Mahendo 7
7
Sitefano unadzihehera mbere za ngambi
1Ndo kuhani mubomu wamuuza Sitefano vivi, “Vidze, gano maneno wambwago wagagomba, ukale uwe wagagomba jeri?”
2 #
Mwa 12:1
Sitefano achiudzidza vivi, “Sumilani atumia a ngambi na Ayahudi asena! Pʼindi Mwenyezi Mulungu wamulairira mukare wehu Burahemu, phokala ucheri itsʼi ya Mesopotamia kʼadzangwe kwendasagala Harani. 3Na Mulungu ariphomulairira, wamwamba vivi, ‘Ariche mbarizo utsame yiyi itsʼi yenu, wende itsʼi yondakwamba wende.’ 4#Mwa 11:31; Mwa 12:4Ndo Burahemu watsama itsʼi ya Akalidayo, achendasagala Harani. Na abaye ariphofa, Mulungu wamwamba atsame vivyo kuko Harani nako, na achidzasagala yiyi itsʼi musagalayo vivi. 5#Mwa 12:7; 13:15; 15:18; 17:8Ela Mulungu kʼamupʼire Burahemu hata phatʼu phafikapho lwayo lwa kʼukʼu, phakale phakwe phenye. Mulungu wamulaga Burahemu tu kukala, itsʼi yiyo yindakala yakwe na atʼu a mudzunguwe, na ukati uo Burahemu wakala kʼana hata mwana. 6#Mwa 15:13, 14Mulungu wamwamba vivi, ‘Atʼu a mudzunguo andakala ajeni kahi za itsʼi yiriyo tsʼi yao, na kuko andahendwa agulwa ahumiki na ahendwe vii myaka magana mane. 7#Kul 3:12Ela mimi, nindaatiya akili ao atʼu a itsʼi yiyo ondaahenda agulwa ahumiki. Na chisha, andalaa itsʼi yiyo ao atʼu a mudzunguo, kwa hata adze aniabudu phatʼu phapha.’ 8#Mwa 17:10-14; Mwa 21:2-4; Mwa 25:26; Mwa 29:31-35:18Na chisha, Mulungu wahenda kubitwʼatsʼi kukale dalili ya riro lagano roriika na Burahemu. Ndo Burahemu ariphomuvyala mwanawe Isaka, wamubitʼatsʼi mutsana wa nane. Isaka naye ariphokudzavyala mwanawe Jakobo, wamubitʼatsʼi. Jakobo naye ariphovyala aratʼu anae kumi na airi, ario ndio akare ehu, waabitʼatsʼi vivyo.
9 #
Mwa 37:11;
Mwa 37:28;
Mwa 39:2, 21 “Mumwenga wa ao akare ehu kumi na airi wakala ni Jesefu, na yiye waonerwa chidzitso ni ao nduguze hata achimuguza akakale mugulwa muhumiki itsʼi ya Misiri. Ela Mulungu waenderera kukala naye, 10#Mwa 41:39-41na achimutivya na rikize zosi. Mulungu wamwajaliya hekima hata vivyo vichimuphota Farao, mufalume wa Misiri, na Farao achimuhenda gavuna wa Misiri, na yiyo nyumbaye. 11#Mwa 42:1, 2Ndo kwakudzagwa nzala bomu kuko itsʼi zosi za Misiri na Kanani, yiriyo yaaturisa atʼu muno, na ao akare ehu ákala kʼaapata kamare leu. 12Ndo Jakobo wasikira kukala, kuko itsʼi ya Misiri, kwakala kunapatikana leu. Ndo achiahuma anae, ario ndo akare ehu ende kuko Misiri lwa kwanza. 13#Mwa 45:1; Mwa 45:16Akare ehu ariphouya kuko charo chao cha phiri, Jesefu wadzimanyisa kwa ao nduguze, na hata Farao naye achiamanya ao atʼu a Jesefu. 14#Mwa 45:9, 10, 17, 18; Mwa 46:27Chisha, yiye Jesefu walagizira kukala, abaye na atʼue osi ende kuko Misiri, na osi ákala ni atʼu mirongo mifungahe na atsano. 15#Mwa 46:1-7; Mwa 49:33Ndo Jakobo wakwenda kuko Misiri, kuriko yiye na akare ehu anjine ásagala hata achifa, 16#Mwa 23:3-16; 33:19; 50:7-13; Josh 24:32na nyufu zao zichiudzwa Shekemu zichendazikwa kokala Burahemu ugula mbira kulaa kwa anangwa a Hamori, na chasi fulani cha pʼesa.
17 #
Kul 1:7, 8 “Ukati phokala u phephi na kufika wa Mulungu kuchimiza chilagane chokala udzimulaga Burahemu, chilagane cha kwaika tsare atʼue osi kulaa Misiri kokala ni agulwa ahumiki, isabu ya Aiziraeli kuko Misiri yakaza konjezeka. 18Na yakaza konjezeka vivyo hata mufalume munjine ariye kʼamumanyire Jesefu, achanza kutawala kuko Misiri. 19#Kul 1:10, 11; Kul 1:22Ndo yiye waahendera unyama atʼu a chiryomo chehu, na achiahendera vii ao akare ehu kwa kwagaramisha aaike konze ana ao atsanga kwa afe.
20 #
Kul 2:2
“Musa wavyalwa ukati uo, na wakala ni mwana mudzo muno hata achitsunukwa ni Mulungu. Avyazie achimurera mwao nyumbani myezi mihahu, 21#Kul 2:3-10na ariphokwendamwika kuko konze, mwanangwa wa chiche wa Farao wamuhwala na achimurera dza mwanawe. 22Ndo Musa wafunzwa maneno gosi ga hekima ya Amisiri, na yiye waishimika muno kwa manenoge gokala achigomba, na mahendoge gokala achihenda.
23 #
Kul 2:11-15
“Musa phokala una myaka mirongo mine, waamula kwendaalamusa Aiziraeli anzie. 24Tsʼiku mwenga kuko, Musa wamona Mwiziraeli munziwe unapigwa ni Mumisiri. Ndo achendamukanira, na achimuriphiza kumupiga yiye Mumisiri, na phapho achimuulaga. 25Musa wakala unaona Aiziraeli anzie andamanya kukala, Mulungu wakala unamuhumira yiye kwakombola, ela ao kʼaagamanyire gago. 26Ndo kunadzachakwe, Musa waona Aiziraeli anzie airi anapigana. Musa achiakanya, na achiheza kwatsanganya kwa kwaamba, ‘Mwimwi samba hata mu ndugu! Hʼaya heka sambi munapigana?’ 27Ela yuyatʼu yekala unamupiga munziwe, achimusukuma Musa kʼanda, na achimwamba, ‘Ni ani yekwika uwe ukale chilongozi na mulamuli wehu? 28Hebu unahenza uniulage dza vyomuulaga yuya Mumisiri dzana?’ 29#Kul 18:3, 4Musa ariphosikira vivyo, wachimbirira itsʼi ya Midiyani. Achendasagala kuko dza mujeni hata achihwala, na achivyala analume airi.
30 #
Kul 3:1-10
“Musa phokala usagala Midiyani myaka mirongo mine, Mulungu wamulairira dza malaika kwa njira ya chitsaka chokala chinaaka moho kuko nyika, phephi na mulima wa Sinai. 31Musa ariphoona gago, waangalala hata achisengera phephi kwa aonetʼo. Ela achisikira laka ra Bwana Mulungu rinaamba, 32‘Mimi ndimi Mulungu wa akareo, ano Burahemu, Isaka na Jakobo!’ Musa phapho achiphenywa ni woga, na achanza kutetema hata kʼasubutire kulola kahiri. 33Bwana Mulungu achimwamba, ‘Vula virahuvyo kwakukala, phapho wimirepho ni phatʼu phatakatifu.’ 34Chisha, achenderera kumwamba, ‘Mimi nidzigaona kamare gago mai gahenderwago atʼu angu kuko itsʼi ya Misiri. Na chicho chiriro chao nidzichisikira, na nidzikudzaativya. Ndo vivi, ninahenza nikuhume ko Misiri.’ ”
35 #
Kul 2:14
Sitefano waenderera kugomba achiamba, “Musa yuyu, bee ni yuyatʼu ariye Aiziraeli ámurema kwa kwamba, ‘Ni ani yekwika uwe ukale chilongozi na mulamuli wehu?’ Yuyu wahumwa ni Mulungu mwenye akale chilongozi na mutivyi wao pharatʼu ariphomulairira dza malaika, kwa njira ya chitsaka chokala chinaaka moho. 36#Kul 7:3; Kul 14:21; Isab 14:33Ndo Musa ndiye yealongoza Aiziraeli kulaa itsʼi ya Misiri kwa kuhenda mautʼu-mautʼu ga kwangalaza na dalili ko Misiri. Vivyo waenderera kuvihenda Bahari ya Shamu, na phokala a nyika myaka mirongo mine. 37#Kʼumb 18:15, 18Musa yuyu vivyo, ndiye yeamba Aiziraeli, ‘Mulungu undamutsagulira mutʼu kahi zenu, akale mugomviwe dza mimi.’ 38#Kul 19:1-20:17; Kʼumb 5:1-33Na ukati Aiziraeli ariphokala a phamwenga kuko nyika, Musa yuyu vivyo, ndiye yekala mutsanganyi wa malaika wa Bwana na ao Aiziraeli. Malaika yiye yegomba naye mulima wa Sinai, ndiye ariyemupʼa Musa garatʼu maneno garehago uzima, ahupʼe siswi.
39“Ela akare ehu árema kumusikiza Musa, chisha achimurema, na hata achaza kuuya itsʼi ya Misiri. 40#Kul 32:1Ndo ao achimwamba vivi Haruni, ‘Hutengezere milungu, yitsukulwe mbere zehu, yihulongoze vivyo hwendavyo. Maana, Musa yehulongoza kulaa Misiri, kʼahumanya ugwirwa nini!’ 41#Kul 32:2-6Phapho ndipho achitengeza chinyago chokala chinga dza ndama. Achichilavira sadaka na kuchiusira shuhuli kwa anachabudu chicho chitʼu chokala adzichitengeza na mikono yao enye. 42#Amo 5:25-27Ndo Mulungu wauka kati yao, achiaricha aabudu zizo nyenyezi nyinji za mbinguni. Vivi vinagwa sawa na goandikwa chitabu cha agomvi a Mulungu kukala,
‘Mwimwi Ayahudi, mimi tsʼimi muriyenilavira sadaka
na kuniusira shuhuli yiyo myaka mirongo mine
yokala mu nyika.
43Mwimwi mwatsukula hema ra mulungu Moloki,
na chinyago chokala chinga nyenyezi ya mulungu wenu Rafani.
Vivyo vinyago vyovitengeza, ndivyo murivyovyabudu,
na gago gandanihenda nimuhende muhwalwe mateka
muphirikwe kutʼu kure kuchira mudzi wa Babeli.’
44 #
Kul 25:9, 40 “Akare ehu kuko nyika ákala ana riratʼu hema roaonyesa kukala, Mulungu wakala u phamwenga nao. Hema riro ratengezwa dza vyokala Musa ulagizwa ni Mulungu aritengeze, kutuwiriza ao mufano okala udziwona. 45#Josh 3:14-17Chisha, akare ehu áritsukula riro hema ao ukati okala analongozwa ni Joshuwa hata achendahwala yiyatʼu itsʼi yiriyo enye áuswa ni Mulungu. Na riro hema rakala phapho hata ukati wa mufalume Daudi. 46#2 Sam 7:1-16; 1 Mgu 17:1-14Daudi wamuphota Mulungu, na achimuvoya ahenzezwe ajenge nyumba yiriyo Ayahudi andamwabudu yiye Mulungu wa Jakobo. 47#1 Afal 6:1-38; 2 Mgu 3:1-17Ela nyumba yiyo, yakudzajengerwa Mulungu ni Selemani, mwana wa yiye Daudi. 48Ela hata vivyo, Mulungu Ariye Dzulu kuchira osi, kʼakala nyumba zijengwazo ni adamu. Vivi vinagwa sawa na maneno ga Mulungu gogombwa ni mugomviwe kukala,
49 #
Isa 66:1, 2 ‘Bwana Mulungu unaamba,
“Mbingu ni chihi changu cha chifalume,
na itsʼi ni phatʼu phangu pha kwikira magulu.
Ndo mundanijengera nyumba ya chidzedze?
Na hata ni lwaphi phondaoya?
50Mino samba ndimi niriyetengeza vivyo vyosi na mikono yangu!” ’ ”
51 #
Isa 63:10
Sitefano waenderera kugomba achiamba, “Mwimwi mu apingi abomu, mu atʼu mumuremao Mulungu mwenu myoyoni, na munarema kusirikisa udzumbe wa Mulungu. Mwimwi munga dza ao akare enu, na ukati wosi munarema kutuwa ga Roho wa Mulungu! 52Ao akare enu kʼaana mugomvi wa Mulungu ariye kʼaamuhenderere mauku. Na ao áaulaga hata osema udzumbe wa Mulungu dzulu ya kudza kwa yiye mwenye haki. Mwimwi namwi vino, mwamonyesa atʼu ai achimugwira, na muchimuhenda aulagwe. 53Mwimwi ndimwi ohewa Shariya ni Mulungu kuchirira malaika, ela kʼamuyituwire vyokala yinaamba!”
Sitefano unaulagwa
54Atumia a ngambi ariphosikira gago maneno gogombwa ni Sitefano, ámutsukirirwa muno hata achisaga meno. 55Ela Sitefano yiye achikala udziudzalwa ni Roho wa Mulungu. Achilola dzulu mulunguni achiona mungʼalo wa Mulungu, na Jeso wimire mukono wa kulume wa Mulungu. 56Ndo Sitefano achiamba vivi, “Aa! Mimi ninaona mbingu zifunuka, na Jeso Mutʼu yelaa dzulu wimire mukono wa kulume wa Mulungu.”
57Sitefano ariphogomba vivyo, atʼu osi okala a phapho, ápiga kʼululu muno, na achifimba masikiro gao. Chisha, osini achimutinira Sitefano chivimwenga, 58achimukuruta hata achimulavya phapho mudzini, na achanza kumupiga mawe. Ao atʼu okala álavya ushaidi ámurichira mutana aihiwaye Saulo,#7:58 Saulo kunjine unaihiwa Pʼaulo. Lola chitabu cha Mahendo kwanzira 13:9. makoti gao agamanyirire. 59Ao atʼu áenderera kumupiga mawe Sitefano, na yiye Sitefano achivoya vivi, “Bwana Jeso, riphokere roho rangu!” 60Chisha, achimitʼa mavindi achirira kwa laka ra dzulu achiamba, “Bwana, tsʼiatarire dambi riri.” Ariphomarigiza kugomba gago, achitoka roho.
Aktualisht i përzgjedhur:
Mahendo 7: CHIDUR
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr