Lûk 16

Ngàn kum tofu wùt fètana

1Jisòs fî fôktì màgân fu lefu ha jùmtìbàmsù wunsu na, “Wùt chìk wùlè ndùku kəta wùt fètana lem na wu hi kine mwə̀ mù wûn. Tuk lefu ghɨta hì bê jîsà ha wun na, wù bobhe kə mwə̀ mâ halô. 2Wùt chìk we toŋa wûn buf ha wun na, ‘Mu ywo na ghə ni kum wò? Chwùti ha mu te wò chehì fêtà, beka yu ti kpên shyəma wò de fêtì.’ 3Wùt fètana àtɨ̂n hì kana nâ yi nè nê nâ ghə te bì fèt khɨŋa hi fihe yi a yi fèt agha. Yi kəta wi jyaka hi tè gbì chɨm a chyà luktu a wu kâ, wumê ghaka hi tè gbè lun a chyà. 4À fî kaha jis kə wun a wun a ngɨŋ na, ‘Mu ti khɨli gha ye mu mò hi nì a yu afa ghɨ fihe mu a yi fèt ma ghɨta bê hi saŋlê hi fye mu a ghɨna sù ndâ.’ 5Wù kwâktì ni, hì toŋa kə wùt wù mòk, wù mòk atɨ̂n à ghɨt afa ghɨ ndùku kəta fôlì ha bì fèt à wûn, ghɨna bênà. Wù shyə̂ bên, wù buf ha wun na wù kəta ghə hi làk ha bì fèt a mù agha? 6Wù jis ha wun na, ‘Yi kəta kaŋ wu mgutu wu wə.’ Wù jis ha wun na wù ko lêŋì ŋwàklù ma wù nyaŋhê nyak na yi kəta kaŋ wu mgutu mtân. 7Wùt kùmtena bên, wù buf ha wûn na wù kəta hi fo ghə ha bì fèt à wûn agha? ‘Wù jis ha wun na mu kəta hi fo bàlìsù wîtsù wu wə.’ Wù jis ha wun na wù ko ŋwàklù ma wù nyak na yi kəta hi fo bàlìsù mfama. 8Bì fèt à wûn yen gha ye wùt fètana wuna ndùku kama nê hì bɨnhì lumu tofanu we wù ne gha yîn atɨ̂n.” Jisòs jis ni, ki jîs na, “Ghɨt a mbye tofalò wu lum afa ghɨna fate gha ghɨna atɨ̂n, chyâ wana yi bana.”

9“Mu jìsà ha ghàn na, ghàn hi kwo sunsu nì ka wanu we wu bu hi bèn nì ngə̂k a yu afa wu me, ma ghàn bê hi kole yênà yi laka afa yi bè mê wi ma ghɨ bê fyi ghàn wo bwà.” 10Wùt ki fate khɨte mwə̀ mù tetamù ma ghɨ bê fo mwə̀ mù chìk, ma wù fatè khɨti kəbi yâ. Wùt shìki bu hi khɨte mwə̀ mù tetamù, wò fo nâbi mwə̀ mù chìk ma wù tê fate khɨtî. 11Ghàn shìki mô ma yi ti ghak ghàn hi khɨte ghak yi mbyi, ma à bê fo nde kàntè ghak ha ghàn agha? 12À hì mô na wùt lè wi hi fo a shyə wuna na ghàn fatè lem, ma à bê fo nde ghana agha?

13“Wùt wi hi tè mò wùt fètana ha ghɨt à bà. Yi hì mò ni ma wù nê hi bânà wù mòk, kôŋà wùlè; à hì bu yâ ma wù nê hi ngumle wù mòk, kehe wùlè. Wò wi hi tè fèt ha Yènfù nì ha ka.”

Jisòs njâŋ ha ghɨt a Falàsî

(Mat 11.12-13; 5.31-32; Mâk 10.11-12)

14Ghɨt a Falàsî ale yû jis yîn kum ka hì chəka Jisòs beka ghɨna ndùku kôŋà ka. 15Jisòs ki jîs ha ghɨna na, “À mò ghàn ghe a ghàn gbè kata chwûtè ha ghɨta na ghàn mò ghɨt a jûŋà, biyani Yènfù khə təm ghana. Shyə ghe ghɨta ke na ghɨ kpenelò mò te wu chyâklù a Yènfù ashyə̂.”

16“Ghɨ bè hì gbê a Musìs sah à yì sak, fê gbê yi yiki fòktìsù chiksu hi kwoka chem a tuk wu Jon Fo Mòlû. Chîn ghɨ fôktè yênà tum yì jùŋ kum fə̂n wù Fùyènù, nâbi nde hì nô kə yi nô hi lye lùk wu fə̀nù afân.” 17Biyani yi chwûtè wi na saki Musìs ti mî. Yi bonelò shyəma nyə nì chyə mi, chyâ te silàfu sakfu a làŋ à Fùyènà bê chyâ a chyə̂.

18“À jùm nâbi nde ywê wûn, yen lyi wùlè, ma à hi mô na wù ti khɨm sak yi malani, wùt lɨmà wùlè lyi wùt ywên àtɨ̂n, ma à hi mô kəbi na wù ti khɨm sak yi malani.”

Lasalòs ghê wùt wù chìk

19Wù jis ni, fî fôktì màgân fu lefu na, “Wùt wù chìk wùlè ndùku mô ma wù ti mak mwə̀ mù tù fə̀n, fê yəhe wun wu wunu nì nâbi ghə kə mu tuk mù jɨ̀m. 20A mô ni ma ghɨ ti ben lem wùt wù jɨ̀ŋana wùlè a wun a jwô bɨn, ghɨ toŋte na Lasalòs, wun wu wunu wù jɨ̀m mô wù jì. 21Wu jə̂mà nâ na nde fo beka shyə yəna ha yi ma yi yə, kə nâ me mù chemle a chyə̂ a wùt chìk we baŋa yəna. Wu jîsà ni, busu bê la luktu wun tu yable tê. 22Wù kpû, anjèlsù Fùyènsu lyi wûn yen lem a Ablàhâm a ngwùŋ. Wùt chìk we boŋ kpû, ghɨ gûmà wûn. 23Wù yen wu lùk wu ghɨt a kpona hì yena ngə̂k yì kanana afû, wù lôhì a se wuna ki yen Ablàhâm hadà Lasalòs mô a wun a ngwùŋ 24Wù toŋti wûn jis na, ‘Ablàhâm kwohi seni ha mu a bâ, ma wò tum Lasalòs ma wù tuŋ kə nâ wan à wô wûn a mòlû ma wu bê chemhi a mu yi jwô beka toŋu mu yima kə ni. Mu ywolò lûmì kanani atɨ̂n à wu wùs afân.’ 25Ablàhâm jis ha wun na, ‘Wan, khɨlî na wò ndùku yəlò jùŋ te wò ndùku baha mô a chyə̂, Lasalòs boŋa yena ngə̂k. Chin mò, wu mô yi yùtì ywo jùŋ afân wo boŋa ywo yi lûm. 26Nâbi ha kàn, foŋlana ale mò ghaka kə ni, a ghe ghɨ jyâhè ghàhnà, ma wùt lo a ghàh a bàh afân hì khɨŋa hi dàŋ à bèn afâ, ma wù tê yena jə̀ lumu, wùt ki lô afâ hì khɨŋa hi dàŋ à bèn ha ghàh, ma wù tê khɨlî hi dàŋ.’ 27Wù jî, jis ha Ablàhâm na, ‘Mu chyate wò a bâ te yi mô ni, kaha tum Lasalòs ma wù yen a bom a ndâ, 28ma wù yê tobhi wana noma kum nì gha yîn kə ghɨna bê boŋa lyi a nki ngə̂k afân. Ghɨna baha faŋ à tân.’ 29Ablàhâm jis na, ‘De ghɨna kətalò ŋwàklù sù Musìs sù ghê fòktìsù chiksu tì nyàka.’ Ghɨna yu ha ghɨna. 30Wù jis ha Ablàhâm na, ‘Ngàŋ a bâ, wùt ki lôtì a yi kpû yen ha ghɨna ma ghɨna nê kahi təm a ghɨna a sùbe.’ 31Ablàhâm ki jîs ha wun na, ‘Ghɨna ki fâŋ hi yu gha ye Musìs ghê fòktìsù chiksu tì nyàka, ma ghɨna bê tê yû, nâbi wu yu afa wùt kahe yena ha ghɨna ma wù lòte a yi kpû.’”#16.31 Ghɨ tì lem wûn a Ablàhâm a ngwùŋ, chwùtè na wù ndùku mò hi khɨtè yi bôn njwô Ablàhâm ndùku mô bì we Yènfù tì chwùne ha ghɨt a wuna.

Aktualisht i përzgjedhur:

Lûk 16: bmv

Thekso

Ndaje

Copy

A doni që theksimet tuaja të jenë të ruajtura në të gjitha pajisjet që keni? Regjistrohu ose hyr

Mësoni më shumë rreth versionit Ŋwàklù Fùyèn Kàn Mù Fê (Cameron)

Lûk 16

Vargje biblike të njohura nga
Lûk 16

Dëgjoj Lûk 16

Bibla:

Bum

Versioni: Ŋwàklù Fùyèn Kàn Mù Fê (Cameron) - bmv

Lûk 16

Lûk 16

Vargje biblike të njohura nga Lûk 16

Dëgjoj Lûk 16

Bibla:

Bum

Versioni: Ŋwàklù Fùyèn Kàn Mù Fê (Cameron) - bmv

Lûk 16

Vargje biblike të njohura nga
Lûk 16