Tongo nda ti aye 21
21
Dungo Isaac
1KOTA GBIA aga ti sara nzoni na Sara alingbi na tënë so lo tene. Lo sara ye na Sara alingbi na zendo so lo mu ando. 2 Sara amu ngo si lo du molenge-koli na Abraham na ndembe so Abraham aga mbakoro awe. Sara adu molenge ni gi na ngoi so Nzapa afa na lo. 3Abraham adi iri ti molenge so Sara adu na lo so Isaac. 4 Lo fâ Isaac na *ganza na ndembe so molenge ni asara lango miombe tongana ti so Nzapa amu na lo yanga ti sarango ni. 5Abraham ayeke na ngu ngbangbo oko na ndembe so lo du Isaac. 6 Sara atene: “Nzapa asara titene mbi he ngia. Azo so kue ayeke ma tënë ti Isaac ayeke bongbi na mbi ti he ngia ni.” 7Na pekoni, lo tene: “Zo wa laa alingbi ti tene na Abraham atene, fade Sara ayeke mu me na molenge? Me mbi du molenge-koli na Abraham na ya ti mbakoro ti lo!”
Abraham atumba Agar na Ismael
8Molenge ni akono si mama ni azi lo na yanga ti me. Na lango ti zingo lo na yanga ti me, Abraham asara kota matanga.
9Sara abaa molenge so Agar, wali ti kodro ti Ezipte, adu na Abraham so. Molenge ni ayeke sara ngia. 10 Lo tene na Abraham: “Mo tumba ngbaa-wali so na molenge ti lo, ala hon si molenge ti ngbaa-wali so na molenge ti mbi, Isaac, akangbi ya ti aye ti mo na peko ti mo pepe.”
11Tënë so aso be ti Abraham mingi, ngbanga ti so Ismael ayeke molenge ti lo. 12 Me Nzapa atene na lo: “Ayeke nzoni be ti mo aso ndali ti molenge ni na ngbaa-wali so pepe. Ma tënë so kue Sara ayeke tene na mo, ngbanga ti so na lege ti Isaac laa mo yeke wara ahale so mbi mu zendo ti ala na mo. 13Ti molenge ti ngbaa-wali ni, mbi yeke sara titene na lege ti lo mbeni mara abaa gigi, ngbanga ti so lo nga lo yeke molenge ti ya ti mo.”
14Na ndaperere so ndo angba kâ, Abraham alondo, lo mu mapa na bozo ti poro so ngu ayeke na ya ni, lo mu na Agar; lo zia ni na ndö ti go ti lo. Lo mu molenge ni na lo si lo tene na lo atene, lo gue. Agar ague si lo yeke tambula kirikiri na ya ti benyama ti Bersheba. 15Na ndembe so ngu ahunzi na ya ti bozo ni awe, lo zia molenge ni na gbe ti mbeni kete keke. 16Lo gue, lo duti yongoro, alingbi na yongo ti ndo so, tongana zo apika kokora ague, ati daa. Lo yeke tene na be ti lo, lo tene: “Mbi ye ti duti ti baa molenge ni akui na le ti mbi pepe!” Lo duti yongoro na molenge ni si lo to nda ti toto. 17Nzapa ama toto ti molenge ni si na nduzu kâ, *ange ti Nzapa airi Agar, atene: “Agar, nyen laa asara mo, nyen? Sara mbeto pepe, ngbanga ti so Nzapa ama toto ti molenge ni na ndo so molenge ni ayeke daa so. 18Londo! Mu molenge ni na nduzu! Mo gbu lo ngangu, ngbanga ti so mbi yeke sara titene mbeni kota mara abaa gigi na lege ti lo.” 19Nzapa azi le ti Agar si lo baa mbeni du ti ngu so ngu ayeke na ya ni. Lo gue, lo to ngu ni na ya ti bozo ti poro ni si lo mu na molenge ni titene lo nyon.
20Nzapa ayeke na molenge ni. Lo kono si lo sara kodro gi na benyama. Lo ga zo ti pikango kokora. 21Lo sara kodro na benyama ti Paran. Mama ti lo amu na lo mbeni wali ti kodro ti Ezipte.
Abraham na Abimelek aga ambuki
22 Na ngoi ni so, Abimelek na Pikol, makonzi ti aturugu ti lo, aga atene na Abraham: “Nzapa ayeke na mo na lege ti aye so kue mo yeke sara. 23Laso, na ndo so e yeke daa so, ayeke nzoni mo deba yanga ti mo na iri ti Nzapa, mo tene, mo yeke handa mbi pepe, wala amolenge ti mbi pepe, wala *ahale ti mbi pepe. Tongana ti so mbi sara nzoni na mo, mo nga, fade mo yeke sara nzoni na mbi, na azo ti kodro so mo duti daa so.” 24Abraham akiri tënë, atene: “Mbi deba yanga ti mbi awe.”
25Abraham adema tere ti lo na Abimelek ndali ti du ti ngu so azo ti kua ti Abimelek agbanzi na lo so. 26Abimelek akiri tënë na lo, atene: “Mbi hinga zo so asara ye so pepe. Mo tene nga na mbi tënë ni kozoni pepe. Ti mbi, mango tënë ni laa mbi ma laso so.” 27Abraham amu ambeni taba, na angasa, na abagara si lo mu na Abimelek. Ala use aleke tënë ti *mbuki na popo ti ala. 28Abraham amu akete mama ti taba mbarambara azia ala nde. 29Abimelek ahunda lo, atene: “Nda ti akete mama ti taba mbarambara so mo zia ala nde so ayeke nyen?” 30Abraham akiri tënë, atene: “Titene mbi mu ala na mo. Tongaso, tongana mo baa ala, mo dabe ti mo, mo tene, mbi laa mbi zi du ti ngu so.” 31Ndani laa azo airi ndo ni so Bersheba. Na ndo so laa ala use kue adeba yanga ti ala.
32Kâ na Bersheba si ala leke tënë ti mbuki. Na pekoni, Abimelek amu lege akiri na sese ti azo ti Filistii, lo na Pikol, makonzi ti aturugu ti lo. 33Abraham alu keke ti tamaris na kodro ti Bersheba, lo sambela Nzapa so ayeke kpu na kpu si lo iri lo na iri ti KOTA GBIA. 34Abraham alango aninga na sese ti azo ti Filistii.
Aktualisht i përzgjedhur:
Tongo nda ti aye 21: MNF2010
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© La Société Biblique de Centrafrique 2010