Piancilna 41
41
Pharaoh’ Mang
1Tua khit kum nih bit a bei ciangin Pharaoh in mang khat man hi: Nile gei-ah a din laitakin 2 gun sung pan thau kisa-a a mai pingpeng bawngpi sagih pusuakkhia-a, phai lakah a gamta uh hi. 3 Tuate nungah a melsia a gawng gemgam bawngpi sagih Nile sung panin paikhia a, gun gei-a a dangte kiangah a ding uh hi. 4 Tua a melsia a gawng gemgam bawngpite in a thau-a a mai pingpeng bawngpi sagihte nemang uh hi. Tua khit ciangin Pharaoh khanglo hi.#Pc 20:3; Isa 19:6
5 Amah ihmu kik-a mang a nihna man hi: Buh kung khat panin a taksa a hoih buhvui sagih a vui hi. 6 Tuate nungah nisuahna huih in a thepsak buhvui hawm sagih a vuikhia leuleu hi. 7 Tua buhvui hawmte in a taksa a dim vui sagihte valhtum uh hi. Tua khit ciangin Pharaoh a khanglo hi; tua pen a mang ahi hi.
8 A zingsang ciangin a lung nuam lo-a, Egypt gama mipil teng le mitphial sia teng a samsak hi. Pharaoh in amaute kiangah a mang gena, ahi hangin kuamah in a khiatna a gensak thei kei hi.#Da 2:1,3; 4:5, 19; Pk 7:11,22
9 Tua ciangin haitawi makaipa in Pharaoh kiangah, "Tuni-in ka ginatlohna ka phawk hi. 10 Khatvei Pharaoh a nasemte tungah heh a, amah in kei le a moh-em makaipa, inncing mangpa’ innah hong khum hi. 11 Zan khat thu-in mang ka man khawm uh a, khiatna nei tuak hi. 12 Tua laitakin inncingpa’ nasempa Hebrew khangno khat ko tawh a omkhawm hi. Ama kiangah ka mang uh ka gen uh ciangin, hong khiatsak a, ka mang uh a khiatna hong gen tuak hi. 13 Ko tunga hong khiatsak bang lianin tung hi: Kei ka nasepna munah hong kikoih kika, a khat pen kikhailum hi," b#41.13 Ahikeh dawtlet a ci hi.
14 Tua ciangin Pharaoh in Joseph samsaka, amah thong hawmpi sung pan kipaikhiatpih pah hi. A sam met-a a puansilhte a khek khit ciangin Pharaoh mai-ah pai hi.#Ph 105:20; Da 2:25
15 Pharaoh in Joseph kiangah, "Mang khat ka mana, kuamah in a khia thei kei hi. Ahi hangin mang khat na zak phetin khia thei pah hi, ci-in a kigenna ka za hi," ci hi.#Da 5:16
16 Joseph in, "Ken ka hih thei kei hi; ahi hangin Pasian in ama deih bangin Pharaoh hong dawng ding hi," ci-in dawng hi.
17 Tua ciangin Pharaoh in Joseph kiangah, "Ka mangin Nile gei-ah ka din laitakin 18 gun sung panin thau kisa-a a mai pingpeng bawngpi sagih hong pusuakkhia a, phai lakah a gamta uh hi. 19 Tuate nungah a melsia mahmah a gawng geugau a thep dekdak - bawngpi sagih hong paikhia hi. Egypt gam sung khempeuhah tua zah a melsia ka mu ngei nai kei hi. 20 A melsia a gawng bawngpite in, hong paikhia masa bawngpi thau sagihte netum uh hi. 21 Ahi hangin a nek khit nangawn un a nek lam uh kua mah in thei lo a; a nek ma zah mah un a melsia veve uh hi. Tua khit ciangin ka khanglo hi.
22 "Ka mangin buh kung khat panin a taksa a hoih buhvui sagih hong vuikhia zong ka mu hi. 23 Tuate nungah nisuahna huih in a mut keu a hawm, a thep adang vui sagihte hong vuikhia hi. 24 Buhvui hawmte in a taksa vui sagihte valhtum uh hi. Mitphial siate kiangah ka gen hangin hong gensiang thei khat beek a om kei uh hi," a ci hi.#tg 8
25 Tua ciangin Joseph in Pharaoh kiangah, "Pharaoh mangte khat hi-a, a kibang ahi hi. Pasian in a hih dingte Pharaoh tungah hong laakkhol ahi hi. 26 Bawngpi hoih sagihte kum sagih hi a, buhvui hoih sagihte kum sagih ahi hi; tua pen mang kibang hi a, khat ahi hi. 27 Tuate khit cianga hong paikhia a gawng a melsia bawngpi sagihte kum sagih hi a, nisuahna huih in a mut keu a man nei lo buhvui sagihte tawh a kibang ahi hi: Amaute kum sagih sung kialpi ahi hi.#Da 2:45
28 "Pharaoh tunga ka gensa bang tektek ahi hi: Pasian in a hih dingte Pharaoh tungah hong lak zo hi. 29 Egypt gambupah kum sagih sung kihau mahmah ding hi, 30 ahi hangin tuate kum sagih sung kialpi in nungzuih ding hi. Tua ciangin Egypt a hauhnasa khempeuh kimangngilh dinga kialpi in leitang a siasak dikdek ding hi. 31 A nungzuih kialpi nasia lua mahmah ahi manin tua ma-a hauhnasa kiphawkkha lo ding hi. 32 Pharaoh tunga nam nih a hong kipia mangmatna Pasian in kiptaka a khentatsa thu hi a, Pasian in a tangtungsak pah ding hi.
33 "Tu-in Pharaoh in thu ngaihsun siam mipil khat zong inla, Egypt gam uksak in. 34 Pharaoh in mangpite seh inla, a kihauh kum sagih sungin Egypt leitanga piang khempeuh sehnga suah sehkhat lasak in. 35 Hih hong tung ding kum hoih sunga an khempeuh amah khawmsak inla nek dingin Pharaoh thuneihna nuai khuapi sungah kholsak in. 36 Egypt tunga hong tung ding kum sagih kialpi hanga gam sung a siat loh nadingin kum sagih kialpi sunga zat dingin hih ante kikoihkhol ding hi," ci hi.
37 Pharaoh le a uliante khempeuh in hih ngimna hoih sa uh hi. 38 Tua ciangin Pharaoh in amaute kiangah, "Hih mipa lo a sungah Pasian’ kha c#41.38 Ahikeh pasiante ompih omna midang i mu zo diam?" ci-in dong hi.
39 Tua ciangin Pharaoh in Joseph kiangah, "Pasian in hihte khempeuh nang hong theihsak nungsang, nang zah a mipil a kician khat beek a om kei hi. 40 Ka kumpi inn na uk dinga ka mite khempeuh in na thu hong mang ding uh hi. Nang sangin kumpi tokhom thu-ah a lianzaw ka hi bek ding hi," a ci hi.#Ph 105:21-22; Ns 7:10
Joseph in Egypt Uk
41 Tua ciangin Pharaoh in Joseph kiangah, "Egypt gam bup uk dingin nang kong koih zo hi," ci hi. 42 Tua ciangin Pharaoh in a min gelhna zungbuh a khutme pan suahkhia-a, Joseph khutme-ah a bunsak hi. Saihadial puan hoih tawh amah zemin a ngawngah kham khainiang oksak hi. 43 Amah in ama nuai-a pa a#41.43 Ahikeh ama nuai-a pa sakolleng ah ahikeh sakolleng a nihna ah in sakolleng tungah tuangsak a, a mai-ah mite in, "Lam na awn un," b#41.43 Ahikeh kun un ci-in a awng uh hi. Tua bangin Egypt leitang bup ukin amah a koih hi.#Pc 42:6; Es 3:10; Da 5:7,16,29
44 Tua ciangin Pharaoh in Joseph kiangah, "Kei Pharaoh ka hi hi, ahi hangin nang thu loin Egypt gam khempeuhah kuamah in khut ahikeh khe a liik kei ding hi," ci hi. 45 Pharaoh in Joseph min Zaphenath-Paneah phuaka, On c#41.45 Tua pen Hekiopolis tg. 50 ah zong a siampi Potiphera’ tanu Asenath a zi dingin a pia hi. Tua ciangin Egypt gam khempeuh ah Joseph a zin hi.#Ph 105:22
46 Egypt kumpipa Pharaoh nasem-a a lutin Joseph kum sawm thum pha hi. Pharaoh omna panin zinkhia a, Egypt gam khempeuh a phasuak hi. 47 A kihauh kum sagih hun sungin leitang in tampitak a gahkhia hi. 48 Egypt gama a kihauh tua kum sagih sunga an piangte khempeuh Joseph in khawma, khuapite sungah a khol hi. Khuapi khempeuh ah a kima an piangte a khol ciat hi. 49 Joseph in buhhum tampitak, tuipi gei-a sehnel bangin a khol hi; tam lua mahmah ahi manin a ciamteh nawn vet kei hi; bang hang hiam cih leh kiteh zo nawn lo hi.#Da 1:19
50 Kialpi kumte tun ma-in Joseph in On-a siampi Potiphera’ tanu Asenath tawh tapa nih a nei hi. 51 Joseph in a tapa masa min Manasseh d#41.51 Manasseh pen Hebrew a mangngilh cihna pana aw pana kila hi kha ding hi. phuaka, "Pasian in ka lungkhamna khempeuh le, ka pa’ innkuanpih khempeuh hong mangngilhsak hang ahi hi," ci hi. 52 A tapa nihna min Ephraim e#41.52 Epharaim pen Hebrew a a nih veina cipha cihna tawh a aw kibang hi. phuaka, "Ka thuakna gamah Pasian in hong ciphasak hang ahi hi," ci hi.#Pc 17:6; 49:22
53 Egypt a, kihauh kum sagih beita-a, 54 Joseph gensa bang tektek in kum sagih kialpi ding kipan ta hi. Gamdang khempeuh ah zong kialpi tunga ahi hangin Egypt gam bupah an a om hi. 55 Egypt gam khempeuh ah kialpi a tun pat laitakin mite in Pharaoh kiangah an ngen uh hi. Tua ciangin Pharaoh in Egypt mite khempeuh tungah, "Joseph kiangah pai unla hong gen bangbangin sem un," ci hi.
56 Gambup ah kialpi a tun kim ciangin, Egypt gam khempeuhah kialpi nasia lua ahi manin Joseph in a buh salte hongin Egypt mite tungah a zuak hi. 57 Joseph kianga an lei dingin gam khempeuh Egypt ah pai uh hi; bang hang hiam cih leh leitung khempeuhah kialpi nasia mahmah hi.#Pc 12:10; 42:5
Aktualisht i përzgjedhur:
Piancilna 41: ZIV
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Copyright 1994 Myanmar Center for World Mission