Sáŋa 11
11
Yésusu a á fúfúné ugúle bɛhɛ́ Lasáalɛ
1Mɔtɔ ummue ufíno yɛ́hɛ́ Lasáalɛ, o obamɔ́ na ogɔ́nɔ́ɔ. A mbá lɛ́ a gɛ́ga naá gɛdɔŋɔ gá Beteníi, olɔŋɔ na bolimóní bɛ́hɛ́ bá bakɔ́dɔ báaba bá lɔ́mɔ́ Malɛ́a na Mááta.
2Malɛ́a moánɛ mɔ́ɔnyɔ mɔ́ɔ a mbaá fúé Yésusu alabɛ́nda go bɛgɔ́ndɔ́, a báá bɛ́ fúúnée na cóɛ sɛ́hɛ́. Ondimóní Lasáalɛ, mɔ́ɔ a mbaá lɛ́ a nóma.
3Bolimóní bá bakɔ́dɔ go dómɛna Yésusu cɔ́mɔ bá amɔ́: «Daadáa ugúle bahɔ a nóma.»
4Aŋa Yésusu a mbɔɔ́ ɔ́bɔ́ cɔ́mɔ yɛ́ɛyɔ, gɛ́hɛ́ go gálɛda a amɔ́: «Ogɔnɔ́ yá Lasáalɛ yɔ́ɔyɔ yó do gaá mo óná. Yó lɔ́mɔ́ go go dúfie bogaaga bá Asaŋa. Gɔnɔ́ bá gúmidie Moɔnɔ́ ba Asaŋa a.»
5Yésusu a mba lɛ́ a maamana Mááta na ondimóní Malɛ́a, na Lasáalɛ kɛ́. 6Kanɛ́ akɛ́ aŋa a mbíi íyime goŋaá Lasáalɛ a nóma, gɛ́hɛ́ go gɔnɔ dúmbie medúgú máandɛ́ tisi naá hoóma háaha a mbaá lɔ́mɔ́ hɔ́ɔ. 7Naá nnyimé hɔ́ɔlɔ́ kanɛ́, gɔ́ɔ o oyanamɔ́ behúúní bɛ́hɛ́ a amɔ́: «Ŋgáa dɛ no gunde naá Yudée.» 8Behúúní bɛ́hɛ́ go mo gundie bá amɔ́: «Eléébi, medúgú kanɛ go béfíidie, Beyúdene bá báá fúmbée go go óna na adánɛ́, gɔ́ɔ o lɔ́mɔ́ go a amɔ́ o gɔnɔ gunde hɔ́ɔ o?» 9Yésusu go bó oyana a amɔ́: «Ábɔ, buisí bó do bɛanánáa bigúlí bɛ́ɔ́dɔ́ na bɛ́andɛ́ o? Aáŋa mɔtɔ ɛ ɛnda sisíi, a dɛ bósó go kúkenene, goakɛ́ ɛ ɛ́nana gise gá cí yɛ́ɛyɛ. 10Kanɛ́ aáŋa ɛ ɛnda na budúgú, a kúkenene, goakɛ́ a dɛ báá na gise.»
11Naá nnyimé ya dogálɔ dɔ́ɔdɔ, Yésusu go gidene a amɔ́: «Ugúle bɛcɔ́ Lasáalɛ a lɛ́ go dɔnɔ́ɔ, kanɛ́ ŋgɛ́danamɔ́ go go ɛ́da mo foyona.» 12Behúúní go mo oyana kanɛ́ bá amɔ́: «Daadáa, aáŋa a lɛ́ go dɔnɔ́ɔ, a geé éŋúgé.» 13Yésusu a mbaá lɔ́mɔ́ o oyanɛna behúúní bɛ́hɛ́ nigúe ná Lasáalɛ, kanɛ́ bɔ́ɔ, bá béeniŋenye goŋaá bó lɔ́mɔ́ dɔnɔ́ɔ mammana. 14Gɔ́ɔ Yésusu a bó ádɛnamɔ́ pasɛ́pasɛ́ a amɔ́: «Lasáalɛ a lɛ́ ugúe. 15Ŋgɔ́bɔnɔ bese makɔ́nɔ́ go busío bɛ́nyɔ́ aŋa gɔ́ɔgɔ bó mbaá bádómbánáa yɔmɔ́ɔ kanɛ hɔ́ɔ, hɔ́ɔlɔ́ gɔ́ɔ no gaá ná ágá odɛ́má yɛ́nyɔ́ naá yɔmɔ́ɔ. Kanɛ́ ŋgáa dɛ no ɛ́da anáa a lɔ́mɔ́.» 16Tómasɛ, mɔ́ɔnyɔ bá gɔnɔmɔ́ dɔ́ŋɔnɔ bá amɔ́ Moɔnɔ́ ba ɛbáasa, o oyanamɔ́ behúúní báaba bóncodío a amɔ́: «Ŋgáa dɛ no ɛ́da tɔ́nɔ, dɛ gúenye olɔŋɔ na Iloodio.»
17Yésusu ɛ ɛ́da bola, go gíde goŋaá bá mba miée Lasáalɛ, a ná lɛ́ medúgú ménni. 18Aŋa Beteníi a lɔ́mɔ́ a dɛ ɔmpɔ́nɛ́nɔ́ɔ na Yolósalɛmɛ, boóma bá go húme ba kílo mɛ́da bádadɔ́, 19gɔ́ɔ gɛca gá Beyúdene gɛ́ mbuú úlénée naá nnyaŋá ya Mááta na Malɛ́a go go nco bó folofolio go nigúe ná ondimóní bábɔ́.
20Mááta ɔ ɔ́ ɔ́bɔ́ goŋaá Yésusu a ná lɛ́ go pɛ́, gɛ́hɛ́ go fadɛgɛna go go ɛ́da mo gólio; Malɛ́a, mɔ́ɔ a báá síéné naá nnyaŋá. 21Mááta go oyana Yésusu a amɔ́: «Daadáa, aáŋa o mba lɛ́ hɔ́ɔ, gásɛ́ ondimóní bamɛ a lɛ́ kanɛ go gúe. 22Kanɛ́ akɛ́ godɔ́ɔdɔ, ŋgíyimene goŋaá buimée bɔ́ɔbɔ o gaá nú úhúné Asaŋa, a gaá go fáá.» 23Yésusu a amɔ́ gɛ́hɛ́ aá: «Tɛ́ɔbɛnɔ a gaá fúfúgé.» 24Mááta go gundie a amɔ́: «Ŋgíyimene caá a ŋga fúfúgé naá kúme gɛbɛ́láa ya begúe, buisí bá mesúgidinye#11.24 Go ɛ́na naá Déniele..»
25Yésusu go mo oyana a amɔ́: «Ndɛ́ kúme gɛbɛ́láa, yɔmɔ́ɔ gɔnɔ́ gɛɔyɔ. Mɔ́ɔnyɔ a ágamɔ́ odɛ́má yɛ́hɛ́ naá yɔmɔ́ɔ a ŋgɔ ɔyɔ́ɔ, akɛ́ a gúe. 26Gɔnɔ́, uŋkimée mɔ́ɔnyɔ ɔ ɔyɔmɔ́ a gunde a ŋgolimonyo a dɛ ŋgá bóso go gúe. Go olimonyo nɔ́ɔnɔ o?» 27Mááta a amɔ́: «Ɛɛ́ɛŋ Daadáa, ŋgolimonyo goŋaá o lɛ́ Mesíi, Moɔnɔ́ ba Asaŋa, mɔ́ɔ mɔ́ɔnyɔ a mbaá lɛ ba go úle naá cí.» 28Naá nnyimé ya dogálɔ dɔ́ɔdɔ, Mááta go fadɛgɛna go go ɛ́da dɔ́ŋɛnɔ ondimóní Malɛ́a, a báá mo oyáná naá udúu a amɔ́: «Iloodio a lɛ́ héení, a go dɔ́ŋɔnɔ.»
29Malɛ́a ɔ ɔ́bɔnɔ cɔ́mɔ yɛ́ɛyɔ, go dómba go fadɛgɛna, go ɛ́da anáa Yésusu a mbaá lɔmɔ́.
30Yésusu a mba ŋá a gá lɛ́ go pɛ́ kanɛ go íŋene naá gɛdɔŋɔ, kanɛ́ a mbaá ŋá a gá lɛ́ naá hoóma háaha Mááta a mbaá ncó mo gíde hɔ́ɔ. 31Aŋa Beyúdene báaba bá mbaá lɛ naá nnyaŋá na Malɛ́a go go mo foloofolio, bá mbaá mo ɛ́ná a báá gaŋányɛ́dá go fadɛgɛna go go húme, gáábɔ́ go mo biene. Bá mba lɛ́ bá béeniŋenye bá amɔ́ ɛ ɛ́danamɔ́ naá gɛbɛ́lá go go baŋa. 32Aŋa Malɛ́a a mbaá ncó bola naá hoóma háaha Yésusu a mbá lɔmɔ́ hɔ́ɔ, u úle a mo ɛ́nana, go dómba go mo obɛna naá bɛgɔ́ndɔ́ a amɔ́ gɛ́hɛ́ aá: «Daadáa, aáŋa o mba lɛ́ hɔ́ɔ, gásɛ́ ondimóní bamɛ a lɛ́ kanɛ go gúe.» 33Yésusu ɛ ɛ́nana Malɛ́a na Beyúdene báaba bá mbaá lɛ bá mo díligenene bá baŋa, nnyɔ́dɔ yɛhɛ́ go sagɛmɛda, odóɛ yɛ́hɛ́ yó báá bógólɛ́dá. 34Gɛ́hɛ́ go úhune a amɔ́: «No lɔ́mɔ́ mo miéelú áhanɛ́ɛ o?» Batɔ go mo gundie bá amɔ́: «Daadáa u úle ncó go ɛ́na.» 35Gɔ́ɔ Yésusu a dúmbugemú na mbií. 36Beyúdene go ɛ́da go oya bá amɔ́: «Éé! Ɛ́ná nɔnɔ mbɔ́dɔ yɛ́ɛyɛ a á lɔmɔ́ a maamana Lasáalɛ.»
37Kanɛ́ bóncodío naá olɔŋɔ yábɔ́ bá amɔ́: «A lɛ́ fuunéelú ugélígeli oŋgíso, a dɛ á gá lɛ́ bá go ŋa goŋaá Lasáalɛ a dɛ gúé o?»
38Gɔ́ɔ nnyɔ́dɔ ya Yésusu ɛ gɔnɔmɔ́ sagɛmɛda, gɛ́hɛ́ go ɛ́da naá gɛbɛ́lá. Bó mba lɛ́ gikeŋgúlu gindígénéelú na ɛdánɛ́#11.38 Go ɛ́na naá Mot 27.60; Mél 15.46; Lók 24.2.. 39Yésusu go oyɛda a amɔ́: «Úlíe nɔnɔ ɛdánɛ́ nɛ́ɛnɛ.» Mááta, ondimóní ba gɛlɔ́ŋɔ́ɔ, go oyana Yésusu a amɔ́: «Daadáa, a ná lɛ́ go numpe, goakɛ́ medúgú ménni mámáa aŋa bá lɔ́mɔ́ mo miéelú.» 40Kanɛ́ Yésusu go mo gundie a amɔ́: «Mbáa go oyana caá aáŋa go olimonyo, o gɛɛ́ ɛ́ná nigúmi ná Asaŋa.» 41Batɔ go úlie ɛdánɛ́ gɔ́gɔ́ɔ. Yésusu go fediginye oŋgíso go mmoɛná, go gálɛda a amɔ́: «Baaba, ko béhiigi go gɔ́ɔgɔ o ŋgɔ́bɔmɔ́. 42Mammana, ŋgíyimene caá o ŋgɔ́bɔnɔ bɛcamɛna biimée, kanɛ́, kálagalamɔ́ nɔ́ɔnɔ go busío bá gitúu gá batɔ gɛ́ɛgɛ naá boayá bámɛ gɛ́ɛgɛ, go goŋaá bó oliminyo bá amɔ́ o mba tómá.» 43Naá nnyimé ya dogálɔ dɔ́ɔdɔ, gɛ́hɛ́ go áncɛda na ukelú ogɔ́nɔ́ a amɔ́: «Lasáalɛ, húme!» 44Lasáalɛ go húme, bɛgɔ́ndɔ́ na ɛmbɔ́gɔ méŋínényé méŋínényé na biseli bá nnɔ́mbɔ́, busío boáalú na sanda ya gɛla. Yésusu go oyana batɔ a amɔ́: «Mo fulúnéemú nɔnɔ, no mo dɛ́ɛna ɛ ɛ́da!»
Bagɔ́nɔ́ɔ bá Beyúdene bá á gedíe go óna Yésusu
(Mot 26.1-5; Mél 14.1-2; Lók 22.1-20)
45Gitúu naá olɔŋɔ yá Beyúdene báaba bá mbaá lɛ úléelú naá Malɛ́a, gɛ́ mbɛ ɛ́ná bɔ́ɔbɔ Yésusu a mbaá ŋaáa, gɛ́ báá ágá odɛ́má yábɔ́ naá Yésusu. 46Kanɛ́ bóncodío go ɛ́da gíde Befelisiéŋe, go bó oyanɛna bɔ́ɔbɔ Yésusu a mbaá ŋaáa. 47Bagɔ́nɔ́ɔ bá bedúmbí bɛbáágá naá Asaŋa na Befelisiéŋe go lukumenye nɛgála nɛgɔ́nɔ́ go oyɛda hɔ́ɔ bá amɔ́: «Dɛ gaá ná no ŋaáa nɛɛ́nɛ o? Mɔtɔ mɔ́ɔnyɔ a ŋanana gɛcɛcá gá bieninye bá gobékúke!» 48«Dɛ amɔ́ dɛ mo dɛ́ɛna a dúmbenye náana, batɔ biimée bá gaá ágá odɛ́má yábɔ́ naá mɔ́ɔ, manɛ́ kanɛ́ Balomɛ́ŋɛ ba gaá ná ncó gaŋɛmɛda, bá gada Nnyaŋá ya Asaŋa yɛcɔ́, bá fúugie gɛdɔŋɔ gɛ́cɔ́.» 49Ummue naá olɔŋɔ yábɔ́, ufíno yɛ́hɛ́ Keyífe, a mba lɛ́ Ufuŋe yá bedúmbí bɛbáágá naá nnyómá moánɛ, go oyɛda a amɔ́: «No do ɔ́bɔ́nɔ́ɔ boóma. 50No do ɛ́nánáa no amɔ́ bó lɛ́ bese go busío bɛ́nyɔ́ go goŋaá mɔtɔ táŋɛ́ ummue a gúe go boɛ́nɔ, nɔ́ɔnɔ gɛdɔŋɔ giimée gɛ́ dɛ fúé o?» 51A dɛ mbá gálɛda nɔ́ɔnɔ go mɔ́ɔ moatɛ́, kanɛ́ aŋa a mbaá lɛ Ufuŋe yá bedúmbí bɛbáágá naá nnyómá moánɛ, gɔ́ɔ a mbaá gálɛ́dá dogálɔ dá mbúsí dɔ́ɔdɔ go goŋaá Yésusu a háanana go gúe go gɛdɔŋɔ; 52caá akɛ́ goana go gɛdɔŋɔ gɛ́hɛ́, kanɛ́ go go bándɛgɛna baaná bá Asaŋa báaba bá lɔ́mɔ́ sálámándáalú naá cí iŋkimée hoóma táŋɛ́ hémmue. 53Buisí moánɛ bɔ́ɔbɔ bɔ́, bagɔ́nɔ́ɔ bá Beyúdene bá gediemú go óna gá Yésusu. 54Naá bɛ́hɛ́ boayá, Yésusu go békile go gɔsɔ a bólɛga naá oŋgíso yá Beyúdene. Kɔ́ɔ a bɔ́gɔ́gɛdɔmɔ́ na behúúní bɛ́hɛ́ naá gigísi gá cí mekúígíi na giolóo gá bodɛ́agadɛ́, naá tɛ́sɔnɔ yɛ́ɛyɛ bá dɔ́ŋɔnɔ bá amɔ́ Efelehíme.
(Mot 26.6-13; Mél 14.3-9; Lók 7.36-38)
55Gibíné gá Pásɛ́ka ya Beyúdene gɛ́ mbaá ŋá gɛ́ ná lɛ́ mekúígíi; gitúu gá batɔ bá gɛdɔŋɔ go ɛ́da naá Yolósalɛmɛ otóotoɛ yá gibíné go go básogona. 56Bá mba lɛ́ bá fúmbe Yésusu; bɔ́ɔ naá Nnyaŋá ya Asaŋa gadɛ́ɛ, bá bágálɛnagalɛna bá amɔ́: «Go goɛ́na gɛ́nyɔ́, a guú úlé naá gibíné lí a dɛ guú úlé o?»
57Bagɔ́nɔ́ɔ bá bedúmbí bɛbáágá naá Asaŋa na Befelisiéŋe, bá mba fáá bɛlɔsɛnɔ bá amɔ́ mɔtɔ mɔ́ɔnyɔ a gaá ní íyímé anáa Yésusu a gaá ná bɛ́ɛ́mbá, a háanana go dóogio goŋaá bá mo gumbene.
Aktualisht i përzgjedhur:
Sáŋa 11: YAS
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr