Urtia 1
1
Vlera e drejtësisë
1Dashuroni drejtësinë, ju që gjykoni dheun,
mendoni për Zotin me mirësi,
kërkojeni me zemër të thjeshtë.
2E gjejnë ata që nuk e vënë në provë,
u shfaqet atyre që nuk janë mosbesues ndaj tij.
3Mendimet e shtrembëra na ndajnë prej Perëndisë,
sprovimi i fuqisë së tij i ndëshkon të pamendët.
4Urtia nuk hyn në shpirtin keqbërës,
as banon në trupin e lidhur nga mëkati.
5Shpirti i shenjtë i mësimit i ikën mashtrimit,
u shmanget mendimeve të të pamendëve,
largohet kur ia beh padrejtësia.
6Urtia është shpirt njeridashës,
s'e shfajëson kë fyen me buzë,
se Perëndia është dëshmitar i veshkave të tij,
shqyrtues i vërtetë i zemrës,
ai dëgjon ç'i thotë gjuha.
7Fryma e Zotit mbush botën,
përmbajtësi i të gjithave ua njeh tingullin.
8Kush flet padrejtësisht nuk përvidhet dot,
s'i shpëton ndëshkimit të gjyqit.
9Mendimet e të pabesit hetohen,
fjalët e tij i dëgjon Zoti,
paudhësitë e tij ndëshkohen.
10Veshi i mprehtë dëgjon gjithçka,
as pëshpërimat nuk i shpëtojnë.
11Ruhu nga pëshpërimat e padobishme,
mbaje gjuhën nga shpifjet,
se asnjë fjalë e fshehur s'del huq,
goja gënjeshtare shkatërron shpirtin.
12Mos joshni vdekjen me gabimet e jetës,
mos u rrënoni nga veprat e duarve tuaja,
13se Perëndia nuk e krijoi vdekjen,
as gëzohet me shkatërrimin e të gjallëve.
14Të gjitha i krijoi që të jetojnë,
breznitë e botës mbartin shpëtimin
e nuk kanë helmin e shkatërrimit,
mbretëria e skëterrës s'mbretëron mbi dhe,
15se drejtësia është e pavdekshme.
16Por të pabesët e ftojnë vdekjen me vepra e fjalë,
e bëjnë mikeshë e shkrihen për të,
lidhin besën me të,
se u takon hisja e saj.
Aktualisht i përzgjedhur:
Urtia 1: AL1
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© Shoqëria Biblike Ndërkonfesionale e Shqipërisë 2020
© Interconfessional Bible Society of Albania 2020