Johana 20
20
Lufu lwa Jeso kʼalumo mbirani
(Matayo 28:1-8; Mariko 16:1-8; Luka 24:1-12)
1Ziriphochira tsʼiku mbiri bada ya kuzikwa kwa Jeso, yakala ni tsʼiku ya mwanzo wa juma ra Ayahudi.#20:1 Tsʼiku ya mwanzo wa juma ra Ayahudi ni Jumapili. Tsʼiku yiyo, Maryamu muchina Magidala warauka chiramuko dani-dani hata kucheri na dziza, achenda kuko mbirani kwa Jeso, na achendaona riro dziwe ra phapho muyangoni rakala ridziuswa. 2Ndo achikaza mairo achenda kwa Simoni Pʼetero na yuyatʼu mwanafunzi munjine yekala achihenzwa ni Jeso muno. Achendaambira kukala, “Adzilulavya mumo mbirani lulo lufu lwa Bwana, na kʼahumanya kodzikwendalwika.”
3Pʼetero na yiye mwanafunzi munjine achilaa, na achikazira kwenda kuko mbirani. 4Osi airi ákaza mairo, ela yiye mwanafunzi munjine wakala u mbere ya Pʼetero hata kuko mbirani. 5Ariphofika, wavumbama achitsungurira kuko ndani, achiona yiyatʼu sanza ya kitani, ela kʼaphenyere mumo ndani. 6Simoni Pʼetero yiye, yekala u nyumaze ariphofika tu, achiphenya kare mumo mbirani, na achiona yiyo sanza yi mumo, 7na chicho chidemu chokala chifungirwa Jeso chitswani. Chicho chidemu chakala kʼachi phamwenga na yiyo sanza, ela chakala chikunzwa, na chidziikwa kʼanda hicheye. 8Ndo yiye mwanafunzi munjine yefika phapho mbirani na chimbere, achiphenya mumo mbirani naye, achiona na achikuluphira. 9(Maana, hata phapho, ao ákala kʼaadzangwe kumanya kulaa mumo Maandikoni kukala, ni seti afufuke kulaa kuzimu.)
Jeso unamulairira Maryamu muchina Magidala
(Matayo 28:9-10; Mariko 16:9-11)
10Ndo ao anafunzi airi achikulaa kuko, achiuya kwao midzini.
11Ela Maryamu yiye waima konze ya yiyo mbira achikala unarira. Chisha, achivumbama na kuno unarira vivyo, achitsungurira mumo mbirani, 12na achiona malaika airi a Mulungu okala ana mavalo meruphe asegere pholazwa lufu lwa Jeso, mumwenga upande wa chitswani, na yiye munjine upande wa maguluni. 13Ao malaika achimuuza vivi, “Urizwa nini mayo?” Maryamu achiaudzidza achiaamba, “Aa, nirizwa ni kukala adziluhwala lufu lwa Bwana wangu, na hata tsʼimanya kodzikwendalwika.” 14Unamarigiza kugomba gago, wagaluka na achiona mutʼu wimire phapho, ela kʼamumanyire kukala ni Jeso. 15Jeso achimuuza vivi, “Urizwa nini mayo? Na ni ani yiye umutsakulaye?” Maryamu achiona kukala, yiye ni mutsunzi wa phapho kadzundani. Ndo achimwamba, “Mutumiangwa, uchikala ndiwe yedziluhwala, nambira kodzikwendalwika nikaluhwale.” 16Jeso achimwiha, “Maryamu!” Naye Maryamu achigaluka, na achigomba kwa Chiburania achiamba, “Raboni!” yaani “Mwalimu!” 17Jeso achimwamba “Richa kunigwira, mana, mimi tsʼenda dzulu kwa Baba Mulungu vivi kare. Ela enda kuko kwa enehu ukaambire kukala, ‘Ni phephi na kwenda dzulu kwa Baba, ariye ni Abayenu hata mwimwi, kwa Mulungu wangu, ariye ni Mulungu wenu hata mwimwi.’ ”
18Ndo Maryamu muchina Magidala achendaambira aratʼu anafunzi kukala, “Asenani, mimi nidzimona yiye Bwana!” Na chisha achiapʼa uo udzumbewe.
Jeso unaalairira anafunzie kumi
(Matayo 28:16-20; Mariko 16:14-18; Luka 24:36-49)
19Tsʼiku yiyo ya kwanza ya riro juma bee dziloni ya kausiku, anafunzi a Jeso ákala arundikana nyumbani, na kuno nyuvi zisindikwa kwakukala, ákala ni aoga na vilongozi a Ayahudi. Ndo achihendamona Jeso wimire kati-kati yao kare tu, na achiaamba, “Enehu, kalani na reri!” 20Ariphomarigiza mulamuso uo, waaonyesa maganjage, na phapho mbavuni kwa amumanye kukala ndiye. Ndo ao anafunzi achihamirwa muno kwa kumona Bwana.
21Jeso achiaamba vivi kahiri, “Kalani na reri! Mimi ninamuhuma dza viratʼu Baba Mulungu arivyonihuma.” 22Na ariphogomba gago, waavivira pʼumuzi, na achiaamba, “Phokerani Roho wa Mulungu. 23#Mat 16:19; 18:18Muchisamehe dambi za mutʼu yeyosi, zizo zisamehewa, na yeyosi ariye dambize kʼamuzisamehe, zizo kʼazisamehewa.”
Jeso na Tʼomasi
24Tʼomasi, mumwenga wa aratʼu kumi na airi, (ariye wihiwa Pʼatsa), wakala kʼapho ukati Jeso ariphoalairira aratʼu anzie. 25Ndo Tʼomasi ariphouya, aratʼu anafunzi anzie ámwamba, “Aa! Tʼomasi, siswi hudzimona Bwana!” Ela Tʼomasi achiaudzidza achiaamba, “Mwi asena, mino bee paka nihendemona yiye Jeso mwenye, na hata nimukumbe mumo mwakwe maganjani mokotwʼa misumari, na phapho phakwe mbavuni phodungwa fumo, hʼaya ndo nikuluphire. Ela photsʼikala vivyo, hʼa-a tsʼindakuluphira mino.”
26Yiriphofika tsʼiku ya nane, ao anafunzi a Jeso ákala arundikana phamwenga kahiri mumo ndani, na Tʼomasi wakala u mumo tsʼiku yiyo. Nyuvi zakala zifungwa vivyo, ela achihendamona Jeso u kati-kati yao kare kahiri, na achiaamba, “Enehu, kalani na reri!” 27Chisha achimwamba Tʼomasi, “Tʼomasi, bandika chalacho mumu mwangu maganjani mokotwʼa misumari, chisha golosa mukonoo ubandike phano mbavuni phodungwa fumo. Na richa kura kutsʼakuluphirako, ukuluphire!” 28Tʼomasi achiudzidza achiamba, “Aa! Bwana wangu na Mulungu wangu!” 29Jeso achimwamba, “Ii, udzikuluphira vino kwakukala, udzinona? Bee, baha ao akuluphirao photsʼi kona.”
Lengo ra chitabu chichi
30Jeso wahenda dalili za kwangalaza zinjine nyinji mbere zehu siswi anafunzie, zirizo kʼazandikirwe mumu chitabuni. 31Ela gaga gadzandikwa kwa hata mukuluphire kukala Jeso ndiye yiye Kʼirisito, Mwanangwa wa Mulungu, na kwa kukuluphira, mupate uzima uphya wa kare na kare kwa dzinare.
Aktualisht i përzgjedhur:
Johana 20: CHIDUR
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr