Tongo nda ti aye 25
25
Ambeni molenge ti Abraham
1Abraham akiri amu mbeni wali so iri ti lo Ketura. 2Wali ni adu na lo amolenge tongana: Zimran, Yoksan, Medan, Madian, Ishebak na Shua. 3Yoksan adu Saba na Dedan. *Ahale ti Dedan ayeke azo ti mara ti Ashur, ti Letushi na ti Leumi. 4Amolenge ti Madian ayeke Efa, Efer, Hanok, Abida na Elda. So ahale ti Ketura kue laa.
5Abraham amu aye ti lo kue na Isaac. 6Ti amolenge so ambeni wali ti lo adu, lo mu kadoo na amolenge ni. So lo de na fini, lo tene na ala ti hon yongoro na tere ti molenge ti lo Isaac ti gue na mbeni kodro, na mbage ti To.
Abraham akui
7Ngu so kue Abraham asara na gigi ayeke ngu ngbangbo oko na balembarambara na oku. 8Na pekoni, lango ti Abraham ahunzi. Lo te gigi alingbi na lo; lo ga mbakoro, lo duti nzoni na ya ti mbakoro ti lo ni. Lo kui si lo gue na peko ti akotara ti lo. 9Amolenge ti lo Isaac na Ismael alu kuâ ti lo na ya ti du ti têne ti Makpela so ayeke na yaka ti Efron, molenge ti Sohar, zo ti mara ti Het. Yaka ni abaa le na kodro ti Mamre. 10 Abraham avo ando yaka ni na maboko ti azo ti mara ti Het. Na ndo so laa a lu kuâ ti Abraham na ti wali ti lo Sara. 11 Na peko ti kuâ ti Abraham, Nzapa asara tufa na ndö ti molenge ti lo Isaac. Isaac asara kodro nduru na du ti ngu ti Lahai-Roi.
Asewa ti Ismael
12So ayeke tënë ti sewa ti Ismael, molenge so Agar, wali ti kodro ti Ezipte so ayeke sara kua na Sara, adu na Abraham. 13Iri ti amolenge ti Ismael ti koli na lege ti molongo ti dungo ala ayeke so: Nebayot, kozo molenge ti Ismael, na Kedar, Adbeel, Mibsam, 14Mishema, Duma, Masa, 15Hadad, Tema, Yetur, Nafish na Kedma. 16So amolenge baleoko na use ti Ismael kue laa. Ala yeke amakonzi baleoko na use na ndö ti akete mara ti ala. Ala zia iri ti ala na ndö ti akete kodro ti ala na abâbâ ti ala. 17Ismael aduti na gigi ngu ngbangbo oko na baleota na mbarambara si lo kui, lo gue na peko ti akotara ti lo. 18Ahale ti Ismael asara kodro na sese so ayeke na popo ti Havila na Shur. Shur ayeke nduru na Ezipte na lege so ague na Ashur. Ala gue, aduti ti ala nde na tere ti tanga ti ahale ti Abraham.
JACOB
25–36
Ezau na Jacob
19Tënë ti sewa ti Isaac, molenge ti Abraham ayeke so:
Abraham adu Isaac. 20So Isaac ayeke na ngu baleosio, lo mu Rébecca ti ga wali ti lo. Rébecca ayeke molenge ti Betuel si lo yeke nga ita ti Laban; azo so kue ayeke azo ti mara ti Aram, na sese ti Mezopotamii ti nduzu. 21Isaac avoro tere ti lo mingi na KOTA GBIA ndali ti wali ti lo, ngbanga ti so wali ti lo ni ayeke wali ti dungo ni pepe. KOTA GBIA abaa mawa ti lo si wali ti lo Rébecca amu ngo. 22Lo yeke ku ti du angbo; amolenge ni ayeke pika tere ti ala na ya ti mama ni si lo hunda tere ti lo, lo tene: “Nyen laa asi na mbi tongaso?” Na pekoni, lo gue, lo hunda KOTA GBIA na nda ti tënë ni. 23 KOTA GBIA atene na lo:
“Amara use ayeke na ya ti mo;
amara use ayeke sigigi na ya ti mo
ti kangbi tere ti ala.
Mbeni mara ni oko ayeke ngangu ahon mbeni,
yaya ni ayeke sara kua na gbe ti ngambe ni.”
24So lango ti dungo ti lo alingbi awe, andaa angbo laa ayeke na ya ti lo. 25Kozo molenge so asigigi, tere ti lo kue abe bengo. Kua ti tere ti lo amu tere ti lo kue tongana ti nyama. A di iri ti lo Ezau. 26Ita ti lo asigigi na peko ti lo; lo gbu ngbonda ti gere ti Ezau. A di iri ti lo Jacob. Na ndembe so a du amolenge so, Isaac ayeke na ngu baleomene.
27Amolenge-koli ni akono. Ezau aga mbeni kpengba zo ti gingo nyama so ayeke tambula na ya ti ngonda. Jacob ayeke ti lo zo so ayeke kpoo; lo yeke duti na ya ti ada ti bongo. 28Isaac aye Ezau mingi, ngbanga ti so lo ye ti te nyama ti ngonda mingi. Rébecca aye ti lo Jacob mingi.
29Mbeni lâ, Jacob ayeke sara ngu-kasa. Ezau alondo na ngonda akiri. Ngangu ahunzi na lo kue. 30Ezau atene na Jacob: “Mbi gbu gere ti mo, zia mbi nyon mbeni ngu-kasa so, ngu-kasa so le ni abe bengo so, ngbanga ti so ngangu ahunzi na mbi kue awe.” Ndani laa azo airi lo Edom. 31Jacob atene na lo: “Ka na mbi ndo ti mo ti kozo molenge si.” 32Ezau akiri tënë, atene: “Baa, mbi yeke kui kuingo. Nyen laa mbi yeke sara na ndo ti mbi ti kozo molenge ni, nyen?” 33Tongaso Jacob atene na lo: “Deba yanga ti mo si.” Ezau adeba yanga ti lo si lo ka ndo ti lo ti kozo molenge na Jacob. 34 Na pekoni, Jacob amu na Ezau mapa na ngu-kasa ni. Ezau ate, lo nyon si lo londo, lo hon. Lege so Ezau abaa ndo ti lo ti kozo molenge tongana mbumbuse ye na le ti lo laa.
Aktualisht i përzgjedhur:
Tongo nda ti aye 25: MNF2010
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© La Société Biblique de Centrafrique 2010