Matayi 14
14
Nizya bufwe ubwa Yohani Uwalozyo
(Mlko. 6.14-29; Luk. 9.7-9)
1Pakabalilo kalakala u Helodi, u mwene uwa mu Galileya, akivwa zizyo abantu bakanenagha nizya Yesu. 2Akaghabuzya amakambala ghache akati, “Uyu we Yohani Uwalozyo yula, azyuka kubufwe. Ichi cho chifukwa ali na maka aghakupelela ivyika.”
3 #
Luk. 3.19-20
Pakuti u Helodi akalamula ukuti bamuleme u Yohani. Bakamupinya ni mpingu nukumwighalila mujele. Akabomba zinizi pachifukwa icha Helodiya umuchi uwa wamwabo uwa Filipu, 4#Lev. 18.16, 20.21pakuti u Yohani Uwalozyo akamubuzya u Helodi akati, “Indaghilo zyitu zitakwitikizya ukuti usemye u Helodiya!” 5U Helodi akalondagha pakumughogha, loli akanyilagha aba bantu pakuti bakamusubila u Yohani pakuba mulaghuzi.
6Pisiku ilya kusekela ukupapiwa kwa Helodi umwana umulindu uwa Helodiya akimba pantazi pakabukatila kosi kala. U Helodi akahoboka nkani 7umwakuti akamulayizya ukuti, “Nkulapa ukuti inkwiza pakukupa chosi chicho ungalaba.”
8Loli bo unyina amubuzya ichakuti alabe, umulindu yula akati, “Losi ulu mpanga umutu uwa Yohani Uwalozyo mumbale!”
9U mwene u Helodi ichitima chikamulema, pachifukwa icha layizyo lilyo akalayizya pamaso pa bayeni bache bosi, po akalamula ukuti bamupe chicho umulindu yula akalaba. 10Po akatuma yumo kujele ukuti adumule umutu uwa Yohani. 11Bakiza nu mutu ghula mumbale nukumupa umulindu, po umulindu yula akamupa unyina. 12Abamanyili aba Yohani bakiza, bakanyamula umuvimba wache nukughusyila. Po bakabuka pakumubuzya u Yesu.
U Yesu akulyesya ichilundilo ichikulu icha bantu
(Mlko. 6.30-44; Luk. 9.10-17; Yoh. 6.1-14)
13Bo u Yesu ivwa zinizi, akakwela mubwato nukwepapo, akabuka kubuzilo kuko kutakabako abantu. Abantu bakivwa zinizi, po bakafumamo mutwaya twabo nukumukonka pakwenda mulubazu. 14U Yesu akika mubwato, sona bo ennya ichilundilo ichikulu icha bantu, ichililizi chikamulema, po akabapozya bosi babo bakaba babine.
15Pachamabwila abamanyili bache bakiza pakumubuzya ukuti, “Kwila kale, muno mo munkolongo. Ubabwezye abantu ukuti babukaye mumaghunda na mutwaya tuto tuli papipi pakwilondela bene ivyakulya.”
16U Yesu akamula akati, “Batakabwelaye. Amwe mwebene mubapanje ivyakulya!” 17Bakamula bakati, “Pano tuli bulo ni vibama fayivi ni swi zibili.” 18U Yesu akamula akati, “Zagha navyo kuno.” 19Po akalamula abantu bala ukuti bikale pasi pisote. Akasenda ivibama fayivi ni swi zibili zila, akennya kumwanya nukupalizya kwa Chala. Akamenyannya ivibama vila nukubapa abamanyili bache, sona abamanyili bakagabila abantu. 20Abantu bosi bala bakalya nukwikuta. Po abamanyili bakanyamula ividudunga 12 vivyo vikizula ni vyakusyala. 21Abantu babo bakalya bakabapo 5,000, ukusita ukubelengelako abakolo na bana.
U Yesu akwenda pamizi
(Mlko. 6.45-52; Yoh. 6.15-21)
22Panapo na panapo u Yesu akababuzya abamanyili bache ukuti bakwele mubwato nukulongolela kwisila ilinji ilya nyanja, bo akubabwezya abantu. 23Bo ababwezya abantu, akakwela mwene pighamba pakwiputa. Bo ubusiku bwanda, u Yesu akabamwenekulakula. 24Pakabalilo kalakala ubwato bukaba kubutali munyanja, bukalwanagha na mayigha pakuti bukalumbilanagha ni mpepo. 25Pakasi-kasi pakabalilo aka fili nu sikisi koloko pandabindabi u Yesu akiza ku bamanyili bache, bo akwenda pamizi. 26Bo bamwennya akwenda pamizi, bakanyila nukukolomoka nu bogha ukuti, “Ichizyuka!”
27Panapo na panapo u Yesu akababuzya akati, “Mutakatetemaye! Nene. Mutakanyilaye.” 28Po u Pitala akati, “Mwene, nanti naloli wewe mbuzya ukuti nize kukwako bo inkwenda pamizi!”
29U Yesu akamula akati, “Zagha!” Po u Pitala akika mubwato, akanda pakwenda pamizi pakubuka kwa Yesu. 30Loli bo ennya impepo iyamaka, akanyila nukwanda pakudwiba mumizi. Akalila akati, “Mwene, mpoka!”
31Umwalubilolubilo u Yesu akagholosya inyobe yache nukumulema nukuti, “Awe we walwitiko ulunandi! Nkimba choni chicho ukilamwa.”
32Bosi babili bala bakakwela mubwato mula, po impepo yikaleka pakukuka. 33Po abamanyili mubwato bakamuchindika u Yesu, bakanena bakati, “Naloli we Mwana uwa Chala!”
U Yesu akupozya umubine mu Genesaleti
(Mlko. 6.53-56)
34Bakaloboka inyanja yila nukufika mukaya aka Genesaleti. 35Kulakula abantu bakamumanya ukuti akaba we Yesu nukutuma abantu ukuti bize na babine kwa Yesu ukufuma muvigaba vyosi ivipalamani. 36Bakamulaba ukuti abitikizye ababine pakupalamasya bulo mulubazu ulwa mwenda wache. Po abantu bosi babo bakaghupalamasya, bakapolagha.
Aktualisht i përzgjedhur:
Matayi 14: LMBNT2016
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
The copyright is jointly and equally held by:
©️ The Bible Society of Malawi, 2014
©️ The Word for the World International, 2014
Mësoni më shumë rreth versionit Ulufingo Ulupya