Luk 23
23
Jesû gwikua kîrî Pilatû
(Mat 27.1-2,11-14; Mar 15.1-5; Joh 18.28-38)
1Rîu antû bau bonthe baraikia Jesû kîrî Pilatû. 2Baraambîrîria kûmûthitanga bakiugaga, “Nî tûrethîre muntû ûûjû akîremagia antû ba mûgongo jweetû, na agîkanagia antû kûritîra Kaisarî ûgoti, na agiciîtaga Kristû, mûnene.” 3Pilatû aramûûria, “Gwe nîgwe mûnene wa Ayahudi?” Jesû aramûcokeria, “Nîgwe ûkuuga u.” 4Pilatû areera athînjîri-Mûrungu barîa anene amwe na ntundu atîrî, “Gûtî ûthûûku nkwona muntû ûûjû athithîtie.” 5Îndî bo baraciûmia kûmwîra, “Ûritani bwaawe nî bûtûmîte antû barega kwathîka Galili yonthe. Aambîrîrie Galili na rîu akwîja mwanka gûkû.”
Jesû gwikua kîrî Herode
6Rîrîa Pilatû aigîrue ûu, nî oorîrie këethîra muntû ûû aarî wa kuuma Galili. 7Rîrîa aigîrue atî nî wa kuuma Galili, kûrîa Herode aathaga, arauga aikue kîrî Herode, ûrîa waarî Jerusalemu îgiiteene rîu. 8Rîrîa Herode oonere Jesû, nî aagwîrîrue mono nîkwîthîrwa nî airîragîria kûmwona mono. Nî aarî akwigua mantû jegiî Jesû na nî eerîgagîîra kwona akîringa kîama noo kîmwe. 9Tontû bûû, Herode arooria Jesû biûria bibingî îgiita rîrîraaja, îndî Jesû ataacokia kîûria kinya kîmwe. 10Athînjîri-Mûrungu barîa anene na aritani ba Waatho barairita kwîra Herode mantû jamathûûku mono jegiî Jesû. 11Herode na asikarî baawe baramûcikûûra na baramûmeneeria. Rîu Herode aramwîkîra nguû înthongi ya ûnene na arauga aikue kîrî Pilatû. 12Herode na Pilatû baatwîre barî anthû îndî kuuma ntukû îîu baratuma ûcoore.
Jesû gûtuîrwa kûûragwa
(Mat 27.15-26; Mar 15.6-15; Joh 18.39—19.16)
13Pilatû nî eetîre athînjîri-Mûrungu barîa anene na athani na antû 14na arabeera, “Bûraretere muntû ûûjû bûkiugaga atî nî atûmîte antû barega kwathîka, na ndîgûcûnkûûna bwega gûtî ûntû kinya bûmwe bwa bûrîa bûramûthitangîrîte ndîramûgwata nabu. 15Kinya Herode, gûtî maatia aramûgwatîre najo, nîkîo gîtumîte amûcokia kîrî tuî. Gûtî ûntû athithîtie bûûmba gûtûma ooragwa. 16Tontû bûû, ndiuga aûûrwe ibooko rîu arekeerue.”
[ 17O îgiita rîa kîatho kîa Pasaka, Pilatû nî aathaûraga muntû ûrîa antû baaugaga bathaûrîrwe.]#23.17 Maandîko jamwe jatî na gîchunchî gîkî.
18Kîrîndî kîonthe nî kîaringîre gîtuma gîkiugaga, “Nî oragwe! Tûthaûrîre Baraba!” 19Baraba aingîri ncheera nîûntû bwa gûtûma antû ba ntûûra barega kwathîka na nîûntû bwa kûûraga muntû. 20Pilatû nî eerencere antû kaîrî akîendaga kûrekeeria Jesû. 21Îndî bararinga gîtuma bakiugaga, “Mwambithie! Mwambithie!” 22Pilatû nî oorîrie antû rîa jathatû atîrî, “Nî maatia jarîkû muntû ûûjû athithîtie? Ntîkwona arî na maatia joomba gûtûma ooragwa. Tontû bûû, ndiuga aûûrwe ibooko rîu arekeerue.” 23Îndî bararinga gîtuma mono bakiugaga no mwanka aambwe. Tontû bûû, Pilatû arabaathîkîra na 24aragiita îgamba kûthithue ûrîa beendaga. 25Arathaûra muntû ûu baugîre bathaûrîrwe, ûrîa waingîri nîûntû bwa gûtûma antû barega kwathîka na nîûntû bwa kûûraga muntû. Îndî aranenkanîra Jesû kîrî bo beeta kûmûthithîria ûrîa bakenda.
Jesû kwambwa mûtharabeene
(Mat 27.32-44; Mar 15.21-32; Joh 19.17-27)
26Rîrîa beetîte kûmwamba, nî baatirimanîre na Simioni wa kuuma Kurene aumîte muundeene na baramûgwata baramûkamatithia mûtharaba arî nyuma ya Jesû. 27Antû babaingî barathingata Jesû. Bamwe baarî aka barîa baithikîrîte bakîrîraga nîûntû bwaawe. 28Jesû araciûgûra na arabeera, “Eekûrû ba Jerusalemu, bûkárîra nîûntû bwaakwa, îndî rîreeni nîûntû bweenu na bwa aana beenu. 29Nîkwîthîrwa îgiita nî rîîjîte rîrîa antû bakaugaga, ‘Kîtharimo nî kîrî aka barîa nthata na barîa batoonkia mwana!’ 30#Hos 10.8; Kûg 6.16 Rîu bakaambîria kwîra irîma, ‘Tûkuûkîreeni,’
na beere tûrîma, ‘Tûriindeni.’
31Tontû këethîra nî bakûthangîkia muntû ûmwagîru ûjû rî, bakathangîkia antû barîa batî babaagîru atîa?”
32Nî kwaarî atuunyani baîrî beetîte kûûragwa amwe na Jesû. 33Rîrîa baakinyîre antû arîa eetagwa Gûntû kwa mûrûitû jwa kîongo, barabaamba o. Ûmwe rûteere rwaawe rwa ûrîo rwa Jesû na ûngî rûteere rwa ûmotho.
34 #
Zab 22.18
Jesû arauga, “Baaba, barekere, nîûntû batîkûmenya ûrîa bakûthithia.” Rîu bararinga kuura nîkenda boona barîa bakagaana nguû ciaawe. 35#Zab 22.7 Antû nî baarûngi akuî bategeete ûrîa gwakarîkaga rîrîa atongeeria ba Ayahudi bamûthekagîra bakiugaga, “Nî aroonokagia bangî, rîu nî acionokie këethîra nîwe Kristû, ûrîa Mûrungu athuurîte.” 36#Zab 69.21 Kinya asikarî bareeta kûmûcikûûra, na baramûnenkera ndibei îrî na nchechû anyua, bakiugaga, 37“Këethîra gwe nîgwe mûnene wa Ayahudi, cionokie.” 38Îgûrû rîa kîongo kîaawe nî kwaandîki nteto iji: ÛÛJÛ NÎWE MÛNENE WA AYAHUDI.
39Ûmwe wa atuunyani barîa baambanîrue nawe aramûruma akiugaga, “Anga gwe tîgwe Kristû? Cionokie na ûtwonokie kinya tuî!” 40Îndî ûu ûngî aramûgondokera akiugaga, “Ka ûtîgûkîra Mûrungu? Gwe waatuîrîrwe îgamba o ta ûrîa aatuîrîrwe. 41Tuî nî tûbuîrîte gûkanûkua nîûntû bwa mantû jamaaî jarîa tûthithîtie. Îndî muntû ûûjû gûtî ûthûûku athithîtie.” 42Rîu areera Jesû, “Ûndirikane, rîrîa ûgakinya ûneneene bwaaku.” 43Jesû aramwîra, “Ka ngûkwîra na mma atî naarua ûkeethîrwa ûrî amwe naani îgûrû kwa Baaba.”
Gûkua kwa Jesû
(Mat 27.45-56; Mar 15.33-41; Joh 19.28-30)
44Thaa thita igûkinya, riûa nî rîatigîre kwara na kûragea muundu nthîgûrû yonthe mwanka thaa kenda. 45#Kum 26.31-33 Gîtambaa kîrîa kîagitanîtie kîûrû kîratambûkîra gatîgatî biraa biîrî. 46#Zab 31.5 Jesû arakaya na kajû gakanene arauga, “Baaba, nkûnenkanîra mwoyo jwaakwa kîrî gwe!” Akûthiria kuuga ûu, arakua. 47Mûnene wa asikarî akwona ûrîa gwakarîkîre, nî aakumîrie Mûrungu akiugaga, “Gûtî nkaanja muntû ûûjû araarî muntû ûmwagîru!” 48Antû bonthe barîa boothûranîte au bakwona ûrîa gwakarîkîre, baraana bakîringaringaga ibara biaao baithikîrîte. 49#Luk 8.2-3 Eekûrû barîa baathingatîte Jesû kuuma Galili na antû bonthe barîa baamwijî, nî baarûngi gataaria bategeete ûrîa gûkûthithîka.
Kûthikwa kwa Jesû
(Mat 27.57-61; Mar 15.42-47; Joh 19.38-42)
50Nî kwaarî na muntû weetagwa Josefu wa kuuma ntûûreene îmwe ya Ayahudi yeetagwa Arimathea. Josefu aarî muntû ûmwagîru na aarî ûmwe wa kîama kîa atongeeria ba Ayahudi. 51Kinya këethîra aarî ûmwe wa kîama kîa atongeeria ba Ayahudi, ataagwatanîîre na ûrîa kîama kîu gîatuîre bwegiî Jesû. We nî eeteerete rîrîa Ûnene bwa Mûrungu bûkeeja. 52Josefu nî eetîre kîrî Pilatû aramûromba rûûtha rwa kûthika mwîrî jwa Jesû. 53Rîu arajûkia mwîrî jûu na arajûkûnja na chuka înjerû, na arajwîka kaburiine keenji iigeene. Gûtî muntû waarî akûthikwa kaburiine kau. 54Îîu yaarî ntukû ya kwithuranîra nîûntû rûûnene kwaarî sabatû. 55Eekûrû barîa beejanîtie na Jesû kuuma Galili barathingata Josefu mwanka baratiga boona kaburi karîa eekîre mwîrî jwa Jesû. 56#Kum 20.10; Kûr 5.14 Rîu baraana kûthuranîra maguta na marashi ja gwaka mwîrî jwaawe. Nî baanogokere ntukû ya sabatû o ta ûrîa Waatho bwaugaga.
Aktualisht i përzgjedhur:
Luk 23: KIMERUBIBLE
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
KIMERU BIBLE WITH DC
©Bible Society of Kenya, 2009, 218