Aluki 8
8
Pɔgsɩ n dolɩ Azezi
1Bɛla poorʋm, Azezi sẽŋɛ la tẽn-kãra, la tẽn-pɩgsɩ pʋam ka mõola Nawẽnnɛ so'olʋm kõ-yẽlga. Tɩ a karẽnbiisi pia la ayi la dɔla ẽ. 2La pɔgsɩ basɛba n mẽ daan dolɩ ẽ. La kʋlkã'arsɩ, la bã'asɩ n daan nãmsrɩ pɔg-bãma, tɩ Azezi botɩ ba yẽ ĩmã'asʋm. Pɔgsɩ la ayɩla yʋ'ʋrɛ de la Amaari n yese Magdala, ẽŋa tɩ kʋlkã'arsɩ bayopɔɩ daan yese dee basɛ ẽ na. 3La ayẽma yʋ'ʋrɛ de la Azanɩ. Ẽŋa de la Asuza n bɩsrɩ naba A'erɔdɩ yire yelle la pɔga. La ayɩla yʋ'ʋrɛ de la Asuzanɩ. Pɔg-bãna, la pɔgsɩ zozo'e n tarɩ ba mẽŋa lɔgrɔ sõŋra Azezi la a karẽnbiisi la.
Nẽra n yese tɩ a lobge a bõnbuuri makrɛ
(Amatie 13:1-23, Amarkɩ 4:1-20)
4La nẽrba n ze'ele tẽnsɩ to'oto'ore sẽnna Azezi zẽ'am. Nẽrba la n daan lagsɛ zo'oge pãɩ la, tɩ Azezi makɛ makrɛ bɔ ba yetɩ: 5«Kaara n daan yese tɩ a lobge a bõnbuuri. Ẽŋa n boe mĩ lɔbgra la, tɩ bõnbuuri la basɛba lui sore zuo tɩ nẽrba nẽ ba, dee tɩ niinto mẽ wa'am wa di ba. 6Tɩ basɛba lui tãmpĩa zuo bule, la mã'asrɛ n ka boe mĩ na ĩyã tɩ ba zẽkɛ ki. 7Tɩ bõnbuuri basɛba lui gõ'osɩ zẽ'a, tɩ bãma la gõ'osɩ la wuu lagɩm yese, tɩ gõ'osɩ la fʋrɛ ba. 8Tɩ basɛba lui zẽ'e-sõŋɔ zẽ'a yese, wɔm biɛ zo'oge paagɛ kɔbga kɔbga.» Azezi n tɔgɛ bɛla la, dee yetɩ: «Sɛka n wõm yetɔga wã, a selse sõŋa sõŋa.»
9Tɩ a karẽnbiisi la soke ẽ makrɛ la võorɛ. 10Tɩ a lerge ba yetɩ: «Nawẽnnɛ botɩ yãma bãŋɛ a so'olʋm yelle n sʋgɛ la mɛ, la sɛba n ka boe tõma pʋam na, mam makrɩ la magsa bɔ'ɔra ba.
‹Bɛla tɩ ba wʋn bɩsra,
dee ka yẽta,
ba wʋn wõnna,
dee ka bãŋra ba võorɛ.›
11Makrɛ la võorɛ n wãna: Bõnbuuri la de la Nawẽnnɛ yetɔga. 12Sore la zuo tɩ bõnbuuri sɛba lui la, ãn wʋ nẽr-sɛba n wõm yetɔga la, tɩ Asũtãana wa'am wa yese yetɔga la ba sũure pʋam, botɩ ba kãn sakɛ yẽ fãarɛ. 13La tãmpĩa la zuo tɩ bõnbuuri sɛba lui la, ãn wʋ nẽr-sɛba n wõm yetɔga la, dee sakɛ la sũ-yẽlga, la yetɔga la ka kẽ ba sũure pʋam sõŋa. Ba sakɛ la wakatɛ fẽe, tɩ yelle sãn paagɛ ba, tɩ ba basɛ. 14La gõ'osɩ la zẽ'a tɩ bõnbuuri sɛba lui la, ãn wʋ nẽr-sɛba n wõm Nawẽnnɛ yetɔga, tɩ ba yɛm yɔɔra la ba vɔm yelle, tɩ bõntarsõm la dũnia yẽlʋm yɛmleego botɩ ba ka tãna wʋn bɩ Nawẽnnɛ sore la pʋam. 15La zẽ'e-sõŋɔ la tɩ bõnbuuri sɛba lui la, ãn wʋ nẽr-sɛba n wõm yetɔga la, dee sakra dɩkra yetɔga la ɩta ba sũure pʋam sõŋa sõŋa, mõrgɛ zɛ kãŋkãŋɛ Nawẽnnɛ sore la pʋam wʋ bõnbuuri la n wɔm biɛ se'em na.»
Mõrgɛ-ya bãŋɛ yãma n selsrɩ se'em na võorɛ
(Amarkɩ 4:21-25)
16Azezi le yetɩ: «Nẽra ka yõ'orɩ fɩtla dɩkɛ lɔkɔ vuge ẽ, bɩɩ dɩkɛ ẽ sʋgɛ gɔrgɔ tilum. A wʋn dɩkɛ ẽ zoole la sɛla zuo, tɩ a nẽegɛ peelem tɩ sɛba n kẽ'erɩ la yẽta. 17Bõn-sɛka woo n lile la wʋn lilge mɛ, la bõn-sɛka woo n sʋgɛ wʋn wa puke mɛ tɩ nẽrba bãŋɛ. 18Mõrgɛ-ya bãŋɛ yãma n selsrɩ se'em na võorɛ. Se'ere n soe la, nẽr-sɛka n tarɩ sɛla, ba wʋn bɔ ẽ pa'asɛ, la nẽr-sɛka n ka tarɩ sɛla, bõn-sɛba fẽe tɩ a tẽ'esɛ tɩ a tara la, ba wʋn to'oge ba.»
Azezi ma, la a yɩbsɩ
(Amatie 12:46-50, Amarkɩ 3:31-35)
19Azezi ma, la a yɩbsɩ n daan wa'am tɩ ba yẽ ẽ. La nẽrba zo'oge mɛ tɩ ba ka tã'agɛ paagɛ a zẽ'am. 20Tɩ ba yele Azezi yetɩ: «Fʋ ma, la fʋ yɩbsɩ n boe yẽŋa bɔɔra tɩ ba yẽ fɔ.» 21Tɩ a lerge ba yetɩ: «Nẽr-sɛba wuu n wõnnɩ Nawẽnnɛ yetɔga, dee sakɛ ɩta lan yele se'em na, n de mam ma, la mam yɩbsɩ.»
Azezi botɩ kʋsebgo yõkɛ
(Amatie 8:23-27, Amarkɩ 4:35-41)
22Daarɛ ayɩla tɩ Azezi la a karẽnbiisi kẽ õorŋɔ, tɩ a yele ba yetɩ: «Basɛ-ya tɩ dooge ya mõgrɛ la ke bɔba doone.» Tɩ ba mõnna õorŋɔ la wɛ'ɛsa. 23La ban mõnnɩ wɛ'ɛsa la, tɩ gẽem yõkɛ Azezi, tɩ a gĩse. Tɩ kʋseb-kãtɛ isge ko'om na zuo vugra, tɩ ko'om kẽ'era õorŋɔ la pʋam, tɩ la lebge pakrɛ bɔ ba. 24Tɩ ba paagɛ nẽegɛ Azezi, yele ẽ yetɩ: «Karẽnsãama, karẽnsãama, tõma yetɩ tɩ ki mɛ.» Tɩ a isge tãsɛ kʋsebgo, la ko-mĩ'isi tɩ ba ãna sĩm. Tɩ kʋsebgo la ko-mĩ'isi la yõkɛ, tɩ la ãna sĩm. 25Tɩ a soke a karẽnbiisi la yetɩ: «Bẽm tɩ ya ka bɔ mam sɩra?» Tɩ dabeem kẽ ba. Tɩ ba palẽŋa ẽkɛ, tɩ ba sɔkra taaba yetɩ: «Ãne n de ẽna tã'agɛ tãsra kʋsebgo la ko'om, tɩ ba sakra a nõorɛ?»
Kʋlkã'arsɩ n dolɩ bʋraaga, tɩ Azezi dige ba
(Amatie 8:28-34, Amarkɩ 5:1-20)
26La ba paagɛ la Geraza dõma tẽŋa. Mõgrɛ la boe la tẽn-ẽŋa la Galile tẽŋasʋka. 27Tɩ Azezi ze'ele õorŋɔ pʋam sige. Tɩ tẽŋa la bʋraa ayɩla tɩ kʋlkã'arsɩ dolɩ ẽ sẽnna tʋ'ʋsra ẽ. A ka yɛɛrɩ fuugo, halɩ tɩ la yuuge, la a ka kẽ'erɩ yire, a boe la zẽ'e-sɛba tɩ yɔɔrɔ boe mĩ na. 28-29Nõor-faa tɩ kʋlkã'arga la ẽn girge ẽ. Tɩ ba gu'ura ẽ, dee ba a nãma, la a nu'usi wuu la bãnsɩ. Tɩ a kɔ'ɔra bãnsɩ la. La kʋlkã'arga la ẽn tarɩ ẽ sẽŋɛ la mõom.
La bʋraaga la n yẽ Azezi la, a kaasɛ mɛ ka dũma tẽŋa a nẽŋam, tĩi tɔgra yetɩ: «Azezi, Nawẽnnɛ n gãnnɩ wuu Dayʋa, bẽm boe mam la fõn tẽŋasʋka? M sosrɩ fʋ mɛ tɩ fʋ da nãmsɛ mam.» Azezi dẽŋɛ yele kʋlkã'arga la mɛ tɩ a yese dee basɛ bʋraa la, bɛla n soe tɩ kʋlkã'arga la yele bɛla. 30Tɩ Azezi soke ẽ yetɩ: «Fõn yʋ'ʋrɛ?» Tɩ a lerge yetɩ: «Mam yʋ'ʋrɛ de la Atʋsa.» Se'ere n soe tɩ a yele bɛla la, kʋlkã'arsɩ la n dolɩ ẽ na zo'oge mɛ. 31Tɩ kʋlkã'arsɩ la sose Azezi yetɩ, a da botɩ ba sẽŋɛ bug-tẽŋa bog-ko'ogo la pʋam.
32La kurkurdõma n daan zo'oge bɔna tãŋa zuo ɔbra yɔnnɔ. Tɩ kʋlkã'arsɩ la belem Azezi yetɩ, a bɔ ba nõorɛ tɩ ba kẽ kurkurdõma la. Tɩ Azezi sakɛ ban yele se'em na. 33Tɩ kʋlkã'arsɩ la basɛ bʋraa la, dee sẽŋɛ ka kẽ kurkurdõma la. Tɩ ba wuu zoe sige ka lui mõgrɛ pʋam ki.
34La sɛba n gu'uri kurkurdõma la n yẽ bõn-sɛka n ẽŋɛ la, ba zoe sẽŋɛ la tẽŋa pʋam, la kẽnkɛrsɩ wuu ka yele sɛla n ẽŋɛ la. 35Tɩ nẽrba sẽŋɛ tɩ ba ka bɩsɛ lan ẽŋɛ se'em na. La ban paagɛ Azezi zẽ'am na, ba yẽ bʋraa la tɩ kʋlkã'arsɩ la yese dee basɛ ẽ na, tɩ a yɛ la futo zẽa Azezi nẽŋam, dee tarɩ yɛm sõŋa sõŋa. Tɩ dabeem kẽ ba. 36Tɩ sɛba n yẽ bõn-sɛka n ẽŋɛ la, yele ba lan ẽŋɛ se'em tɩ kʋlkã'arsɩ la yese dee basɛ bʋraa la. 37Tɩ Geraza tẽŋa nẽrba la wuu belem Azezi yetɩ, a fõrgɛ dee basɛ ba tẽŋa, se'ere n soe la, dabeem n ba kẽ ba. Tɩ Azezi kẽ'era õorŋɔ la tɩ a fõrgɛ. 38Tɩ bʋraa la tɩ kʋlkã'arsɩ la yese dee basɛ ẽ na, sose Azezi tɩ a basɛ tɩ a doose ẽ. Tɩ Azezi zagsɛ, dee yele ẽ yetɩ: 39«Lebe kule ya yire, ka pa'alɛ bõn-sɛba wuu tɩ Nawẽnnɛ ẽŋɛ bɔ fʋ la.» Tɩ a doose tẽŋa la wuu pʋam, mõola pa'ala Azezi n ẽŋɛ bõn-sɛba wuu bɔ ẽ na.
Azayirusi pɔyʋa, la pɔka n kalʋm Azezi fuugo yelle
(Amatie 9:18-26, Amarkɩ 5:21-43)
40Azezi daan lebe dooge la mõgrɛ la ke bɔba. La nẽr-kʋʋŋɔ n põn lagsɛ bilam zɛ gu'ura ẽ. Azezi n daan paagɛ mĩ na, ba to'oge ẽ mɛ sõŋa sõŋa. 41La bʋraa ayɩla n boe mĩ tɩ a yʋ'ʋrɛ dɛna Azayirusi, a de la Zifdõma wẽndeego nẽŋadãana, wa'am wa ka dũma tẽŋa Azezi nẽŋam sose ẽ yetɩ: «Wa'am mam yire, 42tɩ mam pɔyʋa n tarɩ yʋʋma pia la ayi n dee la a ki.» Bʋraa la bia de la ẽŋa ayɩla mã'a.
Tɩ Azezi dɔla ẽ wɛ'ɛsa, tɩ nẽr-kʋʋŋɔ la mikra ẽ. 43La pɔka n daan boe mĩ luta sɩkẽŋa yʋʋma pia la ayi tɩ la ka gɔ'ɔra. Tɩ a daan dɩkɛ ẽn tarɩ sɛla la wuu sã'am tɩbdõma zẽ'am, la baa ayɩla ka yãŋɛ botɩ a yẽ ĩmã'asʋm. 44Tɩ a paagɛ Azezi poorʋm, kalʋm Azezi fuugo nõorɛ. La bilam mẽŋa tɩ a zɩɩm na ze'ele ka le yɛsra. 45Tɩ Azezi soke yetɩ: «Ãne n kalʋm mam?» Tɩ nẽra woo sɩ'ɩsɛ. Tɩ Apɩyɛɛrɩ yetɩ: «Zuudãana, nẽrba wã wuu n lagɩm gilge fõn mikra se'em wã tɩ fõn sɔkra?» 46Tɩ Azezi yetɩ: «Nẽra n kalʋm mam, se'ere n soe la, mam bãŋɛ mɛ tɩ pãŋa n yese mam zẽ'am.» 47La pɔka la n bãŋɛ tɩ a kãn yãŋɛ sʋgɛ la Azezi la, tɩ a gõgra wa'am wa ka dũma tẽŋa Azezi nẽŋam, yele ẽ nẽrba la wuu nẽŋam se'ere n soe tɩ ẽŋa kalʋm ẽ, la ẽŋa n yẽ ĩmã'asʋm bilam mẽŋa se'em. 48Tɩ Azezi yele pɔka la yetɩ: «M bia, fõn bɔ mam sɩra la ĩyã n botɩ fʋ yẽ ĩmã'asʋm. Sẽŋɛ la sũ-mã'asʋm.»
49La Azezi n nãn boe mĩ tɔgra la, tɩ nẽra ze'ele Zifdõma wẽndeego nẽŋadãana la yire wa'am wa yele ẽ yetɩ: «Fʋ pɔyʋa la ki mɛ, da le nãmsɛ karẽnsãama la.» 50La Azezi n wõm bɛla la, tɩ a yele Azayirusi yetɩ: «Da zoe dabeem, wen bɔ mam sɩra, tɩ fʋ pɔyʋa la wʋn yẽ ĩmã'asʋm.» 51Tɩ Azezi sẽŋɛ ka paagɛ a yire, la a ka botɩ nẽra nẽra doose ẽ kẽ, sãn dagna Apɩyɛɛrɩ, la Azakɩ, la Azã, la bia la sɔ, la a ma mã'a. 52La nẽrba la wuu daan kellɩ mɛ fabla bia la ĩyã. Tɩ Azezi yele ba yetɩ: «Da kaasra-ya, bia la ka ki, a gĩsri mɛ.» 53Tɩ ba la'ara Azezi, ban mi tɩ bia la ki mɛ na ĩyã. 54Tɩ Azezi gʋrɛ bia la nu'ugo, tĩi tɔgɛ ẽ yetɩ: «Bia, isge.» 55Tɩ bia la vɔm leme, tɩ a isge bilam mẽŋa. Tɩ Azezi yele ba yetɩ: «Bɔ-ya bia la dia tɩ a di.» 56Tɩ la daan di'ige bia la sɔ, la a ma. Tɩ Azezi kã'an ba yetɩ, ba da yele nẽra nẽra sɛla n ẽŋɛ la.
Aktualisht i përzgjedhur:
Aluki 8: gurDBL
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2008, 2010, Wycliffe Bible Translators, Inc. All rights reserved.