Luka 16
16
Tʼadi ya karani mukorofi
1Jeso waambira anafunzie tʼadi yiyi: “Pʼindi kwakala kuna tajiri mumwenga yekala una karaniwe wa kwimirira miyoye. Yiye tajiri achitsunirwa ni atʼu kukala, yiye karaniwe wakala unamwiyira miyoye. 2Ndo yuyatʼu tajiri achimwiha achimwamba, ‘Atʼu anaamba unaniiyira uwe! Sambi, lavya isabu yosi ya pʼesa zopata na zohumira, mana, uwe kʼwidima kukala karani wangu kahiri.’ 3Yiye karani achaza mwakwe moyoni achiamba, ‘Tajiri wangu unanifuta kazi yangu ya ukarani, nindahendadze mino? Kala ni kwendarima tsʼiidima, na kwendavoya-voya dza achiya ni waibu. 4Ela nidzimanya ra kuhenda vivi kwa hata nichifutwa kazi, atʼu akale ananimanya ni mutʼu mudzo, na hata anipige karibu mwao midzini.’ 5Ndo achanza kwaiha adeni a tajiriwe mumwenga-mumwenga. Achimuuza yiye wa kwanza, ‘Wiswani ni tajiri wangu we?’ 6Yiye achimuudzidza achimwamba, ‘Ninaiswa madiramu gana mwenga ga mafuha.’ Yiye karani achimwamba, ‘Nindakuphunguzira mino, hwala risiti ya isabuyo usagale wandike maruru madiramu mirongo mitsano.’ 7Achimuuza mudeni wa phiri, ‘We nawe unaiswani?’ Yiye achimuudzidza achimwamba, ‘Ninaiswa magunia gana mwenga ga nganu.’ Yiye karani achimwamba, ‘Uwe nawe nidzikuphunguzira vivyo, hwala risiti ya isabuyo wandike magunia mirongo minane.’
8“Ndo yiye tajiri achimulika yiye karani yekala tsʼi mwaminifu, mana, wahenda kaziye na akili. Na bee, ataifa anahenda maneno gao na akili kuriko atʼu ario mwangani.
9“Ndo ninamwambira mino, humirani miyo yenu chividzo muriyo nayo phapha duniani, kwa hata atʼu amugwire usena, na chisha yichisira miyo yiyo, mwende mukaphokerwe mulunguni, kuriko uzima kʼauna musindikizo. 10Mutʼu achikala mwaminifu kwenye maneno madide-madide, undakala mwaminifu hata na mabomu, ela mutʼu atsʼiphokala mwaminifu kwenye maneno madide-madide, kʼandakala mwaminifu vivyo hata kwenye maneno mabomu. 11Ndo muchikala mwimwi kʼamundakala aaminifu na uu utajiri wa phapha duniani, bee kʼamundaaminiwa hata na o utajiri wa jeri wa mulunguni. 12Na muchikala kʼamudzangwe kukala aaminifu na miyo yiriyo tsʼi yenu, bee kʼamundahewa hata yo yenu.
13 #
Mat 6:24
“Kʼakuna muhendikazi aidimaye kwahikirahikira matajiri airi ukati umwenga. Maana, mumwenga undamutsukirirwa na munjine amuhenze, hebu undamusirikisa mumwenga, na yiye munjine amuphurye. Ndo kʼamwidima kumuhikirahikira Mulungu na pʼesa.”
Mafunzo ga Jeso
(Matayo 11:12-13; 5:31-32; Mariko 10:11-12)
14Afarisayo ariphosikira gago gosi, ámuphurya Jeso, kwakukala, ákala anahenza pʼesa muno. 15Ela Jeso yiye achiaamba, “Mwimwi munadzihenda mu adzo mbere za atʼu, ela Mulungu unayimanya myoyo yenu. Maana, chiratʼu chionewacho ni atʼu china mana, kwa Mulungu ni tsukizo.
16 #
Mat 11:12, 13 “Shariya ya Musa na Maandiko ga agomvi a Mulungu, gáenderera hata ukati Johana Mubatizi ariphokudza. Na kwanzira ukati wa Johana, Nguma Mbidzo ya Ufalume wa Mulungu, yichanza kusumurirwa, na chila mutʼu unahenda vyakwe aidimavyo kwa hata akubaliwe kukala mutʼu wa Mulungu. 17#Mat 5:18Ela hata vivyo, ni utʼu udide kwa mbingu na dunia kukala na musindikizo kuriko kufutwa kadona kamwenga ka Shariya.
18 #
Mat 5:32; 1 Akor 7:10, 11 “Chila amurichaye muchewe na kuhwala munjine unazinga tu, na ahwalaye muche yerichwa ni mulume unazinga vivyo naye.”
Tʼadi ya tajiri na muchiya Lazaro
19Jeso waenderera kugomba achiamba, “Kwakala tajiri mumwenga yekala achivala nguwo za gali za rangi ya zambarawe na ya kitani, na mazagazige gákala ni ga raha tsʼiku zosi. 20Na chisha, kwakala kuna muchiya mumwenga aihiwaye Lazaro, yekala una vironda mwiri wosi, na wakala achilazwa muhalani pha yiye tajiri. 21Ndo Lazaro wakala achaza ahewe hata kumba ni zo pʼukupʼuku zokala zichigwa tsʼini ya meza ya yiye tajiri, na dzulu ya gago, madiya nago gákala gachidza gachilamba vivyo virondavye!
22“Ndo Lazaro wakudza achifa, na malaika a Mulungu achihwala rohoye yichendasagala mulunguni phephi na Burahemu.#16:22 Chiyunani chinaamba: chilagani pha Burahemu. Yuyatʼu tajiri naye achifa, achizikwa, 23na rohoye yichenda kuzimu kuriko wakwendaturika muno, hata achiriyariya na achimona Burahemu kwa kure na Lazaro u phapho phephi naye. 24Ndo achiiha kwa laka ra dzulu achiamba, ‘Baba Burahemu, nonera mbazi, na muhume Lazaro atobe hata kumba ni lo lukombelwe madzini, adze anitenezerwe mulomoni, mana, ninaturika muno mimi phapha mohoni.’ 25Ela Burahemu achimuudzidza achimwamba, ‘We baye unamanya uriphokala u duniani, wasagala mazagazi ga raha, ela Lazaro yiye achikala urichirwa kusirima. Ndo vivi Lazaro naye unarya raha phapha, ela we nawe sere jibaro usirime. 26Chisha, tsʼi gago hicheye tu, ela phátsimbwa bopʼo bomu pho kati-kati yehu na mwimwi, kwa hata ahenzao kudza kuko kwenu kulaa kuku kwehu atsʼiidime, na a kuko kwenu atsʼiidime kudza kuku kwehu.’ 27Yuyatʼu yekala tajiri achiamba, ‘Bee chisha ninakuvoya vivyo Baba, umuhume Lazaro ende kwehu, 28mana, nina enehu atsano kuko. Ndo naaende akaambire atye, atsʼidze akadza kuku sheneneni.’ 29Ela Burahemu yiye achimwamba, ‘Kuna Musa na agomvi a Mulungu a kwaambira nduguzo atye. Ndo o nduguzo anahenzwa asirikise gago gagombwago ni ao tu.’ 30Ela yiye achiamba, ‘Baba Burahemu kʼavitosha vivyo! Kala mutʼu ni kufufuka kulaa kuzimu akendaambira, phapho ndipho nikutya.’ 31Burahemu yiye achiamba, ‘Achikala kʼaandamusikira Musa na agomvi a Mulungu, bee hata mutʼu akafufuka kulaa kuzimu, chisha o kʼaandakwendamusikira vivyo.’ ”
Aktualisht i përzgjedhur:
Luka 16: CHIDUR
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr