci‑ishihcikewaatc aaniin eshi antawentamowaatc. 7Ampe, taka naashaya'ii ishaataa, wawaanentamohtaawaataa otishikiishwewiniwaa, cinihsitohtaatihsikwaa kakanoonitiwaatc.” 8Miitahsh kaaTipenciketc kaakii misihtenaatc pemaatisinitc misiwe o'omaa ahkiink ci‑ishaanitc. Okiih poonihtooni hsa i'i kihci ootenaani kaakii oshihtoonihpan. 9I'i tahsh kihci ootenaani Pepal (Babel)#11.9 Pepal (Babel): I'iwe ihkitowin Pepal kaa'icikaatek “Wawanentamihtaakwan,” mii 'i eshinihsitootamowaatc Hiiparoowak kaaishikiishwewaatc. kii‑ishinihkaateni, aaniihsh mii 'imaa kaaTipenciketc kaakii ishi wawaanentamohtootc maamaw kaakii ishikiishwenaaniwaninik misiwe o'omaa ahkiink. Miitahsh kaye i'imaa kaaTipenciketc kaakii onci misihtenaatc pemaatisinitc misiwe o'omaa ahkiink ci‑ishaanitc.
Shem Opiiwesiima' Ehtashinsonitc
10Mii o'oweniwa' opiiwesiima' Shem ehtashinsonitc: Niisho pipoon hsa eishihsenik ahpii kaaishkwaa nihkipiik ahki, Shem ninkotwaahk (100) kiihtahso pipoonwe. Miihsh kaakii okosihsitc, Arpakihsaat (Arphaxad) ekii ishinihkaanaatc. 11Ahpii hsa kaaishkwaa ayaawaatc ini okosihsan, keyaapi hsa naanwaahk (500) tahso pipoon kiihpimaatisi. Kotak itahsh kaye apinoonciisha' okiih pi ayaawaa'.
12A'a hsa Arpakihsaat nihsimitanashinaanan (35) ehtahso pipoonwetc kiiokosihsi, Shiila (Shelah) ekii ishinihkaanaatc. 13Ahpii hsa kaaishkwaa ayaawaatc ini okosihsan keyaapi hsa, niiwaahk nihsopipoon (403) kiihpimaatisi. Kotak itahsh kaye apinoonciisha' okiih pi ayaawaa'.
14A'a hsa Shiila nihsimitana (30) ehtahso pipoonwetc kiiokosihsi, Iipar (Eber) ekii ishinihkaanaatc. 15Ahpii hsa kaaishkwaa ayaawaatc ini okosihsan keyaapi hsa, niiwaahk nihsopipoon (403) kiihpimaatisi. Kotak itahsh kaye apinoonciisha' okiih pi ayaawaa'.
16A'a hsa Iipar nihsimitanashiniiwin (34) ehtahso pipoonwetc kiiokosihsi, Piilek (Peleg) ekii ishinihkaanaatc. 17Ahpii hsa kaaishkwaa ayaawaatc ini okosihsan keyaapi hsa, niiwaahk nihsimitana (430) tahso pipoon kiihpimaatisi. Kotak itahsh kaye apinoonciisha' okiih pi ayaawaa'.
18A'a hsa Piilek nihsimitana (30) ehtahso pipoonwetc kiiokosihsi, Riio (Reu) ekii ishinihkaanaatc. 19Ahpii hsa kaaishkwaa ayaawaatc ini okosihsan keyaapi hsa, niishwaahk shaankahso (209) pipoon kiihpimaatisi. Kotak itahsh kaye apinoonciisha' okiih pi ayaawaa'.
20A'a hsa Riio nihsimitanashiniishin (32) ehtahso pipoonwetc kiiokosihsi, Siiraak (Serug) ekii ishinihkaanaatc. 21Ahpii hsa kaaishkwaa ayaawaatc ini okosihsan keyaapi hsa, niishwaahk niishwaahso (207) tahso pipoon kiihpimaatisi. Kotak itahsh kaye apinoonciisha' okiih pi ayaawaa'.
22A'a hsa Siiraak nihsimitana (30) ehtahso pipoonwetc kiiokosihsi, Nehor (Nahor) ekii ishinihkaanaatc. 23Ahpii hsa kaaishkwaa ayaawaatc ini okosihsan keyaapi hsa, niishwaahk (200) tahso pipoon kiihpimaatisi. Kotak itahsh kaye apinoonciisha' okiih pi ayaawaa'.
24A'a hsa Nehor niishtanashishaankahso (29) ehtahso pipoonwetc kiiokosihsi, Tiira (Terah) ekii ishinihkaanaatc. 25Ahpii hsa kaaishkwaa ayaawaatc ini okosihsan keyaapi hsa, ninkotwaahk mitaahshishaankahso (119) tahso pipoon kiihpimaatisi. Kotak itahsh kaye apinoonciisha' okiih pi ayaawaa'.
26A'a hsa Tiira niishwaahsimitana (70) ehtahso pipoonwetc kiiokosihsi, Eparam (Abram), Nehor (Nahor), Heran (Haran) ekii ishinihkaanaatc i'i okosihsa'.
Tiira (Terah) Opiiwesiima' Ehtashinsonitc
27Mii o'oweniwa' opiiwesiima' Tiira (Terah) ehtashinsonitc: Mii hsa o'oweniwa' Tiira kaakii okosihsitc; Eparam (Abram), Nehor (Nahor), ini kaye Heran (Haran) kaakii ishinihkaasonitc. A'a tahsh Heran okosihsan Laat (Lot) kii‑ishinihkaasowan. 28Mekwaa hsa oteten Tiirawan ehpimaatisinitc, Heran hsa kiihtashi ishkwaa pimaatisi i'imaa Er (Ur) ootenaank, Paapilan (Babylon) ahkiink kaakii onci nihtaawikitc. 29Iki tahsh minciniish Eparam a'a kaye Nehor kiiwiiwiwak. Eparam hsa wiiwan Seraii (Sarai) kii‑ishinihkaasowan. A'a tahsh wiin Nehor wiiwan Milhka (Milcah) kii‑ishinihkaasowan otawemaani Iska (Iscah) ekii ishinihkaasonitc. Iki tahsh ihkwewak Nehor kii‑ishinihkaasowan otetewaan. 30A'a hsa wiin Seraai kaawiin okiih kashkihtoohsiin cioniicaanihsitc. 31Tiira tahsh okii maaciinaan okosihsan Eparaman, wiiwini kaye kaakii oshiimihsitc Seraii eshinihkaasonitc. Ooshihsan kaye Laat eshinihkaasonitc kaakii otetenitc Heranan okiih tako maaciinaan. Miitahsh kaaishi maacaawaatc ekii nakatamowaatc Er (Ur) ootena eyaanik Kaaltiiya (Chaldea) ahkiink#11.31 Kaaltiiya (Chaldea) ahki: Mii peshikwan i'i ahki Paapilan kaa'icikaatek. ewii ishaawaatc Kenan (Canaan) ahkiink. Ahpii tahsh eni takohshinowaatc Heran ootenaank, mii 'imaa kaaishi kapehshiwaatc. 32Miitahsh weti Tiira kaahtashi ishkwaa pimaatisitc niishwaahk naanan (205) ekiih tahso pipoonwetc.
Aktualisht i përzgjedhur:
Cenisihs 11: OJBR
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Ojibwe Shorter Bible (Roman Script) © 2008 Canadian Bible Society