Lókasɛ 23
23
Yésusu a á dɛ́lɛ́mɛ́ná naá busío bá Pɛlátɛ
(Mot 27.2,11-14; Mél 15.1-5)
1Gɔ́ɔ batɔ bá Nɛgála nɛgɔ́nɔ́ bá fadɛgɛnamɔ́ biimée, go ɛ́da na Yésusu naá Pɛlátɛ. 2Gáábɔ́ go ɛ́da go mo sɔ́mɛnɔnɔ bá amɔ́: «Dɛ mba huenyée mɔtɔ mɔ́ɔnyɔ a búlumuncenye gɛdɔŋɔ, o oyanɛna batɔ a amɔ́, bá dɛ soáa tásɛ ya Sɛsáalɛ, a gɔnɔ béfínenye a amɔ́ a lɛ́ Mesíi, a lɛ́ ufuŋe.» 3Pɛlátɛ go mo úhune a amɔ́: «O lɛ́ ufuŋe yá Beyúdene lí?» Yésusu go mo gundie a amɔ́: «Go ó oyɛ́dá#23.3 Go ó oyɛ́dá : go ɛ́na Mot 27.11 na gibélincígínyé gɛ́ɛgɛ hɔ́ɔ..» 4Pɛlátɛ go oyana bagɔ́nɔ́ɔ bá bedúmbí bɛbáágá naá Asaŋa na gitúu gá batɔ a amɔ́: «Cɛ ɛ́nánáa boóma bɔ́ɔbɔ bó lɔ́mɔ́ bá go ubie mɔtɔ mɔ́ɔnyɔ na gɛsɛnɛ.» 5Kanɛ́ bɔ́ɔ go dɛ́mbɛga bá amɔ́: «A búlumuncenye gɛdɔŋɔ na gohúunenye gɛ́hɛ́. A mba bayɛ́gá naá Gelilée, a báá bááká naá Yudée uŋkimée, gɔ́gɔ́ɔ godɔ́ɔdɔ a ná lɔ́mɔ́ háalá.»
Yésusu a á dɛ́lɛ́mɛ́ná naá busío bá Elóode
6Aŋa Pɛlátɛ a mbɔɔ́ ɔ́bɔ́ dogálɔ dɔ́ɔdɔ, a báa lɛ gó úhune a amɔ́: «Mɔtɔ mɔ́ɔnyɔ a lɛ́ ba Bégelilée o?» 7Aŋa a mbɔɔ́ ɔ́bɔ́ goŋaá Yésusu ɛ ɛ́da go úlene naá gigísi ga cí gɛ́ɛgɛ Elóode a mbaá lɛ ufuŋe hɔ́ɔ, gɛ́hɛ́ go mo dómɛna Yésusu, goakɛ́ Elóode moánɛ a mba lɛ́ tɔ́nɔ naá Yolósalɛmɛ medúgú moánɛ mɔ́ɔmɔ. 8Gɔ́ɔ Elóode ɔ ɔ́bɔmɔ́ bese makɔ́nɔ́ aŋa a mbɛɛ́ ɛ́ná Yésusu, goakɛ́ a mba lɛ́ na ncaná ya go mo ɛ́na fueké go moóma mɔ́ɔmɔ a mbɔɔ́ ɔ́bɔ́ bó oya go busío bɛ́hɛ́. A mba lɛ́ a béeniŋenye goŋaá a gɛɛ́ ɛ́ná Yésusu a ŋa gɛsɛɔ. 9A báa lɛ gó mo úhune gɛca gá ŋgúhune, kanɛ́ Yésusu go mo obɛna gɛmámɔ́. 10Bagɔ́nɔ́ɔ bá bedúmbí bɛbáágá naá Asaŋa na muloodio má gicele bá mba lɛ́ hɔ́ɔ, bɛ́ ɛ́dana naá busío na go sɔ́mɛnɔnɔ Yésusu na bogaaga. 11Elóode na bisimbi bɛ́hɛ́ go ɛ́da go mo hɔnɔ, bá mo fánɛnafanɛna, bá báá mo ágá gɛmbɛ́lɛŋɛnyɛ gá gɛla, bá báa lɛ gó mo gundie naá Pɛlátɛ. 12Cóá, Pɛlátɛ na Elóode ba mba lɛ́ babɛlɔ́bɛlɔ, buisí moánɛ bɔ́ɔbɔ, bá bɛ́ɛ́ ɛ́yá begúle.
Bá á sómbá goŋaá bó óna Yésusu
(Mot 27.15-26; Mél 15.6-15; Sáŋ 18.39-40; 19.4-16)
13Gɔ́ɔ Pɛlátɛ a dɔ́ŋɛnɔmɔ́ bagɔ́nɔ́ɔ bá bedúmbí bɛbáágá naá Asaŋa, mefuŋe na boɛ́nɔ, 14a amɔ́ gáábɔ́ a amɔ́: «No á ŋgúléné na mɔtɔ mɔ́ɔnyɔ no amɔ́, a búlumuncenye gɛdɔŋɔ. Yɔmɔ́ɔ ŋgaá mo bidée naá oŋgíso yɛ́nyɔ́, cɛ á gá ɛ́ná boóma bɔ́ɔbɔ a háananamɔ́ na gɛaŋɔ́ go bɔ́, naá moóma mɔ́ɔmɔ no mo sɔ́mɔnɔmɔ́ go mɔ́. 15Akɛ́ Elóode a lɛ́ kanɛ go ɛ́na boóma, goakɛ́ a á có mo gundínyée. Náana, mɔtɔ mɔ́ɔnyɔ a lɛ́ kanɛ go ŋa gɛoba gɛ́ɛgɛ a háananamɔ́ go gúe go gɛ́. 16Kaá ŋaáa kanɛ́ goŋaá bá mo sóala bɛságɔ, naá nnyimé, ndɛ go mo dɛ́ɛna.» [17Naá gibíné gá Pásɛ́ka ya Beyúdene giimée, Pɛlátɛ a mba lɛ́ a húmenye mɔtɔ ummue naá ncíbo ya gɛaŋɔ́.]
18Batɔ biimée go ɛ́da go ánca bá amɔ́: «Óná mɔtɔ mɔ́ɔnyɔ, o có húminye Balábasɛ.» 19Balábasɛ mɔ́ɔnyɔ a mbo óná mɔtɔ gɛcamɛna gɛ́ɛgɛ ologodo a mboó obá naá tɛ́sɔnɔ, boóma moánɛ bɔ́, a mbaá lɔmɔ́ naá ncíbo ya gɛaŋɔ́. 20Aŋa Pɛlátɛ a mbaá lɔmɔ́ a lɛ́galɛga go húmie Yésusu, gɛ́hɛ́ go gɔnɔ gálɛda gitúu gá batɔ. 21Kanɛ́ batɔ go ɛ́da go ánca bá amɔ́: «Mo gilénéemú naá kolósi! Mo gilénéemú naá kolósi!» 22Pɛlátɛ kanɛ́ go úhune gitúu gá batɔ go oŋɛndɔ yá gádadɔ́ɔ a amɔ́: «Kasɛ́á gɛgáda gá boóma a á ná ŋaáa kanɛ́ o? Cɛ á gɛ́ ɛ́ná boóma bɔ́ɔbɔ a háananamɔ́ na nigúe go bɔ́. Kaá ŋaáa goŋaá bá manɛ mo sóala bɛságɔ, naá nnyimé hɔ́ɔlɔ́, ndɛ go mo dɛ́ɛna.» 23Kanɛ́ bɔ́ɔ go ɛ́da go éleninye, bá ánca bá amɔ́, ŋgáa a gilene Yésusu naá kolósi. Gɛánca gábɔ́ go mánɛgɛna. 24Pɛlátɛ go sómba goŋaá a hóogio ŋgɔŋɛnɔ yabɔ́. 25Gɔ́ɔ a húmiemú mɔ́ɔnyɔ a mbaá lɔmɔ́ naá ncíbo ya gɛaŋɔ́ go busío bá ologodo na ŋgónana, mɔ́ɔnyɔ bá mbaá lɔmɔ́ bú úhene; naá Yésusu, a báá bó íŋéné goŋaá bá ŋa nɛhɛ́ aŋa bá lɛ́galɛgamɔ́.
Bá á giléné Yésusu naá kolósi
(Mot 27.32; Mél 15.21)
26Bá ná lɛ́ go húmene na Yésusu naá tɛ́sɔnɔ, gáábɔ́ go lumene na mɔtɔ ufíno yɛ́hɛ́ Símono, ba tɛ́sɔnɔ ya Siléene, ɛ ɛ́ ɛ́da go úlene naá ntɛ́mɛ́; bisimbi go mo yɔkɛnɔ bɛ́ báá mo dóɛ́gɛ́ná kolósi, a síene ɛnda na yɛ́ naá nnyimé ya Yésusu. 27Gɛcɛcá gá batɔ na bakɔ́dɔ gɛ́ mo bienene: bakɔ́dɔ bá mba lɛ́ bá mo baŋa, bɛ́ ɛ́ ɛ́da bá bégide gɛsasɔ naá ndoŋá ya Beyúdene. 28Yésusu go bó bábondona a amɔ́: «Bakɔ́dɔ bá Yolósalɛmɛ, no do baŋáa gámɛ; kanɛ́ baŋáa nɔnɔ go busío bɛ́nyɔ́ moatɛ́ na gá baaná bɛ́nyɔ́, 29goakɛ́ medúgú má úlene máama bá ŋgaá oyáa bá amɔ́: “Besé na bɛhóádá bá bakɔ́dɔ, besé na bakɔ́dɔ báaba bá mbaá lɔbɛ́nɔ́ kanɛ go bíene, kanɛ go yúuŋenye.” 30Gɔ́ɔ batɔ bá ŋgɛɛ́ ɛ́dá go gálagala ɛgɔndɔ bá amɔ́: “Có obɛ́náamɔ́ nɔnɔ!” go bɛɛnɛ bá amɔ́: “Có ɔsɛ́gɔ́ɔmɔ́ nɔnɔ#23.30 O bana Osée 10.8.!” 31Mammana, bá amɔ́ bá ŋa náana go boɛ́tɛ bogɔ́sɔ, bó ŋgaá bɛ́ɛ́mbá nɛɛ́nɛ go boɛ́tɛ bugúe o?»
32Gɛcamɛna gímmue eé gímmue, bá mbɛ ɛ́dá na bahándá báandɛ́ go go ɛ́da bó óna olɔŋɔ na Yésusu. 33Aŋa bá mbɛɛ́ ɛ́dá bola naá hoóma bá dɔ́ŋɔnɔmɔ́ bá amɔ́ «Giŋóŋkólóŋó gá odóɛ», bisimbi go gilene Yésusu hɔ́ɔ naá kolósi na bahándá báandɛ́#23.33 O bana, go eninye na Iseyíi 53.12. gɛcamɛna gímmue eé gímmue, onyɔ moánɛ naá yɛhɛ́ kolósi; mɔ́ɔnyɔ naá boayá bá ombɔ́gɔ onɔ́mɛ, mɔ́ɔnyɔ naá boayá bá ombɔ́gɔ odádɛ́. 34Gɔ́ɔ Yésusu a gálɛdamɔ́ a amɔ́: «Baaba, bó hééhínyéemú, mammana, bá dɛ íyíménée boóma bɔ́ɔbɔ bá ŋananamɔ́.» Bisimbi go nɔɔ bɛla bɛ́hɛ́ go adɔ go go bɛ́ abɛdana#23.34 Go ɛ́na Ɛsagɔ 22.19.. 35Boɛ́nɔ bó mba lɛ́ hɔ́ɔ tɛ́nɛ́ɛ bó núune. Naá boayá bá mefuŋe má Beyúdene, má mba lɛ́ hɔ́ɔ má kɛ́nya#23.35 Go ɛ́na Ɛsagɔ 22.8-9. má amɔ́: «A mba sódónyóo bóncodío; ŋgáa a bósódio mɔ́ɔ moatɛ́ aáŋa a lɛ́ Mesíi ba Asaŋa, Giiyide.» 36Bisimbi tɔ́nɔ bɛ́ mba lɛ́ bɛ́ mo hɔnɔ; bɛ́ báá mo báyɛkɛ́ná go go mo dóŋio gɛtóánɔ́ɔ gá mɔgɛ́bɔ#23.36 Go ɛ́na Ɛsagɔ 69.22., 37bɛ́ gálagala bɛ́ amɔ́: «Aáŋa o lɛ́ ufuŋe yá Beyúdene, bósódíomú maamɔ́ɔ moatɛ́.» 38Bá bɔ́ɔ́ ɔ́ŋɔ́ naá gɛgɔ́gɔ́ náana: «Mɔ́ɔnyɔ a lɔ́mɔ́ ufuŋe yá Beyúdene», bá báá gɛ́ gilénée naá odóɛ yá kolósi.
39Ohándá ummue gilénéelú naá kolósi, a mo sɛga a amɔ́: «Ábɔ, o do báá Mesíi, bósódíomú maamɔ́ɔ moatɛ́, o có sódio bɛɛcɔ́ɔ tɔ́nɔ.» 40Kanɛ́ ohándá mɔ́ɔnyɔ untió go áncɛdɛna sɔ́gɔ́ɔ mɔ́ɔnyɔ a amɔ́: «O do hálámánánáa Asaŋa o? Maamɔ́ɔ o bɛananamɔ́ noséésényée númmue eé númmue. 41Go busío bɛ́cɔ́ bó lɛ́ tɛ́nɛ́ɛ, goakɛ́ meŋiigíe mɛ́cɔ́ má háanana na noséésényée nɔ́ɔnɔ dɛ dáŋabamɔ́ nɔ́ɔnɔ; kanɛ́ mɔ́ɔnyɔ a lɛ́ kanɛ go ŋa gɛbɛ́ gá boóma.» 42Gɛ́hɛ́ go gɔnɔ go oyɛda a amɔ́: «Yésusu, mbééníŋínyéemú aŋa o ŋgaá ncó gunde naá bufuŋe báhɔ.» 43Yésusu go mo gundie a amɔ́: «Mammana, ŋgaá go oyana caá, ínoni yɛ́ɛyɛ, o gaá bɛ́ɛ́mbá namɛ naá Peledísi#23.43 Peledísi : hoóma há bɛaŋgana olɔŋɔ na Asaŋa go báaba bá bɛamɔ́ gisódio naá nnyimé ya nigúe nábɔ́..»
Yésusu a á gúé naá kolósi
(Mot 27.45-56; Mél 15.33-41)
44Bó mba lɛ́ boóma bá tólóbóo, mbíno go dómba go oba naá gɛdɔŋɔ giimée, gó bɛ́ɛ́ ɛ́dá húme bigúlí bɛ́dadɔ́. 45Buisí go dómba go fúe. Sanda ya goodo yɛ́ɛyɛ ɛ mbaá lɔmɔ́ ɛ sala Nnyaŋá ya Asaŋa go cómba ɛ́handɛ́#23.45 Go ɛ́na Gihúmie 26.31-33. go salɛga go biseli bɛ́andɛ́ go tɛ́mádɛ́má. 46Gɔ́ɔ Yésusu a áncɛdamɔ́ ukelú ogɔ́nɔ́, go gálɛda a amɔ́: «Baaba, ŋgaá gundíe giliíli gámɛ naá ɛmbɔ́gɔ yahɔ#23.46 Ɛsagɔ 31.6..» Aŋa a mbaá gálɛ́dá nɔ́ɔnɔ, gɛ́hɛ́ go obɛnɛna. 47Ogɔ́nɔ́ɔ ba bisimbi ɛ ɛ́nana boóma bɔ́ɔbɔ bó mbaá bádómbánáa, gɛ́hɛ́ go ɛ́da go gúmenye Asaŋa a amɔ́: «Mammana, mɔtɔ mɔ́ɔnyɔ a mba lɛ́ mɔtɔ ba bɛtɛ́nɛ́ɛ.» 48Batɔ báaba bá mbaá bábándáa go go lɛ́ɛma boóma buimée bɔ́ɔbɔ bó mbaá bádómbánáa, go gundene naá nnyaŋá sábɔ́, bɛ́ ɛ́dá bá bégide ɛmbɔ́gɔ go gɛsasɔ na mogódí. 49Begúle bɛ́hɛ́ biimée, na bakɔ́dɔ báaba bá mbaá lɔmɔ́ bá mo bienene gó bayɛga naá Gelilée, bá mba lɛ́ tɛ́nɛ́ɛ gɛyábá#23.49 O bana go eninye na Ɛsagɔ 38.12., go go núune bɔ́ɔbɔ bó mbaá lɛ bó bádómbana.
Bá á miée Yésusu
(Mot 27.57-61; Mél 15.42-47)
50Gɔ́ɔ mɔtɔ ummue ba Nɛgála nɛgɔ́nɔ́, ufíno yɛ́hɛ́ Yósɛbɛ, u úlemú a báá bolá. A mba lɛ́ mɔtɔ ba odɛ́má, mɔ́ɔ gɔnɔ́ gɛtɛ́nɛ́ɛ. 51A dɛ mbáa lɛ ukelú nabɔ́ go go sómba gáábɔ́ gá gɛsɛnɛ na meŋiigíe mábɔ́ kɛ́. A mba lɛ́ mbíényée ya Alɛmatɛ́ɛ, tɛ́sɔnɔ mmue ya Yudée#23.51 Go ɛ́na Mot 27.57 na gibélincígínyé gɛ́ɛgɛ hɔ́ɔ., a mba lɛ́ a gɛ́gana Bufuŋe bá Asaŋa. 52Mɔtɔ mɔ́ɔnyɔ go ɛ́da naá Pɛlátɛ go go mo úhune gigúe gá Yésusu. 53Yósɛbɛ go úlie kanɛ́ gigúe gá Yésusu naá kolósi, a báá gɛ́ máŋánáa naá nnɔ́mbɔ́ ya gɛla, a báa lɛ gó ɛ́da gɛ́ bídiginye naá gɛbɛ́lá gɛ́ɛgɛ bá mbaá dímé naá gɛdánɛ́dánɛ́, anáa bá mbaá ŋá bá gá lɛ́ bá dɛ miée mɔtɔ kɔ́ɔ. 54Gó mba lɛ́ gobélie gá sábadɛ, buisí bá go bégedegedie. 55Bakɔ́dɔ báaba bá mbaá lɛ olɔŋɔ na Yésusu gó bayɛga naá Gelilée, go ɛ́da go bienene Yósɛbɛ. Gáábɔ́ go núune gɛbɛ́lá, bá bɛ́ɛ́ ɛ́ná aŋa bá mbaá bídígínyée gigúe gɛ́hɛ́. 56Gáábɔ́ go gunde naá tɛ́sɔnɔ, go gedegedie megúdé má go fofa má goŋaá bá gɛɛ́ ɛ́dá fúenene gigúe#23.56 megúdé má go fofa : go ɛ́na naá Mél 14.8 na gibélincígínyé gɛ́ɛgɛ hɔ́ɔ..
Buisí bá sábadɛ, bá báá dúúgídé aŋa gicele gɛ́ mbaá lɔ́mɔ́ gɛ́ oya#23.56 aŋa gicele gɛ́ mbaá lɔ́mɔ́ gɛ́ oya go ɛ́na naá kálata ya Gihúmie 20.10; Bicele 5.14..
Aktualisht i përzgjedhur:
Lókasɛ 23: YAS
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr