JUAN 16
16
1“Ini tanan napamolong ko sa inyo agud nga indi kamo masandad. 2Isikway kamo nila sa mga sinagoga; hoo, ang takna nagaabut nga ang bisan sin-o nga magpatay sa inyo magahunahuna nga sia nagaalagad sa Dios. 3Kag ini himoon nila bangud nga wala sila makakilala sa Amay, ukon sa akon. 4Apang ining mga butang napamolong ko sa inyo, agud nga kon ang ila takna mag-abut madumduman ninyo nga nagsugid ako sa inyo nahanungud sa ila.
Ang Buluhaton sang Espiritu Santo
“Ining mga butang wala ko masiling sa inyo kutub sa ginsuguran, bangud nga kaupud pa ako ninyo. 5Apang karon nagakadto ako sa nagpadala sa akon; kag wala gid sa inyo sing nagapamangkot sa akon, ‘Diin ka bala makadto?’ 6Apang bangud nga napamolong ko sa inyo ining mga butang, ang kasubu nagtugub sang inyo mga tagiposoon. 7Walay sapayan nagasugid ako sa inyo sang kamatooran: sa kaayohan ninyo nga ako magtaliwan, kay kon indi ako magtaliwan, ang Mananabang indi mag-abut sa inyo; apang kon magtaliwan ako, ipadala ko sia sa inyo. 8Kag kon mag-abut sia, magapatalupangud sia sa kalibutan nahanungud sa sala kag sa pagkamatarung kag sa paghukom: 9nahanungud sa sala, bangud nga wala sila magtoo sa akon; 10nahanungud sa pagkamatarung, bangud nga ako makadto sa Amay, kag indi na kamo makakita sa akon; 11nahanungud sa paghukom, bangud nga ang manugdumala sining kalibutan nahukman.
12“May madamu pa ako nga butang nga inugsiling sa inyo, apang indi kamo makadala sa ila karon. 13Kon ang Espiritu sang kamatooran mag-abut, magatuytuy sia sa inyo sa bug-os nga kamatooran; kay indi sia magahambal gikan sa iya kaugalingon, kondi ang bisan anong mga butang nga iya mabatian ipamolong niya, kag ipahayag niya sa inyo ang mga butang nga maabut. 14Himayaon niya ako, kay kuhaon niya ang akon kag ipahayag ini sa inyo. 15Ang tanan nga iya sang Amay akon; busa nagsiling ako nga kuhaon niya ang akon kag ipahayag ini sa inyo.
Ang Kasubu Baylohan sa Kalipay
16“Sa diotay pa nga tion, kag indi na kamo makakita sa akon; liwat sa diotay pa nga tion, kag kamo makakita sa akon.” 17Ang iban sang iya mga gintoton-an nagsinilingay, “Ano bala ining iya ginasiling sa aton, ‘Sa diotay pa nga tion, kag kamo indi makakita sa akon, kag liwat sa diotay pa nga tion, kamo makakita sa akon’; kag, ‘bangud nga ako makadto sa Amay’?” 18Nagsiling sila, “Ano bala ining iya ginasiling ‘sa diotay pa nga tion’? Wala kita makahibalo sang ginsiling niya.” 19Si Jesus nakahantup nga sila buut magpamangkot sa iya; gani nagsiling sia sa ila, “Nagainusisaay bala kamo nahanungud sini, nga nagsiling ako, ‘Sa diotay pa nga tion, kag indi kamo makakita sa akon, kag liwat sa diotay pa nga tion, kag kamo makakita sa akon’? 20Sa pagkamatuud, sa pagkamatuud, nagasiling ako sa inyo, nga kamo magahaya kag magapanalabiton, apang ang kalibutan magakalipay; magakasubu kamo, apang ang inyo kasubu baylohan sa kalipay. 21Ang babayi kon ginasakitan may kasubu, bangud nga nag-abut ang iya takna; apang sang nakaanak na sia, indi na sia makadumdum sang kasakitan, bangud sang kalipay nga natawo ang bata sa kalibutan. 22Gani kamo karon may kasubu, apang ako makigkita sa inyo liwat kag magakalipay ang inyo tagiposoon, kag walay bisan sin-o nga magakuha sa inyo sang inyo kalipay. 23Sa sadtong adlaw indi kamo magpamangkot sa akon. Sa pagkamatuud, sa pagkamatuud, nagasiling ako sa inyo, kon magpangayo kamo sing bisan anong butang sa Amay, ihatag niya ini sa inyo sa akon ngalan. 24Tubtub karon wala pa kamo makapangayo sing bisan ano sa akon ngalan; pangayo, kag magabaton kamo, agud nga ang inyo kalipay mabug-os.
Nadaug Ko ang Kalibutan
25“Ini napamolong ko sa inyo sa mga paanggid; ang takna nagaabut nga indi na ako magapamolong sa inyo sa mga paanggid kondi magasugid sa inyo sing maathag sang Amay. 26Sa sadtong adlaw magapangayo kamo sa akon ngalan; kag wala ako nagasiling sa inyo nga magapangayo ako sa Amay tungud sa inyo; 27kay ang Amay gid nagahigugma sa inyo, bangud nga naghigugma kamo sa akon kag nagtoo nga ako nagikan sa Amay. 28Ako nagikan sa Amay kag nagkari sa kalibutan; liwat, magabiya ako sang kalibutan kag makadto sa Amay.”
29Ang iya mga gintoton-an nagsiling, “Yari karon, ikaw nagapamolong sing maathag, indi sa paanggid! 30Karon nakakilala kami nga ikaw nakahibalo sang tanan nga butang, kag wala nagakinahanglan nga may tawo nga magpamangkot sa imo; tungud sini kami nagatoo nga ikaw nagikan sa Dios.” 31Si Jesus nagsabat sa ila, “Karon nagatoo na bala kamo? 32Ang takna nagaabut, hoo nag-abut na, nga paaplaagon kamo, ang tagsa ka tawo sa iya kaugalingon, kag bayaan ninyo ako nga isa lamang; apang indi ako isa lamang, kay ang Amay kaupud nakon. 33Ini napamolong ko sa inyo, agud nga kamo may paghidait sa akon. Sa kalibutan may kangitngitan kamo; apang magpakalig-on kamo, nadaug ko ang kalibutan.”
Aktualisht i përzgjedhur:
JUAN 16: ABHIL82
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Ang Biblia ©1982 Philippine Bible Society