मत्ती 28
28
यीशुन जीव उठणो
(मरकुस 16:1-10; लुका 24:1-12; योहान 20:1-10)
1विहेवणेन दिह्यान पासाण एप्तान पेल्ले दिह, उजालो एतास, मरीयम मगदलीनी एने दिहरी मरीयम माहणाह देखणे आवी। 2एने उचकाहुच मुठलो बुकम्प ईनो, काहाकाय मालीकान एक दुत हेरगा माय रेन उतऱ्यो, एने माहणान आहने आवीन ता देगड़ाह सिटो केर दिनो, एने ता पोर बोह गीयो। 3तान वेह विजलीन गेत, एने तान फाड़का बोरफान गेत, दोवल्या एता। 4ताह बिन राखवाल्या काप उठना, एने बेसुद एय गीया।
5हेरोगदुत बायकुह केयो, “बिहो मा, माहु मालुम हे तुमू खुरूसखाम पोर चेड़ायेल ता यीशुह होदत्युह। 6तो न्या नाह सुतो,” पुण तो वचन कियेल तिहे, “जीव उठेल हे,” आवो ज्यो जागो दिखो, जा मालीकान देड़ एतो, 7पुण तुमू जावो, तान चेलाह किवो काय तो मुरेल माय रेन जीव उठेल हे, एने तुमूह रेन पेल गेलील माय जाथे, एने ताह ता दिखहो, मी तुमूह केय दिनो।
8त्यु बिय माय एने मोटली खुसी माय माहणान जागे रेन तुलेचबूखे वोलीन तान चेलाह खुबेर देणेन केरता दोवड़ीन जात रेन्यु।
9तेवी यीशु त्युह मिलानो, एने केयो, “तुमूह हुक जुड़ी,” त्यु आहने आव्यु एने यीशुन पाया पोड्यु। 10तेवी यीशु त्युह केयो, “बिहो मा,” मारा बायह्याख जाईन किवो, “काय गेलील माय जात रेय, ता माहु देखती।”
राखवाल्यान खुबेर
11ता जाणेस बाजरियेल एता, एने राखवाल्या माय रेन थोड़ाक जाणे गावा माय आवीन आखी वात मुखी चाकऱ्याह केय होमलाया। 12तेवी ता डायला हेऱ्या एकठा एन होमच्यो केऱ्या, एने सिपायड़ाह मोकतीस चांदी आपीन केया, 13“ज्य किज्यो काय जेवी राती आमु हुव जायेल एता, तेवी तान चेला आवीन ताह चोरीन लेन जात रियेल। 14एने केदी ज्यी वात पिलातुसान काना माय वोर पोचनी, ते आमु ताह सोमजाड़ लेहु, एने तुमूह वोचाड़ लेहु।”
15ता पोयशा देरीन जीहे कियेल एता, तिहेच केऱ्या ज्यी वात आज वोर यहुद्यान माणहे केरतेह।
यीशु देखाणे एने आखरी उकुम
(मरकुस 16:14-18; लुका 24:36-49; योहान 20:19-23; प्रेरितान काम 1:6-8)
16 #
मत्ती 26:32; मरकुस 14:28 आकरा चेला गेलील ने ता बोयड़ा पोर गीया, जा यीशु ताह कियेल इतो। 17चेला यीशुह देखीन नमस्कार केऱ्या, पुण थोड़ाक जाणे बुल माय एता।#लुका 24:36-49 18यीशु तान आहने आवीन केयो, “हेरोग एने देरतीन सोब आदिकार माहु होपायेल हे। 19#प्रेरितान काम 1:8तानकेरता तुमू जावो, आखी जातीन माणहाह चेला बाणावो, एने ताह आबाख, एने बेटाख ने, चोखाला जीवान नावा माय बपतीस्मा आपु, 20एने ताह सोब वातु जो मी तुमूह उकुम आपेल हे माणनेन हिकाड़ो; मी देरतीन आखरी वार वोर जेलेमक्योस तुमू हिऱ्यो हे।”
Aktualisht i përzgjedhur:
मत्ती 28: Nii2025
Thekso
Ndaje
Krahaso
Kopjo
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
The Nahali Bible © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2025