Aluki 9

Azezi tõm a karẽnbiisi pia la ayi tɩ ba sẽŋɛ ka mõolɛ Nawẽnnɛ yetɔga

(Amatie 10:5-15, Amarkɩ 6:7-13)

1Azezi daan wi a karẽnbiisi pia la ayi la lagsɛ mɛ, bɔ ba pãŋa, la nõorɛ tɩ ba dige kʋlkã'arsɩ dee botɩ bã'adõma yẽ ĩmã'asʋm. 2Dee tõm ba yetɩ ba mõolɛ Nawẽnnɛ so'olʋm yelle, dee botɩ bã'adõma yẽ ĩmã'asʋm. 3La a yele ba yetɩ: «Da dɩkɛ-ya sɛla sɛla sẽŋɛ. Da dɩkɛ-ya dasaarɛ, bɩɩ tãmpɔkɔ, bɩɩ dia, bɩɩ ligri. Da dɩkɛ ya futo bayi bayi. 4La yi-sɛka tɩ ya paagɛ tɩ ba to'oge ya, bɔna-ya yi-ẽŋa pʋam ka paagɛ daar-sɛka tɩ ya wʋn fõrgɛ tẽŋa la. 5La zẽ'e-sɛka tɩ nẽrba ka to'oge ya, yese-ya tẽn-ẽŋa pʋam, dee pɩɩsɛ ya nãma tẽntõnnɔ basɛ. Ya sãn ẽŋɛ bɛla, la wʋn pa'alɛ ba tɩ ba ka ẽŋɛ sõŋa.» 6Azezi n yele bɛla la, karẽnbiisi la yese mɛ sẽŋɛ tẽn-pɩgsɩ wuu pʋam ka mõola Nawẽnnɛ kõ-yẽlga, dee botɩ bã'adõma yẽta ĩmã'asʋm.

A'erɔdɩ boorɩ tɩ a bãŋɛ Azezi n de nẽr-sɛka

(Amatie 14:1-12, Amarkɩ 6:14-29)

7Galile Naba A'erɔdɩ n daan wõm bõn-sɛba wuu n ɩtɩ la, a palẽŋa n ẽkɛ, se'ere n soe la, nẽrba basɛba n daan yele ẽ tɩ Azezi de la Azã sɛka n daan misri nẽrba ko'om pʋam na n vo'oge. 8Tɩ nẽrba basɛba yetɩ, Nawẽnnɛ nõtɔ'ɔsa A'eli n le wa'am dũnia zuo, tɩ nẽrba basɛba yetɩ, kʋrʋm kʋrʋm Nawẽnnɛ nõtɔ'ɔsa ayẽma n vo'oge. 9Tɩ A'erɔdɩ yetɩ: «Mam daan botɩ ba wike Azã zuugo mɛ, dee tɩ ãne n de ẽna wã tɩ mam wõm a yelle wãna wã?» La a daan boorɩ tɩ a yẽ Azezi mɛ.

Azezi bɔ nẽr-kʋʋŋɔ dia

(Amatie 14:13-21, Amarkɩ 6:30-44, Azã 6:1-14)

10Azezi karẽnbiisi pia la ayi la tɩ a daan tõm na, lebe mɛ ka tɔgɛ pa'alɛ ẽ bãma n ẽŋɛ se'em na wuu. Tɩ Azezi botɩ ba doose la ẽ yese kẽnkɛrŋa ka lɛm tẽŋa yʋ'ʋrɛ n de Betisayida. 11Tɩ nẽr-kʋʋŋɔ la bãŋɛ ẽn sẽŋɛ zẽ'am na, babsɛ ẽ. Tɩ a to'oge ba, tɔgɛ Nawẽnnɛ so'olʋm yelle bɔ ba, dee botɩ bã'adõma yẽ ĩmã'asʋm.

12La wẽnnɛ n daan boe mĩ tɩ a kẽ, tɩ karẽnbiisi pia la ayi la wa'am a zẽ'am wa yele ẽ yetɩ: «Botɩ nẽrba la sẽŋɛ tẽn-pɩgsɩ, la yiɛ n lɛm na ka ɛ dia, la gã'a-zẽ'a, se'ere n soe la, tɩn boe zẽ'e-sɛka wã de la mõom.» 13Tɩ Azezi yele ba yetɩ: «Yãma mẽŋa bɔ ba dia tɩ ba di.» Tɩ ba lerge yetɩ: «Tõma tarɩ la borborɩ banuu, la zũma bayi mã'a, sãn dagna tɩ tɩ sẽŋɛ ka da dia wa'am wa bɔ nẽr-bãna wuu.» 14La bʋraasɩ n daan boe mĩ de wʋ tʋsanuu. Tɩ Azezi yele karẽnbiisi la yetɩ: «Basɛ-ya tɩ nẽrba la welse zĩ'ire pinu-nu.» 15Tɩ karẽnbiisi la botɩ nẽrba la wuu zĩ'ire bɛla. 16Tɩ Azezi dɩkɛ borborɩ banuu, la zũma bayi la gorge bɩsɛ saazuum pʋ'ʋsɛ Nawẽnnɛ dia la ĩyã, dee fiise borborɩ la zũma la bɔ a karẽnbiisi la tɩ ba to'oge pʋɩ nẽrba la. 17Tɩ ba wuu di tɩgɛ, dee tɩ karẽnbiisi la vaagɛ bõn-gito n deege pɩrɛ pɩtɔ pia la ayi.

Apɩyɛɛrɩ yetɩ Azezi de la Krisi tɩ Nawẽnnɛ tõm

(Amatie 16:13-21, Amarkɩ 8:27-31)

18Daarɛ ayɩla Azezi daan boe la kẽnkɛrŋa pʋ'ʋsra Nawẽnnɛ, tɩ a karẽnbiisi la bɔna a zẽ'am, tɩ a soke ba yetɩ: «Nẽrba yetɩ mam de la ãne?» 19Tɩ ba lerge yetɩ: «Nẽrba basɛba yetɩ fõn de la Azã sɛka n daan misri nẽrba ko'om pʋam na, tɩ nẽrba basɛba yetɩ, fõn de la Nawẽnnɛ nõtɔ'ɔsa A'eli, tɩ basɛba yetɩ, fõn de la kʋrʋm kʋrʋm Nawẽnnɛ nõtɔ'ɔsa ayẽma n vo'oge.» 20Tɩ a soke ba yetɩ: «Dee yãma yetɩ mam de la ãne?» Tɩ Apɩyɛɛrɩ lerge yetɩ: «Fõn de la Krisi tɩ Nawẽnnɛ tõm na.»

21Tɩ Azezi kã'an ba yetɩ, ba da yele nẽra nẽra, 22dee yetɩ: «Dẽnɩ tɩ mam n de Nẽrsaala Dayʋa la nãmsɛ zozo'e. Tẽŋa wã kẽma, la kãabgɔ kẽma nẽŋadõma, la lɔɔ karẽnsãandõma nifo wʋn kẽ mam mɛ, tɩ ba kʋ mam, la dabsa atã daarɛ mam wʋn vo'oge mɛ.»

Azezi doosgo yelle

(Amatie 16:24-28, Amarkɩ 8:34—9:1)

23Azezi yele bɛla dee yele nẽrba la wuu yetɩ: «Nẽra sãn bɔɔra tɩ a doose mam, dẽnɩ tɩ a basɛ a mẽŋa n boorɩ se'em, dee sakɛ nãmsgɔ daarɛ woo wʋ nẽra n buke a kũm dɔ-puurŋa dɔla mam. 24Nẽr-sɛka woo n boorɩ tɩ a gu a vɔm, a wʋn koŋe ẽ, la nẽr-sɛka n sakɛ tɩ a koŋe a vɔm mam ĩyã, a wʋn yẽ vɔm. 25Nẽra sãn yẽ dũnia sɛla woo dee koŋe vɔm Nawẽnnɛ zẽ'am, a yõorɔ de la bẽm? 26Nẽr-sɛka n zoe yãnnɛ mam ĩyã, la mam yetɔga la ĩyã, mam n de Nẽrsaala Dayʋa la mẽ wʋn zoe yãnnɛ la ẽ wakat-sɛka tɩ mam wʋn leme wa'am la m na'am pãŋa, la Nawẽnnɛ, la a malɛkadõma na'am pãŋa la. 27Mam yetɩ ya la sɩra sɩra, tɩ yãma nẽr-sɛba n boe kalam wã basɛba kãn ki, sãn dagna tɩ ba wa yẽ la Nawẽnnɛ so'olʋm.»

Azezi nẽŋa teere

(Amatie 17:1-18, Amarkɩ 9:2-8)

28Yetɔg-bãma poorʋm, la daan ẽŋɛ wʋ dabsa anii, tɩ Azezi botɩ Apɩyɛɛrɩ, la Azakɩ, la Azã doose ẽ zom tãŋa zuo tɩ a ka pʋ'ʋsɛ Nawẽnnɛ. 29La ẽn boe mĩ pʋ'ʋsra la, tɩ a nẽŋa teege, tɩ a futo pelge yẽgra. 30Tɩ bʋraasɩ bayi darɛ zɛ tɔgra la ẽ. Ba de la Amoyisi, la A'eli 31n puke ba mẽŋa nẽegɛ la Nawẽnnɛ na'am peelem tɔgra la Azezi, ẽŋa n wʋn ki Zerizalɛm se'em tɩ bõn-sɛka tɩ a wa'am tɩ a ẽŋɛ la, ẽŋɛ ba'asɛ yelle. 32La gẽem n daan tarɩ Apɩyɛɛrɩ la a taaba la tɩ ba gĩse, yãŋa nẽegɛ yẽ Azezi n yẽgrɩ, tɩ nẽrba bayi la zɛ a zẽ'am. 33Tɩ nẽrba bayi la daan bɔna mĩ tɩ ba fõrgɛ, tɩ Apɩyɛɛrɩ yele Azezi yetɩ: «M Zuudãana, tõma n boe kalam wã, la ãn sõŋa mɛ. Basɛ tɩ tɩ tĩ põnsɩ batã, ayɩla bɔ fõn, ayɩla bɔ Amoyisi, la ayɩla bɔ A'eli.» A daan wen tɔgɛ mɛ, a ka mi ẽn tɔgrɩ se'em na. 34La ẽn daan boe mĩ tɔgra bɛla la, tɩ sawatɛ wa'am wa lile ba la a mã'asʋm. La sawatɛ la n lile ba la, dabeem n yõkɛ karẽnbiisi la. 35Tɩ kõa ze'ele sawatɛ la pʋam yetɩ: «Ẽna de la mam Dayʋa tɩ mam looge. Selse-ya ẽ.» 36La kõa la n tɔgɛ la, ba yẽ la Azezi mã'a n ze. Tɩ ba daan sĩna wakat-ẽŋa ka yele nẽra nẽra bãma n yẽ sɛla la.

Kʋlkã'arga n tarɩ bia, tɩ Azezi botɩ a yẽ ĩmã'asʋm

(Amatie 17:14-18, Amarkɩ 9:14-27)

37Tɩ beere daan wiige, tɩ Azezi la a karẽnbiisi la ze'ele tãŋa la zuo sige, tɩ nẽr-kʋʋŋɔ daan tʋ'ʋsɛ ẽ. 38La bʋraa ayɩla n daan boe nẽr-kʋʋŋɔ la pʋam tĩi tɔgɛ yetɩ: «Karẽnsãama, mam belnɩ fʋ mɛ, bɩsɛ m bia wã. A de la mam bi-yẽŋa, la kʋlkã'arga n dolɩ ẽ. 39Kʋlkã'arga la sãn ẽn girge ẽ, a botɩ a kaasra mɛ, dee luta kinki'ire, tɩ nõtõorʋm yɛsra a nõorʋm. Kʋlkã'arga la ẽn nãmsɛ ẽ zo'oge mɛ, pɔglʋm ẽ dee basɛ ẽ. 40Bɛla tɩ mam belem fʋ karẽnbiisi yetɩ, ba dige ẽ tɩ a yese, tɩ ba ka yãŋɛ.» 41Tɩ Azezi yetɩ: «Zamãan-ẽna nẽrba, ya ka bɔ'ɔrɩ mam sɩra, la ya ka ɩtɩ sõŋa. Mam wʋn mã'agɛ m mẽŋa la yãma yuuge paagɛ la wakat-kãna?» A yele bɛla dee yele bʋraa la yetɩ: «Tarɩ bia la wa'am.» 42La bia la n paarɩ Azezi zẽ'am na, tɩ kʋlkã'arga la lʋbɛ ẽ tɩ a gõgra. Tɩ Azezi tãsɛ kʋlkã'arga la tɩ a basɛ bia la. Tɩ kʋlkã'arga la basɛ bia la, tɩ a yẽ ĩmã'asʋm, tɩ Azezi dɩkɛ ẽ lebse a sɔ. 43La nẽrba la wuu n yẽ Nawẽnnɛ pãn-kãtɛ la, la di'ige ba mɛ.

Azezi tɔgɛ a kũm yelle

(Amatie 17:22-23, Amarkɩ 9:30-32)

Nẽrba la wuu daan ken ze la yɛrɩ la bõn-sɛba wuu tɩ Azezi ẽŋɛ la. Tɩ Azezi yele a karẽnbiisi la yetɩ: 44«Selse-ya yetɔg-ẽna tɩ mam yetɩ m tɔgɛ wã sõŋa: Ba wʋn yõkɛ Nẽrsaala Dayʋa la sẽŋɛ ka ẽŋɛ la nẽrsaalba nu'usum.» 45La ba daan ka bãŋɛ a yetɔga la võorɛ. Yetɔga la daan sʋgɛ mɛ tɩ ba ka tã'agɛ bãŋɛ a võorɛ, dee zɔta dabeem ka soke ẽ.

Ãne n wʋn dɛna nẽr-kãtɛ Nawẽnnɛ zẽ'am?

(Amatie 18:1-5, Amarkɩ 9:33-37)

46Azezi karẽnbiisi la daan wẽ'erɩ la nõke'ene la taaba, bɔɔra tɩ ba bãŋɛ bãma pʋam nẽr-sɛka n wʋn dɛna nẽr-kãtɛ gãnna. 47Tɩ Azezi bãŋɛ ban tẽ'esrɩ se'em na, yõkɛ bia ze'ele lɛm a mẽŋa, 48dee yetɩ: «Nẽr-sɛka woo n to'oge bi-pɩka n ãn wʋ ẽna mam yʋ'ʋrɛ ĩyã, a to'oge la mam, la sɛka n mẽ to'oge mam, a to'oge la sɛka n tõm mam na. Nẽr-sɛka n de pɩka ya zẽ'am na, ẽŋa n de nẽr-kãtɛ.»

Nẽr-sɛka n ka sisri yãma, a de la ya nẽra

(Amarkɩ 9:38-40)

49Tɩ Azã yele Azezi yetɩ: «Zuudãana, tõma yẽ la bʋraa n digri kʋlkã'arsɩ la fõn yʋ'ʋrɛ tɩ ba yɛsra, la ẽŋa n ka po dɛna tõma nẽra la ĩyã, tɩ tõma gu ẽ yetɩ a basɛ.» 50Tɩ Azezi lerge ba yetɩ: «Da gu-ya ẽ, nẽr-sɛka n ka sisri yãma, a de la ya nẽra.»

Samaari tẽŋa nẽrba ka bɔ Azezi sɩra

51Dabs-sɛba tɩ Azezi daan wʋn zẽkɛ sẽŋɛ Nawẽnnɛ yire la n daan lɛm, tɩ a kɔ'ɔn yetɩ, dẽnɩ tɩ ẽŋa sẽŋɛ Zerizalɛm. 52A daan tõm na nẽrba yetɩ ba dẽŋɛ nẽŋam. Tɩ nẽrba la daan dẽŋɛ sẽŋɛ ka kẽ Samaari tẽn-pɩka pʋam tɩ ba mãasna sɛla woo dee gu'ura ẽ. 53Tɩ tẽŋa la nẽrba zagsɛ tɩ bãma kãn to'oge ẽ, ẽn we'esɩ Zerizalɛm na ĩyã. 54La a karẽnbiisi Azakɩ la Azã n bãŋɛ bɛla la, tɩ ba soke Azezi yetɩ: «Zuudãana, fõn boorɩ tɩ tɩ wi bugum tɩ ba ze'ele saazuum wa di ba mɛ bɩɩ?» 55Tɩ Azezi wẽrgɛ, gi ba [yetɩ: «Yãma ka mi sɩ-sɛka n tarɩ ya la. 56Nẽrsaala Dayʋa la ka wa'am tɩ a sã'am nẽrba vɔm, a wa'am tɩ a fãagɛ ba mɛ.»] Tɩ ba wɛ'ɛsa tẽŋa ayẽma.

Azezi doosgo yelle

(Amatie 8:19-22)

57Ban boe sore wɛ'ɛsa la, tɩ bʋraaga yele Azezi yetɩ: «Mam wʋn dɔla fɔ sẽnna zẽ'e-sɛba wuu tɩ fʋ wʋn sẽnna.» 58Tɩ Azezi lerge ẽ yetɩ: «Pɩɩna tarɩ yogro mɛ, tɩ niinto mẽ tara tʋgrɔ, la Nẽrsaala Dayʋa la ka tarɩ zẽ'a wʋn gã'arɛ vo'ose.» 59Dee le yele bʋraa ayẽma mẽ yetɩ: «Doose mam.» Tɩ bʋraa la lerge ẽ yetɩ: «Basɛ tɩ m sẽŋɛ ka laagɛ m sɔ dee wa'am wa dɔla fɔ.» 60Tɩ Azezi lerge ẽ yetɩ: «Basɛ tɩ sɛba n ka tarɩ vɔm Nawẽnnɛ zẽ'am na laagɛ ba kũm. Dee tɩ fõn sẽŋɛ ka mõolɛ Nawẽnnɛ so'olʋm kõ-yẽlga la.» 61Tɩ bʋraa ayɩla yele ẽ yetɩ: «Zuudãana, mam wʋn doose fo, la basɛ tɩ m sẽŋɛ ka keese m yir-dõma.» 62Tɩ Azezi lerge ẽ yetɩ: «Nẽr-sɛka n gʋrɛ nii-kũure kɔɔra dee bɩsra poorʋm, ka tã wʋn tõm Nawẽnnɛ so'olʋm tõoma.»

Aktualisht i përzgjedhur:

Aluki 9: gurDBL

Thekso

Ndaje

Copy

A doni që theksimet tuaja të jenë të ruajtura në të gjitha pajisjet që keni? Regjistrohu ose hyr

Mësoni më shumë rreth versionit Farefare, Ninkaré

Aluki 9

Vargje biblike të njohura nga
Aluki 9

Dëgjoj Aluki 9

Bibla:

Farefare

Versioni: Farefare, Ninkaré - gurDBL

Aluki 9

Aluki 9

Vargje biblike të njohura nga Aluki 9

Dëgjoj Aluki 9

Bibla:

Farefare

Versioni: Farefare, Ninkaré - gurDBL

Aluki 9

Vargje biblike të njohura nga
Aluki 9