Lk 7
7
Yesus asye olò mbò-esye ndzoe ntèd bëzimbi
Mt 8,5-13; Yoh 4,43-54
1Eyòṅ bibug bie bingaman dzie bod a mëlò, ndò akë a Kafarnao. 2Ndzoe ntèd bëzimbi#7,2Edzoe Roma engabë bëlë abui bëzimbi a minnam minnam. Antoa hm na, nkunda bëzimbi hili onë dzam bò bod ntèd, ehi mbòg bod bakuda bëtan, ngë ki taṅ fë. Ndzoe nyò adzoe ntèd bëzimbi. mbòg angabë abëlë olò angabë adiṅi, olò te okònò ha abui, bëkon bëlindigi, bëyëmë bëlindigi; 3Awog angawog na Yesus anë hala, ndò angalom bënyia-bodo-mvia bë Yuden na bësili nyè ngë anë dzam sò, abò olò woe mvoè. 4Ndò bëngakui abë Yesus, bëngakogëlan ai nyè abui, bò na: Akyëbë ai na obò nyè dò. 5Amu adiṅ ayòṅ dan, ndò fë angaloṅ bia nda bikoan. 6Ndò hm Yesus akë nsamba ai bò. Hala akui ya man ntye ai nda, ndò ndzoe ntèd bëzimbi nyò alom bëmvoe na bëkad nyè na: A Nti, obë wu ndzug, amu makyëbë ki ai dò na onyian a ebëm dzama. 7Asu te ben ndò mamen mëmbara sòṅ a bë wa. Dzam da, kòbògò hë ebug, mbò-bisye wama abò mvoè. 8Amu mamen mënë e kan mod mëbëlë edzoe ya abëlan ai e bëzimbi madzoe; mëdzo ai e nyò na: këlëg, akëë; mëdzo ki ai mfë na: zaag, asò fë. Mëdzo ai mbò-bisye wama na: Bò anë osi, anë oka, abò fë. 9Awog Yesus angawog nala, ndò akam, avëṅan mfa e bod bëngabë bëtoṅo nyè, nyè na: Makad mina na, mabë ya ki yen e kan ṅyëbë nyi hom mfë a Israel. 10Ndò e bod angalom badugan a nda, bëkòbò na olò omboo ya mvoè.
Yesus avëlë mbim mòn nkus mininga a Nain
11Ndò hm labò na, a mvus ya hala, ndò akë e tisòn enë dzoe na Nain, bëyègè boe batoṅ nyè ha ai abui nkunda. 12A akui babi ai mbè tisòn, ondzi na bëngabëgë mbim mbaṅ mòn a abum nyia#7,12Awu mbaṅ mòn angabë mësis abui a Israel., mininga te atoa nkus, mod nkunda ya tisòn te atoa ai nyè esamba. 13Ayen angayen nyè, ndò Nti angawog nyè engongòl, nyè ai nyè na: Të wabad yon. 14Ndò asubu osu, anamba ewòli mbim, e bod bëmbë bëgë dzò bëtëbë, nyè na: A ndoman, wa madzo ai nyè, kodogo a si. 15Ndò mbim ongatòbò, akèè ai nkòbò, ndò avë nyè nyia woe. 16Wòṅ oku fò bod bësë a nyòl, bëngalugu Zamba, bò na: Profèt nen akui abë bia, ai na: Nti asò yen ayòṅ die. 17Foe etsaman fò nala etyan ai nyè a Yudea osë ai a mvus nnam osë.
Bod ya Yohannes Ndu-Bodo angalom
Mt 11,2-19
18Ndò bëyègè bë Yohannes bëngamana nyè tie e mam mësë ma. Yohannes aloe bëyègè boe bëbè, 19alomo bò abë Nti, nyè na: Yë wa wayean sò, yë biyanga mfë? 20Eyòṅ e bod ba bëngakui abë nyè, bò na: Yohannes ndu-bodo alom bia abë wa, nyè na: Yë wa wayean sò, yë biyanga mod mfë? 21Abog te aben, angabë alëdëgë abui bod akòn ai mintye, ai bëbë minsisim, abò fë na mindindim miyen. 22Ndò ayalan bò na: Kaṅan lèè Yohannes e mam miayen, miwogo fë. Mindindim miayen, mimbombog miawulu, minzëzam miafuban, mindondòg miawog, mimbim miahëbë, mimbubua mingawog mbëmbë foe. 23Mvòm ai e nyò aku ki mbëg etòm dzama. 24Adugan bëyègè bë Yohannes bëngadugan, ndò akèè na akòbò ai nkunda atyan ai Yohannes na: Dze mingakë yen a nkod-nnam? Yë e nden evundu yafoṅan? 25Dze hm ben mingakë yen? Yë e mod abëgë abëṅ biyie? E bod bëbëgë abëṅ biyie, a bëbëlë fë byem bi mò bëtoa a mënda minkukuma! 26Dze hm mingakë yen tug? Yë profèt? Owe, alolod profèt! 27E mod nyòlò ṅnyè bëngatil na: Yënë sik, malom wa englès wama osu, ṅnyè ayi wa kom zen osu#7,27Mal.3,1. 28Makad mina: A bòn bë bininga, mod ziṅ a lod ki Yohannes. Dzam da, e nyò anë mëligi-mvua a edzoe Zamba alod nyè. 29E bod bësë bëngabë bëwogo, ai bënòṅò bë ntòlò, bëngalugu Zamba mbol bëngaduuban ṅduan Yohannes. 30Bëfarisea ai bod bë mvende bëngabèan ṅyian Zamba, amu bandzëki duuban abë nyè. 31Mayi vëg bod ya e mvòṅ nyi ai dze, ndò ki bafulan ai dze? 32Bafulan ai bòngò ya bëtoa a nsëṅ angara, bëloegan bò bò, bò na: Bibom mina mëzik, mina të dzëm; akë mina yia bia mëlunga, mina të yëb. 33Amu Yohannes ndu-bodo angasò, nyè të di mbaṅëla, të nyu wayn, mina na: Abëlë mbë nsisim. 34Mòn mod akë sò, adzaag, anyaag, mina na: Yënë ndondòg ai nsòg mëyòg, anë eyòṅ ai bënòṅò bë toya ai bësëm minsëm. 35Ndò hm, bòn bë fëg bayi dzò bòòlò na enë sosoo.
Yesus adzu mininga
36Ndò man farisea ziṅan gabanda nyè na adi ai nyè, ndò angakë a nda man farisea te, ayëmë etoa. 37Mininga ziṅ#7,37Biayëm ki dzoe e mininga nyò, tò anë abui bod badzo na ṅnyè anë Maria Magdalena. angabë a tisòn hala, mininga minsëm; Awog angawog na atoa a nda man farisea, ndò asò ai nlòmbi mbòn, 38ndò atëbë babi a mvus mëkol moe, angayon, angasoe Yesus bibëga bie a mëkol, angafimi ai esil ya nlo woe, awòbògò nyè mëkol ai mò ai mbòn hi. 39E man farisea angabanda nyè angayi yen nala, anganyiṅ a nnëm etere na: Ngë e mod nyò atoa profet, ngë ayëm e kan mininga yanamba#7,39Eboe yazu e mod anamba nsëmë minsëm a nyòl. nyè nyi, na anë nsëmë minsëm. 40Yesus nyè ai nyè na: A Simun, mëbëlë nkòbò ai wa. Nyè na: A ṅyëgëlë, kòbògò. 41Yesus nyè na: bod bëbè bëngabë bëbëlë nkole-mòni mbòg mvola: mbòg abëlë nyè minsaṅ mi mòni mintèd mitan, e nyò mbòg mëwom mëtan. 42Mbol tègè ai e mòni badugan nyè, ndò angadzu bò bësë bëbè. Za ya abë bò ayi nyè diṅ a bui? 43Simun nyè na: Mavëg na e nyò bëdzu abui. Nyè ai nyè na: Oyen fò mbëṅ. 44Ndò avëṅan mfa mininga angabë, nyè ai Simun na: Wayen e mininga nyò a? Mënyian wa a nda, wa tègè ma soe mëndim a mëkol. Nyè awòbò hm ma mëkol ai bibëga, ndò afimi mò ai esil. 45Wandzëki wuban ai ma: Mfa woe, anë mënyian ha ana, anë hë awuban ai ma a mëkol. 46Wandzëki ma wòbò mbòn a nlo. Nyè awòbò ma mbòn a mëkol. 47Makad wa na, etòm te, abui minsëm mie mivaaban nyè, amu adiṅ abui. E nyò badzu abòd, adiṅ abòd. 48Nyè ai nyè na: Minsëm mie mivaaban wa. 49E bod bëngabë toa ai nyè ha bëkèè hm na balaṅëdan ha na: Za ben nyò avaè tò minsëm? 50Nyè ai mininga na: ṅyëbë woe onyii wa. Okëlë mvoè.
Aktualisht i përzgjedhur:
Lk 7: NTE12
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
MKPAMAṄ AMVOE Nouveau Testament en langue Ewondo © Bible Society of Cameroon, 2012.