Lk 4
4
Yesus abëlë mëbobëla
Mt 4,1-11; Mk 1,12-13
1Yesus atoa ndzalan ai Mfufub Nsisim, ndò angakodo a Yordan, Nsisim okë ai nyè a nkod-nnam, 2mëlu mëwom mënyii, Satan abobolo nyè. Mëlu mëte, nyè ha të di dzom; a mvus mëlu mëte, zie engakòn nyè. 3Satan nyè ai nyè na: Ngë onë mòn Zamba, kada e ngòg nyi na evëṅan mbaṅëla. 4Yesus nyè ai nyè na: Anë ntilan na: Mod anyiṅ ki hë ai mbaṅëla etam#4,4 Em 8,3. 5Ndò abed ai nyè, alëdë nyè bidzoe bisë ya si eyòṅ dzia, 6Satan nyè ai nyè na: Mayi wa vë edzoe esë dzi ai duma ya ete, amu bëngavë ma dzò ndò mavë dzò e mod madiṅ na mavë. 7Mfa woe, ngë olumbu a si na walugu ma, bisë biawoge ai wa. 8Yesus nyè na: anë ntilan na: Olugu Nti Zamba woe, ndò fë osye hë nyè etam#4,8 Dt 6,13. 9Ndò akë ai nyè a Yerusalem, atëlë nyè a nkom ndil tempel, nyè ai nyè na: Ngë onë mòn Zamba, woaga wamen a si. 10Amu anë ntilan na: Ayi bende benglès boe asu doe na bëkala wa#4,10: Sal 91,11, 11ai na: Bayi wa bëgë a mò, asu yë na të mëkol moe matobe a ngòg#4,11 Sal 91,12. 12Yesus nyè ai nyè na: bëngadzo na: Të wabobolo Nti Zamba woe#4,12 Bs 6,16. 13Amana Satan angamana kan mëbobëla esë, ndò angakèan ai nyè, alama të eyòṅ efë.
YESUS ASYE A GALILEA
Yesus akui a bod eyòṅ osu a Galilea
Mt 4,12-17; Mk 1,14-15
14Ndò Yesus angadugan a Galilea ai ngul Nsisim. Foe dzie eyaman fò a nkòṅ nnam osë. 15Ayëgëlë a mënda bikoan maban, bod bësë bëtaman nyè.
Bod batëb Yesus a Nazaret
Mt 13,53-58; Mk 6,1-6
16Ndò hm akë a Nazaret#4,16 Yesus atari esye dzie a dzal abyali die, a Nazaret., e hom anganaṅ, akëlë a nda-bikoan akyaè ya angabë nyè fulu a amos sabbat, ndò atëbë a si na alaṅ#4,16 Fulu engabë Yuden na, a amos sabbat, ngë nnëṅ ziṅ anë a ngogëlan a nda-bikoan, bavë nyè olugu na alaṅ Mfufub Ntilan. Ngë mod te anë ṅyëmë kalara, mod te angatimi fë bò e bibug ya ahë laṅ.. 17Ndò bëngavë nyè kalara profet Isaias; ayaè kalara, ayënë e hom ongabë ntilan na: 18Nsisim Nti onë ai ma, amu angawòbò ma mbòn na mëkad mimbubua mbëmbë foe; angalom ma na mëbende mimbog na basoeban, ai mindidim na bayen, mësoe bò fili, 19na mëbende mbu maa ya waanyëb#4,19 Is.61,1-2. 20Ndò afèd kalara, akalan nyè mod bisye, atobò a si. Mis më bod bësë ya nda bikoan ha mëbëbëgë hë nyè. 21Akèè hm na akad bò na: Ebug dzi etoban a mëlò man amos di. 22Bësë bëngataman nyè, bëngakam bibug bi maa bikui nyè a anyu, bëngadzo na: Së mòn Yosef nyò a? 23Nyè ai bò na: Miayi hm fò ma kad na: A ngëngaṅ, sye wamen. E mam mësë biawog na wabò a Kafarnao, bò mò a dzal doe ha. 24Nyè na: Amen, amen, makad mina na, bakëkam profèt ziṅ a dzal die. 25Makad mina bëbëla na: Abui minkus lëngabë abog Elias a Israel eyòṅ yob ongafèdban mimbu milè ai ngòn esaman, eyòṅ ngul zie engabë a nnam, 26dzam da Elias andzëki lomban abë tò mbòg mbòg. Angalomban abë nkus mininga ya Sarepta ya Sidon. 27Ndò fë minzëzam mingabë abui a Israel a abog profet Eliseus, hë da tò mbòg andzëki fububan së na Naman, man Siria. 28E ba bësë bëwogo e mam ma a nda-bikoan bëdzie ai olun, 29ndò batëbë, bëkuli nyè a ṅnyie tisòn, bëkëlë ai nyè a anyu mbimbiṅ, a nkol a yob ya tisòn dzaban engabë nloṅan ete, asu yë na basogolo nyè a si. 30Nyè ha angalod të fë bò a zaṅ, akëlë zen dzie.
Mod abëlë mbë nsisim a nyòl
Mk 1,21-28
31Ndò angakë a Kafarnao, tisòn ya Galilea. Angayëgëlë bò a amos sabbat. 32Bëngakam fò ayëgëlë die, amu ebug dzie engabë ai ngul. 33A nda bikoan ha, mod ziṅan gabë abëlë mvit nsisim a nyòl, angabam a yob ete na: 34Bia wa biakuan dze, a Yesus man Nazaret? Yë wasò na wazu bia mana? Mayëm wa, onë Mfufubu Zamba. 35Yesus abama ai nyè na: Ku evol, okui fë nyè a nyòl. Ndò mbë nsisim awoa nyè a si a zëzaṅ bod, akodo nyè a nyòl, tègè nyè dugan kòb. 36Wòṅ okuu fò bod bësë a nyòl, bëngadzo bò bò na: Za akyaè ayëgëlë di, na abam ai bëbe minsisim ai ngul, ai edzoe, mingakui a nsëṅ. 37Foe dzie etsaman a nkòṅ nnam te osë.
Yesus abò abui bod mvoè
Mt 8,14-17; Mk 1,29-34
38Ndò angakodo a nda bikoan hala, anyian a nda Simun. Nkyè mininga Simun angabë akònò ngul fiba, ndò bakad nyè adzo die te. 39Ndò atëbë e hom angabë, atëbëlë fiba, fiba akodo nyè a nyòl. Etye te, akodo a si, angasye bò. 40Ai mëyimbi më dzobo, ndò bazu ai nyè e ba bësë bëkònò kan akòn esë. Angabede mod osë wò a nlo, bod bëngabò mvoè. 41Bëbe minsisim bëngakui abui bod a nyòl bëdzoo na: Wa onë mòn Zamba. Angabam, të bò dzoge na bëkòbò, amu bëyëmë na anë Kristus.
Yesus akë akad mbëmbë foe
Mk 1,35-39
42Ai mëlende më kidi, ndò akui, akëlë a fëfëlë etam. Minkunda mingadzëṅ nyè, ndò bakui e hom angabë, bëngadzëṅ na babi nyè na të akodo e hom bënë. 43Nyè ai bò na: Mayean fë yedan mbëmbë foe edzoe Zamba a bëtisòn bëfë, amu asu te ndò bëngalom ma. 44Angakë ayedan a mënda bikoan ya Yudea.
Aktualisht i përzgjedhur:
Lk 4: NTE12
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
MKPAMAṄ AMVOE Nouveau Testament en langue Ewondo © Bible Society of Cameroon, 2012.