ADECHHÜ 8
8
Atssükedon Sakhen
1Anyiza na Noah nu ma gweghe ahunjjen wi keben aghangsathu tsü nmali; ma ameghü yala sho thsü nu atssü mo teqha thsüa. 2Ayyi non wi atssü bvü keshhugho pen nu tang wi atsankuthu khen. Atsan nghola, 3ghanan meza nu deni seng wi atssü na ashishi sa qan wa. 4Asha tagüwa ghanan tagha nu tagü wi ahunjjen na ki Ararat Yyishiphon miwi ngan wa. 5Atssü na zeng pfü wa, nu asha taghawa ghanan atuwa wi ayikhathu shoni mu shagha.
6Ghanan jügha seng wi Noah na jjenkubhi shachi 7nu aduwwe kizzawa kesü kesun pi bvü thsü. Tsüna kheneng nghola, isala atssü npi keqha chu pighe kevüli wa. 8Tsaseng wi Noah na atssü keqha wadhala npi khe chüyale nkhetsü kesü kesun chi, 9isala atssü na khilila ayyi donbhon keben ghena nkhetsüwa na ma keka pen nmula. Tsüna kheneng ahunjjen wi gho, nu Noah na ma kwen chang chi nu tsü ssiya. 10Ma tsüseng wi ghanan tagü hie nu nkhetsüwa tsü kesun nengchi. 11Tsüna minulen wi oliv wa kahang kesü mcü pi nu ma wi gho neng. Tsalina Noah na atssü qan wadhale kesa chüya. 12Tsaseng wi ma ghanan tagü hie nu nkhetsüwa tsü kesun nengchi; khilitsü nkhetsü tsüna kheneng ngho la. 13Noah kahang mapi 601 asha atuwa ghanan atuwa wi atssükedon na qan wa. Noah na ahunjjen sha nu ghang kevüli chinan ayyi wi atssükedon na keqha wa kebenla muya. 14Asha keniwa ghanan ngwe nu tagü wi ayyi na qentha sa.
15Anyiza na Noah wi kiza, 16“Nwubvü, ntsathu, nu mathu wubvüthu tsü ahunjjen wina ssinu shhulo. 17Awathu nu aghangsathu tsüdila ssinu no gweghe shhulo, isanu mathu ya mizzasa sen nu ayyi tsüdi wi waya thsülo.” 18Tsalina Noah na ahunjjen wina ma wubvü, ma tsathu, mathu wubvüthu ssinu shhua. 19Aghangsa nu awathu tsüdila ahunjjen wina mathu len kepapa wi akhang khang sala shhua.
Noah Na Kekinyikesa
20Noah na Apvüwa wi kekinyipen kesü saya; ma aghangsa nu awa kemetha kesüsü khuya nu tsü maben pi kekinyipen miwi mecang pi ahhansha sachi. 21Apvüwa na ahhansha kesa kemecang han tsü ma nen nu ma ketanla hati khi, “Anyi kekuli ghena hi kishen-keshi pi ayyi wi nchi nengdha; anyi ma kepvüza tsü wina ma kemeshen nmehai kesa tsü hi chüben. Hi haseng witsü nansü ti ayyi wi kahangli keben tsüdi meyasa nengdha. 22Ayyiwa ha keben chu ciwi pala cü keyang nu kewwi tsü saben. Ciwi keshüthangla kese tsü nu keyeng tsü, pathsü nu mazu, aghaja nu ghanan saben.”
Aktualisht i përzgjedhur:
ADECHHÜ 8: RENGNBSI
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.