MATIUS 8
8
Yesus, jipic cowok ajaworomtewef
(Mrk. 1:40-45; Luk. 5:12-16)
1Barewen. Yesus e sikon op ewneyefen. Ow arkenakut masirin, aramat ipic fa asep ajukusirienawfesen. 2Penyakit kusta ipic cowokam aenawefen. Ar aramat ipic bipu jine onok aneyotapefen. “Tuan. Or faknakut ara. Or akat aporcem, or dam akat do batetam araman.” Inim aeefen. 3Yesus masirin, ban ajoromef, wunam e ipic dam ton atatiwefen. “Dor inimas akat ara. Or dam akat ememey.” Inim aeefen. Yesus inim atakam atawef cowok masirin, e penyakit kusta, e ipic bakan asarimjiosefen. Aram dam akat aememefen. 4Yesus masirin, “Or aras atakam wun ow botaw arapok. O nat, e Allah atakam mamtaw tugas ipic akan mamakosey. Aramat ipic or baoworporcan. Or, e Musa jirmec ajirimef pok, Allah tetamey. Eras or dam akat aememamem, inim baporomtamas ara.” Inim aeefen.
Yesus tentara kerja bwemtam ipic ajaworomtewef
(Luk. 7:1-10)
5Yesus kota Kapernaum afiwefen. Afiwef masirin, tentara komandan ipic aramat ipic aenawomefen. Aram janim fak aanimefen. 6“Tuan. E dokerja bwemtam ipic cem awames. Ar japow ara. Aram aamesjurusma.” Inim aeefen. 7Yesus masirin, “Bare, dor e ipic baworomtam aenawcimin,” inim aeefen. 8E tentara komandan ipic nat, “Dor or awcawor opok. Inimas or e docem bwemfiw asan opok. O nat, atakamin atawey. E dokerja bwemtam ipic masirin, ajaworsitcema. 9Doram ow jirmec ji aemin, wunam dor e dotentara ow jirmec ajirimamin. Dor wun tentara ipic. ‘Baysosey,’ inim aecey, aramat ipic ajisoscema. Dor wun ipic, ‘Bwenawey,’ inim aecey, aramat ipicam aenawcema. Doram e dokerja bwemtam ipic, ‘Inim pok pwemey,’ inim aecey, bare aramat ipic inim pok aemcema.” Inim aeefen. 10Yesus e aramat ipic atakam jen ajief ara, aram junum aeefen. Aram atakam e fa asep asoromfes ow aotawefen. “Atakamnak ara, awamec ipic Allah basicim fak ipic ara. Dor e Israel ow aman, awamec ipic awcawor ow bi bapor opokut. 11Ca nat, jakaperey. Ow arke, e capinmiin capinmiin ewinawcemes. Ar e Abrahamam, e Ishakam, e Yakubam, e Onam Op Pemerintah Asan, amos akac aancemes. 12E asan bafiwap ji ow, bare Yahudi ow ara. E nat, Allah, Yahudi ow arke, e jiwicnakut asan ajiwosomcema. Erasan ara, ow bwec awutut abweccemes. Aram dam jen ajicemes.” Yesus inim aeefen. 13Ar masirin atakam e komandan ipic aotawefen. “Or bare. Cema. Dor e jirey aememas jipu aemamin.” Inim aeefen. Bare, e kerja bwemtam ipic asarimjaworemefen.
Yesus dam ow arke ajaworomtawef
(Mrk. 1:29-34; Luk. 4:38-41)
14Barewen. Yesus, Petrus cem afiwemefen. Afiwemef masirin, ar Petrus anapwec dam aemamesef aporefen. 15Ar e cowoc ban aomopefen. E cowoc masirin, ajufamapefen. E cowocam asitef, wunam amos pok e aramat ipic atetamefen.
16Porow ara masirin, ow, dat ajak aman ow arke aramat ipicpu atowotnawfesen. Aramat ipic jirmecin e dat ajirima aeefen. Inimas ar e dat ow jak aman aotewerisima aeefen. E dat masirin, ajisosa aefesen. Aramat ipicam e dam ow takas ajaworomtewa aeefen. 17Ametnak ara, Allah atakam botaw ipic juwas Yesaya, atakam aotawefen. “E aramat ipic e dadam kumitas ajisomoscema. Aram e dadamas ajiwosomcema.” Inim aeefen. E Yesus aemefas, bare e Yesaya atakam jipuas ara.
Wun ow Yesus mamkawi akaten
(Luk. 9:57-62)
18Barewen. Yesus ow arke fumi abwiciremfes aporefen. Ar masirin, e amamkawi ow e poman bajir jirmec ajirimefen. 19Allah Jirmec mamememtam ipic cowokam, aramat ipic aenawomefen. Aram atakam Yesus aotawefen. “Guru. E asanin asanin jisoscem, doram or ajamkawijarawarcimin araman.” Inim aeefen. 20Yesus masirin, atakam e ipic aotawefen “E wasan juwur, co epcom. E sokam co epcom. E Asmat Anakat Ajaworemef Ipic nat, memames cem opok.” Inim aeefen. 21E awun mamkawi ipicam atakam aramat ipic aotawefen. “Tuhan. Dor e doricipic se batakamwuapom.” Inim aeefen. 22Yesus nat, atakam e ipic aotawefen. “Mamkawican. E damir ow, e wun damir ow se arma bawuapomces.” Inim aeefen.
Foam, bwiam, Yesus atakam ji aefes
(Mrk. 4:35-41; Luk. 8:22-25)
23Yesusam ci asawuefen. E amamkawi owam e ci akac asawufesen. 24E jicupum aemsefes, bare jon awutut awumenamefen. Waam awutnakut e ci aman ajawumefen. Aramat ipic nat, isi aemamesefen. 25E mamkawi ow masirin, aramat ipic ameromfes, wunam ajitimfesen. “Tuhan. Ajortewcarowey. Dar bwi damir aafcomom openow.” Inim aefesen. 26Aramat ipic masirin, atakam e ow aotawefen. “Ca nat, ucim omaram? Car do basicim awut opoknakap ow ara.” Inim aeefen. Aramat ipic masirin, asitefen. Ar jirmec e foam, e bwiam, ajirimefen. Bare, e bwiam orom aoemseefen. 27E ow masirin, junum aefesen. “A ucim jipicam? E foam, e bwiam, aratakam ji aemes.” Inim aefesen.
Yesus, dat arke aotewerisimef
(Mrk. 5:1-20; Luk. 8:26-39)
28Barewen. Yesus poman ajirefen. Ar e Gadara ow capinmi ajirtayefen. Jipic jamnukam e awerem asan ewenawfes, wunam aramat ipic bi jamnuk aemamtewfesen. Dat arke, e ipic jamnuk jak aman aemapawirisen. Inimas e ipic jamnuk jokmennakut arawen. Owam erasan bokotpu bwemokorfe asan opoken. 29E ipic jamnukam atakam awut atawfesen. “Or Allah atiw ara. E nat, or ucim pok emcarowem? Allah e dabajurusum jofay, atakam emesakamtiwef. O nat, dar bap bajurusum arapen?” Inim aefesen. 30Erasanam dawon opok inim, o cesa arke bar aemmarfesen. 31E datam janim fak Yesus aanimfesen. “Or dar a ipic jamnuk jak aman aotewerisimcarowemnew, dar e o dam aman bawarimfiwtotor, jirmec ajirimcarowey.” Inim aefesen. 32Aramat ipic masirin, atakam e dat aotawefen. “Bare, baysosey.” Inim aeefen. E dat masirin, e ipic jamnuk jak aman awarimisfes, wunam e o dam aman awarimfiwtotorfesen. E o arke takas masirin, e emtow inim sikon fop akukusayneyfesen. Aram bwi akan aakpua inim aefesen. Aram bwi damir aaffesen. 33E o cesa manmok batiw ow masirin, omar ajisosfesen. Aram e kota ajisosfesen. Aram erasan e aporfesas takas, atakam aotawfesen. Aram e jak aman dat ow aemfesasam atakam aotawfesen. 34E kota ow takasam, Yesus bi jamnuk bwemamtew ajisfesen. Ar Yesus bi aporfes masirin, ar aramat ipic e acapinmi bakan bajios, janim fak aanimfesen.
Aktualisht i përzgjedhur:
MATIUS 8: LAICNS
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr